Чьрʹа Жьн Гәрәке Принсипа Сәритийе Ԛәбул кә?
«Сәре жьне мер ә» (1 КОРН. 11:3).
1, 2. (а) Паԝлосе шанди дәрһәԛа сәритийа кӧ Йаһоԝа кʹьфш кьрьбу у гӧһдарикьрьне, чь ньвиси? (б) Ве готареда чь пьрс ԝе бенә шеԝьркьрьне?
ПАԜЛОСЕ шанди ньвиси, ԝәки «сәре һәр мери Мәсиһ ә» у «сәре Мәсиһ Хԝәде йә», у бь ԝе йәке да кʹьфше принсипа сәритийе кӧ Хԝәде кʹьфш кьрьбу (1 Корн. 11:3). Готара пешийа ԝеда һатьбу готьне, ԝәки бона Иса ԛәдьрәки мәзьн бу, кӧ гӧрʹа сәре хԝә, демәк гӧрʹа Йаһоԝа Хԝәдеда бә. Ӧса жи һатьбу готьне, кӧ сәре мер Мәсиһ йә. Мәсиһ һьндава мәрьвада ԛәнщ, нәрм у дьлшәԝат бу. Мер жи гәрәке чʹәʹв бьдьнә Мәсиһ у щьватеда һьндава һʹәмуйада ӧса бьн, илаһи һьндава жьнед хԝәда.
2 Ле әм чь дькарьн бежьн дәрһәԛа жьна? Сәре ԝан кʹи йә? Паԝлосе шанди ньвиси: «Сәре жьне мер ә». Жьн һьндава ве тʹәмийа кӧ жь бина бәр Хԝәде йә, гәрәке чаԝа бьн? Гәло әве принсипе дькарьн бьдьнә хәбате ԝе дәрәщеда жи чахе мер баԝәрмәнд нинә? Гәло әв йәк кӧ жьн гәрәке принсипа сәритийе ԛәбул кә, те һʹәсабе кӧ изьна жьне тʹӧнә фькьред хԝә бежә, гава малбәтеда тьштәк те сафикьрьне? Жьн жь бо чь һежайи пәсьна нә?
«Кʹомәкдарәк кӧ Лайиԛи Ԝи бә Чекьм»
3, 4. Чьма пеканина принсипа сәритийе, зәԝащерʹа кʹаре тинә?
3 Принсипа сәритийе алийе Хԝәдеда һатийә кʹьфшкьрьне. Паши әʹфьрандьна Адәм, Йаһоԝа Хԝәде гот: «Нә баш ә кӧ мер тʹәне бьминә, кʹомәкдарәк кӧ лайиԛи ԝи бә чекьм». Чахе Адәм дит кӧ Йаһоԝа кʹомәкдарәк дайә ԝи, шабуна әԝи гот: «Ньһа әва һәстуйе жь һәстуйе мьн ә у гоште жь гоште мьн ә» (Дәстп. 2:18-24). Мәщала Адәм у Һеԝайе һәбу, кӧ бьбуна де-баве инсанәта кʹамьл. Зӧрʹәтед ԝан жи ԝе һʹәта-һʹәтайе бәхтәԝарийеда сәр әʹрде щьнәтеда бьжитана.
4 Жь бо мьԛабьлибуне, ԝана һәр тьшт ӧнда кьр (Бьхунә Рʹомайи 5:12). Ле принсипа дәрһәԛа сәритийе нәһатийә гӧһастьне. Чахе мәрьв әве принсипе рʹаст дьдьнә хәбате, әв кʹарәкә мәзьн тинә у зәԝаще бәхтәԝар дькә. Ахьрийе әԝана шабуне дьстиньн, чаԝа кӧ Иса ша дьбу гава гӧрʹа сәре хԝә дькьр, демәк гӧрʹа Йаһоԝа. Дәрһәԛа Иса, пешийа һатьна ԝийә сәр әʹрде һатийә готьне: «Һәр тʹьм ль бәр Ԝи ша дьбум» (Мәтʹлк. 8:30). Нә мер, нә жи жьн жь бо гӧнәкʹарийе нькарьн әве принсипе бь кʹамьли биньн сери. Ле чахе әԝана һәр тьшти дькьн, кӧ әве принсипе биньн сери, әԝана зәԝаща хԝәда ләзәте дьвиньн.
5. Чьма жьн-мер гәрәке гӧһ бьдьнә ширәта жь Рʹомайи 12:10?
