Ча Хwә жь Дьнйайе Дур Хwәй кьн

1. Жь дöакьрьна Иса, чь һатә кʹьфше?

ШӘВА пешийа мьрьна хwә, Иса гәләк хәм дькьр бона һʹалхwәшийа шандийед хwә. Әwи һәла һе дәрһәqа ве йәке Баве хwәрʹа жи дöа кьр: «Әз һиви накьм кö тö wана жь дьнйайе һьлди, ле wәки тö wан жь Йе Хьраб хwәй ки. Әw нә жь дьнйайе нә, чаwа кö әз нә жь дьнйайе мә» (Йуһʹәнна 17:15, 16). Жь дöакьрьна Иса те кʹьфше кö әwи шагьртед хwә гәләк һʹьз дькьр, у һивийе бу кö әwана «нә пʹара дьнйайе» бьн (Йуһʹәнна 15:19). Бь рʹасти жи, сәва Иса гәләк фәрз бу, wәки шандийед wи хwә жь дьнйайе дур хwәй кьн!

2. Хәбәра «дьнйа» кö Иса готьбу чь дьһатә һʹәсабе?

² Хәбәра «дьнйа» кö Иса готьбу, әwа һәйә инсанәт, йа кö жь Хwәде qәтийа йә у сәрwере кʹижани кö Шәйтʹан Мире-щьна йә. Әв дьнйа öса жи бь рʹöһʹе хwәһʹәзийе у бабахийе тʹьжә буйә, йе кö жь Шәйтʹан те (Йуһʹәнна 14:30; Әфәси 2:2; 1 Йуһʹәнна 5:19). Бь рʹасти жи «кʹе ве дьне һʹьз дькә, әw нәйартийе ль Хwәде дькә» (Аqуб 4:4). Ле әwед кö дьхwазьн нава һʹьзкьрьна Хwәдеда бьминьн, ча дькарьн хwә жь дьнйайе дур хwәй кьн, һәрге әwана дьнйайеда ньн? Wәрен әм дина хwә бьдьнә пенщ дәрәща: 1) Амьн бьминьн Пʹадшатийа Хwәдерʹа у пьрсед политикида тʹәвнәбуйине (нейтралитет) хwәй кьн; 2) Ча мьqабьли рʹöһʹе дьнйайе дәрен; 3) Ча кʹьнщхwәкьрьн у хәмьландьнеда бәрбьһер бьн; 4) Ча бь жийинәкә һеса бьжин; 5) Ча чʹәкед рʹöһʹани ль хwә кьн.

ЧАWА АМЬН БЬМИНЬН У ТʹӘВНӘБУЙИНЕ ХWӘЙ КЬН

3. (а) Ньһерʹандьна Иса һьндава политика дьнйайе чь щурʹәйи бу? (б) Чьма әм дькарьн бежьн, кö шандийед Исайи кʹьфшкьри qасьд ьн? (Бьньһерʹә спартьн).

³ Иса нәдькʹәтә нава шьхöле политика дьнйайе. Сәва wи фәрз бу мәрийарʹа дәрһәqа Пʹадшатийа Хwәде хәбәр дә, Пʹадшайе кʹижани кö wе хwәха буйа (Данийел 7:13, 14; Луqа 4:43). Ләма жи әwи ль бәр Wәлийе Рʹомайи демәк Пилатойе Понтийо, гот: «Пʹадшатийа мьн нә жь ве дьнйайе йә» (Йуһʹәнна 18:36). Шагьртед Исайи амьн чʹәʹв дьдьнә Иса. Әwана Мәсиһрʹа у Пʹадшатийа wирʹа амьн ьн, у дәрһәqа ве Пʹадшатийе һʹәму мәрийарʹа әʹлам дькьн (Мәтта 24:14). Паwлосе шанди ньвисийә: «Әм жь алийе Мәсиһда qасьдийе дькьн» у «алийе Мәсиһда рʹәща жь wә дькьн, тʹәви Хwәде ль һәв wәрьн!»a (2 Корьнтʹи 5:20).

4. Һʹәму Мәсиһи һьндава Пʹадшатийа Хwәде ча амьнийе дьдьнә кʹьфше? (Бьньһерʹә чаргошә «Тʹәвнәбуйина Мәсиһийед Бәре».)

