Чь те Һʹәсабе Хәбәред «Рʹӧһʹ» у «Нәфс»?

ЧА ТӦ дьшьрмиш дьби, мәʹна ван гьлийа чь йә? Һьнәк баwәр дькьн, кӧ әв һәйә тьштәк нава мәрийада, йе кӧ найе дитьне у намьрә. У wана тʹьре кӧ паши мьрьна бәдәне әв тьштәк, йе кӧ найе дитьне жь мәрийа дәрдькʹәвә у диса дьжи. Гәләк жь мәрийа һәма ӧса дьшьрмиш дьбьн у һьн жи әwана әʹщебмайи дьминьн гава педьһʹәсьн, кӧ әв һинкьрьн ль сәр һʹиме Кʹьтеба Пироз нинә. Wәрә әм пебьһʹәсьн, ча хәбәред «рʹӧһʹ» у «нәфс» дь Кʹьтеба Пирозда тенә хәбате.

ЧЬ ТЕ ҺʹӘСАБЕ «НӘФС»?

Пешийе, wәрә әм хәбәрдьн дәрһәqа хәбәра, нәфс. Дьбәк те бира тә кӧ Кʹьтеба Пирозә орижинал һатийә ньвисаре ль сәр зьмане Ибранийа у Йунанийа. Гава ньвискʹаред Кʹьтеба Пироз дәрһәqа «нәфсе» дьньвисин, wана хәбәрәкә Ибрани дьданә хәбате, нефеш у хәбәрәкә Йунани психе. Әв дӧ хәбәр дь Кʹьтеба Пирозда, wәкә 800 щара һатьнә ньвисаре. Ле дь Мьзгинийеда wәлгәрʹандьна Стокһолме, әв дӧ хәбәр, ль сәр зьмане Кӧрманщи гәләк щар те wәлгәрʹандьне ча «нәфс». Һәрге тӧ дина хwә бьдейи, хәбәра нәфс ча те хәбьтандьне дь Кʹьтеба Пирозда, тӧйе те дәрхи wәки әw гәлә щар те готьне ль сәр мәрийа. Ньһа wәрә әм дәрһәqа ве йәке чәнд мәсәла пебьһʹәсьн.

Wи зәмане Нӧһда, гава гәми дьһатә чекьрьне. Wеда һьндьк, аwа готи һʹәйшт нәфс «нава аведа хьлаз бун» (1 Пәтрус 3:20). Ль вьр хәбәра, «нәфс» әшкәрә ль сәр мәрийа те готьне, демәк Нӧһ, жьна wи, се кӧрʹед wи у жьнед wан. Дь кʹьтеба Дәркʹәтьне 16:16-да, щьмәʹта Исраелирʹа дәрһәqа тʹопкьрьна маннайе, рʹебәри һатә дайине. Wанарʹа һатьбу готьне: «Бьра һәр кәси wә, qаси хwарьна хwә жь wи бәрәв кә, wәкә һʹәсабе wан нәфса, чьqас кӧ коне һәр кәсида һәнә». Демәк һәр кәс, мана гәрәке тʹера нәфәред хwә тʹоп кьра. Диса чәнд мәсәла дькари бьбини дь кʹьтеба Дәстпебун 46:18; Йешуа 11:11, Кʹаред Шандийа 7:14-да, кʹидәре кӧ «нәфс (ПКʹМ)» ль сәр мәрийа те готьне.

Һәрге тӧ һе кʹур һин би Кʹьтеба Пироз, тӧйе бьбини wәки дь Кʹьтеба Пирозда тʹӧ щикида найе готьне, кӧ нәфс һʹәта-һʹәтайе дьжи йан жи нәмьрийә. Ле бь рʹастийе Кʹьтеба Пироз әʹйан дькә, кӧ нәфс дьмьрә у нажи (Һәзәqел 18:4, 20).

ЧЬ ТЕ ҺʹӘСАБЕ «РʹӦҺʹ»?

Ньһа wәрә әм бьньһерʹьн кӧ ча дь Кʹьтеба Пирозда хәбәра «рʹӧһʹ» те хәбате. Һьнә жь мәрийа дьшьрмиш дьбьн, кӧ «рʹӧһʹ» у «нәфс» йәкә. Ле бь рʹастийе әв ӧса нинә. Кʹьтеба Пироз рʹьнд нишан дькә, wәки ортʹа «рʹӧһʹ» у «нәфсда», фьрqи һәйә. Ле гәло, фьрqийа wан чьда нә?

