Кʹьтеба Пироз, Хәбәра жь Хwәде йә

1, 2. Чьрʹа әм дькарьн бежьн, кӧ Кʹьтеба Пироз пʹешкʹеша жь Хwәде йә?

ҺӘЛА бьдә һʹәсабе хwә кӧ һәваләки тә тьштәки гәлә баш у бьһа тәрʹа пʹешкʹеш бьдә. Wи чахи тӧйе хwә ча тʹәхмин ки? Тӧйе гәләк ша би, ӧса нинә? Дьбәк жи тӧйе ша би кӧ тә тьштәки баш стандийә, ле һе зедә тӧйе ша би сәва ве йәке, кӧ әw һәвале тә бона тә хәм кьрийә у һәвалтийа тʹәви тә qимәт дькә. Бейи шьк тӧйе wирʹа гәләк рʹази би, ӧса нинә?

² Кʹьтеба Пироз һәйә пʹешкʹеша Хwәде бона һәр кәси, сәва чь жи әм бь рʹастийе гәрәке рʹази бьн. Жь ве кʹьтебе әм тьштед ӧса дькарьн һин бьн, чь кӧ зедә щики дьн найе дитьне йан жи һин кьрьне. Мәсәлә, Кʹьтеба Пироз һин дькә дәрһәqа әʹфьрандьна әʹрд у стәйркед әʹзмана, у ӧса жи дәрһәqа мәрийед пешьн. Дь Кʹьтеба Пирозда ширәтед ӧса һәнә, йед кӧ бь рʹастийе жи дькарьн али мә бькьн, wәки әм проблемед хwә сафи кьн. Әw ӧса жи шьровәдькә, wәки Хwәде wе чаwа созед хwә бинә сери у әʹмьре ль сәр әʹрде бәхтәwар кә. Бь рʹастийе жи Кʹьтеба Пироз пʹешкʹеша жь Хwәде йә!

3. Чьрʹа әм жь бо пʹешкʹеша Йаһоwа гәрәке ша бьн, у чьрʹа Йаһоwа Хwәде Кʹьтеба Пироз дайә мә?

³ Жь бо пʹешкʹеша Йаһоwа Хwәде, демәк Кʹьтеба Пироз әм гәрәке гәләк ша бьн, чьмки әв пʹешкʹеш гәләк тьшта дәрһәqа Йаһоwа Хwәде мәрʹа әʹйан дькә. Йаһоwа Кʹьтеба Пироз ләма пʹешкʹеш дайә мә, wәки әм бькарьбьн рʹьнд wи нас бькьн. Кʹьтеба Пироз рʹасти жи дькарә али тә бькә, wәки тӧ незики Йаһоwа Хwәде би.

4. Әw йәк кӧ Кʹьтеба Пироз чьqаси кʹьтебәкә бәлабуйи йә, ча ль сәр тә һʹӧкӧм дьбә?

⁴ Һәрге дь мала тәда Кʹьтеба Пироз һәйә, әв те һʹәсабе wәки тӧ хwәйе кʹьтебәкә гәләк баш у әʹйан и. Кʹьтеба Пироз ль сәр 2 600 зьмана һатийә дәрхьстьне, демәк wәкә 90 сәләф жь мәрийа дькарьн ве кʹьтебе бьхуньн. Хенщи ве йәке, һәр һʹәфтийе бь милйона Кʹьтеба Пироз тенә нәшьркьрьне! Бь тʹәмамийе Кʹьтеба Пироз йан жи пʹаред ве, бь милйарда һатьнә нәшьркьрьне. Бь рʹастийе жи Кʹьтеба Пироз нә мина кʹьтебед дьнена йә.

5. Чь те һʹәсабе, кӧ Кʹьтеба Пироз «жь бина бәр Хwәде йә»?

