Кʹьтеба Пироз Жийина Мәрьва Дьгӧһезә

«Әз Бумә Малхеки Дьһа Баш». РИГОБЕР ОЕТО

• САЛА БУЙИНЕ: 1941

• ԜӘЛАТ: БЕНИН

• БӘРЕ: ЧӘНД ЖЬНЕД ԜИ ҺӘБУН У МЬԚАБЬЛИ ШӘʹДЕД ЙАҺОԜА БУ

ЖИЙИНА МЬНӘ БӘРЕ:

Әз шәһәрәкә мәзьн, Котонойеда һатьмә буйине, ԝәлате Бенинда. Әз малбәта Католикида һатьмә буйине, ле тʹәне щар-щара дьчумә дере. Гәләк Католикед мьһала мә мере чәнд жьна бун, чьмки бь ԛануни әԝ йәк изьн бу. Әз хԝәха жи мере чар жьна бум.

Чахе сала 1970 шәрʹе нава ԝәлат дәстпебу револусийа ԛәԝьми, мьн тʹьре һʹале ԝәлате мә ԝе хԝәш бә. Мьн бь тʹәмами пьштгьрийа сәрԝертийа тʹәзә кьр у мьн дәстпекьр политикайева мьжул бьм. Әндәмед сәрԝертийа тʹәзә Шәʹдед Йаһоԝа һʹьз нәдькьрьн, чьмки ԝана тʹәвнәбуйин хԝәйи дькьр. Әз жи пәй Шәʹдед Йаһоԝа дькʹәтьм. Чахе сала 1976 мисйонеред Шәʹдед Йаһоԝа жь ԝәлат дәрхьстьн, мьн тʹьре ԝәки әԝана ԝе тʹӧ щар ида вәнәгәрʹьн.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ:

Сала 1990 рʹежима политики һатә гӧһастьне. Әз гәләк әʹщебмайи мам чахе мисйонеред Шәʹдед Йаһоԝа пашда вәгәрʹийан ԝәлате мә. Әз фькьрим ԝәки дьбәкә Хԝәде тʹәви ԝан мәрьва йә. Һьнге әз хәбатәкә тʹәзәда бум у һәвалхәбатчики мьн Шәʹде Йаһоԝа бу. Әԝи дәстпекьр дәрһәԛа баԝәрийа хԝә мьнрʹа гьли кә. Әԝи рʹезед Кʹьтеба Пироз нишани мьн кьр, кʹидәре дьһатә готьне ԝәки Йаһоԝа Хԝәдайе һʹьзкьрьне у һәԛийе йә (Ԛануна Дӧщари 32:4; 1 Йуһʹәнна 4:8). Әԝ хәйсәт-һʹӧнӧр гәләк мьн хԝәш дьһатьн ләма жи дьле мьн гьртьн. Мьн гәләк дьхԝәст дәрһәԛа Йаһоԝа пебьһʹәсьм, ләма жи әз ԛайил бум һинбуна Кʹьтеба Пироз дәстпекьм. Зутьрәке мьн дәстпекьр һәрʹьм щьватед Шәʹдед Йаһоԝа.

Һʹьзкьрьна кӧ ԝедәре мьн дит, гәләк дьле мьн гьрт. Ԝана фьрԛи нәдькьр ортʹа мьләта у бәрәка. Чьԛас һе зедә мьн тʹәви Шәʹдед Йаһоԝа хәбәр дьда, һаԛас һе зедә әз избат дьбум, ԝәки әԝана пәйчуйед Исайә рʹаст ьн (Йуһʹәнна 13:35).

Мьн фәʹм кьр кӧ һәрге әз дьхԝазьм Йаһоԝарʹа хьзмәт кьм, әз гәрәке жь Дера Католики дәрем. Әв йәк нәһеса бу, чьмки әз дьфькьрим кӧ мәрьв ԝе чь бьфькьрьн дәрһәԛа мьн. Гәләк ԝәʹдә дәрбаз бу һʹәта мьн бь аликʹарийа Йаһоԝа ԛәԝат станд у жь ве дере дәркʹәтьм.

