Сәрһати 94

Иса Зарʹа Һʹәз Дькә

ҺӘЛА бьньһерʹә ча Иса әв гәде бьчʹук һʹәмез кьрийә. Те кʹьвше кӧ бь рʹастийе жи әԝ зарʹа һʹәз дькә. Ле меред кӧ бәрбь Иса сәкьнинә шагьртед ԝи нә. Гәло Иса чь ԝанарʹа дьвежә? Ԝәрә әм пебьһʹәсьн.

Иса тʹәви шагьртед хԝә һәма һежә жь рʹеки дьреж вәгәрʹийа. Ле рʹева шагьртед ԝи һәврʹа кʹәтьбунә дәʹԝе. Һьнә ԝәʹдә шунда Иса ԝана пьрс кьр: «Һун рʹеда бона чь һәврʹа кʹәтьбунә дәʹԝе?» Ле бь рʹастийе Иса заньбу сәва чь әԝана шәрʹ дькьрьн. Иса дьхԝәст пебьһʹәсийа һәла әԝана ԝирʹа ԝе бежьн йан на.

Шагьртед Иса дәнге хԝә нәкьрьн, чьмки рʹеда ԝана һәврʹа дәʹԝ дькьр һәла кʹи жь ԝан мәзьнтьр ә. Һьнә жь ԝана дьхԝәстьн жь йе майин һе гьринг буна. Ньһа дина хԝә бьдә, кӧ Иса ԝе ча ԝанарʹа шьровәкә, ԝәки нетед ԝан бьбьнә һәри мәзьн рʹаст нинә.

Иса гази зарʹа бьчʹук кьр у ԝи пешбәри шагьрта да сәкьнандьне у готә ԝан: «Әз рʹаст ԝәрʹа дьбежьм, һәгәр һун вәнәгәрʹьн у нәбьнә мина зарʹока, һун тʹӧ щар накʹәвьнә Пʹадшатийа Әʹзмана. Аԝа кʹи кӧ мина ве зарʹоке хԝә бьчʹук кә, әԝ ә йе һәри мәзьн Пʹадшатийа Әʹзманада». Ле зани Иса чьрʹа ӧса гот?

Бәле, Иса ӧса гот чьмки зарʹед бьчʹук тʹӧ щар хәм накьн һәла кʹи жь ԝан һәри мәзьн ә йан гьринг ә. Ләма жи шагьртед ԝи гәрәке жь зарʹа һин буна у һәврʹа нәкʹәтана дәʹԝе һәла кʹи жь ԝан һәри мәзьн ә.

Диса һәбун дәрәщә, чахе Иса әʹйан дькьр кӧ әԝ зарʹед бьчʹук гәлә һʹәз дькә. Һьнә мәһә шунда мәрьв зарʹед хԝә анибун щәм Иса. Ле шагьртед Иса нәдьһиштьн кӧ әԝана незики Иса бьн у ԝана дьданә сәкьнандьне. Ԝи чахи Иса готә шагьртед хԝә: «Бьра әв зарʹок бенә щәм мьн, пешийа ԝан нәгьрьн, чьмки Пʹадшатийа Әʹзмана пʹара йед ӧса йә». Паше Иса ԝан зарʹа дьдә һʹәмеза хԝә, у ԝана кʹәрәм дькә. Чахе әм педьһʹәсьн кӧ Иса зарʹа ӧса һʹәз дькьр, әм гәлә ша дьбьн! Ӧса нинә?

Мәтта 18:1-4; 19:13-15; Марԛос 9:33-37; 10:13-16.