Гәло Чьрʹа Хԝәде Дьһелә кӧ Әм Бьчәрчьрьн?

ЧАԜА ХԜӘДЕ СӘР КӦЛ-ДӘРДЕД МӘ ДЬНЬҺЕРʹӘ?

Мәйрәм: Рʹож хера ԝә, Сара. Әз ша мә, ԝәки һун мале нә.

Сара: Ча баш ә һун һатьн.

Мәйрәм: Ԝе рʹоже мә хәбәр дьда дәрһәԛа ве йәке, кӧ гәло Хԝәдерʹа йәкә, гава әм дьчәрчьрьн?a Ԝә гот кӧ һун зудава дьхԝазьн щаба ве пьрсе бьстиньн, илаһи гава дийа ԝә кʹәтә ԛәзийе. Ле ньһа әԝ ча хԝә тʹәхмин дькә?

Сара: Һәй баш, һәй хьраб, ле иро һьнәки баш ә.

Мәйрәм: Әз ша мә, ԝәки әԝ иро баш ә. Бь рʹасти һеса нинә ԝе дәрәщеда шабуна хԝә хԝәй ки.

Сара: Һун рʹаст ьн. Щарна әз гәләк дьлтәнг дьбьм, гава дәрһәԛа һʹале ԝе дьфькьрьм.

Мәйрәм: Әре, әз ԝә фәʹм дькьм. Дьԛәԝьмә те бира ԝә ԝе рʹоже мьн ԝәрʹа соз да кӧ әзе щаба пьрсәке бьдьм, кӧ чьрʹа Хԝәде изьн дьдә, ԝәки әм бьчәрчьрьн һәрге ԛәԝата ԝи һәйә кӧ щәфе мә бьдә һьлдане.

Сара: Әре, те бира мьн.

Мәйрәм: Кʹьтеба Пирозда щаба ԝе пьрсе һәйә, ле ԝәрә пешийе әм бькьнә бира хԝә хәбәрдана хԝәйә ԝе рʹоже.

Сара: Баш.

Мәйрәм: Мә дит, ԝәки һәла һе хьзмәткʹаред Хԝәде йед амьн жи пьрсе дьдьн кӧ чьрʹа һаԛас кӧл-дәрд дьԛәԝьмьн. Гава пʹехәмбәрәк дәрһәԛа ԝе йәке жь Хԝәде пьрси, Хԝәде ԝи сущдар нәкьр у нә готә ԝи, ԝәки баԝәрийа ԝи тʹӧнә.

Сара: Бона мьн әв фькьрәкә тʹәзә бу.

Мәйрәм: Әм ӧса жи пеһʹәсийан кӧ дьле Йаһоԝа дешә, гава әԝ дьвинә кӧ әм дьчәрчьрьн. Мәсәлә, Хәбәра Хԝәдеда те готьне кӧ гава щьмәʹта ԝи дьчәрчьри, дьле ԝи дешийа.b Гәло әм бәрдьлийе настиньн, гава педьһʹәсьн ԝәки Хԝәде бь тʹәмами мә фәʹм дькә?

Сара: Бәле, һәмьки.

Мәйрәм: У ча мә дит, Әʹфьрандаре мә, ԛәԝата кʹижани гәләк мәзьн ә, дькарә һәр тьшт бькә, ԝәки кӧл у дәрде мә бь тʹәмами бьдә һьлдане.

Сара: Мьнрʹа фәʹмдари нинә. Һәгәр ԛәԝата Хԝәде һәйә, ԝәки һʹәму кӧл-дәрда кʹӧта кә, чьрʹа әԝ дьһелә кӧ һаԛас тьштед хьраб бьԛәԝьмьн?

КʹЕ РʹАСТИЙЕ ГОТ?

Мәйрәм: Сәва кӧ щаба ве пьрсе бьстиньн, ԝәрә әм дина хԝә бьдьн Кʹьтеба Пироз, кʹьтеба пешьн, Дәстпебун. Һун тʹәви сәрһатийа Адәм у Һеԝайе у дәрһәԛа бәре ԛәдәхәкьри нас ьн?

Сара: Әре мьн бьһистийә. Хԝәде ԝанрʹа гот кӧ жь бәре бахәки нәхԝьн, ле ԝана гӧрʹа ԝи нәкьр у хԝар.

Мәйрәм: Рʹаст ә. Ле чь Адәм у Һеԝайе һелан кьр кӧ гӧнә бькьн? Щаба ве пьрсе ԝе али мә бькә фәʹм бькьн, кӧ чьрʹа мәрьв дьчәрчьрьн. Һун дькарьн бьхуньн Дәстпебун сәре 3, рʹеза 1 һʹәта 5?