⁴ Qасьд, демәк wәкʹил, дь wәлате дьнда бона wәлате хwә wәкʹилтийе дькьн. Әwана тʹәвнәбуйине хwәй дькьн у накʹәвнә нава шьхöлед wәлатед дьн. Чьмки әwана пьштгьрийа wәлате хwә дькьн. Һәма әве йәке әм дькарьн бежьн дәрһәqа wәкʹилед Мәсиһ, йед кö бь рʹöһʹе пироз кʹьфшкьри нә, у бажарванед «әʹзмана нә» (Филипи 3:20). Әwана бь меркʹими дәрһәqа Пʹадшатийе әʹлам дькьн, у öса али милйона «пәзед» Мәсиһә дьн кьрьн, кö тʹәви Хwәде ль һәв бен (Йуһʹәнна 10:16; Мәтта 25:31-40). Әw пәзед дьн wәк qасьдед Мәсиһ хьзмәт дькьн у пьштгьрийа бьред Мәсиһә кʹьфшкьри дькьн. Әв һәр дö кʹом тʹәвайи, пьштгьрийа Пʹадшатийа Мәсиһ дькьн, мьqим тʹәвнәбуйине хwәй дькьн у накʹәвьнә нава шьхöлед политика дьнйайе. (Бьхунә Ишайа 2:2-4.)

5. Чьда щöдә дьбә щьвата Мәсиһийа, жь щьмәʹта Хwәдейә Исраел?

⁵ Мәсиһийед рʹаст тʹәвнәбуйине хwәй дькьн, нә тʹәне сәва wе йәке кö Иса Мәсиһрʹа амьн бьминьн. Щьмәʹта Хwәдейә Исраел бәре дь wәлатәкида дьжит, ле әм һʹәму qöлбе дьнйайеда дьжин у пʹара бьратийа һʹәмдьнйайе нә (Мәтта 28:19; 1 Пәтрус 2:9). Ләма жи һәрге әм пьштгьрийа партийакә политике бькьн, әме нькарьбьн бь сәрбәсти дәрһәqа Пʹадшатийа Хwәде әʹлам кьн, у хенщи ве йәке йәктийа мәйә Мәсиһити wе бькʹәвә бьн qәзийе (1 Корьнтʹи 1:10). Һьм жи әме мәщбур бьн тʹәви wан хушк-бьред хwә шәрʹ кьн, кʹижана кö гәрәке һʹьз кьн, чаwа кö Иса әм һин кьрьн (Йуһʹәнна 13:34, 35; 1 Йуһʹәнна 3:10-12). Жь вьр те кʹьфше, кö чахе Иса готә шагьртед хwә шур һьлнәдьн, әв гьлийед wи вала нибун. Әwи һәла һе готә wан, wәки дьжмьнед хwә жи һʹьз бькьн (Мәтта 5:44; 26:52; Бьньһерʹә чаргошә «Әз Тʹәвнәбуйине Хwәй Дькьм?»).

6. Тʹәсмилбуна мә Хwәдерʹа, ча һʹöкöм дьбә ль сәр һәләqәтийа мә тʹәви «qәйсәр»?

⁶ Мәсиһийед рʹаст жийина хwә тʹәсмили Хwәде кьрьнә, нә кö тʹәсмили мәрьвәки, тʹәшкиләтәки йан жи мьләтәки. Дь 1 Корьнтʹи 6:19, 20-да öса те готьне: «Һун нә хwәйийе сәре хwә нә. Һун бь qимәт һатьнә кʹьрʹине». Ләма жи, шандийед Иса чь кö «qәйсәррʹа» дькʹәвә дьдьнә qәйсәр, мәсәлә, qәдьр, хәрщ у гöһдарийа öса кʹижан кö мьqабьли qанунед Хwәде начьн. Ле «чь кö йед Хwәде нә» дьдьнә Хwәде (Марqос 12:17; Рʹомайи 13:1-7). Демәк: хьзмәткьрьн, һʹьзкьрьна бь дьл у щан, амьни у гöһдари. Һәрге лазьм бе жи, әwана һазьр ьн жийина хwә бона Хwәде бьдьн. (Луqа 4:8; 10:27; бьхунә Кʹаред Шандийа 5:29; Рʹомайи 14:8.)

ХWӘ ЖЬ «РʹÖҺʹЕ ВЕ ДЬНЙАЙЕ» ХWӘЙ КЬН

7, 8. Чь йә «рʹöһʹе ве дьнйайе», у ча әw рʹöһʹ ль сәр мәрьвед нәгöһдар һʹöкöм дькә?

