ПʹАРА 6

Ибо Беԛьсуртийа Хԝә Хԝәй Дькә

Шәйтʹан Мире-щьна беԛьсуртийа Ибо дькә бьн шьке, ле Ибо Йаһоԝарʹа амьн дьминә

ГӘЛО мәри дькарьн щерʹьбандьнед гәләк гьранда Хԝәдерʹа амьн бьминьн, у һәла һе ԝи чахи жи, һәрге сәва амьнийа хԝә тьштәки жь Хԝәде настиньн? Әв пьрс пешда һат ԝәʹде жийина Ибо, у әԝи щаба ве пьрсе да.

Чахе щьмәʹта Исраел Мьсьреда бу, пьсмаме Бьраһим, Ибо Әʹрәбьстанеда дьжит. Щарәке, мәләк бәр Хԝәде тʹоп бун у Мире-щьна жи һатә нав ԝан. Йаһоԝа бәр әʹфринед хԝәйи әʹзмана гот, кӧ әԝ баԝәрийа хԝә Ибо тинә. Йаһоԝа ӧса жи кʹьфш кьр кӧ мәрики мина Ибо амьн, тʹӧнә. Ле Шәйтʹан Мире-щьна щаба Йаһоԝа да у гот, кӧ Ибо Хԝәдерʹа хьзмәт дькә, чьмки Хԝәде мьԛати ԝи дьбә у ԝи кʹәрәм дькә. Әв мәләке мьԛабьл дьхԝәст избат кьра, кӧ һәрге һʹәму тьшти жь Ибо бьстиньн, әԝе ньфьрʹа Хԝәде бькә.

Мәләк әʹзменда бәр Хԝәде тʹоп бун у Шәйтʹан жи нав ԝанда йә

Хԝәде изьн да Мире-щьна, ԝәки һәбуна Ибо бь тʹәмами ле бьстинә, зарʹед ԝи бькӧжә у бь нәхԝәшикә гьран ԝи нәхԝәш бехә. Ибо ньзаньбу кӧ әв кьред Мире-щьна нә, ләма жи фәʹм нәдькьр чьрʹа Хԝәде щерʹьбандьнед ӧса гьран дьдә ԝи. Ле йәкә Ибо амьн ма у Хԝәде инкʹар нәкьр.

Се һәвалед дӧрʹу һатьбун щәм Ибо. Ԝана дьхԝәст Ибо бьдана баԝәркьрьне, ԝәки йанчь Хԝәде ԝи щәза дькә, сәва гӧнед ԝийә вәшарти. Әв хәбәрдана ԝанә тʹәви Ибо, кʹьтеба Ибода һатийә ньвисаре. Ԝана ӧса жи дьхԝәст избат кьн, ԝәки Хԝәде жь хьзмәткʹаред хԝә тʹӧ щар ԛайил нинә, у итʹбарийа хԝә жи ԝана найнә. Ибо дьшьрмишбуна ԝанә нәрʹастрʹа рʹази нибу. Бь баԝәрийа хԝәйә ԛайим әԝи гот, ԝәки һʹәта мьрьне беԛьсуртийа хԝә ԝе нәһелә!

Ле Ибо шашик бәрʹда. Әԝи гәләк дина хԝә да сәр рʹастийа хԝә. Әлиһу кʹижан кӧ жь ԝана щаһьлтьр бу, чахе һʹәму шәрʹе ԝан бьһист кʹәтә нав хәбәрдана ԝан. Әԝи ширәт да Ибо ԝәки дьшьрмишбуна хԝәйә нәрʹаст, рʹаст кә у ԝирʹа әʹйан кьр, кӧ избаткьрьна сәрԝертийа Йаһоԝа һе фәрз ә, нә кӧ избаткьрьна рʹастийа мәрьва. Шашийа Ибо һәма ве йәкеда бу. Әлиһу ӧса жи һәвалед Ибойи дӧрʹу, сәрт ширәт кьрьн.

Паши ве йәке Йаһоԝа тʹәви Ибо хәбәр да, ԝәки дьшьрмишбуна ԝи рʹаст кә. Хԝәде дина Ибо да сәр кʹәрәмәтед тʹәбийәте у бь ве йәке ԝи да фәʹмкьрьне, кӧ мәри һьмбәри Хԝәде чьԛас бьчʹук ьн. Ибо мәрики шкәсти бу, әԝи шашийа хԝәйә нәрʹаст фәʹм кьр. Йаһоԝа Хԝәде «гәләк дьлован у тʹьжә рʹәʹм ә», әԝи Ибо ԛәнщ кьр у дӧ щар зедәтьр һәбуна ԝи у ӧса жи зарʹед ԝи зедә кьр (Аԛуб 5:11, ИМ). Бәле, Ибо нава щерʹьбандьнед гьранда жи беԛьсуртийа хԝә хԝәй кьр, у бь ве йәке щаба пьрса Мире-щьна да

—Сәр һʹиме кʹьтеба Ибо.

ПЬРСЕД ЛАПИ ФӘРЗ

Шәйтʹан Мире-щьна дьхԝәст избат кьра кӧ Ибойе хԝәдехоф у амьн, тʹәне сәва кʹара хԝә Хԝәдерʹа хьзмәт дькә. Хенщи ве йәке, әԝи ӧса жи дьхԝәст избат кьра, кӧ һʹәму әʹфринед Хԝәде бь дьл у щан Хԝәдерʹа хьзмәт накьн. Ӧса Мире-щьна беԛьсуртийа һʹәму мәрийа кьрә бьн шьке. Әв пьрс, бу пʹара ԝе пьрсәкә фәрз кӧ бахче Еденеда, Шәйтʹан пешда ани. Әв пьрс хут дәрһәԛа рʹастийа Хԝәде бу у дәрһәԛа изьна ԝи кӧ сәрԝертийе бькә. Кʹьтеба Ибо нишан дькә кӧ һәрге әм бәр Йаһоԝа беԛьсуртийа хԝә хԝәй дькьн, бь ве йәке әм щаба пьрса Мире-щьна дьдьн.