Ле мьнрʹа лазьм бу диса гӧһастьнәкә мәзьн бькьм. Жь һинбуна Кʹьтеба Пироз әз пеһʹәсийам, ԝәки Хԝәде пʹьрʹәжьнийе ԛәдәхә дькә (Дәстпебун 2:18-24; Мәтта 19:4-6). Бәр чʹәʹве Хԝәде тʹәне зәԝаща мьнә тʹәви жьна мьнә пешьн рʹаст бу. Ләма жи мьн әԝ зәԝаща хԝә ԛануни кьр у жь жьнед дьн ԛәтийам, ле алийе материйалида мьн бона ԝан хәм дькьр. Ԝәʹдә шунда жь ԝан жьна дӧдӧ бунә Шәʹдед Йаһоԝа.

ЧЬ КʹАР МЬН СТАНД:

Рʹаст ә жьна мьн Католик ма, ле әԝ диса жи ԛәдьре сафикьрьна мьн дьгьрә, кӧ әз Йаһоԝарʹа хьзмәт дькьм. Әм һәрдӧ жи тедәрдьхьн, ԝәки әз бумә малхеки баш.

Бәре әз дьфькьрим,кӧ һәрге әз политикайеда кʹар бькьм, әзе бькарьбьм жийина мәрьва алийе башда бьгӧһезьм. Ле мьн бадиһәԝа ԛәԝат хәрщ дькьр. Ньһа әз заньм ԝәки тʹәне Пʹадшатийа Хԝәде дькарә проблемед инсанәте сафи кә (Мәтта 6:9, 10). Әз гәләк жь Йаһоԝа рʹази мә кӧ әԝи мьнрʹа әʹйан кьр, ԝәки ча әз дькарьм жийина хԝә бәхтәԝар кьм.

«Мьнрʹа Чәтьн бу Хԝә Бьгӧһерʹьм». АЛЕКС ЛЕМОС СИЛВЕ

• САЛА БУЙИНЕ: 1977

• ԜӘЛАТ: БРАЗИЛЙА

• БӘРЕ: РʹЕБӘРЕ ДЕРА ПЕНЩИЙЕ ҺʹӘСАБЕ

ЖИЙИНА МЬНӘ БӘРЕ:

Әз ԛәрахәки шәһәре Итуда мәзьн бумә (Штата Сан Пауло). Ве мьһаледа ԛачахти бәлабуйи бу.

Әз йәки зӧлм бум у мьн бь әʹмьрәки бенамуси дьжит. Хенщи ԝе йәке мьн арш-вершийа наркотика дькьр. Ԝәʹдә шунда мьн фәʹм кьр, ԝәки жийина ԝи щурʹәйи ԝе мьн бькә йан кәле йан жи мәзәле. Ләма жи мьн әв әʹмьр һишт, бумә әндәме дера Пенщийе Һʹәсабе у паше жи һатьмә кʹьфшкьрьне ча рʹебәре ԝан.

Мьн тʹьре, һәрге әз дереда хьзмәт кьм, әзе бь рʹасти бькарьбьм али мәрьва бькьм. Мьн һәла һе жи бь радио бәрнамед религийайи дәрбаз дькьрьн у ԝәʹдә шунда әз мьһала хԝәда бумә мәрьвәки нав у дәнг. Һеди-һеди мьн фәʹм кьр, ԝәки әв дер накʹәвә һʹәйра һʹалхԝәшийа әндәмед хԝә у бона һӧрмәткьрьна Хԝәде дьһа кем хәм дькә. Мьнрʹа зәлал бу ԝәки нета дере тʹәне тʹопкьрьна пʹәра йә, ләма жи мьн сафи кьр жь дере дәрем.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ:

