Сәрһати 100

Иса Ль Бахче Гетшәманийе

ПАШИ ԝе йәке ча Иса тʹәви шагьртед хԝә жь отʹаха жорьн дәркʹәт, әԝана чун ль бахче Гетшәмани. Пешда әԝана ида дьһатьн вьр. Ньһа Иса дьвежә шагьртед хԝә, кӧ әԝана гәрәке һʹьшйар бьминьн у дӧа бькьн. Паше Иса жь ԝан һьнәки дур кʹәт, ль щики сәкьни, чок да у дәстпекьр дӧа бькә.

Һьнә ԝәʹдә шунда Иса вәгәрʹийа щәм шагьртед хԝә. Ле зани әԝи чь дит? Бәле, шагьртед ԝи рʹаза бун! Се щара Иса ԝанарʹа дьвежә кӧ әԝана гәрәке һʹьшйар бьминьн, ле һәр щар гава Иса вәдьгәрʹийа, әԝи ԝана рʹазайи дьдит. Гава Иса щара сьсийа вәгәрʹийа, әԝ ԝанарʹа гот: «Һун чьма рʹадьзен? Ԝәхт перʹа гьһишт кӧ әз бькʹәвьмә дәсте гӧнәкʹара».

Ве дәме дәнге әʹлаләтәкә гьран һатә бьһистьн. Һәла тӧ тʹәне бьньһерʹә! Мәри бь дара у шура незики Иса у шагьртед ԝи дьбьн! Ӧса жи әԝана дәсте хԝәда шәмдана дьгьрьн, ԝәки рʹонайи бьдә рʹийа ԝан. Гава әԝана лап незики Иса бун, йәки жь ԝан пешийа ԝан кʹәт у бәрбь Иса сәкьни. Һәла дина хԝә бьдә шькьл, әв мәри Иса рʹамус дькә. Әв Щьһудайе Исхәрйоти йә! Ле гәло әԝ чьрʹа Иса рʹамусанд?

Иса ԝирʹа гот: «Щьһуда! Тӧ бь рʹамусане мьн дьди дәсте ԝан?» Бәле, әв рʹамус ча нишан бу, йе кӧ нишан дькьр ԝан мәрийарʹа кӧ әв ә Иса. Ԝе гаве мәри пешда һатьн, дәст авитьнә Иса у ԝи гьртьн. Ле Пәтрус пьшта Иса гьрт, әԝи шуре хԝә кʹьшанд ль мәрьви хьст, һьндьк мабу ԝе бькʹәта сәре ԝи мәрьви, ле кʹәтә гӧһе ԝийә але рʹасте у же кьр. Ле Иса дәст да гӧһе ԝи у ԝи ԛәнщ кьр.

Иса готә Пәтрус: «Шуре хԝә бькә щи, тә тʹьре әз нькарьм жь Баве хԝә бьхԝазьм ԝәки перʹа-перʹа донздәһ ордийа зедәтьр мьлйакʹәт бьгьһинә мьн?» Бәле, әԝи дькарьбу! Ле Иса нәхԝәст кӧ мьлйакʹәт али ԝи бькьн, чьмки әԝ заньбу кӧ ԝәʹда ида гьһишт ԝәки нәйаред ԝи, ԝи бькӧжьн. Ләма жи дьжмьн Иса гьртьн у бьрьн. Ле гәло паши ве йәке чь сәре Иса һат? Ԝәрә әм пебьһʹәсьн.

Мәтта 26:36-56; Луԛа 22:39-53; Йуһʹәнна 18:1-12.