Малбәтно, Тʹәвайи Йаһоԝарʹа Ԛӧльх кьн

Чаԝа һун жь ве брошуре пеһʹәсийан, дь Кʹьтеба Пирозда гәләк принсип һәнә, йед кӧ дькарьн али ԝә у малбәта ԝә бькьн. Йаһоԝа дьхԝазә ԝәки һун бәхтәԝар у ша бьн. Әԝ соз дьдә, кӧ һәрге һун ԛӧльхкьрьна хԝә дайньн щийе пешьн дь әʹмьре хԝәда, һьнге «әԝ һʹәмуйе ԝәрʹа бенә дайине» (Мәтта 6:33). Хԝәде бь рʹастийе жи дьхԝазә ԝәки һун бьбьнә досте ԝи. Ләма жи һәр мәщаләке бьдьнә хәбате, сәва кӧ достийа хԝә тʹәви Хԝәде һе мәзьн кьн. Бь рʹастийе жи сәва бәнда әв ԛәдьрәки чьԛас мәзьн ә (Мәтта 22:37, 38).

1 ҺӘЛӘԚӘТИЙА ХԜӘ ТʹӘВИ ЙАҺОԜА ԚӘԜИ КЬН

КʹЬТЕБА ПИРОЗ ЧЬ ДЬБЕЖӘ: Йаһоԝа дьбежә: «Бьбьмә Баве ԝә, һуне жи бьбьнә кӧрʹ у ԛизед мьн» (2 Корьнтʹи 6:18). Хԝәде дьхԝазә ԝәки һун бьбьнә досте ԝийи незик. У дӧакьрьн әв мәщаләк ә, кӧ незики Хԝәде бьн. Йаһоԝа ԝә тʹәглиф дькә, кӧ «һәр гав дӧа бькьн» (1 Тʹесалоники 5:17). Әԝ дьхԝазә нет-мәрәмед дьле ԝә у дәрдед ԝә пебьһʹәсә у бьбьһе (Филипи 4:6). Чахе һун тʹәви малбәта хԝә дӧа бькьн, әԝана ԝе бьвиньн кӧ Хԝәде сәва ԝә чьԛас йәки зенди йә.

Хенщи ве йәке, сәва кӧ тʹәви Хԝәде хәбәр дьн, ԝәрʹа лазьм ә ԝәки ӧса жи гӧһ бьдьнә ԝи. Һун дькарьн әве йәке бькьн, һәрге Хәбәра ԝи у әʹдәбйәтед кӧ ль сәр һʹиме Кʹьтеба Пироз ьн, һин дьбьн (Зәбур 1:1, 2). Чь кӧ һун педьһʹәсьн, дәрһәԛа ван тьшта дьшьрмиш бьн (Зәбур 77:11, 12). Сәва кӧ гӧһ бьдьнә Хԝәде, әв ӧса жи те һʹәсабе кӧ гәрәке һәр тʹьм ль сәр щьвата жи һазьр бьн (Зәбур 122:1-4).

Диса мәщаләкә фәрз һәйә, бь сайа чь жи һун дькарьн һәләԛәтийа хԝә тʹәви Йаһоԝа ԛәԝи кьн. Демәк чахе тʹәви мәрийа дәрһәԛа Хԝәде хәбәр дьдьн. Чьԛас һе зедә һуне әве йәке бькьн, һаԛас һе зәʹф һуне тʹәхмин кьн кӧ незики Хԝәде дьбьн (Мәтта 28:19, 20).

ЧЬ ҺУН ДЬКАРЬН БЬКЬН:

• Һәр рʹож ԝәʹдә бьвиньн, сәва кӧ Кʹьтеба Пироз бьхуньн у дӧа бькьн

• Пешийа ԝәʹдәдәрбазкьрьне у һʹесабуне, һәртʹьм шьхӧлед рʹӧһʹани ль сәр щийе әʹԝльн дайньн

2 ШАБУНЕ БЬВИНЬН ЖЬ ԚӦЛЬХКЬРЬНА ТʹӘВИ МАЛБӘТЕ

КʹЬТЕБА ПИРОЗ ЧЬ ДЬБЕЖӘ: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:8). Бәрнәма ԝә гәрәке һәбә, сәва кӧ һун бькарьбьн һәр гав әԝе бьдьнә хәбате, ԝәки ԛӧльхкьрьна тʹәви малбәте дәрбаз кьн (Дәстпебун 18:19). Ле һе зедә тьшт диса лазьм ьн. Хԝәде гәрәке пʹарәкә жь әʹмьре ԝәйи һәр рʹожи бә. Ләма жи һәләԛәтийа малбәта хԝә тʹәви Хԝәде ԛәԝи кьн. Демәк дәрһәԛа ԝи хәбәр дьн «гава мала хԝәда рʹуньшти би, йан рʹеда би, йан пʹалдайи би йан рʹадьби» (Ԛануна Дӧщари 6:6, 7 ПКʹМ). Бьра нета ԝә мина нета Йешуа бә, йе кӧ гот: «Ле бәле әз у малийен хԝә, әме жь Хӧданрʹа ԛультийе бькьн!» (Йешуа 24:15).

ЧЬ ҺУН ДЬКАРЬН БЬКЬН:

• Бәрнама һинбунейә ӧса һазьр кьн, ԝәки һʹәԝщед һәр нәфәред мала хԝә һьлдьн һʹәсаб кӧ ԝанарʹа һʹәԝас бә жи