5 Сәва кӧ зәԝащ бәхтәԝар бә, жьн-мер гәрәке ширәта Кʹьтеба Пироз биньн сери, кʹижан кӧ һʹәму Мәсиһийарʹа һатийә дайине: «Һʹзкьрьнеда чаԝа хушк-бьра сәр һәв шәԝат бьн, ԛәдьркьрьнеда жь һәвдӧ дәрбазтьр бьн» (Рʹом. 12:10). Хенщи ԝе йәке, мер у жьн гәрәке ԛәԝате бьдьнә хәбате, кӧ «һәврʹа ширьн у дьлшәԝат бьн, ль һәв бьбахшиньн» (Әфәс. 4:32).
Чахе Һәвалзәԝащ Баԝәрмәнд Нинә
6, 7. Һәрге жьн гӧрʹа мере хԝәйи нәбаԝәрмәнд дькә, әԝ йәк чь ахьри дькарә бинә?
6 Һәрге һәвалзәԝаще тә баԝәрмәнд нинә, ча гәрәке хԝә бьди кʹьфше һьндава ԝи йан ԝеда? Һʹәчʹи зәʹф малбәтада мер нәбаԝәрмәнд ә. Жьн ча гәрәке хԝә бьдә кʹьфше һьндава малхе хԝәйи нәбаԝәрмәндда? Кʹьтеба Пирозда те готьне: «Кʹӧлфәтно, гӧрʹа мере хԝәда бьн, ԝәки жь ԝан һьнәк жи, һәгәр гӧһдарийа хәбәре накьн, бь пʹәргалийа жьнед хԝә, бе готьн жи бенә сәр баԝәрийе гава пʹәргалийа ԝәйә хофә у навә-намус бьбиньн» (1 Пәт. 3:1, 2).
7 Кʹьтеба Пироз жьна һелан дькә гӧрʹа мере хԝәйи нәбаԝәрмәнд бькьн. Рʹабун-рʹуньштьна жьне дькарә мере ԝе һелан кә, ԝәки бьфькьрә кӧ жь бо чь жьна ԝи алийе башда ӧса һатийә гӧһастьне. Ахьрийеда дьԛәԝьмә һʹәԝаса мер һьндава баԝәрийа жьна ԝида пешда бе у әԝ жи рʹастийе ԛәбул кә.
8, 9. Жьн гәрәке ча хԝә бьдә кʹьфше, һәрге мере ԝейи нәбаԝәрмәнд бәрдәԝам дькә һьндава ԝеда хԝә нәбаш дьдә кʹьфше?
8 Ле жьн гәрәке чь бькә, һәрге мере ԝейи нәбаԝәрмәнд бәрдәԝам дькә һьндава ԝеда хԝә нә баш дьдә кʹьфше? Кʹьтеба Пироз жьна һелан дькә һʹӧнӧред баш әʹйан кьн, чьԛас ԝанрʹа чәтьн бә жи. Мәсәлә, 1 Корьнтʹи 13:4-да ӧса те готьне: «Һʹьзкьрьн думькдьреж у ширьн ә». Жьн гәрәке бәрдәԝам кә «бь тʹәмамийа мьлуктийе у шкәсти, бь сәбьре» һʹьзкьрьне әʹйан кә (Әфәс. 4:2). Бь аликʹарийа ԛәԝата Хԝәде, демәк рʹӧһʹе пироз, мәрьв дькарә дәрәщед чәтьнда жи һʹӧнӧред баш бьдә кʹьфше.
9 Паԝлосе шанди ньвиси: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Фили. 4:13). Рʹӧһʹе пироз дькарә ԛәԝате бьдә һәвалзәԝаще баԝәрмәнд, ԝәки ԝе йәке бькә, чь кӧ баԝәр нәдькьр кӧ ԝе бькарьбә. Мәсәлә, һәрге жьн йан мер хԝә сәрт дьдә кʹьфше, әԝ йәк дькарә һәвалзәԝаще ԝи һелан кә, кӧ һʹәйфе ле вәкә. Ле Кʹьтеба Пироз һʹәму Мәсиһийа һелан дькә: «Жь бәр хьрабийева хьрабийе ль тʹӧ кәси нәкьн. . . . Чьмки ньвисар ә: ‹Һʹәйфһьлдан дәсте мьн ә, әзе һʹәйфе һьлиньм, Хӧдан дьбежә›» (Рʹом. 12:17-19). Ширәтәкә ӧса 1 Тʹесалоники 5:15-да жи ньвисар ә: «Һаш жь хԝә һәбьн, нәбә кӧ йәк жь бәр хьрабийева хьрабийе бькә, ле һәр гав сәр нета ԛәнщийе бьн, һьн бона һәв, һьн жи бона һʹәмуйа». Бь аликʹарийа рʹӧһʹе пироз әм дькарьн ԝе йәке бькьн, чь кӧ жь ԛәԝата мә дәр ә. Ләма жи чьԛас фәрз ә, ԝәки бона рʹӧһʹе пироз Хԝәдерʹа дӧа кьн!