⁷ Мәсиһи диса пе wе йәке дькарьн хwә жь рʹöһʹе хьраби йа ве дьнйайе дур бьгьрьн, һәрге мьqабьли рʹöһʹе дьнйайе дәрен. Паwлосе шанди ньвисийә: «Мә нә кö рʹöһʹе ве дьнйайе стандийә, ле әw Рʹöһʹе жь Хwәде» (1 Корьнтʹи 2:12). Әwи Әфәсийарʹа гот: «Һун пәй әʹдәтед ве дьне дьчун, ль гора хwәстьна . . . сәрwертийа ве һәwе, wи рʹöһʹе кö ньһа жи нава wан мәрьвада йа хwә дькә, йед кö нә гöрʹа Хwәдеда нә» (Әфәси 2:2, 3).

⁸ «Һәwа», йане рʹöһʹе дьнйайе, әwа һәйә qәwат йе кö найе дитьне, әw мәрийа һелан дькә кö гöрʹа Хwәде нәкьн у öса жи пешда тинә «хwәстәка нәфсе, хwәстәка чаван» (1 Йуһʹәнна 2:16; 1 Тимотʹейо 6:9, 10, ИМ). Рʹöһʹе ве дьнйайе «сәрwертийе» дькә у сәрwертийа wи әw ә, кö хwәстьнед нәфса гöнәкʹар пешда тинә, әw тʹьме һʹöкöм дькә у öса һʹöкöм дькә кö тʹәхмин наки, әw мина һәwе һʹәму щийа бәла дьбә. Хенщи ве йәке, әw «йа хwә дькә» әw нав мәрьвада һеди-һеди пешда тинә хәйсәт-һʹöнöред öса, ча хwәһʹьзи, бабахи, тьмайи у рʹöһʹе нәгöһдарийе.b Wәки кьн бежьн, рʹöһʹе ве дьнйайе һеди-һеди хәйсәт-һʹöнöред Шәйтʹан Мире-щьна нав мәрийада пешда тинә (Йуһʹәнна 8:44; Кʹаред Шандийа 13:10; 1 Йуһʹәнна 3:8, 10).

9. Рʹöһʹе ве дьнйайе чь щурʹәйи дькарә ль сәр һʹьше мә у дьле мә һʹöкöм кә?

⁹ Гәло рʹöһʹе ве дьнйайе дькарә һʹöкöм кә ль сәр һʹьше мә у дьле мә? Бәле, дькарә һәрге әм һʹьшйар нибьн. (Бьхунә Мәтʹәлок 4:23.) Әв рʹöһʹ дькарә öса ль сәр мә һʹöкöм кә, кö әм qә һаш хwә тʹöнә бьн, дьбәк бь сайа мәрьвед мәйи незик йед кö рʹува баш тенә кʹьфше, ле Йаһоwа Хwәде һʹьз накьн (Мәтʹәлок 13:20; 1 Корьнтʹи 15:33). Рʹöһʹе öса хьраб дькарә бькʹәвә нав мә жь әʹдәбйәтед бенамуси, жь порнографи у мәрвед рʹабәрибуйи кö ль сәр малпәра интәрнете нә, жь листькед нәщайиз у жь спортед öса кö һәврʹа дькʹәвьнә ләще. Демәк әв рʹöһʹе ве дьнйайе дькарә һʹöкöм кә ль сәр мә бь һʹәму тьшти чь кö дьдә кʹьфше ньһерʹандьна Шәйтʹан Мире-щьна у рʹöһʹе ве дьнйайе.

10. Әм ча дькарьн мьqабьли рʹöһʹе ве дьнйайе дәрен?

¹⁰ Әм ча дькарьн мьqабьли рʹöһʹе ве дьнйа мьхәнәт дәрен у хwә нава һʹьзкьрьна Хwәдеда хwәй кьн? Әм гәрәке бьдьнә хәбате wан һʹәму тьшта, чь кö Йаһоwа дьдә сәва кö әм рʹöһʹанида пешда һәрʹьн, у öса жи әм гәрәке тʹьме wирʹа дöа бькьн кö рʹöһʹе пироз бьдә мә. Йаһоwа жь Шәйтʹан Мире-щьна у дьнйа кö бьн һʹöкöме Шәйтʹанда нә, qәwаттьр ә (1 Йуһʹәнна 4:4). Бь рʹасти жи, чьqас фәрз ә кö бь дöа незики Йаһоwа Хwәде бьн!

