СӘРҺАТИ
Чахе Әм Хwәстьна Йаһоwа Тиньн Сери, Әм Кʹәрәма Дьстиньн
«Әм qайил ьн!». Әв гьли мьн мере мьн, бьре мьн у жьна wи тʹәвайи гот чахе мә щабдарийа тʹәзә станд. Ле гәло чьрʹа мә әв щабдари qәбул кьр, у Йаһоwа бона ве йәке ча әм кʹәрәм кьрьн? Пешийе wәрә әз дәрһәqа бьчʹуктайа хwә wәрʹа гьли кьм.
ӘЗ Сала 1923-да шәһәре Һемсwортеда (Инглистан) һатьмә буйине. Бьре мьн жь мьн мәстьр бу, наве wи Боб бу. Баве мьн дöрʹути религийада дьдит, у әw йәк бәр чʹәʹве wи рʹәш бу. Чахе әз wәкә 9 сали бум, чәнд кʹьтеб кʹәтьнә дәстед wи кʹижана кö qәлптийа религийа әшкәрә дькьрьн. Әwи чь кö хwәнд, гәләк дьле wи гьрт. Чәнд сал дәрбаз бун, у кәсәки дәре мала мә хьст. Әв Боб Аткинсон бу, әwи пе фонографе готара ньвисанди йа Рутерфорд бьра мәрʹа вехьст. Мә фәʹм кьр кö әw йәк жь wе кʹоме йә, кʹижани әв кʹьтеб дәрхьстьнә йед кö баве мьн хwәнд! Де-баве мьн Аткинсонрʹа готьн, wәки әw һәр евар тʹәви мә шиве бьхwә у щаба гәләк пьрсед мә бьдә, кʹижан кö Кʹьтеба Пирозва гьредайи бун. Әwи әм тʹәглифи щьвине кьрьн кö мала бьраки мәда дәрбаз дьбу, у чәнд километра жь мә дур бу. Әм дәрберʹа qайил бун. Wәʹдә шунда Һемсwортеда щьватәкә бьчʹук саз бу. Зутьрәке бәрпьрсийаре мьһале һатә щьвата мә, у мә wи тʹәглиф кьр кö мала мәда бьминә. Мә öса жи пешәнгед кö незики мә дьжитьн, тʹәглифи сәр нанхwарьне дькьр. Хәбәрдана тʹәви wан гәләк баш сәр мьн һʹöкöм бу.
Һьнге малбәта мә бизнесәк дәстпекьр, ле баве мьн бьре мьнрʹа гот: «Һәрге тö дьхwази бьби пешәнг, әме wи шьхöли бьһельн». Боб qайил бу, у әw 21 салийа хwәда жь мал чу у пешәнгти дәстпекьр. Дö сал шунда, чахе әз 16 сали бум, әз һатьмә кʹьфшкьрьне ча пешәнг. Шәми у Ләʹде мьн тʹәви хушк-бьра хьзмәт дькьр, ле рʹожед дьн һʹәчʹи зәʹф мьн тʹәне хьзмәт дькьр пе бәлге шәʹдәтикьрьне у фонографе. Йаһоwа әз кʹәрәм кьрьм, у мьн тʹәви жьнькәке һинбуна Кʹьтеба Пироз дәстпекьр. Әw рʹöһʹанида гәләк зу пешда дьчу. Гәләк жь нәфәред wе жи ахьрийеда һатьнә нава рʹастийе. Паши саләке, әз тʹәви Мери Һеншел ча пешәнге мәхсус һатьмә кʹьфшкьрьне шарьстана Чеширеда.
