Чʹәʹв Бьдьнә Достед Йаһоwайи Незик

1-3. а) Чьрʹа әм дькарьн баwәр бьн кӧ әм дькарьн бьбьнә досте Йаһоwа? б) Дь wе тʹемайеда әме дәрһәqа чь шеwьр кьн?

КʹЬТЕБА ПИРОЗ сәр Бьраһим се щара дьбежә досте Йаһоwа (2 Дир. 20:7; Иша. 41:8; Аqуб 2:23). Рʹаст ә дь Кʹьтеба Пирозда тʹәне сәр wи те готьне досте Хwәде, ле гәло әw те һʹәсабе кӧ жь мәрьва тʹәне Бьраһим бу досте Йаһоwа? На, Кʹьтеба Пироз дьдә кʹьфше кӧ һәр кәс жь мә дькарә бьбә досте Хwәде.

² Хәбәра Хwәдеда гәләк мәсәлед жьн у меред амьн һәнә, кʹижан кӧ хwәдехоф бун, баwәрийа wан һьндава Йаһоwа һәбу у бунә достед wийи незик. (Бьхунә Зәбур 25:14.) Паwлосе шанди ньвиси дәрһәqа «әʹwьрәки . . . мәзьн йе шәʹдан», кʹижан кӧ бь рʹастийе достед Хwәде бун (Ибрн. 12:1, ИМ). Әw һʹәму мәрьв жь һәв щӧдә дьбун.

³ Wәрен әм дина хwә бьдьнә сәр се һәвалед Йаһоwайи незик, дәрһәqа кʹижана кӧ Кʹьтеба Пирозда те готьне. Әме шеwьр кьн дәрһәqа 1) Рʹутʹ, жьнәбикә амьн жь Моwабе; 2) Һʹьзqийа, Пʹадшайе рʹаст йе Щьһуда у 3) Мәрйәм, дийа Исайә мьлук. Чь әм дькарьн һин бьн жь wан һәр кәса, кӧ әwана ча бунә досте Йаһоwа?

ӘWЕ ҺʹЬЗКЬРЬНА АМЬН ДАЙӘ КʹЬФШЕ

4, 5. Кʹижан сафикьрьна фәрз Рʹутʹ гәрәке бькьра, у чьрʹа әw сафикьрьн нәһеса бу? (Бьньһерʹә шькьле әʹwльн.)

⁴ Бьдьнә бәр чʹәʹве хwә се жьнәби жь әʹрде Моwабе дьчьнә Исраеле. Жь wан йәк Наһоми йә, у букед wе Рʹутʹ у Орпа. Орпайе сафи кьрийә кӧ wәгәрʹә ль Моwабе мала хwә. Наһоми сафи кьрийә кӧ бәрдәwам кә һәрʹә мала хwә Исраеле. Тʹәви wе Рʹутʹ ә кʹижан кӧ гәрәке сафикьрьна фәрз бькә. Әw дькарә йан һәрʹә мала хwә щәм щьмәʹта хwә Моwабеда, йан тʹәви хасийа хwә Наһомийе бьминә, у һәрʹә Бәйтләһʹме (Рʹутʹ 1:1-8, 14).

⁵ Рʹутʹ дькарьбу бьфькьрийа кӧ вәгәрʹә wәлате хwә Моwабе, кʹидәре кӧ малбәта wе у мәрьвед wейи незик wе мьqати wе буна у әw хwәй кьрана. Һьн жи әʹйд-qәйд, зьман у щьмәʹта Моwабе йе wе бун. Ле Наомийе нькарьбу жерʹа әw һʹәму тьшт ль Бәйтләһʹмеда соз бьда. У ләма Наомийе готә Рʹутʹ кӧ вәгәрʹә wәлате хwә Моwабе. Наоми дьтьрсийа кӧ wе нькарьбә бука хwәрʹа нә мер, нә жи мале бьвинә. Ле Рʹутʹ чь сафи кьр? Бьньһерʹьн фьрqийа ортʹа wе у Орпайе. Орпа «вәгәрʹийа гәле хwә у илаһе [хӧданед] хwә» (Рʹутʹ 1:9-15). Ле гәло Рʹутʹ жи дьхwаст вәгәрʹә хӧданед щьмәʹта хwә йед qәлп? Әʹйан ә кӧ на.

6. а) Рʹутʹ чь сафикьрьна билани кьр? б) Чьрʹа Боаз дәрһәqа Рʹутʹ гот кӧ әwе сьтʹар бьн пʹәре Йаһоwа дьгәрʹийа?