Сәра: Тʹәмам. «Жь нава ԝан һʹәму тәрәԝьлед чолейә кӧ Хӧдан Хԝәде әʹфьрандьбун, йе һәри һʹьләкʹар мәʹр бу. Әԝи готә жьне: ‹Рʹасти Хԝәде готийә ԝәки жь һʹәму даред бахчә гәрәке нәхԝьн?› Кʹӧлфәте готә мәʹр: ‹Жь бәред даред бахчә әм дькарьн бьхԝьн. Ле жь бәре ԝе дара кӧ нава бахчәда йә, Хԝәде гот нәхԝьн у дәст нәдьне, ԝәки һун нәмьрьн›. Мәʹр готә кʹӧлфәте: ‹На, һун тʹӧ щар намьрьн, ле Хԝәде занә, ԝе рʹожа гава һун жь ԝе бьхԝьн, чʹәʹвед ԝәйе вәбьн у бьбьнә мина Хԝәде, ԛәнщи у хьрабийе жь һәв дәрхьн›».

Мәйрәм: Зәʹф рʹази мә. Ԝәрә әм һьнәк сәр ԝан рʹеза бьфькьрьн. Йа пешьн, дина хԝә бьдә, ԝәки мәʹр тʹәви Һеԝайе хәбәр дьда. Жь кʹьтебәкә дьн йа Кʹьтеба Пироз әм педьһʹәсьн, ԝәки бь рʹасти Мире-щьна бь сайа мәʹр тʹәви Һеԝайе хәбәр да.c Мире-щьна пьрс данә Һеԝайе дәрһәԛа тʹәмийа Хԝәде һьндава бахәке. Ԝә дина хԝә да чь ахьри һивийа Адәм у Һеԝайе бу, һәгәр ԝана бәре ве бахе бьхԝара?

Сара: Әԝана ԝе бьмьрана.

Мәйрәм: Рʹаст ә. Дина хԝә бьдьнә, кӧ Шәйтʹан бӧхданәкә мәзьн авитә сәр Хԝәде. Әԝи гот: «На, һун тʹӧ щар намьрьн». Бь ԝе йәке Мире-щьна Хԝәде дәрәԝин дәрхьст!

Сәра: Әз дәрһәԛа ԝе йәке ԛә нәфькьримә.

Мәйрәм: Гава Мире-щьна Хԝәде дәрәԝин дәрхьст, әԝи пьрсәкә ӧса пешда ани, бона сафикьрьна кʹижани ԝәʹдә лазьм бу. Тӧ сәрва дьчи чьрʹа нәдьбу, ԝәки әԝ пьрс дәрберʹа бьһата сафикьрьне?

Сара: Рʹаст бежьм, на.

Мәйрәм: Тʹәмам, соз мәсәлә әз дьбежьм ԝәки әз жь тә ԛәԝаттьр ьм. Чаԝа тӧ дькари избат ки, кӧ әз нәрʹаст ьм?

Сара: Әз ньзаньм. Дьԛәԝьмә әм дькарьн һәвдӧрʹа бькʹәвьнә ләще.

Мәйрәм: Рʹаст ә, мәсәлә әм дькарьн тьштәки гьран һьлбьрʹьн. Кʹе баре дьһа гьран һьлбьрʹә, әԝ дьһа ԛәԝат ә. Гава пьрс дьчә дәрһәԛа ԛәԝате, әԝ йәк һеса йә избат ки, ӧса нинә?

Сара: Бь рʹасти жи ӧса нә.

Мәйрәм: Ле гава хәбәрдан дәрһәԛа һʹәлалийе дьчә, ида һеса нинә ԝе йәке избат ки. Рʹаст ә?

Сара: Бәле, ӧса нә.

Мәйрәм: Һеса йә ԛәԝата кәсәки ләщеда избат ки, ле һʹәлалийа кәсәки избат ки бь рʹасти ӧса һеса нинә.

Сара: Һәма ӧса жи һәйә.

Мәйрәм: Демәк, сәва кӧ әв пьрс бе сафикьрьне, лазьм ә ԝәки ԝәʹдә дәрбаз бә кӧ бе избаткьрьне кʹе жь мә рʹаст у һʹәлал ә.

Сара: Бь логики йә.

Мәйрәм: Ньһа ԝәрә әм диса дина хԝә бьдьн Кʹьтеба Пироз. Гәло Мире-щьна гот, ԝәки әԝ жь Хԝәде ԛәԝаттьр ә?

Сара: На.

Мәйрәм: Һәгәр ӧса буйа, Хԝәде ԝе дәрберʹа әв пьрс сафи кьра. Ле Мире-щьна гот, ԝәки әԝ жь Хԝәде рʹасттьр у һʹәлалтьр ә. Әм дькарьн бежьн, ԝәки бь рʹасти әԝи Һеԝайерʹа гот: «Хԝәде ԝә дьхапинә, ле әз ԝәрʹа рʹастийе дьбежьм».

