Гәло Лазьм ә Һәрʹьнә Зийарәта у Щийед Пироз?

ҺӘР сал, ль Жапоне, шәш милион мәрьва зедәтьр тенә ль зийарәте, йе кö ль сәр нивгьрава Шемайе нава мешәда нә. Әwана wәкә дö һʹәзар сал ә кö тенә ль Пʹарьстгәһа Мәзьн, дь Иседа у сәре хwә датиньн бәр хöдайед тәʹве Аматәрасу Омекаме йед религийа Шинто. Хьзмәткʹаре wе религийайе пешийа wе йәке кö бькʹәвьнә пʹарьстгәһе, хwә тʹәмьз дькьн бь wе йәке кö дәсте хwә у дәве хwә дьшон. Паше әwана дьсәкьньн бәр ода бона хьзмәткьрьне у ретуала тиньн сери бь wе йәке, кö сәре хwә бәржер дькьн, дәсте хwә һәв дьхьн, у дöа дькьн.a Баwәрмәндед Шинторʹа найе qәдәхәкьрьне ретуалед баwәрмәндед дьн биньнә сери. У ләма жи һәр кәсе кö дьһатә пʹарьстгәһа Шинто, дьхwази Будист, Мәсиһи йан баwәрмәндед дьн, дькарьбун ретуалед Шинто биньнә сери.

Дьнйайеда гәләк рʹелигийед мәзьнда, щийед пироз йан жи зийарәт һәнә,b у бь милиона мәрьв тенә ль wан щийа. Wәлатед Мәсиһийада, гәләк дер у пʹарьстгәһ һәнә, кʹижан һатьнә тʹәсмилкьрьне Исарʹа, Мәрйәмерʹа у йед пирозрʹа. Гәләк пʹарьстге мина wан, һатьбун авакьрьне wан щийа, кʹидәре кö сәрһатийед жь Кʹьтеба Пироз qәwьмин, йан жи кʹидәре кö тьштед пироз һатьбун дитьне у хwәйкьрьне, йан жи чаwа һьнәк дьбежьн «кʹәрәмәтед» wәʹде иро һатьбун сери. Гәләк мәрьв дьчьнә пʹарьстгәһа чьмки әwана баwәр дькьн, кö һәрге әwана щийед пирозда дöа бькьн дöайед wан wе бенә бьһистьне. Һьнәк жи дьчьнә зийарәта, у щийед öса кʹижани әwана һʹәсаб дькьн щийе пироз, чьмки бь wе йәке дьхwазьн амьнийа хwә Хwәдерʹа бьднә кʹьфше.

Һәрге һун пʹарьстгәһада дöа бькьн, гәло Хwәде дöайед wә wе бьбьһе у щаба дöайед wә wе бьдә? Гәло Хwәде жь амьнийа wан кʹе дьчьнә зийарәта у щийед пироз рʹази йә? Ле гәло лазьм ә мәрьв пʹарьстгәһада сәре хwә бәр Хwәде дайньн? Щабед wан пьрса wе нә кö тʹәне шьровәкьн ча әм гәрәке бьньһерʹьн ль сәр чуйина ль пʹарьстгәһада, ле öса жи wе али мә бькьн фәʹм кьн чь щурʹә һʹәбандьн Хwәде хwәш те.

ХЬЗМӘТКЬРЬНА «БЬ РʹÖҺʹ У РʹАСТИЙЕ»

Чахе Иса Мәсиһ тʹәви кʹöлфәта Самәри хәбәр да, әwи әʹйан кьр кö ча Хwәде дьньһерʹә сәр дöакьрьнед ль пʹарьстгәһа у щийед пирозда. Чахе Иса Самәрйайерʹа дәрбаз дьбу әw сәкьни бәр бира аве незики бажаре Сухар, сәва кö һеса бә. Wедәре әwи тʹәви кʹöлфәтәке хәбәр да, кʹижан кö һатьбу бәр бира аве wәки аве бькʹьшинә. Wәʹде хәбәрдана хwә, кʹöлфәте да кʹьфше фьрqийа мәзьн ортʹа дине Щьһуйийа у Самәрийа. Әwе гот: «Кал у бавед мә ль сәре ви чʹийайи Хwәде һʹәбандьнә, ле һун дьбежьн щийе Хwәде һʹәбандьне гәрәке ль Оршәлиме бә» (Йуһʹәнна 4:5-9, 20).