⁵ Һәйнәсәр, Кʹьтеба Пироз «жь бина бәр Хwәде йә». (Бьхунә 2 Тимотʹейо 3:16.) Гәло әв чь те һʹәсабе? Кʹьтеба Пироз хwәха щаба ве пьрсе дьдә: «Мәрьва бь рʹебәрийа Рʹӧһʹе Пироз жь Хwәдеда хәбәр данә» (2 Пәтрус 1:21). Сәва кӧ әв йәк фәʹмдари бә, мәсәләкә ӧса дькарьн биньн. Кальк дьбежә нәвийе хwәрʹа, wәки әw дәwса wи нәʹме лекә. Кальк дьбежә, ле нәви ледькә. Демәк дь нәʹмеда нет-фькьред кʹи ньвисийә? Бәле, нет-фькьред кальке. Ӧса жи мәрийед кӧ дьньвисин Кʹьтеба Пироз, нә кӧ фькьред хwә, ле фькьред Хwәде ледькьрьн. Бь рʹастийе жи Кʹьтеба Пироз «жь бина бәр Хwәде йә» (1 Тʹесалоники 2:13).

ҺӘВГЬРЕДАН У РʹАСТИЙА КʹЬТЕБА ПИРОЗ

6, 7. Һәвгьредан у рʹастийа Кʹьтеба Пироз чь мәрʹа әʹйан дькә?

⁶ Кʹьтеба Пироз нава 1 600 сала һатийә ньвисаре. Ньвискʹаред wе, дь щурʹә-щурʹә зәманада дьжитьн у щурʹә-щурʹә мәри бун. Һьнә жь wан щоткʹар, мәʹсигьр у шьван бун. Һьнәк жи пʹехәмбәр, һʹакьм у пʹадша. Мәсәлә Луqайе ньвискʹар һʹәким бу. Рʹаст ә ньвискʹаред Кʹьтеба Пироз нә мина һәв бун, әwана тʹәви һәв гьредайи нибун, ле Кʹьтеба Пироз жь сәри һʹәта хьлазийе һәв гьредайи йә у рʹаст ә.

⁷ Дь Кʹьтеба Пирозда, Дәстпебунеда те гьликьрьне кӧ һʹәму кӧл-дәрд у проблемед мәрийа ча дәстпебун. Ле хьлазийа кʹьтебе жи әʹйан дькә, wәки тʹәмамийа әʹрде wе чаwа бьбә щьнәт. Дь тʹәмамийа Кʹьтеба Пирозда дәрһәqа чәнд һʹәзар салед тʹәрихийа дьнйайе те гьликьрьне, у ӧса жи те нишан кьрьне чаwа qьрара Хwәде һеди-һеди әʹйан дьбу. Бәле, һәвгьредана Кʹьтеба Пироз гәлә әʹщебмайи йә, у әв йәк избат дькә кӧ Кʹьтеба Пироз Хәбәра Хwәде йә.

8. Жь чь те кʹьфше кӧ Кʹьтеба Пироз дь алийе зандарийеда рʹаст ә? (Чәнд мәсәла гьли кә).

⁸ Кʹьтеба Пироз жь алийе зандарийе жи рʹаст ә. Дь ве кʹьтебеда дәрһәqа тьштед ӧса ньвисар ьн, чь кӧ паше гәләк сал шунда сәва мәрийа әʹйан бун. Мәсәлә, бәре щьмәʹтед дор-бәре щьмәʹта Исраеле ньзаньбун чаwа сьһʹәт-qәwата хwә хwәй кьн. Ле ида wи чахи, дь кʹьтеба Qануна Кʹаһинтийеда һьнә qанунед ӧса һатьбун ньвисаре, кӧ щьмәʹта Исраеле, бь qәдандьна ван qануна дькарьбун һьн хwә тʹәмьз хwәй кьрана, һьн жи сьһʹәт-qәwат буна. Бәре гәләк мәрьв дьшьрмиш дьбун кӧ әʹрд сәр тьштәки сәкьнийә у әw пәʹн ә, ле Кʹьтеба Пироз зәлал дьгот кӧ әʹрд нава һәwеда нә, тьштәкива дардакьри нинә у әw гьровәр ә (Ишайа 40:22; Ибо 26:7). Рʹаст ә Кʹьтеба Пироз кʹьтебәкә зандарийе нинә, ле гава әв дәрһәqа тьштед зандарийе гьли дькә, әw тʹьме рʹаст ә. Бь рʹастийе жи кʹьтеба жь Хwәде гәрәке һʹәма ӧса буйа, ӧса нинә?

