Мьлйакʹәт у Щьн, Ча ль сәр Мә Һʹӧкӧм Дьбьн?

1. Чьрʹа әм гәрәке пебьһʹәсьн дәрһәqа мьлйакʹәта?

ЧАХЕ тӧ дьхwази рʹьнд тʹәви кәсәки бьби нас, тӧ ӧса жи насийа хwә дьди малбәта wи. Ләма жи сәва кӧ Йаһоwа рʹьнд нас ки, тӧ гәрәке дәрһәqа мьлйакʹәта жи пебьһʹәси, әw һәнә нәфәред малбәта Йаһоwайә әʹзмана. Дь Кʹьтеба Пирозда ль сәр мьлйакʹәта те готьне «лаwед Хwәде» (Ибо 38:7). Гәло Йаһоwа Хwәде чь шьхӧл дайә wан? Гәло дь тʹәрихийеда шьхӧле мьлйакʹәта ль сәр мәрийа һʹӧкӧм буйә? Дьбә кӧ шьхӧле мьлйакʹәта иро ль сәр әʹмьре тә жи һʹӧкӧм дьбә? Һәрге бәле, чаwа?

2. Ча мьлйакʹәт һатьнә дьне, у ль әʹзмана чьqас мьлйакʹәт һәнә?

² Дь Кʹьтеба Пирозда дәрһәqа мьлйакʹәта бь сәда щара һатийә ньвисаре. Wәрә әм бьньһерʹьн чәнд рʹеза, бь сайа кʹижана әм дькарьн һе зәʹф пебьһʹәсьн дәрһәqа мьлйакʹәта. Мьлйакʹәт ча һатьнә дьне? Дь кʹьтеба Колоси 1:16-да ньвисар ә: «Бь дәсте wи [Иса Мәсиһ] һәр тьштед ль әʹрд у әʹзмана әʹфьринә». Ча те кʹьфше, Йаһоwа бь дәсте Кӧрʹе хwәйи тайе тʹәне, демәк Иса Мәсиһ һʹәму мьлйакʹәт әʹфьрандийә. Ле ль әʹзмана чьqас мьлйакʹәт һәнә? Жь Кʹьтеба Пироз әм педьһʹәсьн, wәки ль әʹзмана бь һʹәзара у милйона мьлйакʹәт һәнә, у әwана гьшк qәwат ьн (Зәбур 103:20).

3. Жь кʹьтеба Ибо 38:4-7, дәрһәqа мьлйакʹәта әм чь педьһʹәсьн?

³ Дь Хәбәра Хwәдеда, демәк Кʹьтеба Пирозда, те готьне, кӧ чахе Йаһоwа Хwәде әʹрд дьәʹфьранд «һʹәмуйа лаwед Хwәде бь кʹефхwәшийева банг дькьрьн» (Ибо 38:4-7). Жь ве рʹезе те кʹьфше, кӧ мьлйакʹәт пешийа әʹфьрандьна мәрьва у пешийа әʹфьрандьна әʹрде һәбунә. Ӧса жи дь ван рʹезада те готьне, кӧ мьлйакʹәт һәврʹа «дьстьрийан». Бь ван хәбәра әʹйан дьбә, wәки һʹәста мьлйакʹәта һәйә, демәк әwана дькарьн шабьн у бәрхwә кʹәвьн.

МЬЛЙАКʹӘТ МӘРЬВА ХWӘЙ ДЬКЬН У АЛИ WАН ДЬКЬН

4. Жь Кʹьтеба Пироз ча те кʹьфше, кӧ мьлйакʹәтед амьн хәм дькьн бона һʹалхwәшийа мәрьва?

