ПЬРСЕД КʹЬТЕБА ПИРОЗВА ГЬРЕДАЙИ
Гәло мьри ԝе диса бьжин?
Бешьк, әʹфьрандаре жийине дькарә мәрьва сах кә
Йаһоԝа Хԝәде Канийа жийине йә (Зәбур 36:9). Гәло бь логики нинә кӧ әԝ Хԝәдейе Канийа жийине дькарә мьрийа ԝәгәрʹинә жийине? Кʹьтеба Пироз дьбежә кӧ ахьрийеда әԝ ԝе мьрийа сах кә. (Бьхунә Кʹаред Шандийа 24:15.) Ле чьрʹа Хԝәде дьхԝазә әԝе йәке бькә?
Дәстпекеда нета Әʹфьрандаре мә әԝ бу, кӧ мәрьв һʹәта-һʹәтайе ль сәр әʹрде бьжин (Дәстпебун 1:31; 2:15-17). У ньһа жи нета ԝи бона инсанәте диса әԝ ә. Дьле ԝи дешә кӧ әм иро чаԝа дьжин. Жийина мә тʹьжә йә бь кӧл-дәрда у әʹмьре мә кьн ә. (Бьхунә Ибо 14:1, 14, 15.)
Әԝед кӧ бенә сахкьрьне ԝе кʹидәре бьжин?
Гәло Хԝәде мәрьв әʹфьрандийә бона жийина сәр әʹзмана? На. Хԝәде мьлйакʹәт әʹфьрандьнә бона жийина ль сәр әʹзмана. Ле әԝи мәрьв чекьрьн сәва кӧ ль сәр әʹрде бьжин (Дәстпебун 1:28; Ибо 38:4, 7). Бьфькьрьн сәр ве йәке кӧ чахе Иса мәрьв сах дькьрьн, әԝи ль сәр әʹрде әԝана вәдьгәрʹандьн жийине у әԝан мәрьва ль сәр әʹрде дьжитьн. У һʹәчʹи зәʹф йед кӧ ахьрийеда бенә сахкьрьне, ԝе ль сәр әʹрде вәгәрʹьн жийине. (Бьхунә Йуһʹәнна 5:28, 29; 11:44.)
Ле бона жийина сәр әʹзмана Хԝәде һьнә мәрьв жьбартьн, кʹижана кӧ ԝе бь бәдәна рʹӧһʹани сах кә (Луԛа 12:32; 1 Корьнтʹи 15:49, 50). Әԝед кӧ бенә сахкьрьне бона жийина сәр әʹзмана, ԝе чаԝа пʹадша тʹәви Мәсиһ ль әʹзмана сәр әʹрдерʹа сәрԝертийе бькьн. (Бьхунә Әʹйанти 5:9, 10.)