Сәрһати 101

Иса Те Кӧштьне

ҺӘЛА тӧ тʹәне бьньһерʹә чьԛас тьштәки бехӧдан дьԛәԝьмә! Исайе Мәсиһ дькӧжьн. Бьньһерʹә ньгед у дәстед ԝи мьх кьрьн у ԝи бь кʹенарева дардакьрьн. Гәло әԝана чьрʹа тьштед ӧса сәре Иса дькьн?

Чьмки һәнә кәсед ӧса йе кӧ Иса һʹәз накьн. Зани әԝана кʹи нә? Йәк жь ԝан Шәйтʹане мире щьна йә. Һәма әԝи Адәм у Һеԝа дәʹвда ԝәки әԝана гӧрʹа Хԝәде накьн. Ньһа жи һәма Шәйтʹан ӧса кьр кӧ дьжмьнед Иса ԝи бькӧжьн.

Пешийа ԝе йәке ча Иса кʹенарева дардакьрьн, дьжмьнед ԝи ԛәрфа хԝә ԝи дькьрьн. Ле гәло әв дьжмьн кʹи бун? Те бира тә кʹи һатьн ль бахче Гетшәмани у Иса гьртьн? Бәле, әв сәрԝеред кʹьништа бун. Ԝәрә әм пебьһʹәсьн паше ԝана чь кьр.

Гава сәрԝеред кʹьништа Иса гьртьн, шагьртед ԝи жь тьрса рʹәвин. Ԝана Иса тʹәви нәйаред ԝи тʹәне һиштьн. Ле Пәтрус у Йуһʹәнна ль вьр щики хԝә вәшартьн, паше чунә пәй ԝан сәва кӧ бьньһерʹьн һәла ахьрийе ԝе чь бе сәре Иса.

Кʹәшиша Иса бьрьнә бал мерәки кал йе кӧ пешда кʹаһине пешьн бу, наве ԝи Һәнан бу. Һьнә ԝәʹда әԝана щәм ԝи дьминьн, у паше Иса дьбьнә ль мала Ԛәйафа, йе кӧ кʹаһине пешьн бу. Ль ԝьр гәлә кʹәшиш у сәрԝеред кʹьништа тʹоп бун.

Ль мала Ԛәйафа әԝана диԝана Иса дькьн. Һьн жи мәрийед ӧса тиньн, ԝәки әԝана мьԛабьли Иса шәʹдәтикә дәрәԝ хәвәр дьн. Һʹәму сәрԝеред кʹьништа дәстпекьрьн ԛужини кьн: «Әԝ һежайи мьрьне йә». Ԝе гаве әԝана тʹуйи рʹуйе ԝи дькьрьн, у бь кʹӧлма ле дьхьстьн.

Ԝи чахи Пәтрус ль дәрва сәкьни бу. Һәԝа сар бу, ләма жи мәрьв агьр вехьстьн. Ԝе дәме гава әԝана бәр агьре хԝә гәрм дькьрьн, хӧламәк ль сәр Пәтрус ньһерʹи у гот: «Әве һан жи тʹәви Иса бу».

Пәтрус инкʹар кьр: «На, әз нибум!»

Ԝана се щара готә Пәтрус кӧ әԝ жи тʹәви Иса бу. Ле һәр щар Пәтрус инкʹар дькьр. Гава әв ида щара сьсийа ԛәԝьми, Иса зьвьрʹи у ль Пәтрус ньһерʹи. Пәтрус гәлә пʹошман бу у бәр хԝә кʹәт кӧ әԝи Иса инкʹар кьр. Әԝ жь вьр дур кʹәт у дәстпекьр кʹәлә-кʹәл бьгьри.

Инийе сьбәһ зу гава тәʹв дәркʹәт, кʹәшиша Иса бьрьн ль сәр щьвинәки мәзьн. Ль ԝьр ԝана диԝана Иса кьрьн, ԝәки чь гәрәке сәре ԝи бькьн. Паше ԝана Иса бьрьнә бал Пилатойе Понтийо йе кӧ ԝәлийа Щьһустане бу.

Кʹәшиш Пилаторʹа готьн: «Әԝ мәрики гәлә нәһәԛә у гәрәке бе кӧштьне». Паши ԝе йәке ча Пилато пьрса да Иса, әԝи гот: «Әз тʹӧ нәһәԛийе ԝида набиньм». Паши Пилато Иса шандә щәм Һеродәсе Антипас. Һеродәс ԝәлийа Щәлиле бу, ле ԝи чахи әԝ һатьбу Оршәлиме. Һеродәс жи тьштәки хьрав ль Иса нәдит, ләма жи әԝи Иса пашда шандә щәм Пилато.

Пилато ида дьхԝәст Иса аза кьра. Ле дьжмьнед Иса дьхԝәстьн дәԝса ԝи, гьртики майин аза кьн. Наве ԝи Барабас бу у әԝ ԛачахе ԝан дәра бу. Нивро Пилато Иса дәрхьстә дәрва у готә щьмәʹте: «Аһан! Пʹадше ԝә!» Ле сәрԝеред кʹьништа кьрьнә ԛужини: «Ԝи жь мә дур хә! Бькӧжә! Ԝи бькӧжә!» Ләма жи Пилато Барабас аза дькә, ле Иса дьвә кӧ бе кӧштьне.

Рʹожа инийе, нивро Иса кʹенарева мьх кьрьн. Кʹеләка Иса һәр дӧ алийава дӧ ԛачах кʹенарева дардакьри бун. Ԛачахәк пешийа мьрьна Иса гьлийе ӧса готә ԝи: «Иса, гава тӧ бь Пʹадшатийа хԝәва бейи мьн бира хԝә бинә». Иса ԝирʹа гот: «Әз соз дьдьмә тә, ԝәки тӧйе тʹәви мьн дь щьнәтеда би».

Чьԛас созәки баш ә, ӧса нинә? Ле гәло Иса дәрһәԛа кʹижан щьнәте дьгот? Һәла бинә бира хԝә, щьнәте пешьн йе кӧ Хԝәде чекьрьбу кʹидәре бу? Бәле, әԝ ль сәр әʹрде бу. Чахе Иса ль сәр әʹзмана дәстпекә сәрԝерти кә, Иса ԝе ԝи мәрьви сах кә, сәва кӧ әԝ ль щьнәте сәр әʹрде бьжи. Жь бо ве йәке әм жи гәрәке ша бьн, ӧса нинә?

Мәтта 26:57-75; 27:1-50; Луԛа 22:54-71; 23:1-49; Йуһʹәнна 18:12-40; 19:1-30.