⁶ Те кʹьфше кӧ Рʹутʹ дәрһәqа Йаһоwа Хwәде пеһʹәсийа бу дьбәкә жь мере хwә йан жь Наомийе. Рʹутʹ заньбу кӧ Йаһоwа мина хӧданед Моwабе нинә, у әw һежа йә кӧ wи һʹьз бькә у бьһʹәбинә. Ле занәбун бәс нибу. Рʹутʹ гәрәке сафикьрьнәкә мәзьн бькьра. Гәло әwе бьжарт кӧ Йаһоwа бьбә Хwәдейе wе? Әw йәк Рʹутʹ бь билани сафи кьр. Әwе готә хасийа хwә: «Wе гәле тә бьбә гәле мьн, у Хwәдайе тә бьбә Хwәдайе мьн» (Рʹутʹ 1:16). Бәле һʹьзкьрьна Рʹутʹ һьндава Наомийе дьле мә дьгьрә. Ле бона wе һе фәрз бу һʹьзкьрьна wе һьндава Йаһоwа, у әw һʹьзкьрьн гәләк әʹщебмайи йә. Әw йәк ӧса жи Боаз әʹщебмайи кьр, кʹижани кӧ паше дӧа ль Рʹутʹ кьр, чьмки әwе сьтʹар бьн пʹәре Йаһоwа дьгәрʹийа. (Бьхунә Рʹутʹ 2:12.) Әw йәк тинә бира мә кӧ ча щущька чʹьвике дькʹәвә бьн пʹәре де-баве хwә сәва бе хwәйкьрьне (Зәб. 36:7; 91:1-4). Йаһоwа бона Рʹутʹ һәма бавәки ӧса бу. Йаһоwа әw кʹәрәм кьр бона баwәрийа wе, у Рʹутʹ тʹӧ щар пʹошман нәдьбу бона сафикьрьна хwә.

7. Чь дькарә али wан бькә, йед кӧ һәла һе сафи нәкьрьнә кӧ хwә тʹәсмили Йаһоwа кьн?

⁷ Гәләк мәрьв дәрһәqа Йаһоwа педьһʹәсьн, ле һе сафи накьн кӧ сьтʹаре щәм wи бьгәрʹьн. Әwана паш дьхьн кӧ хwә тʹәсмили wи кьн, у бенә ньхӧмандьн. Һәрге һун жи паш дьхьн, у һе сафи накьн кӧ хwә тʹәсмили Йаһоwа кьн, һәла хwә бьпьрсьн кӧ чьрʹа һун паш дьхьн. Һәр кәс хӧданәкирʹа йан кәсед дьнрʹа хьзмәт дькә (Йешу 24:15). Ле wе бь билани бә һәрге тʹәне Хwәдейе рʹастрʹа хьзмәт кьн, кʹижан кӧ һежа йә, у щәм wи сьтʹаре бьгәрʹьн. Чахе һун хwә тʹәсмили Йаһоwа бькьн, бь ве йәке һуне бьдьнә кʹьфше баwәрийа хwә һьндава wи. Ле әw wе али wә бькә кӧ һун бәрдәwам кьн wирʹа хьзмәт кьн, фьрqи тʹӧнә һун дьбәкә рʹасти кʹижан чәтьнайа бен. Әw йәк Йаһоwа бона Рʹутʹ кьр.

ӘWИ «ХWӘ БЬ ХӦДАНВА ГЬРЕДА»

8. Гьли кьн зарʹотийа Һьзqийа.

⁸ Дәрәща Һьзqийа мина дәрәща Рʹутʹ нибу. Әw нава щьмәʹтәкә ӧсада мәзьн дьбу, кʹижан кӧ тʹәсмили Йаһоwа бьбу. Ле нә һʹәму Исраели Хwәдерʹа амьн бун. Баве Һьзqийа, Аһаз Пʹадша, мәрьвәки зӧлм бу. Әwи ӧса кьр кӧ щьмәʹт кʹәтә нава пʹутпʹарьстийе, у әwи һәла һе пʹарьстгәһа Йаһоwа жи беһӧрмәт кьр. Һьн жи әwи һәла һе бьред Һьзqийа кьрә нава агьр, сәва кӧ wана бькә qӧрбан хӧдане qәлпрʹа. Бь рʹастийе жи зарʹотийа Һьзqийа гәләк хьраб у чәтьн бу (2 Пʹадш. 16:2-4, 10-17; 2 Дир. 28:1-3).

