Ча Дькарьн Малбәта Хwә Бәхтәwар кьн?

1. Чь лазьм ә сәва кӧ малбәт бәхтәwар бә?

ЙАҺОWА ХWӘДЕ дьхwазә, wәки малбәта тә бәхтәwар бә. Дь Хәбәра wида, демәк Кʹьтеба Пирозда һәнә рʹебәри сәва һәр кәсе дь малбәтеда. Ӧса жи ль вьр те гьликьрьне, wәки нәфәред малбәте чь гәрәке бькьн. Һәрге һәр кәс дь малбәтеда, ширәтед Хwәде бьqәдинә, әв йәк wе wана бәхтәwар кә. Иса Мәсиһ гот: «Хwәзи ль wан, йед кӧ хәбәра Хwәде дьбьһен у пек тиньн» (Луqа 11:28).

2. Сәва кӧ малбәт бәхтәwар бә, чь лазьм ә фәʹм бькьн?

² Сәва кӧ малбәт бәхтәwар бә, лазьм ә әм фәʹм бькьн кӧ сазкʹаре малбәте Йаһоwа Хwәде йә, ль сәр кʹижани Иса гот: «Баве мә» (Мәтта 6:9). Чьмки Баве мәйи әʹзмана һәйә сазкʹаре малбәте, ләма жи әw рʹьнд занә чь лазьм ә бькьн, wәки малбәт бәхтәwар бә. Ле чь дь Кʹьтеба Пирозда те готьне, дәрһәqа шьхӧле һәр кәсе дь малбәтеда?

ЙАҺОWА САЗКʹАРЕ МАЛБӘТЕ ЙӘ

3. Ча Кʹьтеба Пироз шьровәдькә сазкьрьна малбәте, у жь кʹӧ әм заньн кӧ әв йәк рʹаст ә?

³ Йаһоwа мәрьвед пешьн Адәм у Һеwа әʹфьрандьн у әwана тʹәви һәв кьрә мер-жьн. Әwи әwана щиwар кьрьн дь щьнәта бәдәwда, демәк дь бахче Адәнеда. Паше жи Йаһоwа wанарʹа гот, кӧ әwана гәрәке зарʹа биньн «шин бьн, у ль һәв зедә бьн, әʹрде тʹьжи кьн» (Дәстпебун 1:26-28; 2:18, 21-24, ПКʹМ). Әв йәк чь кӧ дь кʹьтеба Дәстпебунеда дәрһәqа сазкьрьна малбәте ньвисар ә, чʹирʹок нинә, чьмки Иса Мәсиһ жи дәрһәqа ве йәке дьгот (Мәтта 19:4, 5). Рʹаст ә рʹожа иройин әм рʹасти гәлә чәтьнайа тен у әʹмьре мә ӧса нинә чаwа Хwәде qьрар кьрьбу, ле йәкә малбәт дькарьн бәхтәwар бьн. Wәрә әм бьньһерʹьн чь лазьм ә сәва ве йәке.

4. (а) Ча һәр кәс дь малбәтеда дькарә малбәте бәхтәwар кә? (б) Чьрʹа бона бәхтәwарбуна малбәте, фәрз ә пебьһʹәси дәрһәqа әʹмьре Иса Мәсиһ?

⁴ Һәрге һәр кәс дь малбәтеда чʹәʹв бьдә Хwәде у һʹьзкьрьне нишан кә, малбәт дькарә бәхтәwар бә (Әфәси 5:1, 2). Ле ча әм дькарьн чʹәʹв бьдьнә Хwәдейе кӧ әм нькарьн бьбиньн? Йаһоwа Хwәде Кӧрʹе хwәйи тайе тʹәне шандә әʹрде, у бь сайа Иса Мәсиһ әм дькарьн пебьһʹәсьн у һинбьн һʹьзкьрьна Хwәде (Йуһʹәнна 1:14, 18). Чахе Кӧрʹе Хwәде Иса Мәсиһ ль сәр әʹрде бу, әwи һʹәму тьшт мина Баве хwәйи әʹзмана дькьр. Кʹи кӧ Иса дьдит у дьбьһист, ча бежи Хwәде дьдит у дьбьһист (Йуһʹәнна 14:9). Ләма жи чахе әм педьһʹәсьн дәрһәqа ве йәке, кӧ ча Иса һʹьзкьрьн нишан дькьр у мина wи дькьн, бь ве йәке һәр кәс жь мә малбәта хwәрʹа бәхтәwарийе тинә.