Һьнге Шәрʹе Һʹәмдьнйайе йе II дьчу, у жьнарʹа фәрман дьдан, кö бона шәрʹ аликʹарийе бьдьн. Хьзмәткʹаред рʹелигийед дьн аза дькьрьн жь ве йәке, у ләма әм дьфькьрин кö wе мә жи аза кьн, чьмки әм хьзмәткʹаред һәртʹьм бун. Ле диwан qайил нәбу кö мә аза кьн, ләма сәр мәһәке әз кьрьмә кәле. Саләк шунда, чахе әз ида бумә 19 сали, дö щара мьн данә диwане, чьмки мьн пьштгьрийа шәрʹ нәдькьр, ле диwане әз һәрдö щара жи аза кьрьм. Wан дәрәщада, мьн фәʹм кьр кö рʹöһʹе пироз али мьн дькьр у кö Йаһоwа дәсте мьн дьгьрт, мьн qәwи дькьр у дьшьданд (Иша. 41:10, 13).
ҺӘВАЛХЬЗМӘТКʹАРЕ ТʹӘЗӘ
Мьн у Артур Метйус сала 1946-да һәв нас кьр. Әw се мәһа кәледа бу чьмки нәчу шәрʹ, у паши ве йәке әw чу Һемсwорте бал бьре хwә Денис, йе кö пешәнге мәхсус бу, сәва тʹәви wи хьзмәт кә. Әwана бьчʹуктайеда жь баве хwә дәрһәqа Йаһоwа пеһʹәсийабун, у чахе Артур 17 сали бу әw һатә ньхöмандьне, ле Денис 16 сали. Wәʹдә шунда Денис һатә кʹьфшкьрьне Ирләндеда, у Артур бе һәвалхьзмәткʹар ма. Де-баве мьн әʹщебмайи дьман кö әw гәде щаһьл ча мәʹрифәт ә у ча бь дьл у щан хьзмәт дькә. Ләма wана әw тʹәглиф кьрьн, сәва мала мәда бьминә. Чахе мьн тʹәсәлийа де-баве хwә дькьр, паши нанхwарьне мьн у Артур фьраq дьшуштьн. Ахьрийеда мә дәстпекьр һәврʹа бьньвисьн. Сала 1948, Артур диса сәр 3 мәһа кʹәтә кәле. Сала 1949-да мәһа Чьләйе мә һәв станд. Нета мә әw бу кö хьзмәтийа һәртʹьм нәһельн. Wәʹде һесабуне әм дьхәбьтин, мә емиш тʹоп дькьр. Мә пʹәре хwә бь аqьлайи хәрщ дькьр у пе кʹәрәма Йаһоwа мә хьзмәтийа хwә нәһишт.
Һемсwортеда, һьнә wәʹдә шунда паши зәwаща мә (сала 1949)
Wәкә саләк шунда, әм һатьнә кʹьфшкьрьне ль Ирләнда Бакʹуре, пешийе шәһәре Армайеда, у паше шәһәре Нийурийеда. Һәрдö шәһәрада жи мәрьв һʹәчʹи зәʹф Католик ьн. Wан щийада рʹелигийед дьн һʹьз нәдькьрьн, у ләма мә wедәре гәләк фәсал у бь сәрwахти хьзмәт дькьр. Щьвин дәрбаз дьбун мала хушк-бьраки мә кö жьн-мер ьн. Мала wана жь мала мә 16 километр дур бу. Wәкә 8 мәрьв дьһатьнә щьвине. Щара әм мала wанда шәв дьман, у сәр пола рʹадьзан. Паше шәбәqе wана тәʹштекә мәзьн мәрʹа датанин у мә тʹәвайи дьхwар. Әз гәләк ша мә кö ньһа ль wедәре гәләк Шәʹдә һәнә.
«ӘМ QАЙИЛ ЬН!»
