Сәрһати 82
Мордок’ай У Әстәр
ԜӘРЕН ньһа пебьһʹәсьн чь дьԛәԝьми Фарьстане, пешийа һатьна Әзра ль Оршәлиме. Мордокʹай у Әстәр исраелийед гәлә навдар ьн дь Фарьстанеда. Әстәр жьна пʹадша йә, ле кӧрʹапе ԝе Мордокʹай ԝәзире пешьн ә дь Фарьстанеда. Ле кʹа әм пебьһʹәсьн ча әв йәк ԛәԝьми.
Чахе Әстәр һе бьчʹук бу де-баве ԝе мьрьн. Ләма жи Мордокʹай ԝерʹа бу хԝәй у ԝе мәзьн дькьр. Ле Мордокʹай дь Сусада щәм Аһʹашԝерош пʹадша хӧламти дькьр. Рʹожәке жьна пʹадша Ԝаштʹи гӧрʹа пʹадша нәкьр, ләма жи әԝи бәри ԝе да у хԝәрʹа жьнәкә дьн жьбарт кӧ бьбә ханьм. Гәло кʹи ԝе бьбә жьна пʹадша? Бәле, Әстәра щаһьл у бәдәԝ бу жьна Аһʹашԝерош пʹадша.
Ле ньһа дина хԝә бьдә ԝи мере ԛӧрә, бәр кʹижани әԝ мер сәре хԝә бәржер дькьн. Наве ԝи Һаман ә. Әԝ ԝәзире пешьн ә дь Фарьстанеда. Һаман дьхԝәст кӧ Мордокʹай жи сәре хԝә бәр ԝи бәржер бькә, ле ча әм дьвиньн әԝи ӧса нәдькьр. Чьмки Мордокʹай һʹәсав дькьр кӧ сәре хԝә бәр мерәки хьрав бәржер кьрьн рʹаст нинә. Жь бо ве йәке Һаман гәлә һерс бу. Бьньһерʹә әԝи чь кьр.
Һаман Аһʹашԝерошрʹа шәрʹ ль исраелийа гьли кьр у гот: «Әԝана мәрийед хьрав ьн, у гӧрʹа ԛанунед тә накьн. Ләма жи әԝана һежайи кӧштьне нә». Аһʹашԝерош ньзаньбу кӧ жьна ԝи жи жь исраелийа нә. Әԝи гӧһ да Һаман у ԛануне ӧса дәрхьст, бь кʹижани рʹожәкә кʹьвш кьри ԛьрʹа һʹәму исраелийа гәрәке бьһата.
Гава Мордокʹай дәрһәԛа ԝе ԛануне бьһист, әԝ гәлә бәрхԝәкʹәт. Әԝи әʹламәти шандә Әстәрерʹа у готе: «Тӧ гәрәке тʹәви пʹадша хәвәрди, у ԝи бьди ԛайил кьрьне кӧ мә хьлаз кә». Бь ԛануна фарьса изьна тʹӧ кәси тʹӧнә бу, бейи тʹәглифкьрьн бенә щәм пʹадша. Ле Әстәр йәкә бейи тʹәглиф кьрьне чу щәм пʹадша. Пʹадша шьва зерʹин дьрежи ԝе кьр у бь ве йәке һатә кʹьвше кӧ Әстәр бәр ԝи кʹәрәм дит у ԝе найе кӧштьне. Әстәр Аһʹашԝерош пʹадша у Һаман тʹәглифи кʹефәки мәзьн кьр. Ль ԝьр пʹадша же пьрси кӧ хԝәстьна ԝе чь бу. Әстәр готе кӧ һәгәр әԝана рʹожа майин жи бен, әԝе әʹсәйи хԝастьна хԝә ԝе бежә.
Ль сәр кʹефа дьне Әстәр ида готә пʹадша: «Әзе щьмәʹта хԝәва бемә кӧштьне». Пʹадша бь һерс гот: «Әв кʹи жь сәре хԝә дәрбаз буйә у ван тьшта дькә?»
Әстәр готе: «Ԝа, әԝ мьхәнәт у нәйар, Һамане хьрав ә!»
Ньһа пʹадша дьһа һерс кʹәт. Әԝи фәрман да кӧ Һаман бькӧжьн. Паше Аһʹашԝерош пʹадша Мордокʹай дькә ԝәзире пешьн. Мордокʹай ӧса дькә кӧ ԛануна тʹәзә бе дәрхьстьн, бь сайа кʹижани изьна исраелийа һәбу ԝәʹде рʹожа кʹьфшкьри тʹәви нәйаред хԝә шәрʹ бькьн у хԝә жь мьрьне хьлаз кьн. Ньһа, чьмки Мордокʹай ида ԝәзире пешьн ә, гәлә мәри али исраелийа дькьн. Ӧса исраели жь дьжмьнед хԝә хьлаз бун. Кʹьтеба Әстәр.