Сәрһати 93
Иса Һʹәзара Мәрийа Тʹер Дькә
ДӘРБӘКЕ тьштәкә ӧса ԛәԝьми жь бо чь Иса гәлә бәрхԝәкʹәт. Йуһʹәнна ньхӧмдар һатә кӧштьне. Жьна пʹадше бь наве Һеродийа, Йуһʹәнна гәлә һʹәз нәдькьр. Әԝе ӧса кьр кӧ пʹадша сәре Йуһʹәнна һьлԛәтинә.
Гава Иса дәрһәԛа ве йәке пеһʹәсийа әԝ гәлә бәрхԝәкʹәт, у дьхԝәст һьнә ԝәʹдә тʹәне дәрбаз кьра. Ләма жи әԝ тʹәне чу ль сәре чʹийе. Ле щьмʹәте да пәй ԝи. Гава Иса дина хԝә да кӧ әʹлаләт бәр ԝи тʹоп буйә, әԝи гӧне хԝә ԝан ани у дәстпекьр ԝанарʹа дәрһәԛа пʹадшатийа Хԝәде гьли кә. Әԝи ӧса жи гәлә мәрийа жь нәхԝәшийед ԝан ԛәнщ кьр.
Бәре еваре шагьртед Иса незики ԝи бун у ԝирʹа готьн: «Ида дәрәнг ә, ле әв дәр щики хьки-хԝәли йә. Изьна әʹлаләте бьдә кӧ һәрʹьнә гӧнда хԝәрʹа хԝарьне бькʹьрʹьн».
Ле Иса готә ԝан: «Нә һʹәԝщә йә кӧ әԝ һәрʹьн. Һуне хԝарьне бьдьнә ԝан». Паше Иса готә Филипо: «Әме нан жь кʹӧ дәре бькʹьрʹьн, ԝәки ван мәрийа тʹер кьн?»
Филипо жи щава хԝәда гот: «Сәва кӧ һәр йәкирʹа һәма пәʹрик нан бькʹәвә, гәлә пʹәрә лазьм ә, ԝәки һаԛас нан бе кʹьрине!» Ԝи чахи Әндраԝьс гот: «Вьр хортәк һәйә, кӧ пенщ нанед щәһ у дӧ мәʹсийед ԝи һәнә. Ле бона һаԛас мәрьва әв чь йә?»
Иса готә ԝан: «Мәрьва ль әʹрде бьдьнә рʹуньштандьне». Һьнге Иса әв нан һьлда шькьри да Хԝәде у дәстпекьр әв нан кәр кьр. Паше да шагьртарʹа у ԝана әв нан у мʹәси бәлайи рʹуньштийа кьрьн. Ль ԝьр ԝәкә 5 000 мер бун у диса һʹәзар-һʹәзара жьн у зарʹ. Ԝана һʹәмушк жи хԝарьн бь тʹера хԝә хԝарьн. Чахе шагьрта бәрмайи тʹоп кьрьн, ԝәкә 12 сәвәт бь хԝарьнва тʹьжә тʹоп бьбу!
Паше ве йәке бь хԝәстьна Иса шагьрт рʹуньштьн ԛайике кӧ бәʹра Щәлилева дәрбази алийе дьн бьн. Шәве ньшкева фьртонәкә мәзьн рʹабу. Һьндьк мабу ԛайик бьчуйа бьн аве. Шагьрт гәлә тьрсийан. Һьнә ԝәʹдә шунда, ԛәрәбәрбанге, ԝана дит кӧ кәсәк сәр аверʹа дьгәрә у незики ԝан дьбә. Жь тьрса ԝана дәстпекьр ԛужини кьн, чьмки ԝана ньзаньбу кӧ әв кʹи йә.
«Нәтьрсьн» Иса готә ԝан. «Әв әз ьм!» Ԝана һе баԝәрийа хԝә ԝи нәани. Ле паше Пәтрус готә Иса: «Хӧдан, һәгәр әв тӧ йи, әʹмьр кә кӧ әз сәр аверʹа бемә щәм тә». Иса готе: «Ԝәрә!» Пәтрус жь ԛәйке пәйа бу у рʹасти жи сәр аверʹа чу! Ле чахе әԝ тьрсийа дәстпекьр һәрә бьн аве, ле Иса ԝи хьлаз кьр.
Пашԝәхтийе Иса диса щарәки һʹәзара мәрийа тʹер кьр. Ижар әԝи бь һʹәфт нана у бь чәнд мәʹсийед бьчʹук ԝана тʹер кьр. У диса хԝарьна ԝан тʹер тʹьжә бу.Чьԛас баш ә кӧ Иса ӧса хәм дькьр дәрһәԛа мәрийа, ӧса нинә? Чахе Иса дь Пʹадшатийа Хԝәдеда ча пʹадшайе кʹьфшкьри һʹӧкӧм бькә, әм дәрһәԛа тʹӧ тьшт хәм нәкьн, һʹәму тьшт тʹер тʹьжә бә!
Мәтта 14:1-32; 15:29-38; Йуһ’әнна 6:1-21.