Бь Сәбьр Һивийе бә

1, 2. а) Чьрʹа әw пьрс: «Һʹәта кʹәнге?», бал мә жи дькарә пешда бе? б) Чьрʹа мәсәлед хьзмәткʹаред бәре йед амьн, мә дьлгәрм дькьн?

«ҺʹӘТА чь wәхти?» Әw пьрс пʹехәмбәред амьн Ишайа у Һәбаqуq дан (Иша. 6:11; Һәбq. 1:2). Чахе Даwьд Пʹадша Зәбура 13 ньвиси, wе зәбуреда әwи жи чар щара әw пьрс да: «Һʹәта кʹәнге?» (Зәб. 13:1, 2). Һәла һе Иса жи әw пьрс да чахе кʹәтә нав wан мәрьва баwәрийа кʹижана тʹöнә бу (Мәт. 17:17). Ләма әʹщебмайи нинә wәки щара бал мә жи әв пьрс пешда те.

² Ле чьрʹа бал мә жи дькарә әw пьрс пешда бе? Чьмки дьqәwьмә нәрʹастийе һьндава мәда бькьн. Йан дьбәкә әм әʹмьрда мәзьн ьн у нәхwәш дькʹәвьн. Йан жи дьбәкә әм дькʹәвьнә стресе, чьмки «зәманед» хьрабда дьжин (2 Тимтʹ. 3:1). Йан дьqәwьмә ньһерʹандьна хьраб йа мәрьвед дор бәре мә, мә бинтәнг дькьн у әʹщьз дькьн. Ле чь жи һәбә, әм гәләк дьлгәрм дьбьн чахе педьһʹәсьн кö хьзмәткʹаред Йаһоwайи бәре жи әw пьрс дьдан у Хwәде әwана сущдар нәдькьрьн сәва wе йәке.

3. Чь дькарә али мә бькә чахе әм дькʹәвьнә дәрәщед чәтьн?

³ Чь дькарә али мә бькә гава әм рʹасти дәрәщед чәтьн тен? Аqубе бьре Иса гот: «Хушк-бьрано, сәбьр кьн һʹәта һатьна Хöдан» (Аqуб 5:7). Бәле, мә һʹәмуйарʹа жи сәбьр лазьм ә. Ле чь те һʹәсабе сәбьр, у ча әм дькарьн әwи һʹöнöри бьдьнә кʹьфше?

ЧЬ ТЕ ҺʹӘСАБЕ СӘБЬР?

4, 5. а) Чь те һʹәсабе бь сәбьр бьн? б) Аqуб чь мәсәлә ани дәрһәqа сәбьре? (Бьньһерʹә шькле әʹwльн.)

⁴ Ль гора Кʹьтеба Пироз, сәбьр әw һәйә бәре рʹöһʹе пироз, ләма жи бей аликʹарийа Хwәде мәрьв нькарьн ча лазьм ә әwи һʹöнöри бьдьнә кʹьфше. Әм дькарьн бежьн, кö сәбьр әw пʹешкʹеш ә жь Хwәде. У чахе сәбьра мә һәйә, бь wе йәке әм һʹьзкьрьна хwә Хwәдерʹа нишан дькьн. Әм öса жи һʹьзкьрьне һьндава йед майин дьдьн кʹьфше, гава бь сәбьр ьн. Ле чахе әм бе сәбьр ьн, һʹьзкьрьн ортʹа мә у мәрьвед дьнда сьст дьбә (1 Корн. 13:4; Галт. 5:22). Сәбьр әw ә, кö wәʹде чәтьнайед гьран әм диса жи тәйах дькьн у шабуна хwә öнда накьн (Колс. 1:11; Аqуб 1:3, 4). Сәбьр öса жи әw ә, чахе әм һʹәйфе вәнакьн, ле тәйах дькьн, qәwи дьминьн у чь чәтьнайи рʹасти мә тен, йәкә әм сьст набьн. Хенщи ве йәке, Кʹьтеба Пироз мә һелан дькә, wәки бь дьл у щан qәбул кьн әве йәке кö лазьм ә һивийе бьн. Әв йәк рʹьнд те кʹьфше жь Аqуб 5:7, 8 (Бьхунә.)

⁵ Чьрʹа мәрʹа лазьм ә сәбьр бьн у һивийа Йаһоwа бьн? Аqуб дәрәща мә бәрамбәри щоткʹар дькә. Мәсәлә, щоткʹар зәʹф дьхәбьтә сәва зәвийе бьчинә, ле әw нькарә сәр һәwайе һʹöкöм кә, йан жи öса бькә wәки зәви зу шин бә. Әw нькарә wәʹдә ләз хә. Әw фәʹм дькә wәки гәрәке бь сәбьр һивийе бә сәва «бәре әʹрдейи бь qимәт» бьстинә. Дәрәща мә жи öса нә. Гәләк тьшт дәсте мәда нинә у лазьм ә әм һивийе бьн һʹәта Йаһоwа созед хwә бинә сери (Марq. 13:32, 33; Кʹар. Шанд. 1:7). Бәле, мина щоткʹар әм гәрәке бь сәбьр һивийе бьн.