Бьре мьн у жьна wи Лоти, Ирләнда Бакʹуреда ида ча пешәнгед мәхсус хьзмәт дькьрьн, у сала 1952-да әм һәр чар чунә Бәлфасте сәр щьвата мәзьн. Бьраки мә бь дьл у щан әм тʹәви Прис Һйус кʹижан кö һьнге хьзмәткʹаре филиала Британйайе бу, тʹәглифи мала хwә кьрьн. Еварәке мә тʹәвайи шеwьр дькьр дәрһәqа буклета тʹәзә бь наве «Рʹийа Хwәде Һʹьзкьрьн ә» (God’s Way Is Lovе). Әв буклет һатә дәрхьстьне илаһи бона мәрьвед Ирләнде. Һйус бьра гьли дькьр кö ча чәтьн ә дьле мәрьвед Католик бькʹьрʹьн, йед кö Ирләндайеда дьжин. Кʹидәре бьра дьман, жь wан мала бәри wан дьдан у кʹәшиша нав щьмәʹте дьдан wәки мьqабьли хушк-бьред мә дәрен. Прис гот: «Мәрʹа жьн у мер лазьм ьн, автойед кʹижана кö һәнә, сәва нав тʹәмамийа wәлат кампанийа мәхсусда кʹар бькьн, демәк буклета бәла кьн».a Мә ча әв йәк бьһист, дәрберʹа мә гот: «Әм qайил ьн!». Әв гьли wә хwәнд дәстпека сәрһатийа мьнда.
Тʹәви пешәнга сәр моторсиклета баркʹеш
Дöблинеда һәбу хушкәкә амьн кö гәләк сала нава рʹастийеда бу, у тʹьме һазьр бу кö пешәнг мала wеда бьминьн. Наве wе Ма Рутланд бу. Мә һьнә һур-муре хwә фьрот у һьнә wәʹдә мала wе хушкеда ман. Паше әм һәр чар пе моторсиклета баркʹеш йа Боб, чун авто бьгәрʹьн. Мә автокә хәбьтанди дит у кʹьрʹин. Ле жь мә тʹö кәси нькарьбу бажота, ләма мә жь хwәйе авте һиви кьр у әwи мәрʹа авто ани. Ве еваре Артур сәр ньвина рʹуньштьбу у дьда бәр чʹәʹве хwә кö йанчь автойе дажо. Шәбәqа дьн чахе әwи дьхwәст авто жь гараже дәрхьста, мисйонерәк бь наве Милдред Wилет һатә бал мә (ахьрийеда әw бу жьна Щон Бар). Әwе ажотьн заньбу! Әwе мә һин кьр кö чаwа авте бажон, у әм ида һазьр бун кö һәрʹьн!
Авта мә у траилер
Паше мә хwәрʹа щи дьгәрʹийа сәва бьминьн. Мәрʹа готьн кö фәсал бьн сәва траилереда бьжин, чьмки мәрьвед мьqабьл дькарьн траилере бьшәwьтиньн. Ләма мә хwәрʹа мал дьгәрʹийа, ле мә qә маләк жи нәдит. Ве шәве әм һәр чар автеда рʹазан. Рʹожа дьн, мә тʹәне траилерәкә бьчʹук дит кʹидәреда ньвине дöqәти һәбу. Әв траилер бу мала мә. Әʹщеб ә, ле qә чәтьнайед мә сәва ве траилере тʹöнә бун, чьмки мә әw дьда сәкьнандьне кʹарханед wан мәрьвада йед кö гәләк һʹәйф бун. Мә 16 һʹәта 24 километьр дур хьзмәт дькьр. Чахе мә ида щики дьн траилера хwә дьда сәкьнандьне, әм диса вәдьгәрʹийанә щийе пешийе сәва мәрьвед wедәрерʹа мьзгинийе гьли кьн.
Мә тʹәсәлийа һʹәму мала кьр кö Ирләнда алийе башур-рʹоһьлатеда бун, у дькарьн бежьн чәтьнайед мә гәләк һьндьк бун. Мә 20 000 буклет бәла кьр у мә филиала Британийерʹа ньвиси һʹәму навед wан мәрьва, кʹера мьзгини һʹәwас бу. Әw кʹәрәмәкә мәзьн ә кö ньһа wедәре бь сәда Шәʹдед Йаһоwа һәнә.