⁴ Чахе Йаһоwа у Иса мәрьвед пешьн әʹфьрандьн мьлйакʹәта жи жь әʹзмана дьньһерʹин, жь wан wәʹхтада мьлйакʹәтед амьн пәй мәрьва дьньһерʹьн у хәм дькьн дәрһәqа һʹалхwәшийа wан у ӧса жи дәрһәqа qәдандьна qьрара Йаһоwа Хwәде (Мәтʹәлок 8:30, 31; 1 Пәтрус 1:11, 12). Ле мьлйакʹәта ӧса жи дьдит, кӧ wәʹдә чьqас дәрбаз дьбу мәрьв һе зедә жь Әʹфьрандаре хwәйи һʹьзкьри дур дькʹәтьн у нәдьхwәстьн wирʹа qӧльх кьн. Бейи шьк, жь бо ве йәке мьлйакʹәтед амьн бәрхwә дькʹәтьн. Ле һәрге кәсәк тʹобә дькә у дәстпедькә гӧрʹа Йаһоwа Хwәде бькә, мьлйакʹәтед амьн «ша дьбьн» (Луqа 15:10). Жь вьр те кʹьфше, кӧ мьлйакʹәт гәлә хәм дькьн бона һʹалхwәшийа wан мәрийа, йед кӧ Хwәдерʹа qӧльх дькьн. Ләма жи, Йаһоwа тʹьме мьлйакʹәт дьшандьн, сәва кӧ али qӧльхкʹаред хwәйә амьн бькә у wана хwәй кә. (Бьхунә Ибрани 1:7, 14.) Ньһа әм пебьһʹәсьн чәнд мәсәла.

5. Кʹижан мәсәлә жь Кʹьтеба Пироз нишан дькьн, кӧ мьлйакʹәта али мәрьва кьрьнә?

⁵ Дӧ мьлйакʹәта, али мәрьвәки амьн Лут у qизед wи кьрьн. Wана Лут у qизед wи жь шәһәред зӧлм Содом у Гоморе дәрхьстьн у жь qьрʹкьрьне хьлаз кьрьн (Дәстпебун 19:15, 16). Пәй ве йәкерʹа чәнд сәд сал шунда, Данийел пʹехәмбәр, һатьбу авитьне бире ль нава шера. Ле шера зийан нәданә wи. Ле гәло әw йәк ча qәwьми? Данийел әw йәк ӧса шьровәкьр: «Хwәдайе мьн мьлйакʹәте хwә шанд у дәве шера гьртьн» (Данийел 6:22). Ӧса жи дь qьрʹна йәкеда, мьлйакʹәт Пәтрусе шанди жь кәле аза кьр (Кʹаред Шандийа 12:6-11). Хенщи ве йәке чахе Иса дәстпекьр ль сәр әʹрде qӧльх кә, мьлйакʹәта әw qәwи дькьрьн (Марqос 1:13). Пешийа мьрьна Иса жи, мьлйакʹәт wива хӧйа бу у «әw qәwат кьр» (Луqа 22:43). Бь рʹастийе жи дьлбиникә чьqас мәзьн бу сәва Иса, кӧ мьлйакʹәт әwи wәʹде фәрз дь әʹмьре wида, әw qәwи кьр.

6. (а) Ча рʹожа иройин мьлйакʹәтед баш хәм дькьн бона щьмәʹта Хwәде? (б) Дәрһәqа кʹижан пьрса әме ньһа хәбәрдьн?

⁶ Рʹожа иройин ль сәр әʹрде мьлйакʹәт ида qӧльхкʹаред Хwәдева хӧйа набьн. Рʹаст ә әв мьлйакʹәтед qәwат найнә дитьне, ле әwана хәм дькьн бона щьмәʹта Хwәде. Илаһи сәва кӧ һәләqәтийа мә тʹәви Йаһоwа Хwәде хьраб нәбә. Дь Кʹьтеба Пирозда те готьне: «Мьлйакʹәте Хӧдан, ль дора кәсед кӧ жь wи дьтьрсьн, артешгәһе ава дькә», демәк хwәй дькә, «у wан хьлаз дькә» (Зәбур 34:7). Әв гьли гәлә дьлбинийе дьдьнә мә, чьмки щьн дьхwазьн qьрʹа мә биньн! Ле щьн кʹи нә? Ча әwана һатьнә дьне? Ча әwана дькарьн зийане бьдьнә мә? Сәва кӧ щаба ван пьрса бьбиньн, wәрә әм кьн пебьһʹәсьн, чь qәwьми дәстпека тʹәрихийа инсанәте.

ЩЬН ДЬЖМЬНЕД МӘ НӘ

7. Мире-щьна чьqас мәри жь Хwәде дур хьст?