КʹЬНЩХWӘКЬРЬНЕДА У ХӘМЬЛАНДЬНЕДА БӘРБЬҺЕР БЬН

11. Ча рʹöһʹе ве дьнйайе һʹöкöм дькә ль сәр кʹьнщхwәкьрьне?

¹¹ Кʹьнщхwәкьрьн, тʹәмьзайи у хәмьландьна мәрийа дьдә кʹьфше, кö әw мәрьв дьле хwәда йәки ча нә. Дь гәләк wәлатада qәйде кʹьнщхwәкьрьне гәләк ньмьз буйә, бь готьна рʹожнамәванәки, зутьрәке qав wе тʹö тьшти нькарьбьн хwәкьн, wәки хwә бьдьнә кʹьфше. Һәла һе кәчʹькед бьчʹук жи пәй кʹьнщхwәкьрьна öса кʹәтьнә, дәрһәqа кʹижани кö дь рʹожнамәкеда öса һатьбу готьне «һе зедә тәʹзибун, нә кö шәрми». Öса жи бәлабуйи йә кö кʹьнщед нәтʹәмьз хwә кьн, у wе йәкеда те кʹьфше рʹöһʹе хwәсәрихwәбуне у qәдьре хwә нәгьртьне.

12, 13. Әм гәрәке кʹижан принсипа һьлдьн һʹәсаб wәʹде кʹьнщхwәкьрьн у хәмьландьне?

¹² Ча хьзмәткʹаред Йаһоwа әм дьхwазьн рʹьнд бенә кʹьфше, демәк кʹьнща әм гәрәке тʹәмьз, рʹьнд у бь һʹәwас хwәкьн. Әм öса жи гәрәке кʹьнща öса хwәкьн, кö һәр дәрәщәкеда лайиq бә. Кʹьнщхwәкьрьна мә гәрәке тʹьме лайиq у «бәрбьһерийе» бә, әw йәк дькʹәвә нава «кьред qәнщ», у рʹьнд дьдә кʹьфше хәйсәт-һʹöнöред һәр хьзмәткʹарәки, йед кö дьбежьн кö «рʹийа Хwәдеда дьчьн, ИМ». Һьлбәт әм нахwазьн дина мәрийа бькʹьшиньнә ль сәр хwә, ле әм дьхwазьн хwә «нава һʹьзкьрьна Хwәдеда» хwәй кьн (1 Тимотʹейо 2:9, 10; Щьһуда 21). Бәле, әм дьхwазьн wәки мә бьхәмьлинә әw чь кö «һьндöрʹе дьлда» йә, у чь кö «бәр Хwәде пʹьрʹ бь qимәт ә» (1 Пәтрус 3:3, 4).

¹³ Әм гәрәке бир нәкьн кö кʹьнщхwәкьрьн у хәмьландьна мә һʹöкöм дькә ль сәр ньһерʹандьна мәрийа һьндава хьзмәткьрьна рʹаст. Ләма жи, жь кʹьнщхwәкьрьна мә гәрәке нәйе кʹьфше хwәһʹьзи йан бабахи, ле дәwсе гәрәке бе кʹьфше кö әм Хwәде һöрмәт дькьн, у qәдьре ньһерʹандьна мәрьвед дьнена жи дьгьрьн. Һәнә кʹьнщед öса кö изьна мә һәйә хwә кьн, ле wәрә әм исафа мәрьвед дьнена жь изьна хwә бьльндтьр һʹәсаб кьн. Хенщи ве йәке, әм дьхwазьн Йаһоwа у щьмәʹта wи һöрмәт кьн, у «һәр тьшти бона шькьрдайина Хwәде бькьн» бь ве йәке әме бьдьнә кʹьфше кö әм хьзмәткʹаред Хwәде нә (1 Корьнтʹи 4:9; 10:31; 2 Корьнтʹи 6:3, 4; 7:1).

14. Дәрһәqа кʹьнщед хwә у тʹәмьзайа хwә, әз гәрәке чь пьрса бьдьмә хwә?