МӘСӘЛӘ СӘВА МЕРА

5, 6. (а) Иса һьндава щьвате ча хwә кʹьфш дькә у әwи чь мәсәлә һишт сәва мера? (б) Чь әм гәрәке бькьн сәва кӧ бахшандьна гӧна бьстиньн?

⁵ Дь Кʹьтеба Пирозда те готьне кӧ мер тʹәви жьна хwә гәрәке ӧса бьн, чаwа Иса тʹәви шагьртед хwә. Wәрә әм бьньһерʹьн ван гьлийед Кʹьтеба Пироз: «Мерно, жьнед хwә һʹьз бькьн, чаwа кӧ Мәсиһ щьвин һʹьз кьр у жийина хwә бәр wева да.  . . . Ӧса жи гәрәке мер жьна хwә һʹьз бькә, чаwа бәдәна хwә. Йе кӧ жьна хwә һʹьз дькә, әw хwә һʹьз дькә» (Әфәси 5:23, 25, 28).

⁶ Бәле, Иса һьндава щьвате һʹьзкьрьн әʹйан дькьр, бь ве йәке әwи мәсәләкә баш һишт сәва мера. Рʹаст ә шагьртед Иса гӧнәкʹар бун, ле әwи әwана «һʹәта дәрәща һәрә бьльнд жи . . . һʹьз кьрьн» у һәла һе әʹмьре хwә жи сәва wан бәрва да (Йуһʹәнна 13:1; 15:13). Кʹьтеба Пироз мера һелан дькә: «Кʹӧлфәтед хwә һʹьз бькьн, дьле wан нәешиньн» (Колоси 3:19). Ле чь дькарә али мера бькә, сәва кӧ әве ширәте һәла һе wи чахи жи бьqәдиньн, чахе жьн тьштед нәрʹаст дькә? Мер гәрәке тʹьме бинә бира хwә, кӧ әw жи шашийа бәрдьдә у wирʹа жи бахшандьна Хwәде лазьм ә. Ле мер чь гәрәке бькә, wәки Хwәде wи бьбахшинә? Әw гәрәке бьбахшинә wан мәрийа кʹи кӧ мьqабьли wи гӧнә дькьн, демәк әв те һʹәсабе кӧ әw гәрәке жьна хwә жи бьбахшинә. Бәле, жьн жи гәрәке әве ширәте бьqәдинә. (Бьхунә Мәтта 6:12, 14, 15). Бь рʹастийе жи чаwа һьнә мәри дьбежьн, зәwащ wи чахи бәхтәwар ә, чахе мер у жьн һазьр ьн һәвдӧ бьбахшиньн.

7. Иса чь һьлдьда һʹәсаб, у бь ве йәке әwи чь мәсәлә һишт сәва мера?