ВӘДЬГӘРʹЬНӘ ИНГЛИСТАНЕ, ПАШЕ СКОТЛӘНДАЙЕ
Wәʹдә шунда әм һатьнә кʹьфшкьрьне Лондона башуреда. Чәнд һʹәфти дәрбаз бун, жь филиала Британйайе Артуррʹа тʹелехьстьн у готьн һәла әw дькарә рʹожа дьн дәстпекә шьхöле бәрпьрсийартийе бькә. Бона wи шьхöли, әм һʹәфтеки һатьнә һинкьрьне, у паше әм чунә Скотләндайеда сәва бәрпьрсийартийе бькьн. Wәʹде Артур һьндьк бу кö готаред хwә һазьр кә, ле әw һазьр бу хьзмәтийеда һәр тьшти бькә, һәрге жи әw йәк чәтьн бә. Мәсәла wи гәләк әз дьшьдандьм. Мә гәләк һʹьз кьр ве кʹьфшкьрьнеда хьзмәт кьн. Пешийа ве кʹьфшкьрьне, мә чәнд сала хьзмәт дькьр щурʹә-щурʹә щийада, ле шьхöле бәрпьрсийартийеда кʹәрәм бу кö әм нава гәләк хушк-бьрада бун.
Сала 1962-да Артур тʹәглифкьрьн станд кö һәрʹә Мәкʹтәба Гиләд, кʹижан кö дәһә мәһа дәрбаз дьбу. Әв сафикьрьн нәһеса бу. Әз нькарьбум тʹәви wи бьчума, чьмки әз нәһатьбумә тʹәглифкьрьне, ле мә сафи кьр кö wе рʹаст бә һәрге Артур һәрʹә. Әз бе һәвалхьзмәткʹар мам, ләма диса әз шандьмә Һемсwорте кö чаwа пешәнге мәхсус хьзмәт кьм. Саләк шунда чахе Артур вәгәрʹийа, wи ча бәрпьрсийаре нәһийе кʹьфш кьрьн у әм щабдар бун бона Скотләнда, Инглистана бакʹуре у Ирләнда Бакʹуре.
КʹЬФШКЬРЬНА ТʹӘЗӘ ИРЛӘНДЕДА
Сала 1964-да, Артур Ирләндеда ча хьзмәткʹаре филиале кʹьфш кьрьн. Мьн гәләк һʹьз дькьр хьзмәтийа бәрпьрсийарти, ләма әз һьнәки бәрхwә дькʹәтьм дәрһәqа хьзмәтийа Бәйтʹәледа. Ле мьн заньбу кö һәрге әз qәбул кьм ве кʹьфшкьрьне йа кö дьле мьн найе, Йаһоwа wе әʹсә мә кʹәрәм кә. Бәйтʹәледа мьн щурʹә-щурʹә шьхöл дькьр, мәсәлә шьхöле офиси, пʹечʹандьна әʹдәбйәта, хwарьнчекьрьн, у һәвдан. Щара мә öса жи шьхöле бәрпьрсийаре нәһийе жи дькьр, у öса нав тʹәмамийа wәлат әм рʹасти гәләк хушк-бьра дьһатьн. Әwе йәке у рʹöһʹанида пешдачуйина wан мәрьва йед кö Кʹьтеба Пироз һин дьбун, һәләqәтийа ортʹа хушк-бьред Ирләндеда qәwи кьр. Әw рʹасти жи кʹәрәм ә!
QӘWЬМАНДЬНӘКӘ МӘХСУС БОНА ШӘʹДЕД ЙАҺОWА
Щара пешийе Дöблинеда сала 1965-да щьвата мәзьнә һʹәмдьнйайе дәрбаз бу.b Рʹаст ә гәләк чәтьнайи һәбун, ле йәкә щьвата мәзьн гәләк рʹьнд дәрбаз бу. Бь тʹәмами 3 948 мәрьв һатьн у 65 һатьнә ньхöмандьне. Хwәйед wан мала, кʹижанада 3 500 хушк-бьред мәйә жь щурʹә-щурʹә wәлата мабун, нәʹмәке рʹазибуне стандьн. Ле хwәйед мале гәләк пʹайе хушк-бьра дьдан бона рʹабун-рʹуньштьна wанә баш. Әwе йәке бона Ирләнде кʹарәкә мәзьн ани.