6. Чьда әм дькарьн чʹәʹв бьдьнә Миха пʹехәмбәр?

⁶ Дәрәщед кö иро рʹасти мә тен, мина дәрәщед wәʹде Миха пʹехәмбәр ьн. Әwи wәʹде пʹадшатийа Аһазда дьжит, чахе һʹәму щурʹә корупсийа һәбу. Аһаз пʹадшаки гәләк зöлм бу. Щьмәʹте жи хwә хьрабийе дьгьрт у «кʹаре хьрабда» дәстед wан бь хирәт бу. (Бьхунә Миха 7:1-3.) Миха фәʹм дькьр кö әw пе qәwата хwә нькарә әwан дәрәщед хьраб бьгöһезә. Ле әwи чь дькарьбу бькьра? Әw дьбежә: «Ле әзе Йаһоwа бьгәрʹьм. Әзе һивийа Хwәде хьлазкʹаре хwә бьм. Хwәдайе мьн, wе мьн бьбьһе» (Мих. 7:7, ДТʹ). Әм жи мина Миха гәрәке бь сәбьр һивийе бьн.

7. Ча әм гәрәке һивийа созед Йаһоwа бьн?

⁷ Һәрге баwәрийа мә мина йа Миха йә, әме бь дьл у щан һивийа Йаһоwа бьн. Мәсәлә, гьртийе кәледа кʹижан кö һивийа рʹожа щәза хwә йә, бьхwазә нәхwазә гәрәке һивийа ве рʹоже бә, ле әw нә жи дьхwазә әв рʹож бе. Ле дәрәща мә öса нинә. Әм бь дьл у щан һивийа Йаһоwа нә, чьмки заньн кö әw wе wәʹдәда созе хwә бинә сери у жийина һʹәта-һʹәтайе бьдә мә! Ләма жи «бь думька дьреж» у бь шабуне сәбьр бькьн (Колс. 1:11, 12). Ле һәрге әм бесәбьр бьн у бькьнә кöтә-кöт кö чьрʹа Йаһоwа ләз накʹәвә, әw йәк wе wи хwәш нәйе (Колс. 3:12).

МӘРЬВЕД АМЬНӘ БӘРЕ, ЙЕД КÖ СӘБЬР ДЬКЬРЬН

8. Жь хьзмәткʹаред бәре әм чь дькарьн һин бьн?

⁸ Һәрге әм бьфькьрьн сәр мәсәлед хьзмәткʹаред бәре йед кö бь сәбьр һивийа созед Йаһоwа бун, әме жи һелан бьн бь дьл у щан һивийе бьн (Рʹом. 15:4). Wе керһати бә һәрге әм биньн бира хwә кö әwана чьqас wәʹдә һивийе бун, чьрʹа бь дьл у щан һивийе бун, у сәва сәбьра хwә wана чь кʹәрәм сьтандьн.

9, 10. Бьраһим у Сәра чьqас wәхт гәрәке һивийа Йаһоwа буна?

⁹ Биньн бира хwә сәрһатийа Бьраһим у Сәрайе. Әwана «бь баwәрийе у сәбьре созед Хwәде wар дьбун». Кʹьтеба Пироз дьбежә wәки «Бьраһим бь думька дьреж гьһиштә» wи сози, кö Йаһоwа wи кʹәрәм кьра у зöрʹәта wи ль һәв зедә кьра (Ибрн. 6:12, 15). Ле чьрʹа Бьраһим гәрәке сәбьр кьра у һивийе буйа? Чьмки wәʹдә лазьм бу сәва әв соз бьһата сери. Пәймана кö Йаһоwа тʹәви Бьраһим гьреда, дәстпебу бе сери 14 Нисане сала 1943-да Б.Д.М.. Ве рʹоже Бьраһим тʹәви Сәрайе у һʹәму мәрьвед кö мала wида дьман, Чʹәме Фәратрʹа дәрбаз бун у кʹәтьнә Әʹрде Создайи. Паше Бьраһим 25 сала һивийе бу һʹәта Исһаq жерʹа бу сала 1918-да Б.Д.М., у паше 60 сала һивийе бу һʹәта нәби жерʹа бун Әсаw у Аqуб (Ибрн. 11:9).

