Сәрһати 109
Пәтрус Сәрики Корʹнелйо Дьхә
ӘВ МЕРЕ тӧ ль сәр шькьл дьвини Пәтрусе шанди йә. Меред кӧ пьшт ԝива сәкьнинә һәвалед ԝи нә. Ле гәло әԝ мере кӧ бәр ԝи чок дайә кʹи йә? Чьрʹа әԝи чок да бәр Пәтрус? Гәло әв йәк рʹаст бу? Ԝәрә әм пебьһʹәсьн.
Наве ԝи мерьки Корʹнелйо йә. Әԝ сәрсәде әскәред Рʹоме йә. Корʹнелйо ԛә Пәтрус нас накә, ле ԝирʹа һатьбу готьне ԝәки әԝ Пәтрус тʹәглифи мала хԝә бькә. Ԝәрә әм пебьһʹәсьн ча әв һʹәму тьшт ԛәԝьми.
Әм заньн кӧ шагьртед Иса пешьн тʹәне щьһу бун, ле Корʹнелйо нә щьһу бу. Ле әԝи Хԝәде һʹәз дькьр, ԝирʹа дӧа дькьр у һьн жи мәрийарʹа гәлә ԛәнщи дькьр. Ләма жи дәрбәке мьлйакʹәт ԝирʹа хӧйа бу у готә ԝи: «Хԝәде жь тә ԛәбулә, у ләма жи әԝ щава дӧайе тә дьдә. Һьнә мера бьшинә шәһәре Йафайе пәй мерәки бь наве Пәтрус. Әԝ дь мала Шьмһʹунда дьминә, йе кӧ бәр бәʹре дьжи».
Корʹнелйо перʹа-перʹа чәнд мер шандә пәй Пәтрус. Рʹожәк шунда гава әв мер ида незики Йафа дьбун, Пәтрус ль сәр банийа мала Шьмһʹунда бу. Ԝи чахи Хԝәде ӧса кьр кӧ Пәтрус пʹарчәки дьреж дит, йе кӧ жь әʹзмана дьһатә хԝаре. Ль сәр пʹарчә әԝи щурʹә-щурʹә һʹәйԝан дит, йе кӧ бь ԛануна Хԝәде сәва хԝарьне һʹәрам дьһатьн һʹәсаве. Ле дәнгәки йәкә тьштәки ӧса готә ԝи: «Рʹабә Пәтрус, әԝан һʹәйԝана сәржекә у бьхԝә».
Ле Пәтрус гот: «Һʹаша жь мьн Хӧдан, мьн тʹӧ щар тьштәки һʹәрам нәхԝарийә». Ле ԝе дәнге готә Пәтрус: «Әԝ тьштед кӧ Хԝәде һʹәлал кьрийә, тӧ һʹәрам һʹәсав нәкә». Әв йәк ԝәкә се щара ԛәԝьми. Чахе Пәтрус һе әʹщебмайи дьле хԝәда дьфькьри, кӧ әԝ тьшт чь дьһатьн һʹәсаве, әԝ меред кӧ бь Корʹнелйо һатьбун шандьне гьһиштьн мала ԝи у гази Пәтрус кьрьн.
Ԝи чахи Пәтрус пәйа бу жере у готә ԝан: «Әз ьм әԝ кӧ һун ле дьгәрʹьн. Һун бона чь һатьнә?» Чахе ԝана гьли кьр кӧ мьлйакʹәт готьбу Корʹнелйо, ԝәки әԝ Пәтрус тʹәглифи мала хԝә бькә, Пәтрус ԛайил бу тʹәви ԝан бьчуйа. Рʹожәк шунда Пәтрус тʹәви һәвалед хԝә рʹе кʹәт һʹәта Ԛәйсәрийе, кӧ сәрики Корʹнелйо хә.
Корʹнелйо һʹәму бьрʹа пьзмамед хԝә у һәвалед хԝәйә незик, тʹопи мала хԝә кьр. Чахе Пәтрус дәрда һат Корʹнелйо пешийа ԝида чу у кʹәтә бәр ньгед ԝи. Ле Пәтрус готә ԝи: «Рʹабә бьсәкьнә, әз хԝәха жи мина тә мәри мә». Бь ве йәке Кʹьтеба Пироз нишани мә дькә, кӧ әм гәрәке сәре хԝә бәр мәрийа данәйньн. Әм гәрәке тʹәне бәр Йаһоԝа сәре хԝә дайньн.
Ньһа Пәтрус ԝанарʹа даннасин дькә у гьлийед ӧса дьвежә: «Әз ньһа фәʹм дькьм, ԝәки һәрʹ кәс кӧ ԝе бьхԝазә Хԝәдерʹа ԛӧльх кә, бәр чʹәʹве Хԝәде ԛәбул ә». Чахе Пәтрус һе хәвәр дьда, Хԝәде рʹӧһʹе пироз ль сәр ԝан ани у ԝана дәстпекьр хәвәрдьн ль сәр щурʹә-щурʹә змана. Жь бо ве йәке шагьртед щьһу, йед кӧ тʹәви Пәтрус һатьбун, зәндәгьрти ман, чьмки ԝана тʹьре кӧ Хԝәде тʹәне щьһуйа ԛәбул дькә. Бь ве йәке әԝана сәрԝахт бун кӧ Хԝәде фьрԛи данайнә ортʹа мьләта у мьләтәк жь мьләте дьн четьр һʹәсав накә. Әв йәк баш ә кӧ тʹьме бира мәда жи бә, ӧса нинә?
Кʹаред Шандийа 10:1-48; 11:1-18; Әʹйанти 19:10.