Чахе мьн дәстпекьр тʹәви Шәʹдед Йаһоԝа Кʹьтеба Пироз һин бьм, мьн дәрберʹа тедәрхьст ԝәки әԝана жь религийед дьн щӧдә дьбьн. Дӧ тьшта дьле мьн гьртьн. Йа йәке әв бу, кӧ Шәʹдед Йаһоԝа нә тʹәне хәбәр дьдан дәрһәԛа һʹьзкьрьна һьндава Хԝәде у мәрийа, ле ԝана ӧса жи әԝ һʹьзкьрьн пе кьред хԝә дьданә кʹьфше. Йа дӧда жи әв бу, ԝәки ԝана хԝә жь политике у шәрʹа дур дьгьртьн (Ишайа 2:4). Әԝан һәрдӧ тьшта әз дамә баԝәркьрьне, ԝәки мьн религийа рʹаст дитийә. Демәк рʹийа тәнг кӧ бәрбь жийина һʹәта-һʹәтайе дьбә (Мәтта 7:13, 14).

Мьн фәʹм кьр, һәрге әз дьхԝазьм Хԝәде хԝәш бем, әз гәрәке әʹмьре хԝәда һьнә гӧһастьнед мәзьн бькьм. Демәк гәләк дина хԝә бьдьмә сәр малбәта хԝә у мьлуктийе нав хԝәда пешда биньм. Һеса нибу хԝә бьгӧһезьм, ле бь аликʹарийа Йаһоԝа мьн карьбу. Рʹаст ә жьна мьн пешийа мьн һинбуна Кʹьтеба Пироз дәстпекьрьбу, ле әԝе гавед рʹӧһʹани һьнге дәстпекьр бавежә чахе дит ԝәки мьн нав хԝәда гӧһастьн кьр. Зутьрәке мә һәрда жи фәʹм кьр ԝәки әм дьхԝазьн бьбьнә Шәʹдед Йаһоԝа. Әм рʹожәкеда тʹәвайи һатьнә ньхӧмандьне.

ЧЬ КʹАР МЬН СТАНД:

Се зарʹед мә һәнә, әм гәләк ша нә ԝәки әм дькарьн али ԝан бькьн кӧ незики Йаһоԝа бьн. Малбәта мә бәхтәԝар ә. Әз жь Йаһоԝа рʹази мә, ԝәки әԝи әз бәрбь рʹастийе кʹьшандьмә, кʹижан кӧ хәбәра ԝида нә. Бь рʹасти әв рʹастийа жь Хәбәра Хԝәде дькарә мәрьва бьгӧһезә! Әз һәма избатийа ԝе йәке мә.

«Гӧне Мьнә Бәре Ида Баргьрани Ниньн Сәва Мьн». ВИКТОРИЙА ТОНГ

• САЛА БУЙИНЕ: 1957

• ԜӘЛАТ: АВСТРАЛЙА

• БӘРЕ: ЗАРʹОТИЙА ЧӘТЬН ДӘРБАЗ КЬРИЙӘ

ЖИЙИНА МЬНӘ БӘРЕ:

Әз мәзьн бумә Нйукаследа (Штата Ԝелса Башурейә Ну). Жь һʹәфт зарʹа әз йа мәзьн бум. Баве мьн ичʹкәһʹьз бу, тʹьме сәрхԝәш бу у әм дькʹӧтан. Дийа мьн жи йәкә зӧлм у берʹәʹм бу. Дийа мьн әз дькʹӧтам у гьлийед лапә хьраб мьнрʹа дьгот. Әԝе тʹьме дьгот ԝәки әз йәкә бекер ьм у әзе щәʹньмеда бьчәрчьрьм. Әԝе әз зьравԛәтанди дькьрьм.