10. Иса ча хԝә дьда кʹьфше һьндава ԝанда, йед кӧ ԝирʹа хьраби дькьрьн?
10 Мәрʹа мәсәлә йә әԝ йәк кӧ Иса ча хԝә дьда кʹьфше һьндава ԝан мәрьва, йед кӧ ԛәрфе хԝә ԝи дькьрьн. Дәрһәԛа Иса 1 Пәтрус 2:23-да ӧса ньвисар ә: «Гава дьһатә рʹәзилкьрьне, жь бәрва кәс рʹәзил нәдькьр, гава щәфа дькʹьшанд, гәф ль кәсәки нәдьхԝар, ле хԝә спартьбу һʹакьме сәр рʹастийе». Әм гәрәке чʹәʹв бьдьнә Иса у изьне нәдьнә хԝә кӧ һьндава ԝан мәрьвада хьраб бьн, кʹижан кӧ мәрʹа хьрабийе дькьн. Ԝе баш бә гӧһ бьдьнә ширәта кӧ һʹәму Мәсиһийарʹа те дайине: «Сәр һәв шәԝат бьн, һәв һʹьз бькьн, рʹәʹм у шкәсти бьн. Жь бәр хьрабийева хьрабийе нәкьн, йан жь бәр беһӧрмәткьрьнева беһӧрмәткьрьне» (1 Пәт. 3:8, 9).
Рола Жьне
11. Чь ԛәдьрәки мәзьн жьнарʹа һатийә дайине?
11 Әв йәк кӧ жьн гәрәке гӧрʹа мере хԝәда бә, гәло те һʹәсабе ԝәки изьна жьне тʹӧнәйә фькьре хԝә бежә, чахе малбәтеда тьштәк гәрәке бе сафикьрьне? Һәмьки на. Йаһоԝа гәләк щабдари дайә һьм мера һьм жи жьна. Бьдьнә һʹәсабе хԝә, кӧ ԛәдьрәки чьԛас мәзьн Хԝәде дайә 144 000 Мәсиһийед кʹьфшкьри. Әԝана ԝе Пʹадшатийа Хԝәдеда тʹәви Иса Мәсиһ сәр тʹәмамийа дьнйайерʹа сәрԝертийе бькьн ча пʹадша у кʹаһин! Нава ԝанда жьн жи һәнә (Галт. 3:26-29). Ча те кʹьфше Йаһоԝа Хԝәде нава ԛьрара хԝәда роләкә фәрз дайә жьна.
12, 13. Мәсәла биньн кӧ избат дькьн, ԝәки жьна пʹехәмбәрти дькьрьн.
12 Ԝәʹде бәре һьнә жьна пʹехәмбәрти дькьрьн. Йоԝел 2:28, 29-да те готьне: «Әзе рʹӧһʹе хԝә бьрʹьжиньм сәр һʹәму мьрова; ԝе лаԝед ԝә жи, ԛизед ԝә жи пʹехәмбәртийе бькьн . . . Дь ԝан рʹожада әзе бь сәр дила у бь сәр щарийава жи рʹӧһʹе хԝә бьрʹьжиньм».
13 Чахе Оршәлимеда Рʹожа Пенщийә Һʹәсаб сала 33 Д.М-да 120 шагьртед Иса отʹахәкә жорьнда тʹоп бун, нав ԝанда жьн жи һәбун. Ве рʹоже һʹәмуйед кӧ ԝедәре бун, рʹӧһʹе пироз стандьн. Ләма жи Пәтрусе шанди гьлийе жь кʹьтеба Йоԝел да хәбате, кʹижан кӧ һьм дәрһәԛа мера һьм жи дәрһәԛа жьна йә. Пәтрус гот: «Әва әԝ йәк ә, чь кӧ Йоԝел пʹехәмбәр готийә: ‹Рʹожед ахьрийеда Хԝәде дьбежә ԝе аһа бә: Әзе жь рʹӧһʹе хԝә сәр һʹәму мәрьвада бьбариньм, кӧрʹ у ԛизед ԝәйе пʹехәмбәртийе бькьн, . . . әзе ԝан рʹожада рʹӧһʹе хԝә сәр хӧлам у щарийед хԝәда жи бьбариньм у ԝе пʹехәмбәртийе бькьн›» (Кʹар. Шанд. 2:16-18).