9, 10. а) Чьрʹа Һьзqийа һеса дькарьбу бьбуйа мәрьвәки зӧлм? б) Чьрʹа әм гәрәке сәр Хwәде һерс нәкʹәвьн? в) Чьрʹа әм гәрәке нәфькьрьн кӧ әм ча һатьнә мәзьнкьрьне, ве йәкева гьредайи йә кӧ әме мәрьвнә ча бьн?

⁹ Һьзqийа һеса дькарьбу бьбә мина баве хwә, кӧ зӧлм у һерс бә, у мьqабьли Хwәде бә. Әw мәрьвед кӧ зарʹотийа wан нә ӧса хьраб бу ча йа Һьзqийа, дьфькьрьн кӧ мәʹнийа wан һәйә «дьле хwәда жь Хӧданрʹа һерс» бьн йан сәр тʹәшкиләта wи (Мәтʹлк. 19:3). У һьнәк дьфькьрьн кӧ чьмки зарʹотийа wан хьраб бу, ләма әwана бь жийина хьраб дьжин, у дьбәкә чʹәʹв дьдьнә де-баве хwә у шашийед wан дькьн (Һәзqл. 18:2, 3). Ле гәло әw йәк рʹаст ә?

¹⁰ Мәсәла Һьзqийа сәр ве пьрсе әʹйан щабе дьдә: Әw йәк нәрʹаст ә! Тʹӧ мәʹни тʹӧнә кӧ мәрьв сәр Йаһоwа һерс бә. Чьмки зӧлми кӧ ве дьнйа хьрабда һәйә, нә жь Йаһоwа йә (Иб. 34:10). Рʹаст ә де-бав дькарьн йан хьраб йан баш һʹӧкӧм бьн сәр зарʹед хwә (Мәтʹлк. 22:6; Колс. 3:21). Ле ве йәкева гьредайи нинә кӧ ахьрийеда зарʹ wе йәки ча бә. Чьмки Йаһоwа пʹешкʹешәкә qимәт дайә мә, әw һәйә азабуна бьжартьне, демәк әм дькарьн хwәха сафи кьн кӧ әме чь бькьн у йәки ча бьн (Qан. Дщр. 30:19). Ле Һьзqийа ча әw пʹешкʹеш да хәбате?

11. Чьрʹа Һьзqийа пʹадша, пʹадше Щьһудайи баш бу?

¹¹ Рʹаст ә баве Һьзqийа йәк жь пʹадшед Щьһудайи хьраб бу, ле Һьзqийа йәк жь пʹадшед баш бу. (Бьхунә 2 Пʹадшати 18:5, 6.) Әwи чʹәʹв нәда баве хwә. Әwи гӧһе хwә дьда пʹехәмбәред Йаһоwа, мәсәлә Ишайа, Миха у Һосәйа. Әм дькарьн бьдьнә бәр чʹәʹве хwә кӧ әwи чаwа кʹур гӧһе хwә дьда wан мәрьвед амьн, сәва кӧ жь Йаһоwа ширәт у рʹасткьрьне бьстинә. Тьштед хьраб кʹижан кӧ баве wи кьр, Һьзqийа рʹаст кьр. Мәсәлә, әwи пʹарьстгәһ тʹәмьз кьр, у жь Хwәде һиви кьр кӧ гӧне щьмәʹте бьбахшинә, у һʹәму пʹут кʹӧта кьр (2 Дир. 29:1-11, 18-24; 31:1). Чахе Һьзqийа рʹасти чәтьнайа һат, мәсәлә чахе пʹадше Ашуре Санһәриб һʹӧщӧми сәр Оршәлиме кьр, әwи мерхаси у баwәри да кʹьфше. Әwи итʹбарийа хwә Хwәде ани, кӧ әw wе wана хьлаз кә у ӧса жи бь мәсәла хwә у бь гьлийа щьмәʹт qәwи кьр (2 Дир. 32:7, 8). Рʹаст ә wәʹдәке Һьзqийа qӧрʹә бу, ле йәкә әwи хwә ньмьз кьр у пʹошман бу (2 Дир. 32:24-26). Әʹйан ә кӧ Һьзqийа изьн нә да кӧ зарʹотийа wи сәр wи һʹӧкӧм бә, у әw бьбә йәки зӧлм. Дәwсе әwи да кʹьфше кӧ Йаһоwа досте wи йә. Бь рʹастийе жи Һьзqийа бона мә мәсәләкә баш ә.

12. Мина Һьзqийа ча иро гәләк мәрьв бунә достед Йаһоwа?