Дийа мьн ӧса әз дькʹӧтам, ԝәки щане мьн рʹәш-шин дьбу у гәләк щар жь бо ԝе йәке әз нәдьчум мәкʹтәбе. Чахе әз 11 сали бум дәԝләте әз жь де-баве мьн стандьн у данә щийе зарʹед бехайи, паше жи монастере. Чахе әз бумә 14 сали, әз жь ԝедәре рʹәвим. Мьн нәдьхԝәст вәгәрʹьмә мал, ләма жи мьн дәстпекьр кʹуча бьжим. Әз кʹуча мьһала Сиднейеда дьмам, йа Кинг Кросе.

Чахе әз кʹуча кʹәтьм, мьн дәстпекьр наркотика у ичʹкева мьжул бьм, порнографийе бьньһерʹьм у пʹәрәти ԛавийе бькьм. Щарәке тьштәки ӧса һатә сәре мьн, кӧ әз ԛайим тьрсийам. Әз отʹахәкеда дьмам, кʹижан кӧ йе хԝәйе клуба шәве бу. Щарәке дӧ мер һатьнә бал ԝи у әԝи әз шандьмә отʹахәкә дьн, ле мьн гӧһ да хәбәрдана ԝан. Хԝәйе клубе дьхԝәст мьн бьфьрошә ԝана. Әԝан мера гәрәке әз гәмийа һур-мурада вәшартама у бьбьрама Жапонйайе, сәва кӧ ԝедәре бареда бьхәбьтийама. Мьн жь балконе банзда у әз рʹәвим сәва кӧ аликʹарийе бьхԝазьм.

Әз рʹасти мерәки һатьм, кʹижан кӧ сәр чәндәке һатьбу Сиднейе. Мьн дәрһәԛа һʹале хԝә ԝирʹа гьли кьр у әз һивийе бум ԝәки әԝе һьнә пʹәрә бьдә мьн. Әԝи әз тʹәглифи бал хԝә кьрьм, ԝәки әз сәре хԝә бьшом у пәʹри нан бьхԝьм. Әз чумә щәм ԝи у ӧса ԛәԝьми ԝәки әз щәм ԝи жи мам. Саләк шунда мә һәв станд.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ:

Мьн тʹәви Шәʹдед Йаһоԝа һинбуна Кʹьтеба Пироз дәстпекьр. Ԝәʹде һинбуна Кʹьтеба Пироз щурʹә-щурʹә емосийа бал мьн пешда дьһатьн. Әз гәләк һерс кʹәтьм чахе пеһʹәсийам, ԝәки сәбәбе кӧл-дәрда Мире-щьна йә, чьмки мьнрʹа тʹьме дьготьн ԝәки Хԝәде йә сәбәбе кӧл-дәрда. Ле чахе мьнрʹа шьровәкьрьн, ԝәки Хԝәде мәрьва щәʹньмеда начәрчьринә, әз гәләк дьлрʹьһʹәт бум, чьмки тʹәмамийа әʹмьре хԝә әз жь бо ԝе һинкьрьне дьтьрсийам.

Гәләк мьн хԝәш дьһат, ԝәки Шәʹдед Йаһоԝа рʹебәри жь Кʹьтеба Пироз дьгәрʹийан, чахе гәрәке тьштәк сафи кьрана. Әԝана ль гора баԝәрийа хԝә дьжин. Әз мәрьвәкә ӧса бум кӧ һеса нибу мьнрʹа зьман бьдитана, ле мьн чь жи бьгота йан бькьра, Шәʹдед Йаһоԝа диса жи һьндава мьнда бь һʹьзкьрьн у ԛәдьр бун.

Йа лапә чәтьн бона мьн әԝ бу, ԝәки мьн бькарьбуйа хԝә бекер у беԛимәт һʹәсаб нәкьра. Мьн хԝә гәләк нәфрʹәт дькьр у паши ньхӧмандьне жи нава гәләк салада әз һьндава хԝәда ӧса бум. Бь рʹасти мьн Йаһоԝа һʹьз дькьр, ле әз баԝәр бум ԝәки әԝе тʹӧ щар нькарьбә йәкә мина мьн һʹьз бькә.