14. Рола жьна чь щурʹәйи бу бәлакьрьна религийа Мәсиһитида?
14 Ԛьрʹна йәкеда жьна роләкә фәрз дьлист шьхӧле хьзмәткьрьнеда, ԝәки религийа Мәсиһити бе бәлакьрьне. Әԝана дәрһәԛа Пʹадшатийа Хԝәде шәʹдәти дьдан у шьхӧлед дьн кӧ хьзмәткьрьнева гьредайи бун, дькьрьн (Луԛа 8:1-3). Мәсәлә, Паԝлосе шанди дәрһәԛа хушкәкә бь наве Фойба гот, ԝәки әԝ «бәрдәстийа щьвина Кәнхерйайе дькә». Чахе Паԝлос хьзмәткʹарарʹа сьлав дьшанд, әԝи наве гәләк хушкед амьн һьлда, мәсәлә наве «Тьрифенайе у Тьрифосайе, кʹижан бона наве Хӧдан дьхәбьтьн». Ӧса жи әԝи гот дәрһәԛа «Пәрсисейа дәлал, кӧ гәләки худан рʹетийә бона Хӧдан» (Рʹом. 16:1, 12).
15. Ԝәʹде мәда шьхӧле бәлакьрьна мьзгинийеда жьн чь роле дьлизьн?
15 Ԝәʹде мәда жи шьхӧле бәлакьрьна мьзгинийеда жьн роләкә мәхсус дьлизьн. Нава хьзмәткʹарада кӧ һʹәфт милйона зедәтьр ьн, һʹәчʹи зәʹф жьн ьн (Мәт. 24:14). Гәләк жь ԝан ча пешәнг, мисйонер у бәйтʹәлван хьзмәт дькьн. Зәбурбеж Даԝьд дьстьра: «Хӧдан дькә фәрмани, кʹӧлфәт дьбьнә мьзгиндаред пʹьрʹани» (Зәб. 68:11). Рʹастийа ԝан гьлийа әʹйан ә! Йаһоԝа гәләк ԛимәт дькә хирәта жьна бәлакьрьна мьзгинийеда у ԛәдандьна ԛьрара ԝида. Әв тʹәми кӧ жьн гәрәке гӧрʹа мере хԝәда бьн, найе һʹәсабе ԝәки әԝана гәрәке тʹьме хԝә кәрʹ кьн.
Дӧ Жьнед кӧ Хԝә Кәрʹ Нәдькьрьн
16, 17. Мәсәла Сәрайе ча дьдә кʹьфше, ԝәки жьн сафикьрьнед малбәтеда гәрәке хԝә кәрʹ нәкьн?
16 Һәрге Йаһоԝа итʹбарийа хԝә жьна тинә у шьхӧлед мәхсус дьдә ԝан, гәло нәһежа йә ԝәки мер жи фькьред жьна хԝә һьлдьн һʹәсаб, гава сафикьрьнәкә фәрз дькьн? Һәрге мер ӧса бькьн, әв йәк ԝе бь билани бә. Кʹьтеба Пирозда ӧса жи һәнә мәсәлед кʹӧлфәта, кӧ нета хԝә әʹйан кьрьнә у бей мере хԝә тьштәк сафи кьрьнә. Ԝәрә дина хԝә бьдьн дӧ мәсәла.
17 Жьна бавәʹшир Бьраһим, Сәра, гәләк щар жь мере хԝә һиви дькьр, ԝәки бәри жьна хԝәйә дӧда у кӧрʹе ԝе бьдә, чьмки ԝана хԝә бемәʹрифәти дьданә кʹьфше. Рʹаст ә, «әв готьна» Сәрайе Бьраһим хԝәш нәһат, ле Хԝәде готьна ԝерʹа рʹази бу. Йаһоԝа готә Бьраһим: «Бьра әԝ готьна бона кӧрʹьке тә у щарийа тә ль сәр тә гьран рʹунәни, чь кӧ Сәрайе тәрʹа готийә гӧһдарийа готьна ԝе бькә» (Дәстп. 21:8-12). Бьраһим гӧрʹа Йаһоԝа кьр, гӧһ да Сәрайе у әв йәк кьр, чь кӧ әԝе дьхԝәст.