Гава ньвискʹаред Кʹьтеба Пироз дәрһәqа «рʹӧһʹ» дьньвисин, әwана хәбәра Ибрани рʹуаһ у хәбәра Йунани пнеума дьдан хәбате. Кʹьтеба Пироз хwәха мәʹна ван гьлийа шьровәдькә. Мәсәлә, дь кʹьтеба Зәбура 104:29-да, ӧса ньвисар ә: «Дәма кӧ тӧ [Йаһоwа] рʹӧһʹе [рʹуаһ] wан дьстини, әw дьмьрьн у диса ль шунда вәдьгәрʹьн аха хwә йа бәре (АБ)». Ӧса жи дь кʹьтеба Аqуб 2:26-да те готьне кӧ «qальб бе рʹӧһʹ [пнеума] мьри йә». Жь ван рʹеза те кʹьфше кӧ «рʹӧһʹ», әʹмьр дьдә бәдәне. Бейи «рʹӧһʹ» бәдән мьрийә. Хенщи ве йәке дь Кʹьтеба Пирозда хәбәра рʹуаһ те wәлгәрʹандьне нә кӧ тʹәне ча «рʹӧһʹ», ле ӧса жи ча, «бин» йан бина жийине. Мәсәлә, дәрһәqа Селава Дьнйайе wәʹде Нӧһ, Хwәде гот: «Ва әзе ава тофане ль сәр дьне рʹакьм, wәки һәр бәдәна кӧ бин [рʹуаһ] ль бәр һәйә бьн пʹәрʹе әʹзменда qьрʹбә у ль сәр рʹуйе әʹрде жи чь кӧ һәйә ӧнда бә» (Дәстпебун 6:17; 7:15, 22, ПКʹМ).

Демәк, рʹӧһʹ у нәфс wәкә һәв ниньн. Мәсәлә ча сәва кӧ радио бьхәбьтә лазьм ә ток, ӧса жи сәва кӧ бәдәна мә бьжи лазьм ә рʹӧһʹ. Әв йәк рʹьнд те кʹьфше жь мәсәла радиойе, йе кӧ бь батарей дьхәбьтә. Сәва кӧ радио векʹәвә, лазьм ә батарей. Әве йәке әм ӧса жи дәрһәqа радиойе кӧ ль сәр токе дьхәбьтә, дькарьн бежьн. Бейи ток радио wе нәхәбьтә. Дәрһәqа рʹӧһʹ жи әм дькарьн бежьн, wәки әв qәwат ә, йа кӧ әʹмьр дьдә бәдәне у нет-фькьред wе тʹӧнә. Демәк рʹӧһʹ кәс нинә, әв qәwат ә. Ча жи зәбурбеж гот, бейи рʹӧһʹ, демәк бейи бина жийине, мәри «дьмьрьн у диса ль шунда вәдьгәрʹьн аха хwә йә бәре».

Дь кʹьтеба Wаиз 12:7-да ньвисар ә, wәки гава мәри дьмьрә бәдәна wи дьбә ах у вәдьгәрʹә әʹрде, ле рʹӧһʹе wи чьмки жь Хwәде һатьбу дайине, пашда вәдьгәрʹә бал Хwәде. Демәк гава рʹӧһʹ йан бина жийине жь бәдәне дәрдькʹәвә, бәдән дьмьрә у диса вәдьгәрʹә ахе жь кʹижани һатә әʹфьрандьне. Ле бина жийине вәдьгәрʹә щәм канийа әʹмьр, демәк бал Хwәде (Ибо 34:14, 15; Зәбур 36:9). Әв йәк найе һʹәсабе, кӧ бина жийине йан әв qәwат, дьчә ль әʹзмана. Әв те һʹәсабе, кӧ тʹәне Йаһоwа дькарә мьрийа вәгәрʹинә ль жийине. Йан жи әм дькарьн бежьн, wәки әʹмьре мәрийа дь дәсте Хwәдеда нә. Чьмки тʹәне qәwата Йаһоwа дьгьһиже, wәки рʹӧһʹ йан бина жийине бьдә мәрийа сәва кӧ әwана диса бьжин.

Дьле мә рʹьһʹәт дьбә гава әм педьһʹәсьн, кӧ «һʹәмуйед тʹьрбада» йед кӧ бь хәwа мьрьне рʹаза нә, бь сайа Хwәде wе вәгәрʹьнә ль жийине! (Йуһʹәнна 5:28, 29). Гава Йаһоwа wе wана жь мьрьне рʹакә, әwе wанарʹа бәдәнәкә ну бьдә. Йаһоwа wе рʹӧһʹ, йане бина жийине пʹьфи wан бькә у әwана диса wе бькарьбьн бьжин. Әв йәк шабунәкә мәзьн wе мәрийарʹа бинә у әме чьqас бәхтәwар бьн, ӧса нинә!

Сәва кӧ һе кʹур пебьһʹәси wәки ча хәбәра «рʹӧһʹ» у «нәфс» дь Кʹьтеба Пирозда тенә хәбате, дькари бьньһерʹи брошура «Чь Дьqәwьмә Wәʹде Мьрьне?» Ль сәр рʹупʹела 375-384 (Ингл.), ӧса жи кʹьтеба, «Шеwьркьрьн сәр Һʹиме Кʹьтеба Пироз». Әв әʹдәбйәт Шәʹдед Йаһоwа нәшьр кьрьн, у әw ль сәр гәлә зьмана һатьн wәлгәрʹандьне.