Пʹехәмбәртийа Кʹьтеба Пироз, Дәрһәqа Сала 1914, Гәләк Фәрз ә

КʹОМА мәрийа йед кӧ Кʹьтеба Пироз леколин дькьрьн, чьл сал пешда әʹлам кьрьн, кӧ дь сала 1914-да qәwьмандьнед фәрз гәрәке бьqәwьмьн. Гәло чь тьштед фәрз дь ве саледа qәwьмин у чьрʹа сала 1914, саләкә гәләк фәрз ә?

Дь кʹьтеба Луqа 21:24-да, Иса гьлийед ӧса дьбежә: «Оршәлиме жи бәр пʹийед мьләтед пʹутпʹарьст һәрʹә, һʹәта кӧ wәхте wан мьләта хьлаз бә». Оршәлим дебажаре (пʹайтʹәхте) Исраеле бу, ль кʹидәре жи Пʹадшед жь мала Даwьд сәрwерти дькьрьн (Зәбур 48:1, 2). Әв пʹадшед Оршәлиме, нә мина Пʹадшед дьнена бун. Чьмки әwана «ль сәр тʹәхта Хӧдан» рʹуньштьбун у бь ве йәке ча wәкʹиле Хwәде дьһатьн һʹәсабе (1 Дирок 29:23). Ләма жи Оршәлим бь симболик сәрwертийа Йаһоwа дьһатә һʹәсабе.

Ле гәло, сәрwертийа Йаһоwа кʹәнге кʹәтә бьн пʹийед мьләтед пʹутпʹарьста? Әв йәк сала 607-да Б.Д.М. qәwьми. Wи чахи Бабилонийа Оршәлим зәфт кьрьн. У жь wе сале дәстпебуйи, тʹӧ кәс жь рʹькʹьнйата Даwьд «ль сәр тәхте Хӧдан» ида рʹунәньшт (2 Пʹадшати 25:1-26). Ле гәло Оршәлим һәр тʹьм гәрәке бьн пʹийед пʹутпʹарьстада буйа? На, чьмки Щьбрайил мьлйакʹәт, дәрһәqа Иса гьлийед ӧса гот, «Хwәде wе тʹәхте баве wи Даwьд бьдә wи» (Луqа 1:32, 33). Демәк, Оршәлим гәләк wәхт «бьн пʹийед» пʹутпʹарьстада wе нибуйа, чьмки Иса wе бьбуйа Пʹадша.

Ле әв йәк кʹәнге гәрәке бьqәwьмийа? Жь гьлийед Иса те кʹьфше, кӧ сәрwертийа Пʹутпʹарьста гәрәке wәʹде хwәда хьлазбуйа. Жь кʹьтеба Данийел сәре 4 әме пебьһʹәсьн, кӧ сәрwертийа пʹутпʹарьста чьqас wәʹдә гәрәке бькʹьшанда. Мәсәлә дь сәре 4-да хәwна Пʹадше Бабилоне, Нәбукәднәсәр те гьликьрьне. Дь ве хәwнеда пʹадша бахәки бьльнд дит, йе кӧ һатә бьрʹине. Сәва кӧ кʹока бах тʹәзәда шин нәбә, әw бь зьнщира һʹәсьн у сьфьр һатә гьредане. У мьлйакʹәт сәрда фәрманәкә ӧса дабу: «У бьра жь сәр wева һʹәфт wәхт дәрбаз бьбә» (Данийел 4:10-16).

Щарна дь Кʹьтеба Пирозда бах те һʹәсабе сәрwерти (Һәзәqел 17:22-24; 31:2-5). Ләма жи әw бах, йе кӧ һатә бьрʹине, бь симболик дьһат һʹәсабе сәрwертийа пʹадшед Оршәлимейә кӧ ль сәр тʹәхте Хӧдан рʹуньштьбун, у әw һатә бьрʹине демәк сәкьнандьне. Ле ча жь дитьноке те кʹьфше, Оршәлим тʹәне «һʹәфт wәхта» гәрәке бьн пʹийед Пʹутпʹарьстада бьма. Ле гәло «һʹәфт wәхт», әв чьqас ә?

Жь кʹьтеба Әʹйанти 12:6, 14 те кʹьфше, кӧ «се сал у нив [се у нив wәхт, ДТʹ]», те һʹәсабе «һʹәзар дӧсьд шест рʹож». Демәк « һʹәфт wәхт» әв һәйә дӧ щара 1 260, чь кӧ 2 520 рʹож дәрдькʹәвә. Ле паши зәфткьрьна Оршәлиме, гава 2 520 рʹож дәрбаз бун, Оршәлим һәла һе «бьн пʹийед» мәрьвед Пʹутпʹарьстада бу. Демәк, wәʹде сәрwертийа пʹутпʹарьста һе гәләк сал гәрәке бькʹьшанда. Жь кʹьтеба Жьмар 14:34 у Һәзәqел 4:6 те кʹьфше, кӧ саләк жь бәр рʹожәкева йә, ләма жи әм фәʹм дькьн кӧ «һʹәфт wәхт» 2 520 сал ьн, нә кӧ 2 520 рʹож.

Ньһа wәрә әм жь Щoтмәһа (Октобьре) сала 607 Б.Д.М., чахе кӧ Оршәлим бь дәсте Бабилонийа һатә зәфткьрьне у тʹәхт жь Даwьд һатә стандьне, 2 520 сала һʹәсаб кьн. Әме бенә незики Щoтмәһа сала 1914. Һәма wи чахи «wәхте wан мьләта хьлаз» бу, у Иса Мәсиһ ча Пʹадшайе әʹзмана кʹьфш буa (Зәбур 2:1-6; Данийел 7:13, 14).

Ча жи Иса пешда пʹехәмбәрти кьрьбу, пәй «һатьна» wирʹа ль сәр тʹәхте Пʹадшатийа әʹзмана, гәрәке гәләк тьштед хьраб бьqәwьмийана: шәрʹ, хәлайи-щәлайи, әʹрдһʹәж у нәхwәшийед гьран һәбуна (Мәтта 24:3-8; Луqа 21:11). Qәwьмандьнед ӧса диса щарәке избат дькьн, кӧ дь сала 1914-да ль әʹзмана бь рʹастийе жи Пʹадшатийа Хwәде һатә кʹьфшкьрьне у жь wи чахи дәстпебу «рʹожед ахьрийе», йед кӧ кʹьфш дькьн зәманед хьраб (2 Тимотʹейо 3:1-5).