Тʹәне саләкә әʹдьлайе у бәхтәwарийе бьдә мьн

ЖИЙИНА МЬНӘ БӘРЕ:

Малбәта мьн дьжит Теланкореда, дь гöнде Франсайеда, ль бакʹура-рʹоһьлате. Баве мьн Франс бу, ле дийа мьн Италйан ә. Чахе әз һʹәйшт сали бум, әм дәрбази Рʹоме (Италйа) бун, ль wе дәре мә мьһаләкә кʹәсибда дьжит. Жийина дь wедәре сәва малбәта мә гәләк чәтьн бу, у де-баве мьн һәр рʹож жь бо кемасийа пʹәра шәрʹ дькьрьн.

Кʹәнге әз 15 сали бум, дийа мьн әз һелан дькьрьм, wәки дәрем жь мал у хwәрʹа һәвала бьвиньн. Ләма жи әз сәр гәләк wәхт жь мале дьчум. Һьнә wәʹдә шунда әз кʹәтьмә нава кʹомәкә мәрьве хьраб. Рʹожәке мәрьвәк незики мьн бу, әw дьһата хане гәләк һәвалһʹьз, у әwи наркотик да мьн. Мьн наркотик һьлда, чьмки мьн дьхwаст бьдьмә кʹьфше кö әз ида мәзьн ьм. Әз гәләк зу кʹәтьмә нав дьнйа кö бь наркотике у бенамусийе тʹьжә йә. Гәләк щар зорбәти мьн дькьрьн, у әз хьраб дькьрьм. Бона мьн әʹмьр тʹö тьшт нәдьһатә һʹәсабе, у мьнрʹа йәк бу әзе бьмьрьм йан сах бьминьн. Әз гәләк дьлтәнг бум, у мьн хwә тʹәне тʹәхмин дькьр. Чахе әз 16 сали бум, мьн дьхwаст хwә бькöжьм. Мьн ботʹләк виски вәхwар у хwә авитә голе. У әз се рʹожа кʹәтьмә коме.

Паши wе йәке мьн әʹмьр qимәт кьр, ле әз бумә мәрьвәки һерс у qәлп. Мьн öса дькьр кö мәрьв рʹази бьн, wәки тʹәви мьн бькʹәвьнә һәләqәтийа сексуали, дь мала wанда мьн наркотик дьда wан, у мьн тьштед wани бьһа дьдьзи. Мәрьвед сәрәкә дь криминаледа әз дьдамә хәбате, сәва әз наркотике нав тʹәмамийа Италйайе бәла кьм. Гәләк щар проблемед мьн тʹәви полисйайе һәбун. Нета әʹмьре мьн тʹöнә бу, мьн нькарьбу әʹмьре хwә контрол кьра, ле йәкә мьн баwәр дькьр кö гәрәке мәʹни һәбә кö чьрʹа әз дьжим. Мьн Хwәдерʹа дöа дькьр кö тʹәне саләкә әʹдлайе у бәхтәwарийе бьдә мьн.

КʹЬТЕБА ПИРОЗ ЧА ЖИЙИНА МЬН ГÖҺАСТ:

Чахе әз 24 сали бум, мьн сафи кьр дәрбази Инглистане бьм. Чьмки әз тʹәви криминалийе гьредайи бум у жь бо wе йәке әʹмьре мьн дькʹәтә бьн хофе. Пешийа кö әз бьчума мьн сәрик дийа хwә хьст, у әз гәләк әʹщебмайи мам, чахе мьн ль wедәре дит мәрьвәки, бь наве Анунсеато Лугара, йе кö тʹәви дийа мьн дәрһәqа Кʹьтеба Пироз хәбәр дьда.a Мьн заньбу дәрһәqа әʹмьре wийи криминал, ләма жи әз тьрсийам у мьн жь wи пьрси кö чьрʹа әw ль wьр ә. Әwи мьнрʹа гьли кьр дәрһәqа гöһастьнед мәзьн, кʹижан кö әwи дь әʹмьре хwәда кьрьбу, сәва кö бьбә Шәʹде Йаһоwа. У әwи хwәст кö әз соз бьдьмә wи, wәки әз чахе һәрʹьмә Инглистане, рʹасти Шәʹдед Йаһоwа бем у хәбәрдьм. Әз qайил бум кö әве йәке бькьм. Ле чаwа кö әз гьһиштьмә щи, әз диса вәгәрʹийамә жийина хwәйә бәре.