⁷ Ча әм жь сәре сьсийа пеһʹәсийан, йәк жь мьлйакʹәта хwәст сәркʹартийе бькә, у мьqабьли Хwәде дәркʹәт. Паше әw һатә нав кьрьне Шәйтʹан Мире-щьна (Әʹйанти 12:9). Паши ве йәке чахе Мире-щьна Һеwа хапанд, дь нава 1600 салада әwи диса гәләк мәри жь Хwәде дур хьст. Ле һәбун йед ӧса кӧ Хwәдерʹа амьн ман мәсәлә Һабил, Һәнох у Нӧһ (Ибрани 11:4, 5, 7).

8. (а) Ча һьнә мьлйакʹәт бунә щьн? (б) Щьна чь кьр, wәки жь Селава дь wәʹде Нӧһда хьлаз бьн?

⁸ Дь wәʹде Нӧһда һьнә мьлйакʹәтед дьн жи мьqабьли Хwәде дәркʹәтьн. Wана әʹмьре әʹзмана һишт, хwә кьрьн мәри у ӧса пәйа бун ль сәр әʹрде. Гәло чьрʹа? Дь кʹьтеба Дәстпебун 6:2-да те готьне: «Зарʹед Хwәде дитьн кӧ qизед мәрьвайе бәдәw ьн, жь wан кʹе кʹижан бәгәм дькьр хwәрʹа жьн дьстандьн (ПКʹМ)». Wана мәри һини хьрабийе дькьр, ле Йаһоwа дь һьндава ве йәкеда бе тʹалаш нибу, ләма жи әwи нәһишт кӧ зӧлмийа wан дьреж бькʹьшинә. Хwәде ль сәр тʹәмамийа әʹрде селав рʹакьр, у һʹәму мәрьвед зӧлм qьр бун. Тʹәне qӧльхкʹаред wийә амьн хьлаз бун (Дәстпебун 7:17, 23). Әв мьлйакʹәтед хьраб, йане щьн qальбед мәрьвайе һиштьн у пашда вәгәрʹийанә әʹзмана. Бь ви щурʹәйи wана алийе Мире-щьна, демәк «сәрwере щьна» гьрт (Мәтта 9:34).

9. (а) Чь qәwьми, чахе щьн пашда вәгәрʹийанә ль әʹзмана? (б) Дәрһәqа щьна әме чь пебьһʹәсьн?

⁹ Хwәде ча бәри Мире-щьна дабу, ӧса жи бәри wан щьна да, йед кӧ wәʹде селаве вәгәрʹийанә ль әʹзмана (2 Пәтрус 2:4). Рʹаст ә рʹожа иройин әв мьлйакʹәт нькарьн бьбьнә мәри, ле әwана диса жи мәрийарʹа хьрабийе дькьн у хьраб ль сәр wан һʹӧкӧм дьбьн. Бь аликʹарийа щьна, Шәйтʹан Мире-щьна «тʹәмамийа дьне хальфандийә» (Әʹйанти 12:9; 1 Йуһʹәнна 5:19). Ле чаwа? Щьн, щурʹә-щурʹә тьшт дькьн, wәки мәрийа бьхальфиньн у бьдьн шашкьрьне. (Бьхунә 2 Корьнтʹи 2:11.) Wәрә әм пебьһʹәсьн дәрһәqа ван тьшта.

ЧА ЩЬН МӘРИЙА ДЬХАЛЬФИНЬН

10. Чь йә сербази?

¹⁰ Щьн сәва кӧ мәрийа бьхальфиньн, сербазийе дьдьнә хәбате. Сербази әв һәйә һәләqәти тʹәви щьна. Кʹьтеба Пироз сербазийе инкʹар дькә, у тʹәмийе дьдә мә, wәки әм жь wан һʹәму тьшта чь кӧ тʹәви сербазийе гьредайи йә, хwә дур бьгьрьн (Галати 5:19-21). Чаwа хwарьна мәʹсийа али мәʹсигьрʹа дькә wәки мәʹсийа бьгьрьн, ӧса жи сербази али щьна дькә wәки мәрийа бьдьнә шашкьрьне. Мәʹсигьр сәва кӧ щурʹә-щурʹә мәʹси бьгьрьн, щурʹә-щурʹә хwарьн дьдьн хәбате. Мәсәлә кӧрм, нан у диса тьштед майин. Ӧса жи щьн, бь сайа щурʹә-щурʹә сербазийе, дькарьн һʹәму щурʹә мәрийа бьхальфиньн.

