Самуйел Дькьр Әw, Чь кö Рʹаст бу

Самуйеле щаһьл дь коне Хwәдеда дьжит у дьхәбьти. Кон әw щи бу, кʹидәре кö мәрьв дьһатьн, wәки Йаһоwарʹа qöльх кьн. Ле тö зани Самуйел ча һатә кон? Wәре әм пешийе дәрһәqа дийа Самуйел, Һаннайе пебьһʹәсьн.

Гәләк wәхт Һанна нькарьбу зарʹ бьанийа. Ле әwе гәләк дьхwәст кö зарʹәкә wе һәбә, ләма жи әwе Йаһоwарʹа дәрһәqа ве йәке дöа дькьр у лава жь wи дькьр, wәки али wе бькә. Һаннайе соз да Хwәде, кö һәрге кöрʹәке бинә, wе кöрʹе хwә бьшинә кон, сәва кö әw ль вьр бьжи у qöльх кә. Йаһоwа щаба дöайе wе да, у әwе кöрʹәк ани. Һаннайе, наве wи дани Самуйел. Чахе Самуйел сьсе йан чар сали бу, һьнге чаwа кö Һаннайе соз дабу, әwе кöрʹе хwә һьлда у бьрә кон сәва кö әw ль вьр Хwәдерʹа qöльх кә.

Әли дь конеда сәрәккʹаһин бу. Һәрд кöрʹед wи жи, дь конда чаwа кʹаһин qöльх дькьрьн. Бьра бира тәда бә, wәки кон әв мала Хwәде бу бона qöльхкьрьне. У мәрьв дьһатьн ль вьр, сәва кö пьштгьрийа wан тьштед баш бькьн, йед кö дь конда дьһатьнә кьрьне. Ле кöрʹед Әли тьштед гәләк хьраб дькьрьн. Самуйел дьдит wәки кöрʹед wи чь дькьрьн. Ле гәло Самуйел дькьр әwан тьштед хьраб, йед кö кöрʹед Әли дькьрьн?~ На. Самуйел хwә ль рʹастийе дьгьрт у һʹәму тьшт öса дькьр, чаwа кö де-баве wи, әw һин кьрьн.

Ча тö дьшьрмиш дьби, чахе Әли дьдит wәки кöрʹед wи хьрабийе дькьн, әwи гәрәке чь бькьра?~ Әли гәрәке wана щәза кьра. Хенщи ве йәке, әwи гәрәке изьн нәда wан кö диса жи дь мала Хwәдеда qöльх кьрана. Ле Әли öса нәкьр. Ләма жи Йаһоwа гәләк һерс кʹәт сәр wи у дö кöрʹед wи. Йаһоwа qьрар кьр wәки wана щәза кә.

Еварәки чахе Самуйел рʹаза бу, әwи дәнгәк бьһист йе кö гази wи дькьр: ‹Самуйел!› Һьнге әw рʹадьбә у дьрʹәвә щәм Әли, ле Әли дьбежә: ‹Мьн гази тә нәкьрийә›. Әв йәк дö щар зедәтьр qәwьми. Щара сьсийа, Әли готә Самуйел һәрге тö диса щарәке әв дәнг бьбьһейи, гәрәке öса бежи: ‹Кʹәрәм кә Йаһоwа, бежә; әз тә дьбьһем›. Самуйел һәма öса кьр, чаwа кö Әли wирʹа гот. Паше Йаһоwа готә Самуйел: ‹Бежә Әли кö әзе малбәта wи щәза кьм, бона wан һʹәму тьштед хьраб кö әwана дькьн›. Ча тö дьшьрмиш дьби Самуйелрʹа һеса бу әв йәк бьгота Әли?~ На, әв йәк һеса нибу. Рʹаст ә Самуйел тьрсийа, ле әwи йәкә һʹәму тьшт öса кьр, чаwа кö Йаһоwа wирʹа готьбу. Һәрд кöрʹе Әли һатьнә кöштьне, у Әли жи мьр.

Самуйел мәсәләкә гәләк баш ә сәва мә. Рʹаст ә Самуйел дьдит кö мәрьвед дьн тьштед хьраб дькьрьн, ле әwи йәкә дькьр әw, чь кö рʹаст бу. Ле дәрһәqа тә чь дькарьн бежьн? Тöйе бьби мина Самуйел у хwә мина wи ль рʹастийе бьгьри? Һәрге тö öса бьки, тöйе дьле Йаһоwа у де-баве хwә ша бьки.