¹⁴ Чахе әм дьчьн кö мьзгинийе бәла дькьн йан жи дьчьнә щьвате, гәләк фәрз ә кö әм дина хwә бьдьнә кʹьнщхwәкьрьн, хәмьландьн у тʹәмьзайа хwә. Пьрсед öса бьдә хwә: «Дьбәк әз бь кʹьнщед хwә у һигийена хwә, дина мәрийайә нәлазьм дькʹьшиньмә сәр хwә? Мәрьв кö кʹеләка мьн бьн, wе шәрм нәкьн? Дь ван пьрсада чь бона мьн һе фәрз ә, бь ньһерʹандьна хwә һʹәму тьшти бькьм, йан öса бькьм кö дь щьватеда щабдарийа бьстиньм?» (Зәбур 68:6; Филипи 4:5; 1 Пәтрус 5:6).

15. Дь Хәбәра Хwәдеда чьма дәрһәqа кʹьнщхwәкьрьн, хәмьландьн у тʹәмьзайе qанунед конкрет тʹöнәнә?

¹⁵ Дь Кʹьтеба Пирозда, мәсиһийарʹа дәрһәqа кʹьнщхwәкьрьн, хәмьландьн у тʹәмьзайе qанунед конкрет нәһатьнә дайине. Йаһоwа дьхwазә, wәки хьзмәткʹаред wи һʹьш-аqьле хwә у азайа бьжартьна хwә бьдьнә хәбате. Әw öса жи дьхwазә, wәки хьзмәткʹаред wи рʹöһʹанида гьһишти бьн, пәй принсипед Кʹьтеба Пироз һәрʹьн у хwә һини wе йәке кьн, кö «qәнщи у хьрабийе жь һәв дәрхьн» (Ибрани 5:14). Хwәде гәләк дьхwазә, wәки әм һʹәму тьшти бь һʹьзкьрьна һьндава wи у мәрьвед дор-бәре хwә, бькьн. (Бьхунә Марqос 12:30, 31.) Һәрге әм тьштед жоре готи һьлдьн һʹәсаб, пьрсед кʹьнщхwәкьрьн у хәмьландьнеда бь рʹасти азайа мә гәләк ә. Әw йәк избат дьбә бь wе йәке кö Шәʹдед Йаһоwа ль һʹәму qöлбе дьнйайе чьqас бәдәw хwәдькьн.

ЧА БЬ ЖИЙИНӘКӘ ҺЕСА БЬЖИН

16. Һинкьрьна Иса жь рʹöһʹе ве дьнйайе чьда щöдә дьбә, у кʹижан пьрса әм гәрәке бьбьнә хwә?

¹⁶ Рʹöһʹе дьнйайе бь милйона мәрьва дьдә шашкьрьне у wана һелан дькә кö бәхтәwарийе дь пʹәрада у һәбунеда бьвиньн. Ле Иса гот: «Гәләк мал у мьлкʹе мьров һәбә жи, жийан нә бь мал у мьлкʹва гредайи йә» (Луqа 12:15, ДО). Иса qәбул нәдькьр жийина бь аскетсизме, демәк һʹәму тьшт у öса жи хwә педа инкʹар кьрьн. Ле дәwсе әwи һин дькьр кö әw мәрьв wе бьстиньн әʹмьр у бәхтәwарийе. Әwана һаш жь һәwщәдарийед хwә нә, бь жийинәкә һеса дьжин, у бь рʹасти жи дина хwә дьдьнә тьштед рʹöһʹани (Мәтта 5:3; 6:22). Пьрсе бьдә хwә: «Әз бь рʹасти баwәрийа хwә һинкьрьнед Иса Мәсиһ тиньм, йан кʹәтьмә бьн һʹöкöме «баве дәрәwа»? (Йуһʹәнна 8:44). Хәбәрдана мьн, щурʹе жийина мьн приоритетед мьн, у нет-мәрәмед мьн, чь дьдьнә кʹьфше? (Луqа 6:45; 21:34-36; 2 Йуһʹәнна 6).

17. Йед кö бь жийинәкә һеса дьжин, чь кʹәрәма дьстиньн?

