Сәрһати 88
Йуһʹәнна Иса Ньхöм Дькә
ДЬВИНИ кӧ кәвоткәк ль сәр мерьки һатә хԝаре? Әв мер Иса йә. Әԝ Ньһа ԝәкә 30 сали йә. Ле мере кӧ бәрбь ԝи сәкьнийә Йуһʹәнна йә. Дәрһәԛа Йуһʹәнна әм һьнәки пешда ида пеһʹәсийан. Те бира тә гава Мәрйәм чу бал мәрьве хԝә Елизабет, зарʹ дь зьке Елизабетда жь шабунва львийа? Әԝ зарʹ һәма әв Йуһʹәнна бу. Ле гәло Иса у Йуһʹәнна чь дькьн?
Йуһʹәнна Иса кьрә бьн аве чʹәма Урдӧне. Һәма ӧса мәри дьһатьн ньхӧмандьне. Пешийе мәрийа дькьрьн бьн аве у паше дәрдьхьстьн. Йуһʹәнна мәрийа ньхӧм дькьр, ләма жи наве ԝи данин Йуһʹәнна ньхӧмдар. Ле гәло чьрʹа Йуһʹәнна Иса ньхӧм кьр?
Чьмки Иса хԝәха һатә бал Йуһʹәнна у готә ԝи ԝәки дьхԝазә бе ньхӧмандьне. Ле сәва чь мәри хԝә ньхӧм дькьрьн? Сәва кӧ нишан кьн ԝәки жь гӧнед хԝә пʹошман бунә у дьхԝазьн тʹәрк бьдьн. Ле сәва чь Иса хԝә ньхӧм кьр, нә әԝ тʹӧ щар хьравийе нәдькьр, у әԝ Кӧрʹе Хԝәдейә һʹәлал бу? Бәле, әв ӧса нә. Иса сәва мәʹнийа дьне гәрәке бьһата ньхӧмандьне. Ԝәрә әм пебьһʹәсьн әв мәʹни чь бу?
Пешийа ньхӧмандьне Иса нәщәр бу. Нәщәр әв ьн, йе кӧ тьшта жь дара чедькьн, мәсәлә кʹӧрсийа, тʹәхта у сьфьра. Мере Мәрйәме Усьв нәщәр бу, ләма әԝи Иса һин дькьр кӧ әԝ жи бьбә нәщәр. Ле бь рʹастийе Йаһоԝа кӧрʹе хԝә Иса шандә әʹрде нә сәва ԝе йәке кӧ әԝ бьбә нәщәр. Йаһоԝа шьхӧләки гәлә фәрз да Иса, у ньһа ԝәʹдә ида гьһиштьбу кӧ Иса ви шьхӧли дәстпекә. Иса һатә щәм Йуһʹәнна хԝә ньхӧм кә, ԝәки бь ньхӧмандьне нишани мәрийа кә, кӧ әԝ ида дәстпедькә нете баве хԝә бинә сәри. Ле гәло Хԝәде кьред Исарʹа ԛайил бу?
Бәле, әԝ ԛайил бу. Һәма ча Иса һатә ньхӧмандьне у жь аве дәркʹәт, дәнгәки жь әʹзмана гот: «Әв ә Кӧрʹе мьни дәлал, кӧ әз жь ԝи рʹази мә». Ԝе дәме әʹзман вәбун у кәвоткәк ль сәр Иса һатә хԝәре. Ле әв нә кәвотка рʹасти бу, бь рʹастийе әв рʹӧһʹе Хԝәде бу, йе кӧ мина кәвоткәке һатә хӧйане.
Паши ньхӧмандьне Иса 40 рʹож щики дури мәрьва дәрбаз дькә, сәва кӧ кʹур дьшьрмиш бә дәрһәԛа шьхӧле хԝә. Ль вьр Шәйтʹане мире щьна һатә бәрбь ԝи. Шәйтʹан се щара Иса да щерʹьбандьне, кӧ Иса тьштәки пешбәри ԛануне Хԝәде бькә. Ле Иса ӧса нәкьр.
Пәй һьнә ԝәʹдә Иса рʹасти ԝан мера те, йе кӧ пашԝәхтийе дьбьнә шагьртед ԝийә пешьн. Навед һьнә жь ԝан әв ә: Әндраԝьс, Пәтрус (аԝа готи Шьмһʹун), Филипо у Натанйеле кӧ (ԝирʹа ӧса жи Бәртоломәйо дьготьн). Паше Иса тʹәви шагьртед хԝә дьчә бәрбь ԝәлате Щәлиле. Дь Щәлиледа әԝана ль мала Натанйел дь Ԛанада ман. Ль ԝьр Иса тʹәглиф дькьн ль сәр дәԝатәки мәзьн, у ԝи дәре әԝ кʹәрәмәтәки хԝәйә пешьн дькә. Зани әв кʹәрәмәт чь бу? Иса жь аве шәрав чекьр.
Мәтта 3:13-17; 4:1-11; 13:55; Марԛос 6:3; Йуһʹәнна 1:29-51; 2:1-12.