Панздәһ сал паши ньхӧмандьне мьн дәстпекьр щурʹәки майин бьфькьрьм. Щарәке Ода Щьвата Шәʹдед Йаһоԝада готарван дина хԝә да сәр кʹьтеба Аԛуб 1:23, 24. Ԝан рʹезада Хәбәра Хԝәде бәрамбәри нәйньке дьбә, бь сайа кʹижани әм дькарьн пе чʹәʹве Йаһоԝа сәр хԝә бьньһерʹьн. Әз фькьрим, дьбәкә әз сәр хԝә ӧса наньһерʹьм, ча Йаһоԝа сәр мьн дьньһерʹә. Пешийе мьн әв фькьр жь сәре хԝә дәрхьст, чьмки мьн тʹьре әз һежайи һʹьзкьрьна Йаһоԝа ниньм.

Паши чәнд рʹожа мьн рʹезәк жь Кʹьтеба Пироз хԝәнд, кʹижани әʹмьре мьн гӧһаст. Әв рʹез Ишайа 1:18 бу, кʹидәре Йаһоԝа дьбежә: «Ньһа ԝәрьн у әм ль доза хԝә бьньһерʹьн; һәгәр сущед ԝә мина ԛьрмьз бьн жи ԝе мина бәрфе сьпи бьбьн». Те бежи Йаһоԝа мьнрʹа дьгот: «Вики, ԝәрә әм бь һʹәлали хәбәр дьн. Әз тә нас дькьм, һаш гӧне тә һәмә, һаш дьле тә һәмә у әз тә һʹьз дькьм».

Ве шәве хәԝ нәдькʹәтә чʹәʹве мьн. Әз диса жи дӧдьли дьбум, ԝәки Йаһоԝа мьн һʹьз дькә. Ле чахе әз сәр ԛӧрбанбуна Иса фькьрим, мьн фәʹм кьр ԝәки Йаһоԝа гәләк мьн сәбьр дькьр у гәләк дәрәщада дьда кʹьфше, ԝәки мьн һʹьз дькә. Ле мьн ча бежи ԝирʹа дьгот: «Һʹьзкьрьна тә һаԛас мәзьн нинә, ԝәки пʹара мьн жи теда һәбә. У ԛӧрбанбуна Кӧрʹе тә тʹере накә ԝәки гӧнед мьн бенә афукьрьне». Ӧса дьһатә хане, те бежи мьн пʹешкʹеша Хԝәде, демәк кʹьрʹин, ԛәбул нәдькьр. Ле чахе әз дәрһәԛа кʹьрʹине фькьрим, мьн тʹәхмин кьр, ԝәки Йаһоԝа мьн һʹьз дькә.

ЧЬ КʹАР МЬН СТАНД:

Гӧнед мьн ида сәва мьн баргьрани ниньн у ньһа нета жийина мьн һәйә. Һәләԛәтийа мьн тʹәви мере мьн баш буйә. Әз ша мә, ԝәки ньһа дькарьм мәсәла жийина хԝә бьдьмә хәбате у али мәрьва бькьм. Әз тʹәхмин дькьм, ԝәки әз незики Йаһоԝа бумә.

«Әв Щаба Дӧайе Мьн бу». СЕРГЕЙ БОТАНКИН

• САЛА БУЙИНЕ: 1974

• ԜӘЛАТ: РУСЙА

• БӘРЕ: РОК-МУЗИКАЙА СӘРТВА МЬЖУЛ ДЬБУ

ЖИЙИНА МЬНӘ БӘРЕ:

Әз шәһәре Воткинскеда һатьмә буйине, кʹидәре кӧ композиторе навдар, Пйотр Илич Чайковски һатьбу буйине. Малбәта мә дәсттәнг бу. Баве мьн мәрьвәки баш бу ле гәләк ичʹке вәдьхԝар, ләма жи һʹале малбәта мә нәбаш бу.