⁷ Мер ӧса жи гәрәке чʹәʹв бьдьнә Иса Мәсиһ дь wе йәкеда, кӧ әw һәргав дәрһәqа шагьртед хwә дьшьрмиш дьбу у wана фәʹм дькьр. Иса һьлдьда һʹәсаб qәwата wан у һʹәwщед wан. Мәсәлә чахе шагьртед wи wәстийайи бун, Иса wанарʹа гот: «Дә wәрьн әм тʹәне һәрʹьнә щики хәwлә у һьнәки рʹьһʹәт бьн» (Марqос 6:30-32). Жьн жи һежа нә, wәки дәрһәqа wан дьшьрмиш бьн у хәм кьн. Кʹьтеба Пироз жьна бәрамбәри «qьсьме сьст» дькә у һелана дьдә мера, wәки «qәдьре wан бьгьрьн». Гәло чьрʹа? Чьмки мер у жьн пʹешкʹеша жь Хwәде, демәк жийине, wе wәкә һәв бьстиньн (1 Пәтрус 3:7). Тʹьме гәрәке бира мерада бә, wәки Йаһоwа мәрийа qимәт дькә нә кӧ жь бо ве йәке, кӧ әв мер ә йан жьн ә, ле мәрийа qимәт дькә сәва амьнбуна wан (Зәбур 101:6).

8. (а) Чьрʹа дькарьн бежьн, wәки «йе кӧ жьна хwә һʹьз дькә, әw хwә һʹьз дькә»? (б) Сәва мер у жьн чь те һʹәсабе бьбьнә «бәдәнәк»?

⁸ Дь Кʹьтеба Пирозда те готьне: «Йе кӧ жьна хwә һʹьз дькә, әw хwә һʹьз дькә». Иса дәрһәqа мер у жьна ӧса гот: «Иди әw нә дӧдӧ нә, ле бәдәнәк ьн» (Мәтта 19:6). Әв те һʹәсабе, wәки мер у жьн гәрәке тʹәне тʹәвиһәв рʹазен у һәврʹа бьн, тʹӧ кәсәки дьнрʹа нибьн у тʹәв рʹанәзен (Мәтʹәлок 5:15-21; Ибрани 13:4). Һәрге һәр кәс жь wан нәкʹәвә һәйрʹа хwә ле дьшьрмиш бьн бона һʹәwщед һәв, әwана wе бькарьбьн һьмбәри һәв амьн бьминьн (1 Корьнтʹи 7:3-5). Ӧса жи лазьм ә кӧ мер у жьн дина хwә бьдьнә wан гьлийа: «Тʹӧ кәс, тʹӧ щара жь бәдәна хwә нәфрʹәт нәкьрийә, ле әw бәдәна хwә хwәй дькә». Мер гәрәке жьна хwә wәкә хwә һʹьз бькә, у гәрәке бира wида бә, wәки әw ль бәр сәркʹаре хwә Иса Мәсиһ, щабдар ә (Әфәси 5:29; 1 Корьнтʹи 11:3).

9. Дь кʹьтеба Филипи 1:8-да дәрһәqа кʹижан һʹӧнӧре Иса те готьне, у чьрʹа мер гәрәке әви һʹӧнӧре һьндава жьна хwә нишан кьн?

⁹ Паwлосе шанди дьгот кӧ Иса Мәсиһ «дьловани» нишан дькьр (Филипи 1:8, ИМ). Чьмки Иса дьлован бу, гәләк мәрьв дьхwәстьн незики wи бьн, бь сайа ве йәке һьнә жьн жи бунә пәйчуйед wи (Йуһʹәнна 20:1, 11-13, 16). Һәр жьн дьхwазә, wәки мер һьндава wе һʹьза дьлован у назьк нишан кә.

МӘСӘЛӘ СӘВА ЖЬНА

10. Иса чь мәсәлә да жьна?

¹⁰ Малбәт әв ча тʹәшкиләт ә (организасийон), сәва кӧ һʹәму тьштед ве тʹәшкиләте ӧса бә ча лазьм ә, гәрәке сәрwер һәбә. Сәрwере Иса Мәсиһ жи һәйә. «Сәре Мәсиһ Хwәде йә», ӧса жи чаwа «сәре жьне мер ә» (1 Корьнтʹи 11:3). Әв йәк кӧ Иса чаwа гӧрʹа сәрwерийа Хwәде дькә, мәсәләкә гәлә рʹьнд ә, чьмки сәрwере мә гьшка жи һәйә у әм жи гәрәке гӧрʹа wан бькьн.