¹⁰ Ле Бьраһим чьqас әʹрд станд? Кʹьтеба Пироз дьбежә: «[Йаһоwа] wаргәһ нәда wи [Бьраһим] . . . , нә жи дәwса ньгәки, ле соз да кö ви wәлати чаwа мьлкʹ бьдә wи у пәй wирʹа жи бьдә зöрʹәта wи, гава кö һе зарʹед wи тʹöнәбун» (Кʹар. Шанд. 7:5). Паши 430 сала чахе Бьраһим Чʹәме Фәратрʹа дәрбаз бу, рʹькʹьнйата wи бу мьләт, кʹижан кö гәрәке wи әʹрди wар буйа (Дәркʹ. 12:40-42; Галт. 3:17).

11. Чьрʹа Бьраһим бь дьл һивийа Йаһоwа бу, у әw сәва сәбьра хwә wе чь кʹәрәма бьстинә?

¹¹ Бьраһим бь дьл һивийе бу у сәбьр дькьр, чьмки баwәрийа хwә Йаһоwа у созе wи дьани. (Бьхунә Ибрани 11:8-12.) Рʹаст ә Бьраһим бь тʹәмами пе чʹәʹве хwә нәдит әв соз ча һатә сери, йәкә әw бь шабуне сәбьр дькьр. Ле бьдьнә бәр чʹәʹве хwә чахе Бьраһим дьнйа тʹәзәда жь мьрьне рʹабә, әw wе чьqас ша бә. Әw wе әʹщебмайи бьминә кö Кʹьтеба Пирозда сәрһатийа wи у рʹькʹьнйата wи гәләк щийада һатийә ньвисаре.a Бьдьн бәр чʹәʹве хwә, әw wе ча зәндәгьрти бьминә гава пебьһʹәсә, кö әwи роләкә чьqас мәзьн листийә qьрара Хwәдеда дәрһәqа Мәсиһ! Бешьк, әw wе бьвинә кö чьqас һежа бу wәки һаqас wәхт сәбьр кьр у һивийе ма.

12, 13. Чьрʹа Усьврʹа сәбьр лазьм бу, у тәнгасийада әwи ча хwә да кʹьфше?

¹² Усьв нәбичʹьрке Бьраһим жи бь сәбьр бу. Усьврʹа гәләк хьраби кьрьн. Мәсәлә, чахе әw wәкә 17 сали бу, бьред wийи һʹәлал wи ча дил фьротьн. Паше, чахе әw Мьсьреда бу, шәрʹ авитьнә wи йанчь әwи хwәстийә тʹәви жьна ахайе хwә рʹазе у ләма wи кьрьнә кәле (Дәстп. 39:11-20; Зәб. 105:17, 18). Усьв мәрьвәки амьн у һʹәйф бу, ле те бежи әw дьһатә щәзакьрьне, нә кö кʹәрәмкьрьне. Ле паши 13 сала, һʹале wи ньшкева һатә гöһастьне. Wи жь кәле аза кьрьн, у әw бу сәрwере дöда Мьсьреда (Дәстп. 41:14, 37-43; Кʹар. Шанд. 7:9, 10).

¹³ Ле гәло жь бо wан нәһәqийа Усьв һатә гöһастьне у бу йәки зöлм? Гәло әwи итʹбарийа хwә һьндава Йаһоwа öнда кьр? Тʹö щар на. Ле чь али wи кьр кö бь сәбьр һивийе бә? Баwәрийа wи һьндава Йаһоwа али wи кьр. Әwи заньбу wәки Йаһоwа һаш жь һәр тьшти һәйә у һәр тьшт дәсте wида йә. Баwәрийа wи те кʹьфше жь wан гьлийа кö әwи бьред хwәрʹа гот: «Нәтьрсьн, чьма әз дәwса Хwәде дьгьрьм? Рʹаст ә һун һьндава мьнда хьраб фькьрин, ле Хwәде фькьри кö wе бькә qәнщи, wәки мина рʹожа ироин, әʹмьре гәләк мәрийа хwәй кә» (Дәстп. 50:19, 20). Бәле, Усьв фәʹм кьр wәки һежа бу әw һивийе бә.

14, 15. а) Әм жь сәбьра Даwьд чь һин дьбьн? б) Чь али Даwьд дькьр кö бь сәбьр һивийе бә?

¹⁴ Даwьд Пʹадша жи рʹасти гәләк нәһәqийа һат. Чахе Йаһоwа Даwьд бьжарт сәва әw ахьрийеда бьбә пʹадше Исраеле, әw һәла һе щаһьл бу. Ле Даwьд 15 сала һивийе бу һʹәта әw бьбуйа пʹадше бәрәка хwә (2 Сам. 2:3, 4). Һьнге, Пʹадша Шаwул пәй Даwьд кʹәт у дьхwәст wи бькöжә.b Ләма Даwьд ча хәриб дьжит, әw щара дьрʹәвийа wәлатед хәриб, щара жи бәрʹийеда шкәфтада дьма. Ле һәла һе паши мьрьна Шаwул жи, Даwьд wәкә 7 сала һивийе бу сәва пʹадшатийе бькә сәр тʹәмамийа Исраеле (2 Сам. 5:4, 5).

