Али Зарʹед Хԝә Бькьн кӧ Ахьрийа Ԝан Баш бә

1, 2. Чахе зарʹ мәзьн дьбьн, чь чәтьнайи дькарьн пешда бен?

ЧАХЕ зарʹа мәзьн малда һәйә, нә ӧса һеса йә, чаԝа зарʹа пенщ сали йан жи дәһ сали малда бә. Чахе зарʹ мәзьн дьбьн гәләк чәтьнайи дькарьн пешда бен, ле һьнге шабун у кʹәрәм жи һәнә. Мәсәлед Усьв, Даԝьд, Йошийа у Тимотʹейо дьдьнә кʹьфше, кӧ щаһьл дькарьн борщдарийа һьлдьн сәр хԝә у тʹәви Йаһоԝа һәләԛәтийа башда бьн (Дәстпебун 37:2-11; 1 Самуйел 16:11-13; 2 Пʹадшати 22:3-7; Кʹаред Шандийа 16:1, 2). Рʹожа иро гәләк ԛиз у хортед щаһьл пе шьхӧлед хԝә әве йәке избат дькьн. Дьбәкә һун жи щаһьлед ӧса нас дькьн.

² Ле бона һьнәка ԝәʹде кӧ зарʹ мәзьн дьбьн, ԝәʹде чәтьнайа йә. Зарʹ дьбәкә азайа мәзьн дьхԝазьн, у чахе де-бав һьнә тьштада ԝанарʹа синора датиньн әԝана тʹәвиһәв дьбьн. Ле әԝ зарʹ нәщерʹьбанди нә, ԝанарʹа лазьм ә, кӧ де-бав бь сәбьр у һʹьзкьрьне али ԝан бькьн. Бәле, әв ԝәʹдәки гәләк чәтьн ә, нә кӧ тʹәне бона де-бава, ле ӧса жи бона зарʹа. Ле ча дькарьн али ԝан зарʹа бькьн салед ԝанә чәтьнда?

3. Де-бав чь щурʹәйи дькарьн али зарʹед хԝәйә мәзьн бькьн, кӧ бьбьнә мәрьвед щерʹьбанди?

³ Де-бавед кӧ пәй ширәтед Кʹьтеба Пироз дьчьн, али зарʹед хԝә дькьн, ԝәки әԝана щерʹьбандьнада тәйах кьн у бьбьнә мәрьвед кӧ борщдарийа һьлдьдьн сәр хԝә. Бәре-бәреда де-бав у зарʹед кӧ ширәтед жь Кʹьтеба Пироз әʹмьре хԝәда дьданә хәбате, кʹәрәм стандьнә (Зәбур 119:1).

ХӘБӘРДАНА АЗА У ҺʹӘЛАЛ ОРТʹА ДЕ-БАВА У ЗАРʹАДА

4. Чьрʹа ширәт фәрз ьн, илаһи чахе зарʹ мәзьн ьн?

⁴ Кʹьтеба Пирозда ньвисар ә: «Бе ширәт мәрәм у тʹьвдир бәтал дьбьн» (Мәтʹәлок 15:22). Чахе зарʹ бьчʹук ьн, ԝанарʹа ширәткьрьн лазьм ә, ле чахе мәзьн ьн, һе зедә лазьм ә. Чьмки ԝи чахи әԝана һьндьк малда дьминьн у дьһа зәʹф ԝәʹдә дәрбаз дькьн тʹәви һәвалед хԝәйә мәкʹтәбеда у һәвалед дьн. Һәрге ортʹа де-бава у зарʹада хәбәрдана аза у бь һʹәлали тʹӧнә йә, һьнге зарʹ дькарьн малда хԝә хәриб тʹәхмин кьн. Ле чь бькьн ԝәки хәбәрдана де-бава тʹәви зарʹа, аза у һʹәлал бә?

5. Зарʹед мәзьн гәрәке чь щурʹәй бьн, һьндава хәбәрдана тʹәви де-баве хԝә?