11. Жьн һьндава мере хwә гәрәке ча бә у әв йәк чь кʹаре дькарә бинә?

¹¹ Мер нә кʹамьл ьн, әwана жи шаш дьбьн, ләма жи щарна әwана нькарьн рʹаст борще хwәйә сәрwертийе бьqәдиньн. Ле wәки ӧса нә жьн һьндава мер гәрәке чь щурʹәйи бә? Жьн гәрәке мере хwә бона шашийе wи, нӧхсан демәк ньмьз нәкә у нә жи бьхwазә сәрwертийе бьгьрә дәсте хwә. Жьн гәрәке бир нәкә, wәки Хwәде йед мьлук qимәт дькә (1 Пәтрус 3:4). Һәрге жьн мьлук бә, әwе тʹәхмин кә кӧ дь чәтнайеда жи һеса йә гӧрʹа мере хwә бькә, у әв йәк Хwәде хwәш те. Хенщи ве йәке дь Кʹьтеба Пирозда те готьне, wәки «жьн жь мере хwә хоф бькә [qәдр бьгьрә, ДТʹ]» (Әфәси 5:33). Ле һәрге мере кәсәки һʹәсаб накә Иса ча сәре хwә? Кʹьтеба Пироз wан жьнарʹа һелана дьдә: «Гӧрʹа мере хwәда бьн, wәки жь wан һьнәк жи, һәрге гӧһдарийа хәбәре накьн, бь пʹәргалийа жьнед хwә, бе готьн жи бенә сәр баwәрийе гава пʹәргалийа wәйә хофә [qәдр, ДТʹ] у навә-намус бьбиньн» (1 Пәтрус 3:1, 2).

12. Чьрʹа һәрге жьн бь qәдьр мере хwәрʹа бежә чь кӧ әw дьшьрмиш дьбә, әв йәк найе һʹәсабе нә рʹаст?

¹² Һәрге пьрсәкеда жьн тʹәви мере хwә нә рʹази йә, фьрqи тʹӧнә мере wе мәсиһи йә йане на, әw дькарә бь аqьлайи у нәрм фькьред хwә бежә мере хwә, у әв йәк найе һʹәсабе кӧ жьн qәдьре мере хwә нагьрә. Дьбәк дьшьрмишбуна жьне рʹаст ә, у һәрге мер гьлийе wе qәбул кә, әв йәк дькарә кʹаре бинә малбәтерʹа. Мәсәлә, чахе Бьраһим тʹәви жьна хwә Сәрайе дь пьрса малбәтеда qайил нибу, Йаһоwа готә Бьраһим: «Гӧһдарийа . . . wе бькә». (Бьхунә Дәстпебун 21:9-12, ПКʹМ). Ле һәрге мер ида һʹәму тьшт сафи кьр у сафикьрьна wи мьqабьли qануна Хwәде дәрнайе, һьнге жьн гәрәке гӧрʹа мере хwә бькә у сафикьрьна wи qәбул кә (Кʹаред Шандийа 5:29; Әфәси 5:24).

13. (а) Кʹьтеба Тито 2:4, 5 чьда жьна һелан дькә? (б) Чь дьбежә Кʹьтеба Пироз дәрһәqа башqәжитьне у һʹәвqәтандьне?