11. Чь йә кʹочʹәкти, у чьрʹа әм гәрәке жь ве йәке хwә дур бьгьрьн?

¹¹ Щьн ӧса жи бь фәʹльквәкьрьне мәрийа дьхапиньн. Ле чь йә фәʹльквәкьрьн? Әв те һʹәсабе чахе дьхwазьн пебьһʹсьн дәрһәqа ахьрийе, йан жи дәрһәqа тьштед нә әʹйан. Мәсәлә фәʹльквәкьрьн бь аликʹарийа стәйрка һәйә, бь карта, бь qаwе, фәʹльквәкьрьн ль сәр дәста, шьровәкьрьна хәwна йан бәньк кьрьн. Һʹәчʹи зәʹф жь мәрийа дьфькьрьн кӧ дь фәʹльквәкьрьнеда тьштәки хьраб тʹӧнә. Ле жь Кʹьтеба Пироз әм педьһʹәсьн, кӧ бь рʹастийе щьн али фәʹльквәкьрийа у кʹочʹәка дькьн, у жь вьр әм фәʹм дькьн кӧ щьн тʹәви фәʹльквәкьрийа у кʹочʹәка гьредайи нә. Мәсәлә дь Кʹаред Шандийа 16:16-18-да те гьликьрьне, кӧ «рʹӧһʹе кʹочʹәктийе» qәwат дьда qизәке, wәки әw дәрһәqа ахьрийе әʹйан кә. Ле чахе рʹӧһʹе кʹочʹәктийе, демәк щьн жь wе дәркʹәт, әwе ида нькарьбу кʹочʹәкти бькьра.

12. Чьрʹа хәбәрдан тʹәви мьрийа хоф ә?

¹² Щьн диса бь щурʹәки, мәрийа дьдьнә шашкьрьне. Qәwата щьна һәйә хwә бьдьнә кʹьфше мина мьрийед мә, йан жи мина дәнге wан хәбәрдьн у әʹламәтийед ӧса дәрбази мә бькьн, чь кӧ тʹәне әв мьрийед мәйә незик заньбун. Ӧса жи щьн заньн, кӧ һәр мәрьвәк бира мьрийед хwә дькә. Ләма жи щьн әwе qәwата хwә дьдьнә сербаза у чахе кәсәк дьчә щәм сербаза, wәки тʹәви мьрийед хwә хәбәр дә, сербаз бь дәнгәки ӧса хәбәр дьдә кӧ wана тʹьре мьрийед wана йә хәбәр дьдә у һе дьжи, бь wе йәке щьн һелана дьдьнә мәрийа, wәки һәрʹьн йан чь тʹәви мьрийед хwә хәбәр дьн (1 Самуйел 28:3-19). Ле ча әм жь сәре 6 пеһʹәсийан, чахе мәри дьмьрә әʹмьре wи хьлаз дьбә әw ида нажи (Зәбур 115:17). Ләма жи чахе кәсәк «гази мьрийа дькә», әwана бь щьна тенә хапандьне у мьqабьли qьрара Хwәде дәрдькʹәвьн (Бьхунә Qануна Дӧщари 18:10, 11, ПКʹМ; Ишайа 8:19). Ле һаш жь хwә һәбә, wәки хwә жь ве qәзийаийе дур бьгьри у нәкʹәви тʹәлька щьна.

13. Гәлә мәри, йед кӧ тьрса щьна ль сәр wан һәбу, чь карьбунә бькьн?

¹³ Щьн нә кӧ тʹәне мәрийа дьдьнә хапандьне, ле ӧса жи wана дьтьрсиньн. Мире-щьна у щьнед wи заньн, кӧ wәʹде wан «һьндьк» майә, у әwана wе бенә гьредане. Ләма жи ньһа әwана гәлә һерс ьн (Әʹйанти 12:12, 17). Ле бь һʹәзара мәри, йед кӧ жь щьна дьтьрсийан у тʹьме бьн ве тьрседа дьжитьн, иро жь ве тьрсе аза бунә. Гәло әв йәк wанарʹа ча һәв-һат? У әв мәри, йед кӧ ида сербазийева гьредайи йә, чь гәрәке бькә?