⁵ Сәва хәбәрдан тʹьме ортʹа де-бава у зарʹада һәбә, һәр кәс жь ԝан гәрәке әԝе йәке бькә чь кӧ ԝи дькʹәвә. Зарʹ дькарьн ӧса дьшьрмиш бьн, ԝәки чахе әԝана бьчʹук бун ԝанарʹа һеса бу тʹәви де-бавед хԝә хәбәр дьн, нә кӧ ньһа кʹәнге әԝана мәзьн ьн. Ле ԝе баш бә биньн бира хԝә әван гьлийа «жь бесәʹвитийе [берʹебәрийе] щьмәʹт ӧнда дьбә, ле бь кʹома шеԝьркьра хьлаз дьбә» (Мәтʹәлок 11:14). Әв гьли ча бона мәзьна йә ӧса жи бона бьчʹука йә. Һәрге зарʹ ԛайил ьн тʹәви ԝан гьлийа, әԝана ӧса жи ԝе ԛайил бьн тʹәви ԝе йәке, кӧ ԝанарʹа лазьм ә рʹебәрийа щерʹьбанди. Нә ахьр әԝана ида ԝе рʹасти чәтьнайед һе гьран бен. Әԝана гәрәке баԝәр бьн, ԝәки де-баве ԝанә хԝәдехоф, һазьр ьн бьбьнә ширәткʹаред баш бона ԝан. Чьмки де-бав әʹмьрда дьһа щерʹьбанди нә у ида гәләк ԝәхт ә, кӧ бь һʹьзкьрьн али ԝан дькьн у ԝан хԝәй дькьн. Демәк зарʹед аԛьл, ԝе тʹӧ чар пьшта хԝә нәдьнә де-баве хԝә.

6. Чахе зарʹ дьхԝазә тʹәви де-баве хԝә хәбәр дә, де-бавед билан у бь һʹьзкьрьне тʹьжә, чь дькарьн бькьн?

⁶ Чахе де-бав дьлвәкьри нә тʹәви зарʹед хԝә, әԝ йәк зарʹарʹа дьдә кʹьфше, ԝәки де-бав тʹьме һазьр ьн гӧһ бьдьн хәбәрдана ԝан. Һәрге һун жи де-бав ьн, чьԛас дькарьн ӧса бькьн, ԝәки зарʹа ԝә һеса бькарьбә незики ԝә бә чахе ԝирʹа лазьм бә. Щара әв йәк һаԛас жи нә һеса йә. Кʹьтеба Пирозда ньвисар ә ԝәки, «ԝәхта һьшбуне һәйә у ԝәхта готьне һәйә» (Ԝаиз 3:7). Щарна зарʹ сафи дькә ԝәки ньһа йә ԝәʹдә кӧ әԝ тʹәви ԝә хәбәр дә, ле ԝи чахи дьԛәԝьмә ԝәʹде ԝә тʹӧнә йә, чьмки әԝ ԝәʹдә бона ԝә, «ԝәхта һьшбуне» бу. Демәк, ԝә әԝ ԝәʹдә вәԛәтандьбу сәва һинбуна шәхси, һесабуне, йан жи шьхӧле мале. Ле һәрге һун тʹәхмин дькьн, ԝәки әԝ дьхԝазә тʹәви ԝә хәбәр дә, шьхӧле хԝә бьдьнә алики у тʹәви ԝи хәбәр дьн. Чьмки дьбәкә щарәкә дьн, әԝ ида нә жи бьхԝазә хәбәр дә. Биньн бира хԝә мәсәла Иса. Рʹожәке әԝи сафи кьрьбу, кӧ һьнәки һеса бә. Ле чахе мәрьв дора ԝи тʹоп бун сәва гӧһ бьдьнә ԝи, Иса һесабуна хԝә да алики у дәстпекьр ԝана һин кә (Марԛос 6:30-34). Гәләк зарʹ фәʹм дькьн, ԝәки шьхӧле де-баве ԝан пʹьрʹ зәʹф ә, ле гәләк фәрз ә ԝәки зарʹ баԝәр бә, кӧ чахе лазьм бә, де-бав ԝе кʹеләка ԝи бьн. Демәк, де-бавно һазьр у билан бьн.

7. Де-бав гәрәке хԝә жь чь дур бьгьрьн?