¹³ Һәрге жьн һʹәму тьшти ӧса дькә, чаwа жь wе те хwәстьне, бь ве йәке әw сәва һʹалхwәшийа малбәте гәлә тьшт дькә. Мәсәлә Кʹьтеба Пироз һелана дьдә жьнед меркьри: «Мер у зарʹед хwә һʹьз бькьн, аqьлда гьран бьн, нав-намус, малкьр, һʹәйф, гӧрʹа мере хwәда бьн» (Тито 2:4, 5). Жьна кӧ шьхӧле хwәйә жьнтийе у детийе ль гора wан тʹәмийа дькә, жь алийе малбәта хwә һʹьзкьрьне у qәдьр qазьнщ дькә. (Бьхунә Мәтʹәлок 31:10, 28). Чьмки һәр мер у жьн гӧнәкʹар ьн, ләма жи щарна әwана дькарьн рʹасти чәтьнайед гьран бен, жь бо чь жи әwана дькарьн башqә бьжин, йан жи һәв бьqәтьн. Һьнә дәрәщед ӧса һәнә кӧ Кʹьтеба Пироз дьһелә wәки жьн мер башqә бьжин. Ле сафикьрьна ӧса гәрәке сәра-бәра нибә, ле бь аqьлайи бә, чьмки дәрһәqа ве йәке дь Кʹьтеба Пирозда ӧса те готьне: «Бьра жьн жь мер нәqәтә. . . . У мер жи бьра жьна хwә бәрʹнәдә» (1 Корьнтʹи 7:10, 11). Ле һәрге жьна кәсәки йан мере кәсәки qавийе бькә, тʹәне wи чахи, ча дь Кʹьтеба Пирозда ньвисарә, әwана дькарьн һәв бьqәтьн (Мәтта 19:9).

МӘСӘЛӘКӘ БАШ СӘВА ДЕ-БАВА

14. Иса һьндава зарʹада чаwа бу у чьда зарʹ һʹәwщә нә?

¹⁴ Иса мәсәләкә баш һишт сәва де-бава, кӧ әwана һьндава зарʹада гәрәке чаwа бьн. Щарәке чахе шагьртед Иса нәһиштьн, wәки зарʹ незики wи бьн әwи гот: «Бьра әw зарʹок бенә щәм мьн, пешийа wан нәгьрьн». Дь Кʹьтеба Пирозда те готьне, wәки «әw зарʹ данә һʹәмеза хwә, дәсте хwә дани сәр wан у дӧа ль wан кьр» (Марqос 10:13-16). Һәрге Иса Мәсиһ тʹьме сәва зарʹа wәʹдә дьдит, демәк де-бав жи гәрәке сәва зарʹед хwә wәʹдә бьбиньн. Де-бав гәрәке тʹәви зарʹа гәләк wәʹдә дәрбаз бькьн, нә кӧ тʹәне чәнд дәqа. Әwана гәрәке гәләк wәʹдә хәрщ кьн сәва һинкьрьн у ширәткьрьна зарʹа, чьмки әве йәке Йаһоwа жь де-бава дәʹwа дькә. (Бьхунә Qануна Дӧщари 6:4-9).

15. Де-бав чь дькарьн бькьн, сәва кӧ зарʹед хwә хwәй кьн?

¹⁵ Дьнйайеда зӧлми һе зедә дьбә, ләма жи лазьм ә, wәки де-бав зарʹед хwә жь мәрьвед зьнекʹар хwәй кьн, илаһи жь wан мәрьва кʹи кӧ дьхwазьн зарʹа хьраб кьн у зийане бьдьнә wан. Дина хwә бьде ча Иса шагьртед хwә хwәй дькьр, ль сәр кʹижана әwи бь һʹьзкьрьн гот «лаwно». Чахе Иса гьртьн у гәрәке бькӧштана, әwи хәм кьр wәки шагьртед wи бенә бәрʹдане (Йуһʹәнна 13:33; 18:7-9). Де-бавно, һун гәрәке дина хwә бьдьнә зарʹед хwә у сәва wан хәм кьн, чьмки Мире-щьна дьхwазә зийане бьдә зарʹед wә. Һун гәрәке пешда ширәта бьдьнә зарʹед хwә у тʹәви wан хәбәрдьн дәрһәqа wе йәке, чь кӧ дькарә qәзийе wанарʹа бинәa (1 Пәтрус 5:8). Тʹӧ щар бәдәна зарʹа, рʹӧһʹанийа wан у намуса wан ӧса бьн qәзийеда нибуйә, чаwа рʹожа иройин бьн qәзийеда нә.

16. Ча Иса дьньһерʹи ль сәр кемасийа шагьртед хwә у чь де-бав дькарьн һин бьн жь мәсәла wи?