¹² Чьмки әм дьжин дьнйа берʹәʹм у беһʹьзкьрьн, ләма әʹщебмайи нинә кӧ гәләк зарʹ иро мәзьн дьбьн бь кемасийа һʹьзкьрьне, у бехwәйи (2 Тимтʹ. 3:1-5). Иро гәләк Мәсиһи һәнә, зарʹотийа кʹижана хьраб бу у бь еш бу. Ле әwана бунә достед Йаһоwа. Мина Һьзqийа, әwана дьдьнә кʹьфше кӧ жийина мәрьвайә бәре сәр wи у сәр ахьрийа wи һʹӧкӧм набә. Чьмки Хwәде мәрʹа азайа бьжартьне дайә, у әw qәдьрәки мәзьн ә кӧ әм әве пʹешкʹеше дькарьн бьдьнә хәбате, сәва кӧ wирʹа хьзмәт кьн, wи рʹумәт кьн, чаwа кӧ Һьзqийа кьр.

ӘWЕ ГОТ: «ӘЗ ЩАРИЙА ХӦДАН ЬМ»!

13, 14. Чьрʹа щабдарийа Мәрйәме нәһеса бу, ле йәкә әwе чь щаба хwә да сәр гьлийед Щьбрайил?

¹³ Гәләк сала паши Һьзqийа, жьнәкә щаһьлә Щьһу, доста Йаһоwайә незик бу. Әw Мәрйәм бу. Тʹӧ кәси тʹӧ щар щабдарийа ӧса нә стандийә чаwа әwе. Әw гәрәке һʹәмлә буйа, зарʹ бьанийа, у әw зарʹ хwәй кьра у мәзьн кьра. Әw зарʹ Кӧрʹе Хwәдейи тайе тʹәне бу! Һәла бьдьнә һʹәсабе хwә Йаһоwа чьqас гәрәке әw һʹьз кьра у итʹбарийа хwә wе бьанийа, wәки әw qәдьре ӧса мәзьн бьда wе. Ле гәло чахе Мәрйәм пеһʹәсийа дәрһәqа ве щабдарийе, әwе хwә ча да кʹьфше?

¹⁴ Рʹаст ә һеса те готьн дәрһәqа wи qәдьре мәзьн кӧ Мәрйәме стандийә. Ле wәрә бьфькьрьн гәло Мәрйәм жь бо чь дьбәкә хәмгин дьбу. Мьлйакʹәте Хwәде Щьбрайил готә wе кӧ әw wе һʹәмлә бә, ле бейи һәләqәтийа тʹәви мер. Щьбрайил Мәрйәмерʹа нәгот кӧ әw мәрьвед хwәйә незикрʹа шьровәкә кӧ чьрʹа әw һʹәмлә йә. Гәло әwана wе чь бьфькьрийана сәр wе? Һьн жи Мәрйәм хәмгин дьбу сәва дәргистийе хwә Усьв. Әwе ча гәрәке избат кьра кӧ рʹаст ә әw һʹәмлә йә, ле wирʹа амьн майә? Һьн жи, әв щабдарикә чьqас мәзьн бу, кӧ әwе гәрәке мәзьн кьра, хwәй кьра, у һин кьра Кӧрʹе тайе тʹәне йе Һәри Мәзьн! Әм ньзаньн дәрһәqа һʹәму хәмгинед Мәрйәме чахе Щьбрайил тʹәви wе хәбәрда. Ле әм заньн кӧ әwе чь щаба хwә да, әwе гот: «Әз щарийа Хӧдан ьм. Бьра анәгори готьна тә бона мьн бьбә» (Луqа 1:26-38).

15. Чьрʹа баwәрийа Мәрйәме мәзьн бу?

¹⁵ Рʹасти жи баwәрийа Мәрйәме гәләк мәзьн бу! Әw чаwа щарик, һазьр бу һәр тьшти бькә чь кӧ Йаһоwа wерʹа бьда, у әwе итʹбарийа хwә wи дьани. Әwе дьхwаст Хwәдерʹа хьзмәт кьра, чаwа кӧ әwи qәбул кьра. Ле гәло баwәрийа wейә ӧса qәwи жь чь бу? Баwәри жь буйине найе. Ле әм дькарьн баwәрийе бал хwә пешда биньн у жь Хwәде һиви кьн али мә бькә ве йәкеда (Галт. 5:22; Әфәс. 2:8). Ле әм жь кʹӧ заньн кӧ Мәрйәме баwәрийа хwә qәwи дькьр? Wәрә әм пебьһʹәсьн кӧ әwе ча гӧһе хwә дьда у ча хәбәрдьда.

16. Чь дьдә кʹьфше кӧ Мәрйәм гӧһдарәкә баш бу?