Мәкʹтәбеда әз ӧса рʹьнд һин нәдьбум ча зарʹед дьн, ләма жи мьн хԝә бекер у ньмьз тʹәхмин дькьр. Мьн хԝә жь мәрьва дур дьгьрт у итʹбарийа хԝә ԝан нәдьани. Әз жь мәкʹтәбе гәләк дьлтәнг дьбум. Чахе дәрсдар пьрс дьданә мьн, гәләк щар мьн нькарьбу тьштед һеса жи шьровәкьра, чь кӧ ԝәʹде майин мьнрʹа ԛә проблем нибу шьровәкьра. Чахе мьн кʹома һʹәйшта хьлаз кьр, дәрсдара документеда ньвисин: «Һьндьк хәбәра занә у нькарә фькьред хԝә тʹопи сәр һәв кә». Мьн ӧса жи хԝә бекер һʹәсаб дькьр, ле ԝан гьлийа лаптә дьле мьн шкенандьн у әз чʹәʹве хԝәда дьһа ньмьз бум. Мьн дәстпекьр бьфькьрьм кӧ бона чь әз дьжим, нета жийина мьн чь йә.

Щаһьлтийа хԝәда мьн дәстпекьр ичʹке вәхԝьм. Серида ичʹке кʹефа мьн хԝәш дькьр. Ле чахе мьн гәләк вәдьхԝар, исафа мьн әз дьчәрчьрандьм. Мьнрʹа ӧса дьһатә кʹьфше, ԝәки нета жийина мьн тʹӧнә у әз бадиһәԝа дьжим. Әз ӧса дьлтәнг дьбум, ԝәки чәнд рʹожа жь мал дәрнәдькʹәтьм. Мьн дәстпекьр дәрһәԛа хԝәкӧштьне бьфькьрьм.

Чахе әз бумә 20 сали, әз жь фькьред кӧ әз дьлтәнг дькьрьм, сәр ԝәʹдәки аза бум, чьмки мьн дәстпекьр музикайа рока сәртва мьжул бьм. Әве музикайе ԛәԝат дьда мьн. Мьн пʹорʹе хԝә дьреж кьр, гӧһе хԝә ԛӧл кьр у дәстпекьр мина ԝан музиканта кʹижанарʹа әз фьрнаԛ дьбум, кʹьнща хԝә кьм. У мьн дәстпекьр тʹәви ԝан мәрьва һәвалтийе бькьм, йед кӧ мина мьн рока сәрт һʹьз дькьрьн. Ԝәʹдә шунда әз бумә йәки бәрзәԛ у һерс, у мьн гәләк щар тʹәви нәфәред хԝә шәрʹ дькьр.

Мьн тʹьре рока сәрт ԝе мьн бәхтәԝар кә, ле бь рʹасти һәр тьшт пашопе дьбу. Әз дьбумә мәрьвәки дьһа хьраб! Һәр щар чахе мьн дәрһәԛа ԝан стьранбежа, кʹижанарʹа әз фьрнаԛ дьбум, тьштед хьраб дьбьһист, мьн тʹьре нәмамийа мьн кьрьнә.

Мьн диса дәстпекьр дәрһәԛа хԝәкӧштьне бьфькьрьм, ле ԝе щаре мьн ида конкрет сафи кьрьбу. Тʹәне әве фькьре әз дьгьртьм, ԝәки дийа мьн ԝе нькарьбә бәр ве йәке тәйах кә. Әԝе гәләк әз һʹьз дькьрьм у гәләк тьшт бона мьн кьрьбу. Әз һʹаләки гәләк чәтьнда бум, чьмки мьн нә дьхԝәст бьжита, нә жи дькарьбу хԝә бькӧшта.