¹⁶ Шәв пешийа мьрьна Иса, шагьртед wи һәврʹа кʹәтьнә дәʹwе һәла кʹи жь wан һәри мәзьн ә. Дәwса кӧ Иса ль сәр wан һерскʹәта, әви бь һʹьзкьрьн у пе мәсәла әwана ширәт кьрьн (Луqа 22:24-27; Йуһʹәнна 13:3-8). Де-бавно, һун тʹәхмин дькьн ча гәрәке чʹәʹв бьдьнә мәсәла Иса, дь ве йәкеда чахе зарʹа ширәт дькьн? Рʹаст ә, зарʹарʹа щәзакьрьн жи лазьм ә, ле әв гәрәке «бь дадийенва [бь һәqийе, ДТʹ]» бе кьрьне, нә кӧ бь һерскʹәтьне у нәһәqийе. Тӧ гәрәке тʹәви wана бе фәʹми хәбәр нәди чьмки гьлийе бе фәʹми дькарьн «мина шур» бьбьрʹьн (Йерәмйа 30:11; Мәтʹәлок 12:18). Тӧ гәрәке зарʹа хwә ӧса ширәт ки у щәза ки, wәки паше әw фәʹм кә кӧ әв ширәткьрьн чь кʹар wирʹа ани (Әфәси 6:4; Ибрани 12:9-11).

МӘСӘЛӘ СӘВА ЗАРʹА

17. Иса чь мәсәләкә баш һишт сәва зарʹа?

¹⁷ Гәло зарʹ дькарьн һин бьн жь Иса? Бәле әwана дькарьн! Иса мәсәләкә баш һишт, кӧ ча зарʹ гәрәке гӧрʹа де-баве хwә бькьн. Әwи гот: «Баве чаwа әз һин кьрьмә, әз ӧса хәбәр дьдьм» сәрда жи зедә кьр: «Әз һәр гав кьрьнед кӧ wи хwәш тен, дькьм» (Йуһʹәнна 8:28, 29). Иса гӧрʹа Баве хwәйи әʹзмана дькьр, у Кʹьтеба Пироз зарʹа һелан дькә, wәки әwана гӧрʹа де-баве хwә бькьн. (Бьхунә Әфәси 6:1-3). Рʹаст ә Иса Кӧрʹе Хwәде бу у qәданди бу, ле әwи тʹьме гӧрʹа де-баве хwә Усьв у Мәрйәме дькьр, йед кӧ мәрьвед нәкʹамьл бун. У әв йәк жи сәва һʹәму нәфәре малбәта Иса бәхтәwарбун дьани (Луqа 2:4, 5, 51, 52).

18. Чьрʹа Иса тʹьме гӧрʹа Баве хwәйи әʹзмана дькьр, у дьле кʹи иро ша дькьн зарʹ чахе гӧрʹа де-баве хwә дькьн?

¹⁸ Ча зарʹ дькарьн чʹәʹв бьдьнә Иса у дьле де-баве хwә ша бькьн? Рʹаст ә щарна зарʹарʹа чәтьн ә гӧрʹа де-баве хwә бькьн, ле әве йәке Хwәде жь wан дьхwазә (Мәтʹәлок 1:8; 6:20). Иса тʹьме гӧрʹа Баве хwәйи әʹзмана дькьр, һәла һе wәʹде чәтьнайед гьран жи. Щарәке, чахе бь qьрара Хwәде жь Иса дьһатә хwәстьне тьштәки гәлә чәтьн бькә, әwи Баве хwәрʹа гот: «Әве кʹасе [фәрмане] жь мьн дур хә». Ле йәкә Иса qьрара Хwәде пек ани, чьмки фәʹм дькьр кӧ Баве wи дьһа рʹьнд занә, кӧ ве дәме бона wи чь баш ә (Луqа 22:42). Чахе зарʹ гӧрʹа де-баве хwә дькә, әw бь ве йәке дьле wан ша дькә, ӧса жи дьле Баве хwәйи әʹзманаb (Мәтʹәлок 23:22-25).