¹⁵ Ле чьрʹа Даwьд бь сәбьр һивийе бу? Щаба ве пьрсе әw хwәха зәбура хwәда дьдә, кʹидәре кö чар щара пьрсәкә öса дайә: «Һʹәта кʹәнге?» Әw дьбежә: «Мьн хwә спартийә амьнийа Тә, дьле мьне ша бә, бь хьлазкьрьна Тә. Әзе бьстьрем әшqи Хöданә, бона qәнщийа кö ль мьн кьрийә» (Зәб. 13:5, 6). Даwьд заньбу wәки Йаһоwа амьн ә у wи һʹьз дькә. Әw дьфькьри кö чаwа Йаһоwа али wи дькьр, у әw бь дьл һивийа хьлазкьрьна хwә бу. Бәле, Даwьд заньбу wәки әw бадиһәwа һивийе нинә.

16, 17. Йаһоwа Хwәде у Иса Мәсиһ ча сәбьра мәзьн данә кʹьфше?

¹⁶ Йаһоwа жь мә нахwазә тьштәки öса, чь кö әw хwәха накә. Әw хwәха гәләк сәбьр дькә, у ве йәкеда әwи мәрʹа мәсәла мәзьн һиштийә. (Бьхунә 2 Пәтрус 3:9.) Йаһоwа ида бь һʹәзара сала һивийе йә, һʹәта сафи бә әw шәрʹе кö Әдәнеда авитьнә wи. Әw бь сәбьр һивийа wи wәʹдәйи йә чахе наве wи бь тʹәмами бе пирозкьрьне. Гава әв wәʹдә бе, мәрьвед кö бь дьл һивийа wи нә, wе кʹәрәмед мәзьн бьстиньн (Иша. 30:18).

¹⁷ Иса жи сәбьр дькә у һивийе йә. Чахе әw сәр әʹрде бу, әw һʹәта мьрьне Йаһоwарʹа амьн ма, у сала 33 Д.М.-да әʹмьре хwә да qöрбан у чу ль әʹзмана. У паше әw һʹәта сала 1914 һивийе бу сәва пʹадшатийа хwә дәстпекә (Кʹар. Шанд. 2:33-35; Ибрн. 10:12, 13). Ле Иса ньһа жи һивийе йә һʹәта кö һʹәму дьжмьнед wи qьрʹ бьн паши хьлазийа Һʹәзарсалийа Пʹадшатийа wи (1 Корн. 15:25). Рʹаст ә әw wәʹдәки кьн нинә сәва һивийе бә, ле әw йәк wе кʹәрәмед мәзьн бинә.

ЧЬ WЕ АЛИ МӘ БЬКӘ СӘБЬР КЬН?

18, 19. Чь wе али мә бькә бь сәбьр һивийе бьн?

¹⁸ Бешьк, әм жи гәрәке сәбьр кьн у бь дьл у щан һивийе бьн. Ле ве йәкеда wе чь али мә бькә? Хwәдерʹа дöа бькьн, wәки рʹöһʹе хwәйи пироз бьдә wә, чьмки сәбьр жи бәре рʹöһʹе пироз ә (Әфәс. 3:16; 6:18; 1 Тʹеслн. 5:17-19). Жь Йаһоwа һиви кьн сәва али wә бькә кö һун сәбьр кьн у qәwи бьминьн.

¹⁹ Биньн бира хwә кö чь али Бьраһим, Усьв, у Даwьд кьр, кö әwана бь сәбьр һивийа созед Йаһоwа бун. Баwәри у итʹбарийа һьндава Йаһоwа али wан кьр. Әwана нәдькʹәтьнә һʹәйра хwә у хwәстьнед хwә. Һәрге әм бьфькьрьн кö сәбьра wан ча һатә кʹәрәмкьрьне, әме һелан бьн кö мина wан бь сәбьр һивийе бьн.

20. Әм гәрәке бьхwазьн бь дьл чь бькьн?

²⁰ Һәрге жи әм ньһа рʹасти тәнгасийа у щерʹьбандьна тен, йәкә әм бь дьл у щан һивийа Хwәде нә. Дьбәкә щара әм жи жь кʹәсәра дьле хwә дьбежьн: «Һʹәта кʹәнге йа Йаһоwа?» (Иша. 6:11). Ле бь аликʹарийа qәwата Хwәде, демәк рʹöһʹе пироз, һәр кәс жь мә дькарә чʹәʹв бьдә Йерәмйа пʹехәмбәр йе кö гот: «Пʹара мьн Хöдан ә; жь бәр вейа әз һевийа хwә бь wива гьре дьдьм» (Лур. Йерәм. 3:21, 24).