Сәрһати 113

Паԝлос Дь Рʹомеда

БЬНЬҺЕРʹӘ Паԝлос бь зьнщира гьредайи йә у кʹеләка ԝи жи әскәре рʹомайи сәкьнийә. Бәле, ньһа Паԝлос дь кәле Рʹомеда нә. Әԝ һивийе йә һәла сәркʹаре Рʹоме, Ԛәйсәр, ԝе чь сафи кә дәрһәԛа ԝи. Рʹаст ә Паԝлос бьн нобәдарийе дьжи, ле мәрьв дькарьн бенә щәм ԝи ԝәки сәрики ԝи хьн.

Паши ԝе йәке ча Паԝлос һатә Рʹоме, се рʹож шунда әԝи гази гьрәгьред щьһуйа кьр. Ԝи чахи гәлә жь щьһуйа, йед кӧ дь Рʹомеда дьжитьн, һатьн щәм Паԝлос. Паԝлос жи дәстпекьр ԝанарʹа дәрһәԛа Иса у пʹадшатийа Хԝәде даннасин бькә. Һьнәка баԝәрийа хԝә гьлийед Паԝлос анин у бунә Мәсиһи, ле йа дьне баԝәр нәкьрьн.

Паԝлос ӧса жи даннасин дькьр ԝан әскәррʹа, йе кӧ нобәдарийа ԝи дькьрьн. Паԝлос дь кәледа ԝәкә дӧ сал дәрбаз дькә у һʹәму мәрийарʹа, йед кӧ рʹасти ԝи дьһатьн, әԝи даннасин кьр. Һәла һе мәрийед жь мала Ԛәйсәр жи мьзгинийа хере бьһистьн у һьнәк жь ԝан бунә мәсиһи.

Ле гәло әԝ мәрьве кӧ бәр сьфьр рʹуньштийә у дьньвисә кʹи йә? Бәле, әв Тимотʹейо йә. Рʹаст ә ԝи жи кьрьбун кәле, сәва кӧ әԝи дәрһәԛа пʹадшатийе даннасин дькьр. Ле ньһа әԝ аза йә. Әԝ һатә кәле кӧ али Паԝлос бькә. Зани Тимотʹейо ньһа чь дьньвисә? Ԝәрә әм пебьһʹәсьн.

Те бира тә кӧ әм дәрһәԛа шәһәред Филипйа у Әфәс пеһʹәсийан. Дәрһәԛа ван шәһәра дь сәрһатийа 110-да һатьбу готьне. Паԝлос али ԝан кьр кӧ ль ԝьр щьват вәбьн. Ньһа Паԝлос жь кәле ԝан щьватарʹа нәмә дьньвисә. Әв нәма дь Кʹьтеба Пирозда һәнә, навед ԝан Әфәси у Филипи йә. Һәма ньһа жи Тимотʹейо гьлийед Паԝлос щьвата филипирʹа дьньвисә.

Мәрийед филипи, гәлә ԛәнщи Паԝлосрʹа кьрьн. Ԝана Паԝлосрʹа пʹешкʹеш шандьбу, у Паԝлос жи ньһа рʹазибуна хԝә ԝанрʹа дьньвисә. Әԝи пʹешкʹеши ԝирʹа Епафродито анибу. Пәй һатьна хԝә Епафродито бь нәхԝәшийа гьран нәхԝәш кʹәт у ида бәр мьрьне бу. Ле ньһа әԝ сах - сьламәт ә у зутьрке ԝе вәгәрʹә мал. Епафродито тʹәви хԝә, ӧса жи нәʹма жь Паԝлос у Тимотʹейо ԝе бьвә Филипйайе.

Дь кәледа Паԝлос диса дӧ нәʹма ньвиси, әԝ нәʹма жи дь Кʹьтеба Пирозда һәнә. Йәк жь ԝан әԝи сәва мәсиһийед жь шәһәре Колосйа ньвиси. Наве ве нәʹме һәма ӧса нә: «Колоси». Нәʹма дӧда әԝи ида Фьлимонрʹа, һәвале хԝәйи незикрʹа ньвиси. Әԝ жи дь Колосида дьжит. Дь ԝе нәʹмеда дәрһәԛа Онисимо те готьне, йе кӧ хӧламе Фьлимон бу.

Онисимо жь Фьлимон рʹәвибу у һатьбу Рʹоме. Ль ԝьр әԝ пеһʹәсийа кӧ Паԝлос дь кәледа нә у һатә кӧ сәрики ԝи хә. Паԝлос жи ԝирʹа даннасин кьр. Ӧса Онисимо бу мәсиһи. Ньһа Онисимо пʹошман бьбу, кӧ жь Фьлимон рʹәви. Ле зани Паԝлос чь Фьлимонрʹа ньвиси?

Паԝлос һиви жь Фьлимон дькә, ԝәки әԝ Онисимо бьбахшинә. «Әз ԝи пашда дьшиньмә щәм тә», Паԝлос дьвежә Фьлимонрʹа. «Ле әԝ ньһа ида нә тʹәне хӧламе тә йә. Әԝ ӧса жи сәва тә чаԝа бьраки дәлал ә!» Чахе Онисимо вәдьгәрʹә пашда Колосйайе, әԝ тʹәви хԝә дӧ нәʹма дьвә. Йәк сәва колосийарʹа, йа дьн жи сәва Фьлимон. Ньһа бьдә һʹәсаве хԝә Фьлимон чьԛас ша дьбу, гава пеһʹәсийа кӧ хӧламе ԝи буйә мәсиһи!

Дь нәʹма филипийарʹа Паԝлос әʹламәтийа ша ԝанарʹа у Фьлимонрʹа дьньвисә. Әԝи әʹламәтийа ӧса гот: «Әз ԝәрʹа Тимотʹейо дьшиньм. У һьнәк ԝәʹда шунда әз хԝәха жи бемә щәм ԝә». Ле Фьлимонрʹа әԝи гьлийед ӧса гот: «Мьнрʹа щик һазьр кә, кʹидәре жи әзе бькарьбьм бьминьм».

Чахе Паԝлос жь кәле аза дькьн, әԝ дь гәлә щийада сәрики хушк бьред хԝә дьхә. Ле паше, ԝи пашда дькьнә кәле Рʹоме. Ижар әԝ ида занә кӧ ԝе бе кӧштьне, ләма жи әԝ Тимотʹейорʹа дьньвисә, ԝәки әԝ ләз кʹәвә бе щәм ԝи. Дь нәʹмеда Паԝлос гьлийе ӧса ньвиси Тимотʹейорʹа: «Әз Хԝәдерʹа амьн мам. Ньһа майә кӧ Хԝәде һәԛе мьн бьдә». Паши ве йәке ча Паԝлос һатә кӧштьне, чәнд сал дәрбаз бун у Оршәлим ида щара дӧда һатә һьлшандьне. Ижар, әв йәк бь дәсте рʹомайа һатә кьрьне.

Ле бь ве йәке сәрһатийед Кʹьтеба Пироз хьлаз нәбун. Паши ве йәке Йаһоԝа ӧса кьр, кӧ Йуһʹәнна шанди дӧ кʹьтебед пашьн бьньвисә. Йәк жь ԝан кʹьтеба Әʹйанти йә. Дь ве кʹьтебеда дәрһәԛа ахьрийе те готьне. Ԝәрә әм пебьһʹәсьн чь ахьри һивийа мәйә.

Кʹаред Шандийа 28:16-31; Филипи 1:13; 2:19-30; 4:18-23; Ибрани 13:23; Фьлимон 1-25; Колоси 4:7-9; 2 Тимотʹейо 4:7-9.