9. (а) Ча Кʹьтеба Пироз хwәха әʹйан дькә, wәки әw дь алийе тʹәрихийеда жи рʹаст ә? (б) Мьлуктийа ньвискʹаред Кʹьтеба Пироз, чь дәрһәqа ве кʹьтебе мәрʹа әʹйан дькә?

⁹ Кʹьтеба Пироз ӧса жи дь алийе тʹәрихийеда рʹаст ә. Кʹьтеба Пироз әʹламәтийа һур бь һур у рʹаст дәрбази мә дькә. Мәсәлә, гава Кʹьтеба Пироз дәрһәqа мәрьвәки гьли дькә, әw нә тʹәне наве wи мәрʹа әʹйан дькә, ле ӧса жи бона тʹәмамийа рʹькʹьнйата wи гьли дькә.a Тʹәрихзанед дьнйайе, гава дирока мьләте хwә дьньвисин, тʹьме шашийа мьләт вәдьшартьн. Ле ньвискʹаред Кʹьтеба Пироз мьлук у һʹәлал бун, wана һьн дәрһәqа шашийед мьләт, һьн жи дәрһәqа шашийед хwә дьньвисин. Мәсәлә, дь кʹьтеба Жьмарда дәрһәqа шашикә Мусайә гәләк гьран те гьликьрьне, у әв әʹламәти Муса пе дәсте хwә ньвисибу (Жьмар 20:2-12). Рʹастийа у һʹәлалийа ӧса дь ньвисаред тʹәрихийеда тʹӧнә, ле дь Кʹьтеба Пирозда һәйә, чьмки Кʹьтеба Пироз Хәбәра Хwәде йә.

КʹЬТЕБА КӦ БЬ ЗАНӘБУНЕД КЕРҺАТИ ТʹЬЖӘ ЙӘ

10. Чьрʹа әw йәк кӧ Кʹьтеба Пироз кʹьтебәкә керһати йә, мә әʹщебмайи накә?

¹⁰ Чьмки Кʹьтеба Пироз жь бина бәр Хwәде йә, ләма жи «керһати йә бона һинкьрьне, леһьлатьне, рʹасткьрьне у ширәткьрьна жийина рʹастийеда» (2 Тимотʹейо 3:16). Бәле, Кʹьтеба Пироз кʹьтебәкә керһати йә. Әв кʹьтеб хәйсәт, мәһʹсуләт у рʹабун-рʹуньштандьна мәрийа рʹьнд әʹйан дькә. Авторе Кʹьтеба Пироз Йаһоwа Хwәде йә. Әw һәйә әʹфьрандаре һʹәму тьшти, ләма жи әw гәлә баш мә фәʹм дькә, у жь мә рʹьндтьр мә нас дькә. Хенщи wе йәке, әw рʹьнд занә чь мәрʹа лазьм ә, wәки әм бәхтәwар бьн. Әw ӧса жи рʹьнд занә, жь кʹижан рʹе әм гәрәке дур кʹәвьн, wәки нәкʹәвьнә qәзийе.

11, 12. (а) Дь кʹьтеба Мәтта 5-7-да дәрһәqа кʹижан пьрсед фәрз хәбәрдан дьчә? (б) Чь ширәтед баш дь Кʹьтеба Пирозда һәнә, у чьрʹа әв ширәт нә кӧ тʹәне бәре, ле ӧса жи иро керһати нә?

¹¹ Wәрә әм ньһа һьнәки дәрһәqа һинкьрьнәкә баш хәбәр дьн, йа кӧ дь кʹьтеба Мәтта сәре 5-7-да ньвисар ә. Дь ве һинкьрьнеда хәбәрдан дьчә дәрһәqа чәнд пьрсед фәрз. Мәсәлә, чаwа бь рʹастийе жи бәхтәwар бьн, ча проблемед ортʹа һәв сафи кьн, чаwа дӧа бькьн у чаwа рʹаст бьньһерʹьн ль сәр һәбун-тʹӧнәбуне. Әв ширәт нә кӧ тʹәне һена бәреда керһати бун, ле ӧса жи рʹожа иройин, дь wәʹде мәда.

