Сәрһати 80

Щьмәʹта Хԝәде Жь Бабилоне Дәрдькʹәвә

ПАШИ зәфт кьрьна Бабилоне ԝәкә дӧ сал дәрбаз бу, у бьньһерʹә ньһа чь дьԛәԝьмә! Бәле, щьмәʹта Исраел жь Бабилоне дәрдькʹәвә. Ле гәло чаԝа әԝана аза бун? Кʹи һишт кӧ әԝана дәркʹәвьн?

Пʹадше фарьсийа Корәш һишт ԝана. Гәлә сал пешийа буйина Корәш, Йаһоԝа бь пʹехәмбәре хԝә Ишайа дәрһәԛа Корәш гьлийе ӧса ньвиси бу: «Әз ча дьхԝазьм тӧ һәма ӧса жи бьки. Дәре шәһәр ԝе вәкьри бьминьн, сәва кӧ тӧ шәһәр зәфт ки». Һәма ӧса жи ԛәԝьми, Бабилон бь сәркʹартийа Корәш һатә зәфт кьрьне. Гава әскәред Мәдийа у Фарьса шәве незики шәһәр бун, дәре шәһәр вәкьри бу.

Пʹехәмбәре Хԝәде Ишайа ӧса жи готьбу ԝәки Корәш ԝе фәрмане бьдә, сәва кӧ Оршәлим у пʹарьстгәһе тʹәзәда ава кьн. Ле гәло Корәш бь рʹастийе фәрмана ӧса да, йан на? Бәле, әԝи һәма ӧса жи кьр. Аһан Корәш чь готә исраелийа: «Вәгәрʹьн Оршәлиме у пʹарьстгәһа Хԝәдайе хԝә Йаһоԝа тʹәзәда ава кьн». Ләма жи щьмәʹта Исраел жь Бабилоне дәрдькʹәвә.

Ле гәләк жь исраелийа нькарьн жь Бабилоне дәркʹәвьн у һәрʹьнә Оршәлиме. Чьмки әв рʹекә пʹьрʹ дьреж бу, ԝәкә 800 километьрʹ, у ниве зәʹф жь исраелийа сәва рʹекʹәтьне ида кал-пир бун у нәхԝәш бун. Ӧса жи мәʹнийе дьн жи һәбун, сәва чь гәләка нькарьбун жь Бабилоне дәркʹәтана. Ле Корәш готә ԝан мәрийа йе кӧ дьман: «Зерʹ-зиве хԝә у пʹешкʹешед дьне бьдьнә ԝан мәрийа, йе кӧ вәдьгәрʹьн кӧ Оршәлим у пʹарьстгәһе ава кьн».

Ләма жи исраелийед кӧ рʹе кʹәтьн гәлә пʹешкʹеш тʹәви хԝә һьлдан. Корәш ӧса жи кʹасед кӧ Нәбукәднәсәр жь пʹарьстгәһа Йаһоԝа һьлдабу, да ԝан. Бь ве йәке щьмәʹте гәлә тьшт хԝәрʹа бьрьн.

Чар мәһ дәрбаз бун у Йаһоԝа ча соз дабу, исраели һәма ԝе ԝәʹде һатьн Oршәлиме. Паши һьлшандьна Оршәлиме рʹасти жи 70 сал дәрбаз бу. Ньһа исраели вәгәрʹийан ԝәлате хԝәйә һʹәлал. Паше әме пебьһʹәсьн, ль ԝьр чаԝа гәлә чәтьнайи һатьн пешийа ԝан.

Ишайа 44:28; 45:1-4; Әзра 1:1-11.