Әwе кʹöлфәте дәрһәqа Чʹийайе Гәризим дьгот, кʹижан кö алийе бакуре wәкә 50 км., незики Оршәлиме бу. Wедәре пʹарьстгәһа Самәрйа һәбу, кʹидәре кö әwана щәжьн дәрбаз дькьрьн, мәсәлә Щәжьна Дәрбазбуне. Ле дәwса кö дина хwә бьдә сәр фьрqийа ортʹа дö мьләта, Иса кʹöлфәтерʹа гот: «Әʹвде, мьн баwәр бькә, wәхтәке бе, кö һуне нә ль ви чʹийайи у нә жи ль Оршәлиме Баве бьһʹәбиньн» (Йуһʹәнна 4:21). Әw кʹöлфәт жь wе щабе гәләк әʹщебмайи бу, илаһи чьмки әw щаб жь мәрьве Щьһу бу! Ле гәло чьрʹа һʹәбандьн дь пʹарьстгәһа Оршәлимеда гәрәке бьһата һьлдане?

Иса бәрдәwам кьр: «Ле бәле wәхте бе, иди перʹа гьһиштийә жи, кö йед рʹаст дьһʹәбиньн wе бь рʹöһʹ у рʹастийе Баве бьһʹәбиньн, чьмки Бав йед аһа дьһʹәбиньн дьгәрʹә» (Йуһʹәнна 4:23). Нава Qьрʹнада, Щьһуйа һʹәсаб дькьрьн кö щийе лапә сәрәкә бона һʹәбандьне әw һәйә пʹарьстгәһа Оршәлиме. Әwана сале се щара дьчунә wедәре wәки Хwәдайе хwә Йаһоwарʹа qöрбана биньн (Дәркʹәтьн 23:14-17). Ле Иса гот wәки әw һʹәму тьшт wе бе гöһастьне, у «йед рʹаст» wе «бь рʹöһʹ у рʹастийе» бьһʹәбиньн у хьзмәт кьн.

Пʹарьстгәһа Щьһуйа сәр әʹрде бу у дьһатә дитьне. Ле рʹöһʹ у рʹасти найнә дитьн у нә жи щийед wанә сәр әʹрде һәйә. Бь wи щурʹәйи Иса шьровәкьр кö щийе һʹәбандьна рʹаст wе гьредайи нибә бь тьштед кö тен дитьн, мәсәлә Чʹийайе Гәризимева, пʹарьстгәһа Оршәлимева, у нә жи щийед пироз ә дьнва.

Wәʹде хәбәрдана тʹәви кʹöлфәта Самәри, Иса öса жи кʹьфш кьр кö «wәхте бе», чахе һʹәбандьна Хwәдерʹа wе бе гöһастьн. Ле әw йәк кʹәнге гәрәке бьһата сери? Wи чахи, гава Иса хwә кьрә qöрбан, у бь wе йәке щурʹе һʹәбандьна Щьһуйа, йа кö сәр һʹиме qануна Муса бу, да һьлдане (Рʹомайи 10:4). Иса öса жи гот кö әw wәхт «иди перʹа гьһиштийә». Иса дәрһәqа кʹижан wәхти дьгот? Әw дәрһәqа wи wәхти дьгот, чахе кö әwи шагьрте хwә ида тʹоп дькьр, кʹижан кö гәрәке гöһдарийа хwә бьдана кʹьфше һьндава тʹәмийа кö әwи гот: «Хwәде рʹöһʹ ә у йед кö wи дьһʹәбиньн жи гәрәке бь рʹöһʹ у рʹастийе wи бьһʹәбиньн» (Йуһʹәнна 4:24). Демәк чь те һʹәсабе бьһʹәбиньн бь рʹöһʹ у рʹастийе?