18. Абигаиле бей мере хԝә чь кьр?
18 Бьфькьрьн дәрһәԛа жьна Набал, Абигаиле. Чахе Даԝьд жь бо Шаԝул Пʹадша чола кʹәтьбу, әԝи тʹәви әскәред хԝә незики кәрийед Набал зом лехьстьбу. Даԝьд тʹӧ тьшт жь һәбуна ԝи мәрьви зәфти хԝә нәкьр, дәԝсе һәбуна ԝи дьпараст. Ле дәрһәԛа Набал те готьне кӧ әԝ йәки сәрһьшк у «зьламәки бекер ә кӧ кәс нькарә готьне жерʹа бькә». Чахе Даԝьд бь ԛәдьр һьнә хӧрәк жь Набал хԝәст, әԝи нәда у сәрда жи әскәред Даԝьд беһӧрмәт кьр. Гәло Абигаиле чь кьр, гава дәрһәԛа ԝе йәке пеһʹәсийа? Әԝе дәрберʹа «дӧсьд нан, дӧ мәшк шәраб, гоште пенщ миһед амадәкьри, пенщ сәа гәньме ԛәланди, сәд ԝәши мәԝиж у дӧсьд кадькед бастиԛе һәжира һьлдан у ль кʹәра бар кьрьн» у чу кӧ бьдә Даԝьд, ле мере хԝәрʹа тʹӧ тьшт нәгот. Гәло Абигаиле хԝә рʹаст да кʹьфше? Бәле. Кʹьтеба Пирозда те готьне, ԝәки Йаһоԝа Набал «хьст у әԝ мьр». Ԝәʹдә шунда Даԝьд Абигаил жьнти станд (1 Сам. 25:3, 14-19, 23-25, 38-42, ИМ).
Кʹӧлфәта кӧ Һежайи Пәсьна йә
19, 20. Жь бо чь жьн бь рʹасти ԛимәт те һʹәсабе у һежайи пәсьна йә?
19 Кʹьтеба Пироз пәсьне ԝан кʹӧлфәта дьдә, йед кӧ ԛьрара Йаһоԝа тиньн сери. Кʹьтеба Мәтʹәлокда дәрһәԛа «кʹӧлфәта әʹсьл» те готьне: «Ԛимәте ԝе жь лал-дӧрʹ жортьр ә. Дьле малхе ԝе ԝеда гӧман ә у әԝ тʹӧ кемасийе набинә. Тʹәмамийа әʹмьре хԝәда әԝе ԛәнщийе ԝирʹа бькә, нә кӧ хьрабийе». Ӧса жи ньвисар ә: «Әԝ дәве хԝә бь сәрԝахтийе вәдькә, ль сәр зьмане ԝе һинкьрьна амьн һәйә. Әԝ мьԛатийе мала хԝә дькә у нане хԝәрʹанәдитийе әԝ нахԝә. Зарʹед ԝе рʹадьбьн хԝәзийа хԝә ԝе тиньн у малхе ԝе жи пәсьне ԝе дьдә» (Мәтʹлк. 31:10-12, 26-28).
20 Жь бо чь жьн бь рʹасти ԛимәт те һʹәсабе у һежайи пәсьна йә? Мәтʹәлок 31:30-да те готьне: «Дәрәԝ ә дәлалти у пʹучʹ ә бәдәԝәти, кʹӧлфәта жь Хӧдан дьтьрсә әԝә хԝәзити». Кʹӧлфәт һьнге дьдә кʹьфше кӧ тьрса Хԝәде дьле ԝеда һәйә, чахе әԝ гӧрʹа принсипа Хԝәдейә дәрһәԛа сәритийе дькә. «Сәре жьне мер ә» чаԝа кӧ «сәре һәр мери Мәсиһ ә, у сәре Мәсиһ Хԝәде йә» (1 Корн. 11:3).