⁷ Биньн бира хԝә чахе һун хԝәха зарʹ бун, ԝә чь сәр хԝә тʹәхмин дькьр! Ԝе баш бә һәрге һун һәнәкчи у хәбәрхԝәш бьн. Хәбәрдана тʹәви зарʹа гәрәке ԝәрʹа шабуне бинә. Ле гәло чахе ԝәʹде ԝәйи аза һәйә, һун сәр чь хәрщ дькьн? Һәрге һун әԝи ԝәʹдәйи жь мал дәр хәрщ дькьн, зарʹ әве йәке тʹәхмин дькьн. У һәрге әԝана дәстпекьн бьфькьрьн, кӧ де-бавед ԝан ԝана һаԛас ԛимәт накьн чьԛас кӧ һәвалед мәкʹтәбеда, әԝ йәк ԝе чәтьнайед мәзьн пешда бинә.

ДӘРҺӘԚА ЧЬ ХӘБӘР ДЬН

8. Ча де-бав дькарьн али зарʹа бькьн, ԝәки әԝана рʹаст, һʹәлал у хәбатһʹьз бьн?

⁸ Һәрге ԝә зарʹед хԝә һе һин нәкьрийә кӧ рʹаст, һʹәлал у хәбатһʹьз бьн, демәк ԝәʹдә йә кӧ әве йәке бькьн, чьмки зарʹед ԝә ида мәзьн ьн (1 Тʹесалоники 4:11; 2 Тʹесалоники 3:10). Де-бав ӧса жи гәрәке баԝәр бьн, ԝәки зарʹед ԝан бь тʹәмами фәʹм дькьн кӧ чьԛас фәрз ә, намусийеда хԝә тʹәмьз хԝәй кьн (Мәтʹәлок 20:11). Ве йәкеда, мәсәла де-бава рʹоләкә мәзьн дьлизә. Чаԝа меред нәбаԝәр дьбәкә «бь пʹәргалийа жьнед хԝә, бе готьн жи бенә сәр баԝәрийе», ӧса жи зарʹед мәзьн дькарьн бь рʹабун-рʹуньштьна де-бавед хԝә принсипед рʹаст әʹмьре хԝәда хԝәй кьн (1 Пәтрус 3:1). Ле тʹәне мәсәлә бәс нинә, чьмки зарʹ жь мал дәр гәләк тьштед хьраб дьбьһен у дьвиньн. Ләма жи де-бав гәрәке һаш кӧрʹ йан ԛизед хԝә һәбьн, һәла әԝана чь дьфькьрьн сәр ԝе йәке, чь дьвиньн у дьбьһен. Ле сәва ве йәке лазьм ә пешда бьфькьрьн чь бежьн у паше тʹәви ԝан хәбәр дьн (Мәтʹәлок 20:5).

9, 10. Чьрʹа у ча де-бав гәрәке зарʹед хԝә ширәт кьн дәрһәԛа сексе?

⁹ Әԝ йәк лазьм ә илаһи чахе зарʹед мәзьн ширәт дькьн дәрһәԛа һәләԛәтийа ортʹа мер у жьн, демәк сексе. Де-бавно дьбәкә һун шәрм дькьн тʹәви зарʹед хԝә хәбәр дьн дәрһәԛа ве тʹеме? Һәрге әв йәк ӧса нә, сәр хԝә бьхәбьтьн кӧ шәрм нәкьн, чьмки йәкә зарʹед ԝә, ԝе дәрһәԛа ве йәке жь һьнәкед майин пебьһʹәсьн. У һәрге әԝана жь ԝә пенәһʹәсьн, кʹе занә жь мал дәр ԝе ча бьбьһен? Йаһоԝа дәрһәԛа һәләԛәтийа ортʹа мер у жьн Кʹьтеба Пирозда әйан дьбежә, ләма де-бав жи гәрәке дәрһәԛа ԝе йәке зарʹед хԝә рʹаст ширәт кьн (Мәтʹәлок 4:1-4; 5:1-21).

