Кʹи йә Иса Мәсиһ?

1. Ча әʹмьре Иса дәстпебу?

Иса нә мина һʹәму мәрийа бу, чьмки пешийа һатьна ль сәр әʹрде, әw ль әʹзмана ча мьлйакʹәт дьжит (Йуһʹәнна 8:23). Пешийа әʹфьрандьна һʹәму тьшти, Йаһоwа Иса әʹфьрандьбу, у паше жи һʹәму тьштед дьне Йаһоwа Хwәде у Иса тʹәвайи әʹфьрандьн. Йаһоwа Хwәде хwәха Иса әʹфьрандийә, ләма жи Иса те навкьрьне Кӧрʹе Хwәдейи «тайе тʹәне» (Йуһʹәнна 1:14). Иса Хәбәрване Хwәде бу, әwи хәбәра Хwәде дәрбази кәсед дьне дькьр, ләма жи әw те навкьрьне «Хәбәр». Бьхунә Колоси 1:15, 16.

2. Чьма Иса Мәсиһ һатә ль сәр әʹрде?

Хwәде әʹмьре Кӧрʹе хwә дәрбази зьке Мәрйәме кьр, у ӧса Иса шандә ль сәр әʹрде. Мәрйәм qизәкә щьһу у бькʹьр бу. Ләма жи баве Исайи мәрьвайи тʹӧнәбу (Луqа 1:30-35). Иса Мәсиһ һатә ль сәр әʹрде сәва кӧ: 1) дәрһәqа Хwәде рʹастийе һин кә, 2) мәсәле бьдә мә, чаwа wәʹде чәтьнайа qьрара Хwәде бьqәдиньн, у 3) әʹмьре хwәйи qәданди бәрва бьдә у мә бькʹьрʹә. Бьхунә Мәтта 20:28.

3. Иса Мәсиһ әм жь чь кʹьрʹин?

Ль вьр, кʹьрʹин те һʹәсабе һәqдайин, сәва кӧ кәсәк жь мьрьне бе хьлазкьрьне (Дәркʹәтьн 21:29, 30). Нета Хwәде әw нибу, wәки мәрьв кал бьн, пир бьн у бьмьрьн. Ле әве йәке әм жь кʹӧ заньн? Хwәде мәрьве пешьн Адәмрʹа гот, кӧ һәгәр әw гӧрʹа wи нәкә демәк ча дь Кʹьтеба Пирозда те гoтьне гӧнә бькә, әwе бьмьрә. Ләма жи һәгәр Адәм гӧнә нәкьра, әw wе тʹӧ щар нәмьра (Дәстпебун 2:16, 17; 5:5). Жь Кʹьтеба Пироз әм педьһʹәсьн, кӧ гӧнә жь Адәм «кʹәтә» дьне у дәрбази ль сәр мәрьва бу. Бь ве йәке Адәм гӧнә у мьрьн дәрбази ль сәр һʹәму зӧрʹәтед хwә кьр. Ләма жи мәрʹа лазьм ә кʹьрʹин сәва кӧ мә жь мьрьне хьлаз кә, кӧ жь Адәм дәрбази мә бу. Бьхунә Рʹомайи 5:12; 6:23.

Ле кʹи дькарьбу һәqе кʹьрʹине бьда, сәва кӧ мә жь мьрьне хьлаз кә? Чахе әм дьмьрьн әм тʹәне һәqе гӧнед хwә дькарьн бьдьн. Тʹӧ мәрьвәки гӧнәкʹар нькарә һәqе гӧнед мәрьвед дьн бьдә. Бьхунә Зәбур 49:7-9.

4. Иса Мәсиһ чьрʹа мьр?

Иса нә мина мә бу, әw qәданди бу. Ләма жи нә лазьм бу wәки әw сәва гӧнед хwә бьмьра, әwи тʹӧ щар гӧнә нәкьрьбу. Ле әw мьр сәва гӧнед мәрьвед дьн. Хwәде Иса шанд, wәки әw сәва гӧнед мә бьмьрә, у бь ве йәке әwи һʹәзкьрьна хwәйә пʹьрʹ мәзьн дь һьндава мәрьвада әʹйан кьр. Иса жи һʹәзкьрьна хwә дь һьндава мәда әʹйан кьр, әwи гӧрʹа Баве хwә кьр у әʹмьре хwә сәва гӧнед мә бәрва да. Бьхунә Йуһʹәнна 3:16; Рʹомайи 5:18, 19.

Видео: Чьма Иса Мьр?

5. Иса Мәсиһ ньһа чь дькә?

Чахе Иса ль сәр әʹрде бу, әwи нәхwәш qәнщ дькьрьн, мьри жь мьрьне рʹадькьр у дь чәтьнайада али мәрьва дькьр. Бь ве йәке Иса нишан кьр, кӧ дь ахьрийеда сәва мәрьвед гӧһдар wе чь бькә (Мәтта 15:30, 31; Йуһʹәнна 5:28). Паши мьрьне Хwәде Иса пашда бьрә ль әʹзмана, ча кәсед рʹӧһʹани (1 Пәтрус 3:18). Ль wьр Иса Мәсиһ алийе дәсте Хwәдейи рʹасте рʹуньшт у һивийе бу, кӧ һʹәта Йаһоwа Хwәде qәwате бьдә wи, wәки әw ча пʹадша ль сәр тʹәмамийа әʹрде пʹадшатийе бькә (Ибрани 10:12, 13). Ньһа Иса Мәсиһ ль әʹзмана пʹадшатийе дькә у шагьртед wи жи мьзгинийа Хwәде дь тʹәмамийа дьнйайеда әʹлам дькьн. Бьхунә Данийел 7:13, 14; Мәтта 24:14.

Зутьрәке Иса Мәсиһ ча пʹадша wе qәwата хwә бьдә хәбате, wәки һʹәму чәтьнайа у ӧса жи wан кʹи кӧ чәтьнайа тиньн, wе кʹӧтакә. Һәр кәс кʹи кӧ баwәрийа хwә Иса Мәсиһ тинә у гӧрʹа wи дькә, әwе ль сәр әʹрде дь щьнәтеда бьжи. Бьхунә Зәбур 37:9-11.