ЧА ХWӘ ЖЬ ЩЬНА ХWӘЙ КЬН

14. Ча әм дькарьн мина мәсиһийед жь бажаре Әфәсе qьрʹна йәкеда, хwә жь сербазийе хwәй кьн?

¹⁴ Дь Кʹьтеба Пирозда те шьровәкьрьне, ча хwә жь щьна хwәй кьн у жь wан аза бьн. Wәрә әм бьньһерʹьн мәсиһийед дь qьрʹна йәкеда жь бажаре Әфәсе чь мәсәлә мәрʹа һиштьн. Пешийа кӧ бьбуна мәсиһи, әwана сербазийева гьредайи бун. Ле чахе сафи кьрьн сербазийе бьһельн, wана чь кьр? Дь Кʹьтеба Пирозда ньвисар ә: «Йед сербазийева жи кӧ мьжул дьбун, гәләка кʹьтебед хwә тʹоп дькьрьнә щики у ль бәр һʹәмуйа дьшәwьтандьн» (Кʹаред Шандийа 19:19). Бәле әван мәсиһийа, кʹьтебед сербазийе нә кӧ тʹәне авитьн, ле шәwьтандьн у бь ве йәке мәсәләкә баш һиштьн wанарʹа, кʹи кӧ дьхwазә хwә жь щьна хwәй кә. Һәрге мәри дьхwазьн Йаһоwарʹа qӧльх кьн, лазьм ә бьһельн һʹәму тьштед кӧ сербазийева гьредайи нә. Мәсәлә, һәнә кʹьтеб, нәшьрькьрьн, синәм (филм), шькьл у кʹьлам, йед кӧ сербазийева гьредайи нә. Әв һʹәму тьшт мәрийа бәрбь сербазийе дькʹьшинә у сербазийе ча тьштәки һʹәwас у бе хоф дьдә кʹьфше. Сербазийева ӧса жи гьредайи нә тʹәлисмә, морийед чʹәʹва у тьштед майин йед кӧ хwәва дькьн, сәва кӧ жь qәзийа йан рʹӧһʹе хьраб хwә хwәй кьн (1 Корьнтʹи 10:21).

15. Әм чь гәрәке бькьн, wәки хwә жь щьна хwәй кьн?

¹⁵ Чәнд сал шунда, паши wе йәке чахе мәсиһийед Әфәси кʹьтебед сербазийе шәwьтандьн, Паwлосе шанди ӧса wанарʹа ньвиси: «Шәрʹе мә . . . мьqабьли ордийед рʹӧһʹанийә хьрабә ль дийаре әʹзмана нә» (Әфәси 6:12). Ча те кʹьфше, щьна нәдьхwәст мәсиһийа бьһельн. Әwана бь һʹәму qәwата хwә тʹәви мәсиһийа шәрʹ дькьрьн, wәки wана алт кьн. Ле мәсиһийа чь гәрәке бькьрана, wәки хwә жь щьна хwәй кьрана? Паwлос әwана ширәт кьрьн: «Баwәрийе мина мәртʹале бьгьрьнә хwә, бь кʹижане һуне бькарьбьн һʹәму тиред агьрийә кӧ Йе Хьраб давежә, бьтәмьриньн» (Әфәси 6:16). Чьqаси баwәрийа мә мина мәртʹале qәwи бә, һаqаси һе рʹьнд әме бькарьбьн хwә жь щьна хwәй кьн у мьqабьли wан дәред (Мәтта 17:20).

16. Ча әм дькарьн баwәрийа хwә qәwи кьн?

¹⁶ Ча әм дькарьн баwәрийа хwә qәwи кьн? Бь сайа һинбуна Кʹьтеба Пироз, баwәрийа мә wе qәwи бә. Qәwибуна диwар, һʹимва гьредайи йә. Һәрге һʹиме диwар qәwи йә, диwар жи wе qәwи бә. Ӧса жи баwәрийа мә, һәрге һʹиме баwәрийа мә qәwи йә демәк баwәрийа мә жи wе qәwи бә. Ле һʹиме баwәрийа мә, әв һәйә занәбуна рʹаст жь Кʹьтеба Пироз. Һәрге әм һәр рʹож Кʹьтеба Пироз бьхуньн у һин дьбьн, баwәрийа мә wе һе qәwи бә. Баwәрийа ӧса, мина диwарәки qәwи, wе мә жь һʹӧкӧмтийа щьна хwәй кә (1 Йуһʹәнна 5:5).