Артур Нейтан Нор сьлав дькә чахе те сәр щьвата мәзьн (сала 1965)
Артур әʹлам дькә дәрһәqа дәрхьстьна кʹьтеба «Сәрһатийед Кʹьтеба Пироз» сәр зьмане Гаелик (сала 1983)
Сала 1966 Ирләнда бакʹуре у башуре кʹәтьнә бьн рʹебәрийа филиала Дöблине. Әw йәкти гәләк мәхсус бу, чьмки ве гьраведа мәрьв сәва политике йан жи религийа һәврʹа дькʹәтьнә шәрʹ-дәʹwа. Әм гәләк ша дьбун кö гәләка йед кö бәре Католик бун, һатьнә нава рʹастийе у хьзмәт дькьрьн тʹәви wан хушк-бьра кö бәре Протестант бун.
ГÖҺАСТЬНА МӘЗЬН У КʹЬФШКЬРЬНА ТʹӘЗӘ
Сала 2011-да әʹмьре мә бь тʹәмами һатә гöһастьне, чахе филиала Британийе у Ирләндайе, бунә йәк у әм һатьнә кʹьфшкьрьне Бәйтʹәла Лондонеда. Һьнге әз гәләк бәрхwә дькʹәтьм бона сьһʹәт-qәwата Артур. Нәхwәшийа wи һәбу бь наве Паркинсон. Сәд һʹәйф, малхе мьн 20 Гöлане сала 2015 мьр.
Паши мьрьна wи, әз гәләк дьлшкәсти бум, депресийа мьн һәбу у дьлтәнг бум. Артур тʹьме кʹеләка мьн бу, әз гәләк бира wи дькьм! Ле wан тәнгасийада, әз һе незики Йаһоwа бум. Дьле мьн гәрм дьбә чахе әз педьһʹәсьм кö чьqас wи һʹьз дькьрьн. Мьн нәʹмәк станд жь хушк-бьред Ирләнде, Британйайе, у һәла һе Дәwләтед Йәкбуйи жи. Әв нәʹмәк, у öса жи бәрдьлийа Денисе бьре Артур, жьна wи Мавис у qизед бьре мьни мәзьн Рут у Щуди, öса али мьн кьрьн кö әз нә жи дькарьм пе гьлийа бежьм.
Рʹезәк жь Кʹьтеба Пироз кö гәләк али мьн кьр, әв һәйә Ишайа 30:18. Ль wедәре те готьне: «Йаһоwа бь сәбьр һивийе йә, wәки qәбулкьрьна хwә wәрʹа нишан кә, у әw wе рʹабә сәва кö рʹәʹма хwә wәрʹа бьдә кʹьфше. Чьмки Йаһоwа Хwәдейе һәqийе йә. Һʹәмушк кö һивийа wи нә бәхтәwар ьн», (ДТʹ). Әв гьли гәләк дьле мьн рʹьһʹәт дькьн кö Йаһоwа бь сәбьр һивийе йә, wәки һʹәму чәтьнайед мә кʹöта кә у дьнйа тʹәзәда шьхöлед öса бьдә мә кö әм ләзәте бьвиньн.
Гава әз дьфькьрьм сәр жийина мә, әз дьвиньм кö Ирләндеда Йаһоwа ча рʹебәрийа шьхöле мьзгинийе кьр у ча әw шьхöл кʹәрәм кьр! Әw бона мьн qәдьрәки мәзьн ә кö мьн жи wи шьхöлида кʹар кьр. Бәле, бешьк чахе әм хwәстьна Йаһоwа тиньн сери, әм кʹәрәма дьстиньн.
a Бьньһерʹьн кʹьтеба «Һәрсали» йа сала 1988, рʹупʹ. 101-102.
b Бьньһерʹьн кʹьтеба «Һәрсали» йа сала 1988, рʹупʹ. 109-112.