Сәрһати 90
Иса У Кʹӧлфәтәкә Жь Самәрийа
ЛЬ СӘР рʹийа Самәрйа Иса ль бәр бирәки сәкьни кӧ һеса бә. Шагьртед ԝи чунә шәһәр кӧ хԝарьн бькʹьрʹьн. Жьнәк һатьбу ль вьр кӧ жь бире аве бькʹьшинә у Иса перʹа хәвәр да, у готә ԝе: «Авәке бьдә мьн, әз вәхԝьм».
Жь бо ве йәке әв кʹӧлфәт әщев ма. Ле зани чьрʹа? Чьмки Иса Щьһу бу, ле әԝ самәри бу. Гәләк жь Щьһуйа самәрийа һʹәз нәдькьрьн. Һьн жи хәвәр нәдьдан тʹәви самәрийа! Ле Иса һʹәму мәрийа һʹәз дькьр, ләма жи әԝ дьвежә: «Һәрге тә бьзаньбийа кʹи аве жь тә хԝәстийә, тәйе хԝәха жь ԝи ав бьхԝәста у әԝи ԝе ава жийине бьда тә».
Кʹӧлфәте жерʹа гот: «Әз хӧлам, тьштәки тәйи кӧ тӧ пе аве бькʹьшини тʹӧнә у бир жи кʹур ә! Дә ижар те ава жийине жь кʹӧ дәре бини?»
Иса щаба ԝе да у готе: «Һәрге тӧ жь ве аве вәхԝи, те диса тʹи би. Ле ава кӧ әз дьдьм, жийина һʹәта-һʹәтайе дьдә ԝи кʹи жь ԝе аве вәдьхԝә».
Кʹӧлфәте жерʹа гот: «Әз хӧлам, дә бьдә мьн ԝе аве, кӧ әз иди тʹи нәбьм у нәйем жь вьр аве нәкʹьшиньм».
Кʹӧлфәте тʹьре кӧ Иса дәрһәԛа ава йа кӧ әм вәдьхԝьн дьвежә. Ле бь рʹастийе Иса хәвәр дьда дәрһәԛа рʹастийа Хԝәде у пʹадшатийа ԝи. Рʹасти дәрһәԛа Хԝәде мина ава жийине йә, йа кӧ жийина һʹәта-һʹәтайе дькарә бьдә мәрийа.
Ижар Иса готә ԝе: «Һәрʹә гази мере хԝә кә у ԝәрә вьра».
Кʹӧлфәте щаба ԝи да у гот: «Мере мьн тʹӧнә».
Иса жерʹа гот: «Тә рʹаст гот. Чьмки пенщ меред тә һәбунә у йе кӧ ньһа жи тӧ перʹа йи нә мере тә йә».
Кʹӧлфәт әщев ма, чьмки әв һʹәму тьшт рʹасти жи ӧса бу. Ле гәло Иса ван тьшта жь кʹидәре заньбу? Бәле, Иса Мәсиһе созкьри бу у жь алийе Хԝәде һатә шандьне, ләма жи Хԝәде әԝан әʹламәтийа да ԝи. Ԝи чахи шагьртед Иса вәгәрʹийан, у әԝана жи әщев ман гава дитьн кӧ Иса тʹәви кʹӧлфәтәкә самәри хәвәр дьдә.
Жь ве сәрһатийе әм чь дькарьн һин бьн? Әв нишани мә дькә кӧ Иса һʹәму мәрийа һʹәз дькьр у фьрԛийа ӧртʹа мьләта данәни. Әм жи гәрәке мина ԝи бьн. Әм гәрәке мәрийа бь щьнсе у мьләта ԝан ԝәнәԛәтиньн у фьрԛи данәйньн ортʹа мьләта. Иса дьхԝәст кӧ мәрийед жь һʹәму мьләта рʹастийе пебьһʹәсьн у һʹәта-һʹәтайе бьжин. Әм жи гәрәке бьхԝазьн аликʹари бьдьнә мәрийа кӧ әԝана рʹастийе бьзаньбьн.
Йуһ’әнна 4:5-43; 17:3.