«Әз Хwәдеда Баwәр ьм»

1-3. а) Баwәрийа мәда чь дькʹәвә нава һинкьрьнед сәрәкә? б) Чьрʹа баwәри һьндава рʹабуна мьрийа гәләк фәрз ә? (Бьньһерʹә шькле әʹwльн.)

ҺӘРГЕ кәсәк wә бьпьрсә: «Баwәрийа wәда һинкьрьнед сәрәкә кʹижан ьн?», һуне ча щаба хwә бьдьн? Һуне әʹсә бежьн кö һун баwәр дькьн, wәки Йаһоwа йә Әʹфьрандар у Жийиндар. Öса жи дьqәwьмә һун бежьн кö һун Иса Мәсиһ баwәр дькьн, йе кö бу qöрбан у кʹьрʹин. Һьн жи дьбәкә һун бь шабуне бежьн кö һун баwәр дькьн, wәки әʹрд wе бьбә щьнәт, кʹидәре кö щьмәʹта Хwәде wе һʹәта-һʹәтайе бьжи. Ле гәло һуне ве йәке жи бежьн, wәки һинкьрьнәкә wәйә сәрәкә әw ә, кö рʹабуна мьрийа wе һәбә?

² Һәрге жи әм дьфькьрьн кö сахкьрьн мәрʹа wе нәлазьм бә, чьмки тәнгасийа мәзьнда әме хьлаз бьн у бьжин һʹәта-һʹәтайе, йәкә созе дәрһәqа рʹабуна мьрийа бона мә һинкьрьнәкә сәрәкә йә. Паwлосе шанди шьровәкьр кö чьрʹа баwәри һьндава рʹабуна мьрийа гәләк фәрз ә, әwи гот: «Һәгәр рʹабуна мьрийа тʹöнә, кö öса йә Мәсиһ жи жь мьрьне рʹанәбуйә». Бәле, һәрге Мәсиһ жь мьрьне рʹанәбуйа, әw wе сәр әʹзмана нәбуйа Пʹадша, у һьн жи әм дәрһәqа сәрwертийа wи чь кö мәрьва һин дькьн, wе бош-бәтал буйа. (Бьхунә 1 Корьнтʹи 15:12-19.) Ле әм заньн кö Иса жь мьрьне рʹабуйә. Әм мина Садуqийа ниньн, йед кö баwәр нәдькьрьн, wәки мьри дькарьн рʹабьн. Һәрге жи qәрфа мә дькьн, йәкә баwәрийа мә кö Хwәде дькарә мьрийа рʹакә, qәwи дьминә (Марq. 12:18; Кʹар. Шанд. 4:2, 3; 17:32; 23:6-8).

³ Чахе Паwлос ньвиси дәрһәqа «һинбунед пешьнә сәр Мәсиһ», әwи гот кö «һинбуна сәр . . . рʹабуна мьрийа» дькʹәвә нава һинбунед пешьн (Ибрн. 6:1, 2). Гава Паwлос дәрһәqа рʹабуна мьрийа дьгот, әwи нишан кьр кö әw хwәха әве йәке баwәр дькә (Кʹар. Шанд. 24:10, 15, 24, 25). Рʹаст ә әw һинкьрьна сәрәкә йә у йәк жь «готьнед Хwәде дәрсед пешьнә садә» йә, йәкә әм гәрәке әве һинкьрьне кʹур леколин бькьн (Ибрн. 5:12). Гәло чьрʹа?

4. Кʹижан пьрс дәрһәqа рʹабуна мьрийа дькарьн пешда бен?

⁴ Чахе мәрьв дәстпедькьн Кʹьтеба Пироз һин бьн, әwана сәрһатийед дәрһәqа рʹабуна мьрийа дьхуньн, бәʹса хәбәре чахе Лазар жь мьрьне рʹабу. Әw мәрьв öса жи педьһʹәсьн кö Бьраһим, Ибо, у Данийел, баwәр бун кö ахьрийеда рʹабуна мьрийа wе һәбә. Созе дәрһәqа рʹабуна мьрийа, гәләк сал пешда һатийә дайине. Ле һәрге кәсәк жь wә бьпьрсә, кö Кʹьтеба Пирозда чь избаткьрьн һәнә, wәки әw йәк wе әʹсә бе сери, һуне ча щаба хwә бьдьн? Гәло Кʹьтеба Пирозда те готьне, wәки рʹабуна мьрийа wе кʹәнге бьбә? Әме щаба wан пьрса шеwьр кьн у әw йәк wе али мә бькә wәки баwәрийа хwә qәwи кьн.