¹⁶ Мәрйәме ча гӧһ дьда. Кʹьтеба Пироз мә ширәт дькә кӧ «бьһистьнеда сәрхwә» бьн, ле хәбәрданеда «гьран» бьн (Аqуб 1:19). Ле гәло Мәрйәм гӧһдарәкә баш бу? Бәле. Кʹьтеба Пироз дьдә кʹьфше кӧ Мәрйәме рʹьнд гӧһ дьда гьлийед гәләк фәрз кӧ әwе дьбьһист. Һьн жи әwе хwәрʹа wәʹдә дьдит кӧ бьфькьрә сәр wан тьштед фәрз. Мәсәлә, чахе Иса һатә буйине, шьвана Мәрйәмерʹа гьли кьрьн дәрһәqа әʹламәтийа кӧ мьлйакʹәт wанрʹа готьбу. Паши 12 сала, Иса тьштәки ӧса гот кӧ Мәрйәм әʹщебмайи ма. Дь wан һәрдӧ дәрәщада, Мәрйәме рʹьнд гӧһ дьда, бира хwәда хwәй дькьр, у паше кʹур дьфькьри сәр wан тьшта чь кӧ әwе дьбьһист. (Бьхунә Луqа 2:16-19, 49, 51.)

17. Әм чь дькарьн һин бьн жь ве йәке кӧ Мәрйәме ча хәбәрдьда?

¹⁷ Мәрйәме ча хәбәрдьда. Гьлийед Мәрйәме дь Кʹьтеба Пирозда һьндьк ьн. Ле һәйә хәбәрданәкә wейә дьреж кӧ дь Луqа 1:46-55-да ньвисар ә. Әw гьли әʹйан дькьн, кӧ Мәрйәме Ньвисаред Пироз рʹьнд заньбу. Гьлийед wе гәләк мина wан гьлийед Һанна дийа Самуйел ьн, йед кӧ әwе дӧайе хwәда готьбу (1 Сам. 2:1-10). Ӧса жи те кʹьфше кӧ Мәрйәме ве хәбәрдана хwәда wәкә 20 щара рʹезед жь Ньвисаред Пироз wәкʹьландийә. Әʹйан ә кӧ Мәрйәмерʹа чәтьн нибу дәрһәqа тьштед рʹӧһʹани хәбәрдьдә. Әwе һʹьз дькьр хәбәрдә дәрһәqа рʹастийе, кʹижан кӧ педьһʹәсийа жь Йаһоwа, демәк Досте хwәйи мәзьн, у ӧса жи жь Хәбәра wи.

18. Әм ча дькарьн чʹәʹв бьдьнә баwәрийа Мәрйәме?

¹⁸ Мина Мәрйәме, дьбәкә әм жи щабдарикә ӧса бьстиньн, кʹижан дьбәкә мәрʹа бе кʹьфше кӧ әм нькарьн бькьн. Дә wәрә әм чʹәʹв бьдьнә Мәрйәме, у бь мьлукти qәбул кьн һʹәму шьхӧле кӧ Йаһоwа бьдә мә. Һьн жи итʹбарийа хwә Йаһоwа биньн кӧ әw wе али мә бькә. Әм ӧса жи дькарьн чʹәʹв бьдьнә баwәрийа Мәрйәме, кӧ гӧһ бьдьнә Йаһоwа у бьфькьрьн сәр ве йәке чь кӧ әм педьһʹәсьн дәрһәqа wи у qьрара wи. У чь жи әм педьһʹәсьн, wәрә бь шабуне мәрьварʹа гьли кьн (Зәб. 77:11, 12; Луqа 8:18; Рʹом. 10:15).

19. Әм чьда дькарьн баwәр бьн, һәрге әм чʹәʹв бьдьнә баwәрийа мәрьвед амьн?

¹⁹ Әʹйан ә кӧ Рʹутʹ, Һьзqийа, у Мәрйәм жи, мина Бьраһим досте Йаһоwа бун. Әwана дькʹәвьнә нава «әʹwьрәки . . . мәзьн йе шәʹдан», ИМ, у диса гәләк һәнә йед кӧ нава тʹәмамийа тʹәрихийеда qәдьрәки ӧса стандьнә, кӧ бунә достед Хwәде. Wәрә әм чʹәʹв бьдьнә баwәрийа wан мәрьвед амьн (Ибрн. 6:11, 12). Һәрге әм ӧса бькьн, әм дькарьн сәд сәләфи баwәр бьн, кӧ әме qәдьрәки ӧса бьстиньн кӧ һʹәта-һʹәтайе бьбьнә достед Йаһоwа!