Сәва кӧ жь ԝан фькьред гьран дина хԝә дәрбази сәр фькьред дьн бькьм, мьн дәстпекьр кʹьтебед Урьсийә класики бьхуньм. Кʹьтебәкеда сәрһатийа мәрьвәки һәбу, кʹижани кӧ дереда хьзмәт дькьр. Ньшкева бал мьн хԝәстьнәкә ԛәԝи пешда һат кӧ тьштәки бона Хԝәде у мәрьва бькьм. Мьн бь дьл Хԝәдерʹа дӧа кьр, чь кӧ мьн тʹӧ щар нәкьрьбу. Мьн жь Хԝәде лава дькьр, ԝәки али мьн бькә кӧ нета жийине бьвиньм. Ԝәʹде дӧакьрьне дьле мьн гәләк һеса бу, у әв йәк чь кӧ паше ԛәԝьми гәләк әз әʹщебмайи кьрьм. Дӧ сьһʹәт шунда Шәʹдед Йаһоԝа дәре мьн хьстьн у готьн, ԝәки дькарьн һинбуна Кʹьтеба Пироз тʹәви мьн дәрбаз кьн. Әз баԝәр ьм, ԝәки әв щаба дӧайе мьн бу. Ӧса жийина мьнә тʹәзә у бәхтәԝар дәстпебу.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ:

Рʹаст ә мьнрʹа һеса нибу, ле диса жи мьн һәр тьшт, чь кӧ рока сәртва гьредайи бу, жь хԝә дур хьст. Ле йәкә мьн нькарьбу әве музикайе жь һʹьше хԝә дәрхьм. Чахе әз ԝан щийарʹа дәрбаз дьбум, кʹидәре дәнге ве музикайе дьһат, дәрберʹа жийина мьнә бәре дькʹәтә бира мьн. Мьн нәдьхԝәст әв биранина нәбаш тʹәви рʹастийа Кʹьтеба пироз бә, кʹижан кӧ дьле мьн у һʹьше мьнда кʹок дабу. Ләма жи мьн нет дани, ԝәки хԝә жь ԝан щийа дур бьгьрьм. Һәр щар, чахе жийина мьнә бәре дьһатә бира мьн, мьн бь дьл у щан Йаһоԝарʹа дӧа дькьр у «әʹдьлайийа Хԝәде кӧ жь һәр һʹьш-аԛьли дәрбазтьр ә» тʹәхмин дькьр (Филипи 4:7).

Ԝәʹде һинбуна Кʹьтеба Пироз әз пеһʹәсийам, ԝәки Мәсиһи гәрәке дәрһәԛа һʹәбандьна хԝә мәрьварʹа гьли кьн (Мәтта 28:19, 20). Мьн баԝәр нәдькьр, ԝәки әв йәк ԝе бал мьн бе стандьне. Ле әв рʹастийа кӧ әз һин дьбум, дьле мьн бь шабуне тʹьжә дькьр у рʹьһʹәтийа дьл дьда мьн. Мьн фәʹм дькьр, ԝәки мәрьвед дьн жи һʹәԝще рʹастийа Кʹьтеба Пироз ьн. Мьн карьбу тьрса хԝә алт кьм у мәрьварʹа гьли кьм дәрһәԛа ԝан һʹәму тьшта, чь кӧ әз һин дьбум. Әз гәләк әʹщебмайи мам чахе мьн дит кӧ гава әз мәрьварʹа шәʹдәтийе дьдьм, әз дьһа хԝәда итʹбар дьбьм у баԝәрийа мьн жи ԛәԝи дьбә.

ЧЬ КʹАР МЬН СТАНД:

Әз ньһа зәԝьщи мә у бәхтәԝар ьм. Әз гәләк ша мә, ԝәки мьн карьбуйә али һьнә мәрьва бькьм, ӧса жи али дийа хԝә у хушка хԝә бькьм, ԝәки рʹастийа Кʹьтеба Пироз һин бьн. Бь сайа ԝе йәке кӧ әз Йаһоԝарʹа хьзмәт дькьм у али мәрьва дькьм, мьн нета жийинейә рʹаст дитийә.