¹⁰ Чьԛас баш ә, ԝәки Кʹьтеба Пироз рʹебәрийа зәлал дьдә дәрһәԛа сексе. Ӧса жи тʹәшкиләта Йаһоԝа дәрһәԛа ԝе йәке гәләк әʹламәтийед керһати дьгьһинә мә. Әԝ әʹламәти дьдьн кʹьфше, ԝәки әԝ рʹебәри бона ԝәʹде мә нә жи. Ләма жи ԝе баш бә әԝе рʹебәрийе әʹмьре хԝәда бьдьнә хәбате. Мәсәлә, ԝе чьԛас баш бә һәрге тʹәви кӧрʹ йан ԛиза хԝә шеԝьр кьн тʹемед лайиԛ жь кʹьтеба «Пьрсед Щаһьла у Ширәтед Керһати», пʹаред 1 у 2. Һун дькарьн баԝәр бьн, ԝәки әԝ йәк ԝе ахьрийа баш бинә.

11. Де-бав ча дькарьн бь щурʹе баш зарʹед хԝә һин кьн, кӧ ча Йаһоԝарʹа хьзмәт кьн?

¹¹ Демәк, кʹижан тʹема лап фәрз ә хәбәрдана де-бавада тʹәви зарʹа. Дәрһәԛа ԝе йәке Паԝлос гот: «Зарʹед хԝә . . . бь ширәт у һинкьрьна Хӧдан мәзьн кьн» (Әфәси 6:4). Зарʹарʹа лазьм ә һе зедә у зедә бьзаньбьн дәрһәԛа Йаһоԝа. Илаһи лазьм ә, ԝәки әԝана һин бьн Йаһоԝа һʹьз кьн у бьхԝазьн ԝирʹа хьзмәт кьн. Гәләк тьшт жи де-бав дькарьн пе мәсәла хԝә зарʹед хԝә һин кьн. Чахе зарʹ дьвиньн кӧ де-бав «бь тʹәмамийа дьле хԝә, бь тʹәмамийа щанийа хԝә у бь тʹәмамийа һʹьше хԝә» Хԝәде һʹьз дькьн у бь ԝе йәке бәхтәԝар ьн, ԝи чахи зарʹ дьхԝазьн чʹәʹв бьдьн де-бавед хԝә (Мәтта 22:37). Ньһерʹандьна зарʹа сәр тьштед материйали ԝе чь щурʹәйи бә, диса жи жь де-бава гьредайи йә. Һәрге де-бав Пʹадшатийа Хԝәде датиньн щийе пешийе, бь ԝе йәке әԝана али зарʹед хԝә дькьн, ньһерʹандьна рʹаст нав хԝәда пешда биньн (Ԝаиз 7:12; Мәтта 6:31-33).

12, 13. Чь гәрәке бькьн, сәва һинбуна тʹәви малбәте керһати бә?

¹² Сәва зарʹ Хԝәде һʹьз кьн у бьхԝазьн ԝирʹа хьзмәт кьн, һинбуна тʹәви малбәте, һәр һʹәфтийе, аликʹарикә мәзьн ә (Зәбур 119:33, 34; Мәтʹәлок 4:20-23). Гәләк фәрз ә әԝе һинбуне тʹьме дәрбаз кьн, пьшт гӧһе хԝәва нәвежьн (Зәбур 1:1-3). Чаԝа де-бав, ӧса жи зарʹ гәрәке фәʹм бькьн, кӧ һʹәму шьхӧлед хԝәйи дьн ӧса сафи кьн, сәва кӧ һинбуна тʹәви малбәте паш нәхьн. Хенщи ԝе йәке, сәва кӧ һинбун керһати бә, лазьм ә бьзаньбьн ча рʹаст дәрбаз кьн. Бавәк гьли дькә: «Ԝе йәкерʹа лазьм ә, ԝәки йе кӧ һинбуне дәрбаз дькә гәрәке ӧса дәрбаз кә, ԝәки һинбун һеса у һʹәԝас дәрбаз бә, ле ӧса жи бь мәʹрифәти. Һеса нинә ӧса бькьн ча лазьм ә, чьмки гәләк щар лазьм ә зарʹа рʹаст кьн у ширәт кьн, сәва кӧ һьндава һинбуне, хԝә рʹаст бьдьн кʹьфше. Һәрге щара дӧда жи нәйе стандьне ӧса дәрбаз кьн ча лазьм ә, бәрхԝә нәкʹәвә, ле бьфькьрә, кӧ щара дьн ча бьки, ԝәки рʹьнд дәрбаз бә». Әԝ бав ӧса жи дьбежә, ԝәки пешийа һәр һинбуне әԝ бь дӧа жь Йаһоԝа һиви дькә, ԝәки али ԝан һʹәмушка бькә сәва хԝә рʹаст бьдьнә кʹьфше һьндава һинбуне (Зәбур 119:66).