Чахе Иса дьгот дәрһәqа һʹәбандьна бь рʹöһʹ, әwи дьхwәст бьгота кö мәрьв гәрәке бь рʹебәрийа рʹöһʹе Хwәдейи пироз бьжи, кʹижан кö али мә дькә Ньвисаре фәʹм кьн (1 Корьнтʹи 2:9-12). Ле рʹастийа дәрһәqа кʹижани Иса дьгот, әw һәйә занәбуна рʹаст жь Кʹьтеба Пироз. Ләма жи һʹәбандьна мәйә сәр һʹиме Кʹьтеба Пироз у бь рʹебәрийа рʹöһʹе wийи пироз, wе Хwәде хwәш бе.

НЬҺЕРАНДЬНА РʹАСТ ЛЬ СӘР ПʹАРЬСТГӘҺА

Чаwа әм гәрәке бьньһерʹьн сәр чуйина пʹарьстгәһа бона һʹәбандьне? Чахе әм дьдьн һʹәсабе тʹәмийа Иса дәрһәqа wе йәке, кö шагьрте wи бь рʹöһʹ у рʹастийе гәрәке Хwәде бьһʹәбиньн, фәʹмдари йә кö һʹәбандьна пʹарьстгәһада у щийе пирозда бона Баве мәйи әʹзмана, пʹучʹ те һʹәсабе. Хенщи wе йәке жь Кʹьтеба Пироз әм педьһʹәсьн кö ча Хwәде дьньһерʹә сәр һʹәбандьна пʹута: «Жь пʹутпʹарьстийе бьрʹәвьн» у «хwә жь пʹутпʹарьстийе хwәй кьн» (1 Корьнтʹи 10:14; 1 Йуһʹәнна 5:21). Ләма жи хьзмәткʹаред Хwәде йед рʹаст сәре хwә бәр Хwәде данайньн ль wан щийа, кʹижан кö тенә һʹәсабе щийед пироз йан щийед бона һʹәбандьна пʹута.

Ле әw йәк найе һʹәсабе wәки Хәбәра Хwәде наһелә wәки щийе бона дöакьрьне, һинбуне, у дьшьрмишбуне һәбьн. Щийед бона щьвине кʹижан кö тʹәрбәт у хәмлә нә, лайиq ьн бона һинбуне у шеwьркьрьна тьштед рʹöһʹани. Öса жи һәла бьфькьрьн, һәгәр мәрьв кәвьр датиньн сәр мәзәле мәрьве хwәйи незик бона биранине, wе йәкеда тьштәки хьраб тʹöнә, öса нинә. Һьнәк әwе йәке дькьн, сәва бьдьнә кʹьфше кö мәрьвед хwәйи мьри бир накьн, у wана һʹьз дькьн. Ле һәрге щийе öса һʹәсаб кьн ча щийе пироз йан щийед кö сәре хwә бәр пʹута дайньн, бь wе йәке әме пешбәри хәбәра Иса бьчуна.

Ча те кʹьфше нәлазьм ә һәрʹьнә пʹарьстгәһа бь ве нете, кö тʹәне wедәре Хwәде wе һе зедә гöһ бьдә дöайед wә. У öса жи нәфькьрьн кö һәгәр һун рʹеwитийа дьреж бькьн у һәрʹьн пʹарьстгәһе, һәма бона хатьре wе йәке Хwәде wе жь wә рʹази бә у кʹәрәма бьдә wә. Кʹьтеба Пироз дьбежә wәки Йаһоwа Хwәде «Хöдане әʹрд у әʹзмен ә у пʹарьстгәһед бь дәста чекьрида наминә». Ле әw йәк мә жь Хwәде дур нахә. Әм дькарьн wирʹа дöа бькьн у дöайед мә ль һʹәму щийа wе бенә бьһистьн, чьмки «Хwәде жь мә һәр кәси нә дур ә» (Кʹаред Шандийа 17:24-27).