¹⁷ Иса гот: «Сәрwахти бь әʹмәлед хwә кʹьфш дьбә» (Мәтта 11:19). Бьфькьрә, чь кʹәрәма дьстиньн әw мәрьв йед кö бь жийинәкә һеса дьжин. Әwана шабунәкә пʹьрʹ мәзьн дьстиньн дь хьзмәтеда (Мәтта 11:29, 30). Хенщи ве йәке, әwана хwә жь гәләк хәма хwәй дькьн, жь бо чь жи һе кем бәрхwәдькʹәвьн. (Бьхунә 1 Тимотʹейо 6:9, 10.) Әwана рʹази нә бь тьштед кö щәм wана һәнә у жь бо wе йәке һе зедә wәʹдә wан дьминә бона малбәте у мәсиһийед дьнена. Әwана тʹьме рʹьһʹәт рʹадьзен (Wаиз 5:12). Әwана öса жи шабунәкә гәләк мәзьн дьстиньн жь wе йәке, кö чьqас дькарьн али мәрийа дькьн (Кʹаред Шандийа 20:35). Баwәрийа wан һе зедә дьбә, у дьле wан жи рʹьһʹәт у һеса йә (Рʹомайи 15:13; Мәтта 6:31, 32). Бь рʹасти жи qимәте wан кʹәрәма пʹьрʹ мәзьн ә.

ЧА «ҺӘР ЧʹӘК . . . ЛЬ ХWӘ КЬН»

18. Кʹьтеба Пироз чь дьбежә дәрһәqа дьжмьне мә, методед wи у шәрʹе мә тʹәви wи?

¹⁸ Әwед кö нава һʹьзкьрьна Хwәдеда дьминьн, әwана рʹöһʹани тенә хwәйкьрьне жь Шәйтʹан Мире-щьна, йе кö дьхwазә нә кö тʹәне шабуне жь мәсиһийа бьстинә ле öса жи жийина һʹәта-һʹәтайе (1 Пәтрус 5:8). Паwлос ньвиси: «Шәрʹе мә нә мьqабьли хун у гошт ә, ле мьqабьли сәрwерти у һʹöкöмәтийа йә, мьqабьли миред ве дьнйа тәʹри йә у мьqабьли ордийед рʹöһʹанийә хьрабә ль дийаре әʹзмана нә» (Әфәси 6:12). Хәбәра «шәрʹ» найе готьне дәрһәqа шәрʹе дурва, мәсәлә жь щики öса кʹидәре кö тö дькари хwә вәшери, ле әва һәйә шәрʹе бе чʹәк. Хенщи ве йәке хәбәред «сәрwерти», «һʹöкöмәтийа» у «миред ве дьнйа», те һʹәсабе кö әʹфьринед рʹöһʹани бона шәрʹ рʹьнд һазьркьри нә у кьред wан бь мәрәми нә.

19. Гьли кә дәрһәqа чʹәкед рʹöһʹани.

¹⁹ Рʹаст ә әм сьст ьн у һʹәму тьшт дәсте мәва найе, ле әм дькарьн wи алт кьн. Гәло ча? Һәрге әм, «һәр чʹәке Хwәде ль хwә кьн» (Әфәси 6:11). Дәрһәqа wан чʹәка дь Әфәси 6:14-18-да öса те шьровәкьрьне: «Аwа щийе хwәда бьсәкьньн, рʹастийе мина кʹәмбәре ль пьшта хwә бьшьдиньн, һәqийе мина зьрьһʹ ль синге хwә wәргьрьн у сол ньгед wәда, бона Мьзгинийа әʹдьлайийе һазьр сәкьни бьн. Ль сәр һәр тьштирʹа жи баwәрийе мина мәртʹале бьгьрьнә хwә, бь кʹижане һуне бькарьбьн һʹәму тиред агьрийә кö Йе Хьраб давежә, бьтәмьриньн. У хьлазбуне мина кʹöмзьрьһʹе [йан, һевийе] һьлдьн, мина шур жи хәбәра Хwәде, кö жь Рʹöһʹе Пироз ә. Бь һʹәму дöа у рʹәща һәр гав дöа бькьн пе Рʹöһʹе Пироз. Сәр ве йәке һʹьшйар бьминьн у бона тʹәмамийа щьмәʹта Хwәде тʹьме дöа бькьн».

20. Ортʹа мә у әскәрада чь фьрqи һәйә?