¹³ Дәрбазкьрьна һинбуна тʹәви малбәте борщдарийа де-бавед хԝәдехоф ә. Рʹаст ә һьнә де-бав нькарьн мина дәрсдара бьн у ԝанарʹа чәтьн ә һинбуне бь һʹәԝас дәрбаз кьн. Ле һәрге һун зарʹед хԝә «бь кьра у рʹастийе» һʹьз дькьн, демәк һуне бь мьлуктийе у һʹәлалийе али ԝан бькьн, ԝәки рʹӧһʹанида пешда һәрʹьн (1 Йуһʹәнна 3:18). Щар-щара, дьбәкә зарʹ бьдьнә кʹьфше кӧ нәрʹази нә, ле дьԛәԝьмә әԝана фәʹм дькьн, ԝәки һун ԝана гәләк һʹьз дькьн у дьхԝазьн һʹале ԝана хԝәш бә.

14. Ча дькарьн бьдьн хәбате хәбәред жь Ԛануна Дӧщари 11:18, 19, чахе тʹәви зарʹа дәрһәԛа пьрсед рʹӧһʹани шеԝьр дькьн?

¹⁴ Пьрсед фәрз гәрәке нә тʹәне сәр һинбуна тʹәви малбәте шеԝьр кьн. Те бира ԝә Йаһоԝа чь тʹәми да де-бава? Әԝи гот: «Ле ван хәбәред мьн нава хԝә у дьле хԝәда хԝәйи кьн, ԝан чаԝа нишан ль сәр дәсте хԝә гьредьн у ӧса жи бьра әԝ ль сәр әʹнийа ԝә ль навбәра чʹәʹвед ԝәда бьн. Зарʹед хԝә һини ԝан кьн. Ван хәбәра ԝанарʹа гьли ки гава мала хԝәда рʹуньшти йи йан рʹеда йи, гава пʹалдьди у гава рʹадьби». (Ԛануна Дӧщари 11:18, 19; ӧса жи бьньһерʹә Ԛануна Дӧщари 6:6, 7.) Әԝ йәк найе һʹәсабе, ԝәки де-бав гәрәке сьбе һʹәта еваре зарʹед хԝәрʹа мьзгинийе гьли кьн. Ле малхе мале гәрәке мәщала бәрʹнәдә, сәва рʹӧһʹанида али малбәта хԝә бькә.

ШИРӘТ У ԚӘДЬР

15, 16. а) Чь те һʹәсабе ширәткьрьн? б) Кʹе йә борщдар, сәва зарʹа ширәт кә у кʹе борщдар ә, гӧһ бьдә ширәта?

¹⁵ Ширәт әԝ һәйә һинкьрьн, чь кӧ мәрьва рʹаст дькә. Пʹарәкә ширәте жи хәбәрдан ә. Ширәткьрьн һе зедә те һʹәсабе рʹасткьрьн, нә кӧ щәзакьрьн, ле щарна щәзакьрьн жи лазьм ә. Бәле чахе зарʹед ԝә һе бьчʹук бун, ԝанарʹа лазьм бу ширәткьрьн, ле ньһа кӧ әԝана ида мәзьн ьн, һе зедә һʹәԝще ширәта нә, нә кӧ бәре. Зарʹед аԛьл фәʹм дькьн кӧ әԝ йәк ӧса нә.