Сара: Әз сәр ԝе йәке нә жи фькьри мә.

Мәйрәм: Хԝәде билан ә у әԝи заньбу, ԝәки ԝәʹдә лазьм ә сәва кӧ әшкәрә бә кʹе рʹаст ә у кʹе дәрәԝин ә.

ПЬРСА ҺӘРИ ФӘРЗ

Сара: Ле гава Һеԝа мьр, чьрʹа әв йәк избат нәкьр, ԝәки Хԝәде һәр тьшт рʹаст дьгот?

Мәйрәм: Аликива бежьн, әре. Ле Мире-щьна нә тʹәне әв пьрс пешда ани, һәла бьньһерʹә рʹеза 5. Тә тедәрхьст әԝи диса чь Һеԝайерʹа гот?

Сара: Әԝи гот, кӧ һәгәр Һеԝа ве бәре бьхԝә, ԝи чахи ԝе чʹәʹве ԝе вәбә.

Мәйрәм: Әре у кӧ әԝе бьбә мина Хԝәде у ԝе бьзаньбә ча ԛәнщийе жь хьрабийе һәв дәрхә. Бь ԝе йәке Мире-щьна хԝәст бьда кʹьфше, ԝәки Хԝәде тьштәки баш жь мәрьва вәдьшерә.

Сара: Ньһа фәʹмдари йә.

Мәйрәм: Тә дит, Мире-щьна диса пьрсәк пешда ани.

Сара: Кʹижан пьрс?

Мәйрәм: Мире-щьна хԝәст бежә, ԝәки Һеԝайерʹа у һʹәму инсанәтерʹа ԝе дьһа баш бә бе рʹебәрийа у сәрԝертийа Хԝәде бьжин. Йаһоԝа заньбу, ԝәки ԝәʹдә лазьм ә сәва кӧ Мире-щьна гьлийед хԝә избат кә. Ләма жи Хԝәде изьн да, ԝәки Мире-щьна ԝәʹдәлу бьбә сәрԝере ве дьне. У әв чәтьнайед дәр-доре мә избат дькьн, ԝәки нә кӧ Хԝәде ле Мире-щьна сәрԝере ве дьне йә.d Ле Хԝәде мә бе чʹарә нәһишт.

Сара: Тӧ чь дьхԝази бь ԝе йәке бежи?

Мәйрәм: Кʹьтеба Пироз дӧ рʹастийед дәрһәԛа Хԝәде избат дькә. Йа пешьн, гава әм дьчәрчьрьн, дьле Хԝәде сәр мә дьшәԝьтә у әԝ дьхԝазә али мә бькә. Мәсәлә, әв йәк те кʹьфше жь гьлийед Даԝьд Пʹадша, йед кӧ Зәбур 31:7-да ньвиси нә. Даԝьд жийина хԝәда рʹасти гәләк кӧл-дәрда һат, ле дина хԝә бьдә әԝ дӧайе хԝәда чь Хԝәдерʹа дьбежә. Тӧ дькари әве рʹезе бьхуни?

Сара: Ԝьра те готьне: «Пе һʹӧба Тә әзе әшԛ у ша бьм, чьмки сәр мәʹрьмийа мьнда Тә ньһерʹи у тәʹли-тәнгийа мьн пе һʹәсийайи».

Мәйрәм: Рʹаст ә Даԝьд дьчәрчьри, ле әԝи бәрдьли дьстанд, чьмки заньбу ԝәки Йаһоԝа һаш жь кӧл-дәрде ԝи һәйә. Әв йәк кӧ Йаһоԝа Хԝәде мә фәʹм дькә у һаш жь кӧл-дәрдед мә һәйә бәрдьлийе дьдә мә, ӧса нинә?

Сара: Һәмьки, әм дьлбинийе дьстиньн.

Мәйрәм: Рʹастийа дӧда жи әԝ ә кӧ Хԝәде ԝе нәһелә, ԝәки әм һʹәта-һʹәтайе бьчәрчьрьн. Кʹьтеба Пироз дьдә кʹьфше кӧ зутьрәке әԝе сәрԝертийа Мире-щьна бь тʹәмами кʹӧта кә. Хԝәде ԝе кʹока һʹәму кӧл-дәрда бинә у ԝан дәрда жи рʹуйе кʹижанида тӧ у дийа тә дьчәрчьрьн. Һәгәр тәрʹа дәст дьдә, һʹәфтийа майин әзе диса бем у әме шеԝьр кьн, кӧ чьрʹа әм дькарьн дӧдьли нәбьн, ԝәки зутьрәке Хԝәде ԝе һʹәму кӧл-дәрдед мә бьдә һьлдане.e

Сара: Баш, әзе һивийа тә бьм.