17. Чь wе диса али мә бькә, wәки хwә жь щьна хwәй кьн?

¹⁷ Мәсиһийед Әфәси, диса тьштәк гәрәке бькьрана сәва кӧ хwә жь щьна хwәй кьрана. Әwана дьжитьн дь бажарәки ӧсада кӧ бь сербазийе педа тʹьжә бу. Ләма жи wанарʹа лазьм бу һе зедә аликʹари у хwәйкьрьн. Паwлосе шанди готә wана: «Бь һʹәму дӧа у рʹәща һәр гав дӧа бькьн пе Рʹӧһʹе Пироз» (Әфәси 6:18). Иро әм жи дьнйакә ӧсада дьжин, йе кӧ бь сербазийе тʹьжә йә, ләма жи әм гәрәке тʹьме Йаһоwарʹа дӧа бькьн аликʹарийе бьхwазьн, wәки жь щьна бенә хwәйикьрьне. Чахе әм Йаһоwарʹа дӧа дькьн, әм гәрәке дӧакьрьнеда наве wи бьдьн хәбате. Чьмки «наве Йаһоwа бьрща qәwи йә, йед һәq дьрʹәвьнә һьндӧрʹ у хьлазбуне дьстиньн». (Бьхунә Мәтʹәлок 18:10, ДТʹ.) Гәләк фәрз ә Йаһоwарʹа дӧа бькьн, wәки әw «мә жь йе хьраб» демәк жь Мире-щьна хьлаз кә (Мәтта 6:13). Йаһоwа әʹсәйи wе щаба дӧайед мәйә бь дьл у щан бьдә (Зәбур 145:19).

18, 19. (а) Чьрʹа әм дькарьн гӧман бьн, wәки әме бькарьбьн хwә жь щьна хwәй кьн? (б) Дәрһәqа кʹижан пьрса, әме дь сәре майинда хәбәр дьн?

¹⁸ Шәйтʹан Мире-щьна у щьн гәләк зийандар ьн, ле һәрге әм мьqабьли Шәйтʹан Мире-щьна дәрдькʹәвьн, qьрара Хwәде дьqәдиньн у бь ве йәке незики Хwәде дьбьн, әм ида гәрәке жь Мире-щьна у щьна нәтьрсьн. (Бьхунә Аqуб 4:7, 8.) Чьмки qәwата щьна һьмбәри qәwата Хwәдайе һьмзор, гәләк кем ә. Дь wәʹде Нӧһда әwана һатьбун щәзакьрьне у дь ахьрийеда жи Хwәде wе диwана wана бькә (Щьһуда 6). Ле бьра бира тә нәчә, wәки мьлйакʹәтед Йаһоwайә qәwат жи дькарьн мә жь щьна хwәй кьн (2 Пʹадшати 6:15-17). Әв мьлйакʹәт гәлә дьшьрмиш дьбьн бона һʹалхwәшийа мә у дьхwазьн, wәки әм мьqабьли щьна дәркʹәвьн. У әв мьлйакʹәтед амьн, мә qәwи дькьн. Ләма жи wәрә әм тʹьме һе незики Йаһоwа у мьлйакʹәтед wийә амьн бьн. Гәлә фәрз ә ширәтед жь Кʹьтеба Пироз бьди хәбате, у жь ван һʹәму тьшта чь кӧ сербазийева гьредайи йә, хwә хwәй ки (1 Пәтрус 5:6, 7; 2 Пәтрус 2:9). Һәрге тӧ ӧса бьки, дькари гӧман би, кӧ те жь щьна бейи хwәй кьрьне.

¹⁹ Ле чьрʹа Хwәде дьһелә, wәки щьн һәбьн у чьрʹа Хwәде дьһелә, wәки зӧлми һәбә, жь бо чь жи мәри һаqас дьчәрчьрьн? Дәрһәqа ван пьрса әме дь сәре майинда пебьһʹәсьн.