¹⁶ Кʹьтеба Пирозда ньвисар ә: «Ахмах дәрса баве хԝә беһӧрмәт дькә, ле йе гӧһ дьдә һьлатьне, фәрасәта ԝи зедә дьбә» (Мәтʹәлок 15:5). Жь ве рʹезе гәләк тьшт дькарьн һин бьн. Әԝ рʹез һелан дькә, ԝәки ширәта бьдьн зарʹа. Йан зарʹ ча ԝе гӧһ бьдә һьлатьне, һәрге һьлатьн нәстандийә? Борще ширәткьрьне, Йаһоԝа дайә сәр стуйе де-бава, илаһи бав ьн борщдар. Ле гӧһдайина ширәта борщдарийа зарʹа йә. Һәрге зарʹ гӧһ бьдә ширәтед де-баве хԝә, әԝе гәләк тьштед баш һин бә у һьндьк шашийа бькә әʹмьре хԝәда (Мәтʹәлок 1:8). Кʹьтеба Пирозда ньвисар ә: «Йе ширәта ԛәбул нәкә бәләнгази у ԛаре бен сәре ԝи, ле йе гӧһ дьдә һьлатьне, ԛәдьре ԝийе бьльнд бә» (Мәтʹәлок 13:18).

17. Де-бав гәрәке чь щурʹәйи сәрԝахт бьн, чахе зарʹед хԝәйи мәзьн ширәт дькьн?

¹⁷ Чахе де-бав зарʹед хԝә ширәт дькьн, әԝана гәрәке сәрԝахт у фәсал бьн, ԝәки гәләк сәрт нибьн. Чьмки ӧса зарʹ дькарә һерс кʹәвә у һәла һе жи хԝәда баԝәр нибә (Колоси 3:21). Ле нә жи лазьм ә һаԛас нәрм бьн, кӧ ширәтед фәрз нәдьн зарʹа. Нәрмбуна ӧса дькарә зийане бинә. Мәтʹәлок 29:17-да ньвисар ә: «Дьле кӧрʹе хԝә бешинә, әԝе рʹьһʹәтийе бьдә тә у ԝе бьбә барьстанийа рʹӧһʹе тә». Ле рʹеза 21-да те готьне: «Йе кӧ бьчʹуктийеда хӧламе хԝә назьк хԝәй кә, ахьрийеда әԝе бьбә миратʹхӧре ԝи». Рʹаст ә, әԝ рʹез дәрһәԛа хӧлам дьбежә, ле әԝ ӧса жи дәрһәԛа зарʹед мәзьн ә.

18. Ширәткьрьн чь избат дькә у де-бав жь чь дькарьн хԝә дур бьгьрьн, чахе зарʹа ширәт дькьн у пәй ԝан дьньһерʹьн?

¹⁸ Бь рʹастийе, ширәткьрьна рʹаст, һʹьзкьрьна де-бава дьдә кʹьфше (Ибрани 12:6, 11). Һәрге һун де-бав ьн, демәк һун рʹьнд заньн, чьԛас чәтьн ә бь сәрԝахти зарʹа ширәт кьн у һәртʹьм пәй ԝан бьньһерʹьн. Щара дьбәкә ӧса бе кʹьфше, кӧ сәва әʹдьлайа нәфәред мале, дьһа һеса йә бьһельн, ԝәки әԝ зарʹа кӧ пе нькарьн, ча дьхԝазә ӧса бькә. Ле сафикьрьна ӧса ԝе кʹаре нәйнә, чьмки зарʹ ԝе рʹу бьстинә у бьбә йәки сәрһʹьшк (Мәтʹәлок 29:15; Галати 6:9).

ШЬХӦЛ У ЛИСТЬК

19, 20. Де-бав ча дькарьн хԝә бь аԛьлайи бьдьн кʹьфше, чахе лазьм ә сафи кьн кӧ зарʹед ԝан ча ԝәʹдә дәрбаз кьн?

¹⁹ Бәре жь зарʹа дьһатә дәʹԝакьрьне, ԝәки али де-бава бькьн. Ле иро ԝәʹде зарʹа гәләк һәйә. У әв дьнйа ӧса дькә, кӧ зарʹ ԝи ԝәʹде хԝә, бош-бәтал хәрщ кьн. У һәрге дина хԝә бьдьне, кӧ әв дьнйа ча дьньһерʹә сәр нормед Хԝәде дәрһәԛа намусийе, ԝе фәʹмдари бә кӧ чьрʹа мәрьв һаԛас бебәхт у берʹож ьн.