Бона Пʹешкʹеша Хԝәде Рʹази Бьн
21, 22. (а) Кʹижан мәʹнийед Мәсиһийед зәԝьщи һәнә кӧ жь Хԝәде рʹази бьн? (б) Чьма әм гәрәке ԛәдьр һьндава принсипа Хԝәдейә дәрһәԛа сәритийе, бьдьнә кʹьфше? (Бьньһерʹьн чаргошә сәр рʹупʹела 17)
21 Гәләк мәʹнийед Мәсиһийед зәԝьщи һәнә кӧ жь Хԝәде рʹази бьн! Әԝана илаһи рʹази нә бона ԝе йәке, ԝәки жь Йаһоԝа кʹәрәм стандьнә кӧ карьбунә һәв бьстиньн у ча малбәта бәхтәԝар ԝирʹа хьзмәт кьн (Рʹутʹ 1:9; Мих. 6:8). Хԝәде ӧса әм әʹфьрандьнә, кӧ бькарьбьн бькʹәвьнә зәԝаще. Ләма жи әԝ жь һʹәмуйа баштьр занә, ԝәки чь лазьм ә бона бәхтәԝарийа малбәте. Һәрге һун тʹьме ль гора ԛьрара ԝи бьжин, шабуна Йаһоԝа ԝе сьтʹаргәһа ԝә бә һәла һе ԝан рʹожед чәтьнда жи (Нәһәм. 8:10).
22 Малхе кӧ Мәсиһи йә, жьна хԝә ӧса һʹьз дькә ча бәдәна хԝә, бона ԝе хәм дькә у бь нәрми сәритийа хԝә тинә сери. Жьна ԝийә хԝәдехоф һежайи һʹьзкьрьне йә, чьмки пьштгьрийа ԝи дькә у ԛәдьре ԝи дьгьрә. Ле йа һәрә фәрз әԝ ә кӧ зәԝаща ԝан рʹумәте дьдә Йаһоԝа Хԝәде, кʹижан кӧ һежайи пәсьна йә.
Те Бира Ԝә?
• Принсипа Йаһоԝа һьндава сәритийе кʹижан ә?
• Чьрʹа һәвалзәԝащ гәрәке ԛәдьре һәв бьгьрьн?
• Кʹӧлфәта баԝәрмәнд гәрәке ча хԝә бьдә кʹьфше һьндава малхе хԝәйи нәбаԝәрмәндда?
• Мер пешийа кӧ сафикьрьна фәрз бькьн, чьрʹа гәрәке фькьред жьна хԝә пебьһʹәсьн?
[Чаргошә]
Чьрʹа Лазьм ә Һьндава Һʹӧкӧмәтеда Ԛәдьр Бьдьнә Кʹьфше?
Йаһоԝа бона һʹалхԝәшийа әʹфьринед хԝә принсипед дәрһәԛа сәритийе у һʹӧкӧмәтийе кʹьфш кьрийә. Әве йәке кʹаре тинә һьм әʹфьринед рʹӧһʹанирʹа, һьм жи әʹфьринед физикирʹа. Әв йәк ӧса жи мәщале дьдә ԝан, кӧ азайа хԝәйә бьжартьне рʹаст бьдьнә хәбате у ԛәдьр һьндава Хԝәде бьдьнә кʹьфше. Ӧса жи бь сайа ԝе йәке әԝана дькарьн әʹдьлайи у йәктийеда Хԝәдерʹа хьзмәт кьн (Зәб. 133:1).
Мәсиһийед бь рʹӧһʹ кʹьфшкьри сәрити у һʹӧкӧмәтийа Иса ԛәбул дькьн (Әфәс. 1:22, 23). Һьнә ԝәʹдә шунда Иса Мәсиһ ԝе бьдә кʹьфше кӧ һʹӧкӧмәтийа Йаһоԝа ԛәбул дькә, демәк «хԝәха жи ԝе ельми ԝи Хԝәдейи бә, йе кӧ һәр тьшт ельми ԝи кьр, ԝәки һәр тьштида әԝ бьбә Хԝәдейе һәр тьшти» (1 Корн. 15:27, 28). Ләма жи бь логики йә, ԝәки һʹәму мәрьвед кӧ хԝә тʹәсмили Хԝәде кьрьнә, ча щьватеда ӧса жи малбәтеда гәрәке принсипа сәритийе биньн сери! (1 Корн. 11:3; Ибрн. 13:17) Һәрге әм ӧса бькьн, әме баԝәр бьн ԝәки Хԝәде жь мә рʹази йә у ԝе мә кʹәрәм кә (Иша. 48:17).
[Шькьл]
Дӧакьрьн дькарә али кʹӧлфәта баԝәрмәнд бькә, ԝәки һʹӧнӧред баш бьдә кʹьфше
[Шькьл]
Йаһоԝа ԛимәт дькә рола жьна, йа пешдачуйина шьхӧлед Пʹадшатийеда