¹² Дь Кʹьтеба Пирозда һәнә ширәт у принсип дәрһәqа малбәте, хәбате у тʹьваqийе. Ширәтед Кʹьтеба Пироз сәва һәр кәса керһати нә у дь һʹәму дәрәщада дькарьн бенә хәбате. Әw йәк кӧ занәбунед Кʹьтеба Пироз рʹасти жи керһати нә, рʹьнд те кʹьфше жь гьлийед Йаһоwа Хwәде, йе кӧ әwи бь пʹехәмбәрәки хwә Ишайа, готьбу: «Хӧдан Хwәдайе тә, йе кӧ тьште qәнщ фери [һини] тә кьрийә, . . . әз ьм» (Ишайа 48:17).

КʹЬТЕБА ПʹЕХӘМБӘРТИЙЕ

13. Йаһоwа бь Ишайа пʹехәмбәр дәрһәqа Бабилоне, чь һур бь һур пʹехәмбәрти кьрьбу?

¹³ Дь Кʹьтеба Пирозда гәлә пʹехәмбәрти һәнә. Гәләк жь wан ида һатьн сери. Wәрә әм ньһа дәрһәqа пʹехәмбәртике хәбәр дьн, йе кӧ Йаһоwа бь пʹехәмбәрәки хwә Ишайа, дәрбази мәрийа кьр. Ишайа пешийа дәwрана мә дь qьрʹна һʹәйштада дьжит, у әwи дәрһәqа wеранбуна Бабилоне пʹехәмбәрти дькьр (Ишайа 13:19; 14:22, 23). Дәрһәqа Бабилоне пешда һур бь һур һатьбу шьровәкьрьне, wәки әw wе чаwа wеран бә. Мәсәлә, һатьбу пʹехәмбәрти кьрьне, кӧ ава чʹем wе бьмьчʹьqә, әскәред дьжмьна wе чʹемва дәрбаз бьн у бе шәрʹ бькʹәвьнә Бабилоне. Ле хенщи ве йәке, һатьбу пʹехәмбәрти кьрьне, wәки наве wи пʹадше кӧ Бабилоне wеран кә, wе Корәш бә. (Бьхунә Ишайа 44:27-45:2.)

14, 15. Кʹижан пʹехәмбәрти, дәрһәqа wеранкьрьна Бабилоне һатьн сери?

¹⁴ Wәкә 200 сал шунда, сала 539 пешийа дәwрана мә, шәва 5-6 Щотмәһе, әскәред дьжмьна незики Бабилоне щиwар бун. Ле гәло сәркʹаред wан кʹи бу? Бәле, пʹадше фарьса бь наве Корәш. Ле wәрә әм пебьһʹәсьн, әскәред Корәш рʹасти бе шәрʹ кʹәтьнә Бабилоне, ча кӧ һатьбу пʹехәмбәрти кьрьне?

¹⁵ Wе шәве Бабилонийа кʹефәкә мәзьн дькьрьн. Әwана бе хәм у архайин бун, чьмки сура шәһәр гәләк мәзьн у qайим бу. Ле wи чахи Корәш бь аqьлайи рʹийа ава чʹем, кӧ дькʹәтә шәһәр, бьрʹи у да гӧһастьне. Ӧса ава чʹем һеди-һеди дакʹәт, у әскәр ида карьбун чʹемва дәрбаз бьн у незики диwаред шәһәр бьн. Ле гәло ньһа әскәр wе чаwа жь диwаред шәһәр дәрбаз бьн? Wе шәве ӧса qәwьми кӧ дәргәһе шәһәр вәкьри мабун!

16. (а) Чь Ишайа готьбу дәрһәqа ахьрийа Бабилоне? (б) Ча пʹехәмбәртийа Ишайа бь тʹәмами һатә сери?