²⁰ Ләма жи де-бавед аԛьл дәԝса зарʹа хԝәха сафи дькьн, ԝәки зарʹ чаԝа ԝәʹде хԝә дәрбаз кьн. Ле бир нәкьн кӧ зарʹа ԝә мәзьн дьбә. Әԝ дьбәкә дьфькьрә, кӧ тʹәви ԝи ида гәрәке ӧса нибьн, чаԝа тʹәви зарʹа бьчʹук. Демәк, ԝе алийе де-бавада аԛьлайи бә, һәрге азайе бьдьнә зарʹед хԝә, кӧ хԝәха сафи кьн, чаԝа ԝәʹдә дәрбаз кьн. Ле кʹәнге гәрәке әԝе азайе бьдьнә зарʹа? Чахе зарʹ рʹаст дьжберьн, ча ԝәʹде хԝә дәрбаз кьн, демәк чахе рʹӧһʹанида ида гьһишти нә. Щара зарʹед мәзьн сафикьрьнед рʹаст накьн алийе кʹьламада, һәвалтийеда у тьштед дьнда. Дәрәщед ӧсада лазьм ә тʹәви ԝан хәбәр дьн, ԝәки паше әԝана бькарьбьн сафикьрьнед рʹаст бькьн.

21. Чахе зарʹ сәрԝахти дьдә кʹьфше ԝе йәкеда, кӧ чьԛас ԝәʹдә гәрәки хәрщ кә сәр ԝәʹдәдәрбазкьрьне, карʹа ԝе йәке чьда нә?

²¹ Чьԛас ԝәʹдә лазьм ә бона һесабуне хәрщ кьн? Һьнә ԝәлатада зарʹед мәзьн дьфькьрьн кӧ изьна ԝан һәйә һәртʹьм ԝәʹдә дәрбаз кьн. Де-бав гәрәке зарʹа һин кьн, кӧ лазьм ә бона тьштед дьн жи ԝәʹдә хәрщ кьн. Мәсәлә, һинбуна тʹәви малбәте у йа шәхси дәрбаз кьн, тʹәви Мәсиһийед гьһишти хәбәр дьн, һәрʹьнә щьвате, у ӧса жи шьхӧле мале бькьн. У әв йәк ԝе нәһелә, кӧ «шабуна ви әʹмьрива» гьредайи, Хәбәра Хԝәде дьле зарʹада бьхәньԛинә (Луԛа 8:11-15).

22. Зарʹа мәзьн гәрәке шабуне бәрамбәри чь бькә?

²² Сьлеман Пʹадша готийә: «Әз заньм кӧ бона мәрьва баш ә кӧ ша бә у ԛәнщийе бькә әʹмьре хԝәда у жь ԝе четьр тьштәк тʹӧнә, у һәр мәрьв гәрәке бьхԝә, вәхԝә у ләзәте бьвинә жь һʹәму кьред хԝә. Әԝ дайина Хԝәде йә» (Ԝаиз 3:12, 13, ДТʹ). Бәле, әʹмьре бе шабун, әԝ нә әʹмьр ә. Хәбата бь дьл у щан. Рʹожа иро гәләк зарʹед мәзьн ньзаньн кӧ мәрьв дьлрʹьһʹәтикә ча дьстинә, чахе бь дьл у щан дьхәбьтә. Йан жи чахе мәрьв чәтьнайике алт дькә, чьԛас ша дьбә у ԛәдьре хԝә дьгьрә. Ньһа мәщала һʹәму зарʹа тʹӧнә кӧ хԝәрʹа пʹешәки дәст хьн, ԝәки паше пе әʹбура хԝә бькьн. Әв йәк рʹасти жи борщәки чәтьн ә бона де-бава. Гәло һуне али зарʹа хԝә бькьн, ԝәки әԝ пʹешәки бьстинә? Һәрге һун зарʹа хԝә һин кьн, кӧ әԝ хәбате ԛимәт кә у һәла һе жи һʹьз кә, бь ве йәке һуне али ԝи бькьн кӧ әԝ рʹаст бьньһерʹә сәр хәбате, чь кӧ ԝе кʹаре бьдә ԝи тʹәмамийа әʹмьре ԝида.