²⁰ Әв чʹәкед рʹöһʹани жь Хwәде нә у әwана wе тʹьме мә хwәй кьн, һәрге әм wана ль хwә кьн. Фьрqи һәйә ортʹа мә у әскәрада, әскәр дькарьн гәләк wәхт шәрʹ нәкьн, ле Мәсиһи тʹьме шәрʹ дькьн бона мьрьн у жийине, у әв шәрʹ wе тʹәне һьнге кʹöта бә, чахе Хwәде дьнйа Мире-щьна алт кә у мьлйакʹәтед wийи зöлм жи бькә гәлийе һәй-wайе (Әʹйанти 12:17; 20:1-3). Ләма һәрге тö пешбәри сьстбуна хwә у хwәстьнед хwәйә нәрʹаст шәрʹ дьки, нәсәкьнә у дәсте хwә бәржер нәкә, чьмки һәр кәс жь мә «зордарийе» хwә дькә, wәки Йаһоwарʹа амьн бьминә (1 Корьнтʹи 9:27). Бь рʹасти әм гәрәке wи чахи бәрхwәкʹәвьн, чахе шәрʹ накьн.

21. Әм ча дькарьн шәрʹе рʹöһʹани алт кьн?

²¹ Хенщи ве йәке, бь qәwата хwә әме нькарьбьн әви шәрʹи алт кьн. Ләма жи Паwлосе шанди ньвиси, кö гәрәке һәр гав дöа бькьн пе рʹöһʹе пироз. Öса жи әм гәрәке гöһ бьдьнә Йаһоwа, Хәбәра wи һин бьн у гәрәке һʹәму тьшти бькьн, кö һәләqәтийа мә тʹәви «һәваләскәред» мә һәбә, әм гәрәке бир нәкьн кö әм тʹәне ниньн (Фьлимон 2; Ибрани 10:24, 25). Кʹи кö дь ван һʹәму тьштада амьн бьминә, wе нә кö тʹәне әви шәрʹи алт кә, ле öса жи wе бькарьбә пьштгьрийа һʹәбандьна хwә бькә, чахе тʹәви wи бькʹәвьнә дәʹwе.

ҺАЗЬР БӘ КÖ ПЬШТГЬРИЙА ҺʹӘБАНДЬНА ХWӘ БЬКИ

22, 23. (а) Әм чьма гәрәке тʹьме һазьр бьн пьштгьрийа һʹәбандьна хwә бькьн, у кʹижан пьрса әм гәрәке бьдьнә хwә? (б) Әме дь сәре дьнда кʹижан готаре шеwьр кьн?

²² Иса гот: «Һун нә пʹара дьнйайе нә, ләма дьнйа дьжәнә wә» (Йуһʹәнна 15:19). Ләма жи Мәсиһи гәрәке тʹьме һазьр бьн кö пьштгьрийа һʹәбандьна хwә бькьн у әве йәке гәрәке нәрм у бь qәдьргьртьне бькьн. (Бьхунә 1 Пәтрус 3:15.) Пьрса бьдә хwә: «Гәло әз фәʹм дькьм, чьма Шәʹдед Йаһоwа щар-щара позисийакә öса дьгьрьн кʹижан кö жь ньһерʹандьна гәләка щöда дьбә? Чахе мьнрʹа лазьм ә кö позисийакә öса бьгьрьм, әз бь тʹәмами баwәр дькьм, wәки гьлийед Кʹьтеба Пироз у хöламе амьн рʹаст ьн?» (Мәтта 24:45; Йуһʹәнна 17:17). У чахе лазьм те кö тьштәки öса бькьм, чь кö бәр чʹәʹве Хwәде рʹаст ә, әз һазьр ьм кö жь мәрьвед дьн бемә щöдәкьрьне у һәла һе бь ве йәке жи кʹöбар бьм? (Зәбур 34:2; Мәтта 10:32, 33).

²³ Гәләк щар хwәстьна мә кö жь ве дьнйайе хwә дур хwәй кьн дькʹәвә бьн щерʹьбандьне, у әв йәк öса дьqәwьмә кö әм һаш хwә тʹöнәнә. Мәсәлә, ча мә ида жоре готьбу Шәйтʹан Мире-щьна дьхwазә хьзмәткʹаред Йаһоwа Хwәде, бь wәʹдәдәрбазкьрьна бькә пʹара дьнйайе. Әм ча дькарьн бьжберьн wәʹдәдәрбазкьрьна öса йа кö wе мәрʹа һесабуне бинә у исафа мә жи тʹәмьз хwәй кә? Әве готаре әме дь сәре майинда шеwьр кьн.