Дәрбазкьрьна Щәжьна «Шива Хӧдан», Наве Хwәде Рʹумәт Дькә

МӘСИҺИЙАРʹА тʹәми һатьбу дайине, wәки әwана Рʹожа Биранина мьрьна Иса Мәсиһ дәрбаз кьн, ве щәжьнерʹа дь Кʹьтеба Пирозда ӧса жи те готьне «Шива Хӧдан» (1 Корьнтʹи 11:20). Ле чьрʹа әв щәжьн ӧса фәрз ә? Кʹидәре у ча гәрәке бе дәрбазкьрьне?

Wәрә әм пeшийе пебьһʹәсьн дәрһәqа щәжьна «Дәрбазбуне», йa kӧ щьмәʹта Ибрани һәр сал 14 Нисане дәрбаз дькьрьн ль гора салнәʹма Ибрани. Ле тӧ зани мәһа Нисане, бь салнәʹма Ибрани кʹәнге дәстпедьбу? Әв рʹожа чахе шәв у рʹож дьбьнә wәкә һәв, те һʹәсабе анәгори. Һьнге бьһаре незики анәгорийе, йан пешийа анәгорийе йан жи паше, рʹожа кӧ һива тʹәзә дәрдькʹәт, дьһатә һʹәсабе йәке Нисане. Жь ве һива тʹәзә паши 13 рʹожа, 14 мәһа Нисане бу. Wе рʹоже демәк 14 Нисане гава рʹо дьчу ава, щьмәʹта Ибрани һәр сал щәжьна Дәрбазбуне дәрбаз дькьрьн.

Ле сала 33-йа, 14 Нисане Иса щәжьнәкә тʹәзә кʹьфш кьр. Ве рʹоже Иса Мәсиһ тʹәви шагьртед хwә дь отʹахәкеда тʹоп бун, wәки щара пашьн щәжьна Дәрбазбуне дәрбаз кә. Wе еваре, гава Щьһуда Исхәрйоти жь отʹахе дәркʹәт у чу, Иса щәжьна Шива Хӧдан дәрбаз кьр. Бь ве йәке Иса да кʹьфше, wәки һәр сал дәwса щәжьна Дәрбазбуне, щәжьна Шива Хӧдан гәрәке бе дәрбазкьрьне. Ләма жи сале щарәке әв щәжьн те дәрбазкьрьне.

Мәттайе Ньвискʹар ӧса гьли дькә: «Иса нан һьлда шькьри да, кәркьр да шагьрта у гот: ‹Һан һьлдьн бьхwьн. Әва бәдәна мьн ә. Пәйрʹа кʹас һьлда шькьри да, да wан у wанарʹа гот: Һун һʹәму жи жь ве вәхwьн, әва хуна мьн ә бона пәймане, кӧ бона бахшандьна гӧнед гәләка те рʹетьне›» (Мәтта 26:26-28).

Ле гәло шагьртед Иса бь рʹастийе бәдәна Иса хwарьн, йан жи хуна wи вәхwарьн? Фәʹмдари йә wәки на, әв йәк wе бьһата һʹәсабе мәрьвхӧри у бь ве йәке әwана wе мьqабьли qанунед Хwәде дәркʹәтана (Дәстпебун 9:3, 4; Qануна Кʹаһинтийе 17:10). Ча жь кʹьтеба Луqа 22:20 те кʹьфше, Иса Мәсиһ гьлийед ӧса дьбежә: «Әва кʹаса пәймана ну йә, пе хуна мьн гьредайи, кӧ бона wә те рʹетьне». Ле әв кʹас дькарьбу рʹасти жи «пәймана ну» буйа? На, чьмки пәйман тьштәки ӧса нинә wәки бькарьби дәсте хwә бьди, ләма жи кʹас тьштәки дьн те һʹәсабе.

Нан у шәрав әв симбол ьн. Нан бь симболике те һʹәсабе бәдәна Исайә qәданди. Паши щәжьна Дәрбазбуне, йа кӧ Иса тʹәви шагьртед хwә дәрбаз кьрьн, нан чь кӧ мабу Иса һьлда у да шагьртед хwә. Әв нан бе һәвиртьрʹшк чедькьрьн (Дәркʹәтьн 12:8). Дь Кʹьтеба Пирозда һәвиртьрʹшк бь симболике те һʹәсабе, ча тьштәки бь гӧнә, йан жи тьштәки бь qӧсур. Ләма жи нане бе һәвиртьрʹшк, те һʹәсабе бәдәна Исайә qәданди йе кӧ әwи бәрва да. Бәдәна wи бе qӧсур у бе гӧнә бу (Мәтта 16:11, 12; 1 Корьнтʹи 5:6, 7; 1 Пәтрус 2:22; 1 Йуһʹәнна 2:1, 2).

Шәрава сор жи бь симболике те һʹәсабе хуна Иса. Бь сайа хуна Иса, кӧ һатә рʹетьне, пәймана тʹәзә кʹәтә qәwате. Иса гот кӧ хуна wи «бона бахшандьна гӧнед гәләка те рʹетьне». Бь сайа ве йәке, мәри бәр чʹәʹве Хwәде дькарьн тʹәмьз бьн у һьн жи әwана дькарьн тʹәви Йаһоwа дь пәймана нуда бьн (Ибрани 9:14; 10:16, 17). Әв пәйман йан жи пʹәвкʹәтьн, сәва 144 000 мәсиһийед амьн мәщале вәдькә, сәва кӧ әwана ль әʹзмана бьжин. Ль wьр әwана wе бьбьнә ча пʹадша, кʹаһин, wәки бь кʹарәкә мәзьн сәва мәрийа, пʹадшатийе бькьн (Дәстпебун 22:18; Йерәмйа 31:31-33; 1 Пәтрус 2:9; Әʹйанти 20:6; 14:1-3).

Ле гәло wәʹде Евара Биранине, изьна кʹе һәйә жь ван симбола бьхwьн у вәхwьн? Изьна wан мәрийа һәйә, йед кӧ дь ве пәймана нуда ньн у гӧмана wан жи жийина ль әʹзмана йә. Бь сайа рʹӧһʹе пироз, әwана те дәрдьхьн у ль сәр хwә тʹәхмин дькьн кӧ әwана жь алийе Хwәдеда һатьнә жьбартьне, сәва кӧ ль әʹзмана бьбьнә пʹадша (Рʹомайи 8:16). Хенщи wе йәке, Иса Мәсиһ хwәха тʹәви wан пәймана пʹадшатийе кʹьфш кьр (Луqа 22:29).

Ле чь әм дькарьн бежьн дәрһәqа wан мәрийа, гӧмана кʹижана һәйә кӧ бьжин дь Щьнәте ль сәр әʹрде? Әwана һәма ӧса дькьн, ча кӧ Иса тʹәми дабу. Әwана әве щәжьне бь qәдьр дәрбаз дькьн, ле жь симбола нахwьн у вәнахwьн. Сале щарәке, 14 мәһа Нисане, гава рʹо дьчә ава, Шәʹдед Йаһоwа әв Рʹожа биранине дәрбаз дькьн. Рʹаст ә жь wан мәрийа йед кӧ ль әʹзмана гәрәке бьжин, ль сәр дьнйайе ньһа тʹәне чәнд һʹәзар манә, ле әв әʹйд сәва һʹәму Мәсиһийа тьштәки гәлә фәрз те һʹәсабе. Wәʹде ве әʹйде һәр кәс дькарә дәрһәqа һʹьзкьрьна Йаһоwа у Иса Мәсиһ һе кʹур дьшьрмиш бә (Йуһʹәнна 3:16).