ЗАРʹО МӘЗЬН ДЬБЬН

23. Де-бав ча дькарьн зарʹед хԝәйә мәзьн ԛәԝи кьн?

²³ Һәрге проблема ԝә тʹәви зарʹа ԝәйә мәзьн һәбә жи, бир нәкьн ве ширәта жь Кʹьтеба Пироз: «Һʹьзкьрьн тʹӧ щар кʹӧта набә» (1 Корьнтʹи 13:8). Һʹьзкьрьна хԝәйә һьндава зарʹа вәнәшерьн, ԝанарʹа бьдьнә кʹьфше. Пьрсе бьдьнә хԝә, «Әз пʹайа дьдьм һәр зарʹәкә хԝә сәва ве йәке, кӧ әԝ дькарә чәтьнайед хԝә сафи кә у дәрбаз кә? Чахе мәщал чедьбә, әз пʹайа дьдьмә зарʹа у дьбежьм кӧ әз ԝана ԛимәт дькьм, йан әве мәщале жь дәсте хԝә бәрдьдьм?» Рʹаст ә щара дьбәкә һун у зарʹ һәврʹа нәԛайил бьн, ле һәрге зарʹа ԝәйә мәзьн баԝәр ә кӧ һун ԝи һʹьз дькьн, әм дькарьн бежьн, кӧ әԝе жи һьндава ԝә бь һʹьзкьрьн бә.

24. Кʹижан принсипа Кʹьтеба Пироз бәрдәԝам дькә рʹаст дьминә ширәткьрьна зарʹада, ле гәрәке чь бир нәкьн?

²⁴ Чахе зарʹ ида мәзьн ьн дәстпедькьн гәлә тьштед фәрзда хԝәха сафикьрьна бькьн. Һьнә дәрәщада де-бав дьбәкә рʹази нәбьн сафикьрьнед ԝанарʹа. Чь гәрәке бькьн, һәрге зарʹ сафи дькә, кӧ Йаһоԝа Хԝәдерʹа хьзмәт нәкә? Тьште ӧса дьԛәԝьмә. Һәла һе жи һьнә мьлийакʹәтед ль әʹзмана кӧ зарʹед Йаһоԝа бун, ширәта ԝи ԛәбул нәкьрьн у мьԛабьли ԝи дәркʹәтьн (Дәстпебун 6:2; Щьһуда 6). Зарʹ компотер ниньн кӧ әм програмайе ӧса чекьн, ԝәки әԝана пе хԝәстьна мә бькьн. Азайа ԝан һәйә кӧ ча бьхԝазьн ӧса сафикьрьна бькьн, бона сафикьрьнед хԝә әԝана хԝәха щабдар ьн бәр Йаһоԝа. Ле Мәтʹәлок 22:6-да ньвисар ә: «Зарʹотийеда рʹийа рʹаст һин бькә, гава әԝ кал бә, иди әԝе жь ԝе нәкʹәвә». У әв принсип рʹаст дьминә.

25. Кʹижан ә мәщала лапә баш, бь кʹижани де-бав рʹазибуна хԝә Йаһоԝарʹа дьдьн кʹьфше кӧ ԛәдьр стандьнә бунә де-бав?

²⁵ Зарʹед хԝәрʹа һʹьзкьрьне бьдьнә кʹьфше. Чьԛас дәсте ԝә те, һʹәму тьшти бькьн, ԝәки ԝана бь принсипед Кʹьтеба Пироз мәзьн кьн. Һун кӧ ӧса бькьн һуне мәщала лапә баш бьдьн ԝан, кӧ борщдарийа һьлдьн сәр хԝә у хԝәдехоф бьн. Әв йәк бона ԝә мәщала лапә баш ә кӧ һун рʹазибуна хԝә Йаһоԝарʹа дьдьн кʹьфше, ԝәки ԝә ԛәдьр стандийә, бунә де-бав.