Щарәке әз рʹасти Шәʹдәки һатьм, кʹижан кö ль мәйдана Лондоне журналед «Бьрща Qәрәwьлийе» у «Һʹьшйар Бьн!» бәла дькьр. Созе кö мьн дабу Анунсеато кʹәтә бира мьн, у мьн жь wи Шәʹдәйи хwәст кö тʹәви мьн һинбуне дәстпекә.

Чь кö әз жь Кʹьтеба Пироз педьһʹәсийам, әз әʹщебмайи дькьрьм. Мәсәлә, сәр мьн гәләк һʹöкöм бу рʹеза жь 1 Йуһʹәнна 1:9, кʹидәреда кö дәрһәqа Хwәде те готьне: «Ле һәгәр әм гöнед хwә бьдьнә рʹуйе хwә, әw хwәйе созе хwә йә у һәqийе дькә, wе гöнед мә бьбахшинә у мә жь һʹәму нәһәqийа паqьж кә». Әw рʹез гәләк дьле мьн гьрт у мьн фәʹм кьр, кö әз мәрьвәки нәтʹәмьз ьм, чьмки нәрʹаст дьжим. Мьн дәрберʹа дәстпекьр һәрʹьмә сәр һәр щьватед Шәʹдед Йаһоwа. Әwана бь шабуне бәрбь мьн дьһатьн. Кʹәнге мьн дьдит һәвалтийа wанә незик тʹәви һәв, демәк әw йәк чь кö мьн тʹьме дьхwаст, мьн жи хwәст бьбьмә нәфәрәки малбәта wанә рʹöһʹани.

Рʹаст ә мьнрʹа чәтьн нибу наркотике бьтʹәрькиньм у әʹмьре хьраб бьһельм, ле мьнрʹа дьһа чәтьн бу хәйсәте хwә рʹаст кьм. Мьн тʹәхмин кьр кö әз гәрәке мәрʹифәт у qәдьр бьм һьндава мәрьва. Бь рʹастийе әз һʹәта ньһа шәрʹ дькьм тʹәви һьнә хәйсәтед хwәйи нәбаш. Ле бь аликʹарийа Йаһоwа мьн ида гәләк тьшт нав хwәда гöһаст. Wәкә шәш мәһ wәʹде һинбуна Кʹьтеба Пироз әз һатьм ньхöмандьне ча Шәʹдед Йаһоwа. Әw йәк qәwьми сала 1997 да.

ЧЬ КʹАР МЬН СТАНД:

Паши ньхöмандьне әз зәwьщим тʹәви Барбарайе, әw жи тʹәзә бьбу Шәʹде Йаһоwа. Чахе һәвале мьни бәре дит кö әз ча һатьмә гöһастьне, әwи жи дәстпекьр һинбуна Кʹьтеба Пироз. Ахьрийеда әw у хушка wи жи бунә Шәʹдед Йаһоwа. Öса жи хушка пирька мьн кʹижан 80 сали зедәтьр бу, дәстпекьр һинбуна Кʹьтеба Пироз, у паши ньхöмандьне wәʹдәк шунда мьр.

Ньһа дь щьвата хwәда әз хьзмәт дькьм ча рʹуспи, у тʹәви жьна хwә хьзмәт дькьн ча пешәнге һәртʹьм, у һинбуна Кʹьтеба Пироз тʹәви мәрьвед кö сәр зьмане Итали дь Лондонеда хәбәрдьдьн. Щарна әз дькʹәвьмә депресие сәва әʹмьре хwәйи бәре, ле Барбара аликʹарикә мәзьн ә бона мьн. У ньһа малбәтәкә мьнә öса һәйә кʹижан кö мьн тʹьме дьхwәст кö һәбә, у Бавәки мьни öса һәйә кʹижан кö мьн тʹьме дьхwәст кö һәбә. Мьн жь Хwәде хwәст кö тʹәне саләкә әʹдьлайе у бәхтәwарийе бьдә мьн, ле әwи жь wе зедәтьр да мьн!