19. (а) Чь щурʹәйи Мире-щьна зарʹа дьдә щерʹьбандьне? (б) Ча шьхӧлед зарʹайә хьраб, һʹӧкӧм дьбә ль сәр де-бава?

¹⁹ Мире-щьна дьщерʹьбанд Иса, бей шьк әw wе зарʹа жи бьщерʹьбинә, wәки әwана тьштед нәрʹаст бькьн (Мәтта 4:1-10). Мире-щьна сәва кӧ зарʹа бьщерʹьбинә һәвалед wан дьдә хәбате, wәки әwана ль сәр зарʹа һʹӧкӧм бьн чьмки сәва зарʹа чәтьн ә мьqабьли һәвалед хwә дәрен. Ләма жи гәләк фәʹрз ә wәки зарʹ һәвалтийе тʹәви ван мәрьва нәкә, йед кӧ тьштед хьраб у нәрʹаст дькьн (1 Корьнтʹи 15:33). Мәсәлә, qиза Аqуб Динаһ һәвалти тʹәви wан мәрьва дькьр, йед кӧ Хwәдерʹа qӧльх нәдькьрьн у әве йәке гәләк кӧл-дәрд жерʹа ани (Дәстпебун 34:1, 2). Тӧ тʹәне бьдә һʹәсабе хwә, wе дәрдәки чьqас гьран бә сәва нәфәред малбәте, чахе жь wана йәк бенамусийе бькә! (Мәтʹәлок 17:21, 25).

КʹЬЛИТА БӘХТӘWАРБУНА МАЛБӘТЕ

20. Һәр кәс дь малбәтеда чь гәрәке бькә, сәва кӧ малбәт бәхтәwар бә?

²⁰ Чахе ширәтед жь Кʹьтеба Пироз дьqәдиньн, сафикьрьна проблемед малбәте һеса дьбә. Бәле qәдандьна ван ширәта, әв һәйә кʹьлита бәхтәwарбуна малбәте. Мерно, жьнед хwә һʹьз бькьн у һьндава wан ӧса бьн чаwа Иса һьндава щьвате бу. Кʹӧлфәтно, гӧрʹа меред хwә бькьн ча малхе мале, у пәй мәсәла жьна qәнщ һәрʹьн йа кӧ дь кʹьтеба Мәтʹәлок 31:10-31-да ньвисар ә. Де-бавно, зарʹед хwә һин кьн у ширәт кьн (Мәтʹәлок 22:6). Бавно, «малхетийе рʹьнд ль мала хwә» бькьн (1 Тимотʹейо 3:4, 5; 5:8; Колоси 3:20). Зарʹно, гӧрʹа де-баве хwәда бьн. Дь малбәтеда тʹӧ кәс кʹамьл нинә, гьшк жи шашийа дькьн. Ләма жи мьлук бьн у бахшандьне жь һәвдӧ бьхwазьн.

21. Чь ахьрикә баш һивийа мәйә у ча әм ньһа дькарьн малбәта хwә бәхтәwар кьн?

²¹ Бь рʹастийе жи дь Кʹьтеба Пирозда һәнә гәләк рʹебәри у ширәтед qимәт бона әʹмьре малбәте. Хенщи ве йәке Кʹьтеба Пироз һин дькә дәрһәqа дьнйа тʹәзә, щьнәта ль сәр әʹрде, кʹидәре кӧ; qӧльхкʹаред Хwәдейә бәхтәwар wе бьжин (Әʹйанти 21:3, 4). Бь рʹастийе жи ахьрикә чьqас баш һивийа мәйә! Рʹожа иройин жи малбәта мә дькарә бәхтәwар бә, һәрге әм рʹебәрийа Хwәде дь әʹмьре хwәда дьqәдиньн, йед кӧ дь Кʹьтеба Пирозда ньвисар ә.