¹⁶ Дәрһәqа Бабилоне һатьбу пʹехәмбәрти кьрьне, wәки зәмане дәрбаз бьн ле ль wьр ида тʹӧ кәс wе нәжи у әʹрәб жи чадьред хwә wе данәйньн у шьван жи кәрийед пез wе нәйньн ль wьр (Ишайа 13:20). Әва пʹехәмбәрти нишан дькә, wәки Бабилон нә кӧ тʹәне wе бе зәфт кьрьне, ле wе бе qьрʹкьрьне жи у һʹәта-һʹәтайе wеран бьминә. Әв йәк рʹасти жи ӧса qәwьми, тӧ дькари Бабилона wеран у вала пе чʹәʹве хwә бьбини дь Ираqеда. Әw жь шәһәре Бәхдаде дь алийе башурда 80 км. wеда йә. Әв йәк избат дькә wан гьлийед Йаһоwа, йе кӧ әwи готьбу Ишайа: «Әзе wе бь гезийа кʹӧтакьрьне гези кьм» (Ишайа 14:22, 23, ДТʹ).b

17. Ча әw йәк кӧ пʹехәмбәрти жь Кʹьтеба Пироз һатьн сери, баwәрбуна мә qәwи дькә?

¹⁷ Әw кӧ пʹехәмбәртийед жь Кʹьтеба Пироз һатьн сери, баwәрбуна мә һе qәwи дькә. Һәрге Йаһоwа бәре һʹәму созед хwә дьани сери, демәк дь ахьрийеда жи әw әʹсәйи wе созе хwә бинә сери у әʹрде wе бькә щьнәт. (Бьхунә Жьмар 23:19.) Әм рʹасти жи дькарьн гӧман бьн, кӧ жийина һʹәта-һʹәтайе wе һәбә, чьмки «бона wе жийине, Хwәдайе хwәйе готьна хwә, һе дәwред бәреда соз дайә» (Тито 1:2).c

«ХӘБӘРА ХWӘДЕ САХ У ЗОР Ә»

18. Чь гот Паwлосе шанди дәрһәqа qәwата «Хәбәра Хwәде»?

¹⁸ Чь кӧ әм дь ви сәрида дәрһәqа Кʹьтеба Пироз пеһʹәсийан, сәд сәләфи избат дькә, wәки Кʹьтеба Пироз бь рʹастийе жи нә мина кʹьтебед дьнена йә. Бәле, әв кʹьтебәкә һәвгьредайә, бь занәбунед керһати тʹьжә йә, кʹьтеба пʹехәмбәртийе йә у рʹаст ә. Ле хенщи ве йәке дь Кʹьтеба Пирозда гьлийед ӧса ньвисар ьн: «Хәбәра Хwәде сах у зор ә у жь һәр шуре дӧдәви бьрʹатьр ә, кӧ дәрбази һʹәта навбәра рʹӧһʹ у щан, һәсту у мәжу дьбә, нет у фькьред дьла жи әʹнәнә дькә» (Ибрани 4:12).

19, 20. (а) Ча Кʹьтеба Пироз дькарә али мә бькә wәки әм тедәрхьн кӧ әм чь щурʹәйи нә? (б) Сәва пʹешкʹеша жь Хwәде, демәк Кʹьтеба Пироз, тӧ ча дькари рʹазибуна хwә нишан ки?

¹⁹ Бь сайа хwәндьна Кʹьтеба Пироз, демәк «хәбәра» Хwәде, әʹмьре мә дькарә бе гӧһастьне. Кʹьтеба Пироз али мә дькә, wәки әм хwә бьщерʹьбиньн у тедәрхьн һәла әм чь щурʹәйи нә. Дьбәк әм дьбежьн кӧ әм Хwәде һʹьз дькьн, ле бь сайа хwәндьн у леколина Кʹьтеба Пироз әм дькарьн тедәрхьн, һәла нета мә чь йә, у бь рʹастийе чь йә дьле мәда.

²⁰ Бь рʹастийе жи Кʹьтеба Пироз, Хәбәра жь Хwәде йә. Әм гәрәке ве кʹьтебе бьхуньн, һин бьн у һʹьз бькьн. Кʹьтеба Пироз пʹешкʹеша жь Хwәде йә, ләма жи әм гәрәке рʹазибуна хwә сәва ве пʹешкʹеше нишан кьн. Һәрге әм диса жи кʹур леколине Кʹьтеба Пироз бькьн, әме бьзаньбьн һәла нетед Хwәде сәва инсанәт чь йә. Дь сәре сьсйада әме пебьһʹәсьн, Хwәде чь соз дайә у әw чаwа созед хwә wе бинә сери.