Шандийед Иса бе Тьрс Хьзмәт Дькьн

ДӘҺ рʹож паши чуйина Иса сәр әʹзмана, сала 33-да Д.М., ԝәʹде щәжьна Щьһуйа, демәк Рʹожа Пенщийә һʹәсаб, 120 шагьртед Иса ль Оршәлиме маләкеда тʹоп бун. Ньшкева ве маледа дәнгәки мина дәнге ба тʹьжи бу. Һьнге кʹәрәмәт ԛәԝьми, шагьрта дәстпекьрьн сәр щурʹә-щурʹә зьмана хәбәр дьн. Ле гәло әв йәк ча ӧса ԛәԝьми? Хԝәде рʹӧһʹе хԝәйи пироз да шагьрта.

Бәр ве мале гәләк мәри жь һʹәму дәра тʹоп бьбун. Әԝана зәндәгьрти ман, чахе дитьн кӧ шагьртед Иса, бь зьмане ԝан рʹьһʹәт хәбәр дьдьн. Чахе Пәтрус шьровәдькьр кӧ ча әв йәк ԛәԝьми, әԝи гьлийе Йоԝел пʹехәмбәр ԝәкʹьланд, ԝәки әԝед кӧ бьстиньн рʹӧһʹе пироз, ԝе бьстиньн пʹешкʹешед бь кʹәрәмәт (Йоԝел 2:28, 29). Әве кʹәрәмәте кʹьфш кьр, ԝәки Хԝәде дәԝса щьмәʹта Исраел, ида щьвата Мәсиһийайә тʹәзә ԛәбул дькә. Демәк кʹи кӧ бьхԝәста бьбә хьзмәткʹаре Хԝәде, гәрәке пәй Иса Мәсиһ бьчуйа у бьбуйа Мәсиһи.

Рʹож бь рʹож пәйкʹәтьн зедә дьбун, дьжмьнед Иса шагьртед ԝи кьрьнә кәле. Ле шәв, мәләке Йаһоԝа дәре кәле вәкьр у готә шагьрта, ԝәки әԝана һәрʹьн у хьзмәт кьн. Бәрбанге әԝана чун пʹарьстгәһе, у дәстпекьрьн дәрһәԛа Иса һин кьн. Дьжмьнед ԝан гәләк һерс кʹәтьн, у изьн нәдьдан ԝәки әԝана мьзгинийе бәла кьн. Ле шагьрта бе тьрс щаба ԝан дан: «Әм гәрәке гӧрʹа Хԝәде бькьн, нә кӧ йа мәрьва» (Кʹаред Шандийа 5:28, 29).

Пәйкʹәтьн һе ԛайим бун. Һьнә Щьһуйа, шагьрте Иса Стәйфан гӧнәкʹар кьрьн ве йәкеда, йанчь әԝ Хԝәде беһӧрмәт дькә. Ԝана Стәйфан да бәр кәвьра у кӧштьн. Шаԝуле жь Тарсусе, кӧштьна Стәйфан дьдит, у ԛәбул дькьр. Әв Шаԝуле щаһьл дьчу Шаме, ԝәки шагьртед Иса Мәсиһ бьдә гьртьне. Рʹева жь әʹзмана шәԝԛәк кʹәтә сәр ԝи, у әԝи дәнгәк бьһист: «Шаԝул, Шаԝул! Тӧ чьма мьн дьзерини?» Әԝи жи гот: «Тӧ кʹи йи, Хӧдан? Ԝи дәнги готе: «Әз әԝ Иса мә, йе кӧ тӧ дьзерини» (Кʹаред Шандийа 9:3-5).

Се рʹож шунда, Иса шагьрте хԝә Һананийа шандә щәм Шаԝул, ԝәки рʹонайа чʹәʹве ԝи бинә щи. Шаԝул һатә ньхӧмандьне у бу Мәсиһийе гәләк баш щьватеда. Шаԝул бе тьрс шәʹдәти дьда дәрһәԛа Иса, у әԝ әʹйан бу ча Паԝлосе шанди.

Пешийе шагьртед Иса, мьзгинийа Пʹадшатийа Хԝәде тʹәне Щьһуйарʹа у Самәрийарʹа бәла дькьрьн. Ле щарәке мәләкәк, хԝә нишани сәрсәде ордийа Рʹоме Корʹнелйо кьр, йе кӧ хԝәдехоф бу. Мәләк готә Корʹнелйо, ԝәки әԝ бьшинә пәй Пәтрус у шагьртед дьн, ԝәки ԝи у нәфәред ԝирʹа мьзгинийе гьли кьн. Чахе Пәтрус һе хәбәр дьда, рʹӧһʹе пироз һатә сәр ван гӧһдара у Пәтрус готә ԝан, ԝәки әԝана бь наве Иса Мәсиһ бенә ньхӧмандьне. Чьмки әԝана Ибрани нибун, ләма жи бь ве йәке зәлал бу ԝәки рʹийа әʹмьре һʹәта-һʹәтайе, һатә вәкьрьне сәва һʹәму мьләта. У паши ве йәке щьват һазьр бу, ԝәки мьзгинийе ль сәр тʹәмамийа әʹрде бәла кә.

​—Сәр һʹиме кʹьтеба Кʹаред Шандийа 1:1-11:21.