ПʹЕХӘМБӘРТИ ДӘРҺӘQА РʹАБУНА ЖЬ МЬРЬНЕ КÖ ПАШИ QЬРʹНА ҺАТӘ СЕРИ

5. Пешийе әме дәрһәqа чь шеwьр кьн?

⁵ Һеса йә бьдьнә бәр чʹәʹве хwә, wәки мәрьве тʹәзә мьри, жь мьрьне рʹабә (Йуһʹн. 11:11; Кʹар. Шанд. 20:9, 10). Ле гәло әм дькарьн баwәрийа хwә wи сози биньн кö бь qьрʹна пешда һатийә дайине, wәки ахьрийеда мьри wе рʹабьн? Һун дькарьн итʹбарийа хwә wи сози биньн, wәки мьрийед кö qьрʹна пешда мьрьнә, wе рʹабьн? Бь сәда сала пешда дәрһәqа мәрьвәки һатә пʹехәмбәртикьрьне, кö әw wе жь мьрьне рʹабә, у бь рʹастийе һун баwәр дькьн кö әw жь мьрьне рʹабу. Ле гәло чьрʹа әм ве йәке дькарьн бежьн? У рʹабуна wи ча гьредайи йә тʹәви баwәрийа мә, кö ахьрийеда мьри wе рʹабьн?

6. Чаwа гьлийед жь Зәбур 118 гьредайи нә тʹәви Иса?

⁶ Wәрә шеwьр кьн пʹехәмбәртийа дәрһәqа рʹабуна мьрики, кʹижан кö гәләк сала пешда һатийә пʹехәмбәртикьрьне. Дина хwә бьдьнә гьлийед жь Зәбур 118, кʹижан кö дьqәwьмә Даwьд ньвисийә. Wедәре те готьне: «Һәwар Хöдан, мә хьлаз кә! . . . Бьмбарәк ә әwе кö бь наве Хöдан те!». Дьбәкә ньһа дькʹәвә бира wә чахе әwан гьлийед пʹехәмбәртийа дәрһәqа Мәсиһ, щьмәʹт бь дәнге бьльнд дьгот, чахе 9 Нисане Иса сийар кʹәтә Оршәлиме (Зәб. 118:25, 26; Мәт. 21:7-9). Ле гәло ча Зәбур 118 дьда кʹьфше, wәки паши гәләк сала гәрәке Мәсиһ жь мьрьне рʹабә? Дина хwә бьдьне кö диса әw зәбур чь пʹехәмбәрти кьр: «Әw кәвьре кö һоста тʹәхсир кьр, әw бу сәре әʹнишке» (Зәб. 118:22).

7. Чаwа сәрwеред Щьһуйа Иса инкʹар кьрьн?

⁷ «Һоста», йед кö Иса Мәсиһ инкʹар кьрьн, сәрwеред дине Щьһуйа бун. Wана нә тʹәне пьшта хwә данә Иса у чаwа Мәсиһ wи qәбул нәкьрьн, ле гәләк жь wана хwәстьн кö wи бьдьнә кöштьне (Луqа 23:18-23). Бәле, wана öса кьр wәки Иса бе кöштьне.

8. ЧаwаИса дькарьбу бьбуйа «сәре әʹнишке»?

⁸ Һәрге Иса qәбул нәкьрьн у кöштьн, гәло әw wе ча бькарьбуйа бьбә «сәре әʹнишке»? Әw дькарьбу бьбуйа тʹәне һьнге, һәрге әw жь мьрьне рʹабуйа. Иса хwәха дәрһәqа wе йәке шьровәкьр чахе гьли кьр мәтʹәлока дәрһәqа хwәйе рʹәз. Мәтʹәлокеда Иса гот кö хwәйе рʹәз хöламед хwә дьшандьн бал рʹәзвана, ле wана әw хöлам qәбул нәкьрьн. Паше хwәйе рʹәз кöрʹе хwәйи дәлал шандә бал wан, ле wана әw жи qәбул нәкьрьн у кöштьн. Мина wе йәке Хwәде жи чахе пʹехәмбәред хwә дьшандә бал Исраелийа, wана пьшта хwә дьданә wан пʹехәмбәра. Ахьрийеда Хwәде кöрʹе хwәйи тайе тʹәне шандә бал wан, демәк Мәсиһ, ле wана әw кöштьн. Паше чахе Иса әw мәтʹәлок гьли кьр, әwи пʹехәмбәрти жь Зәбур 118:22 wәкʹьланд (Луqа 20:9-17). Пәтрусе шанди жи әw рʹез да хәбате чахе хәбәр дьда тʹәви «сәрwер, рʹуспи у qанунзан», йед кö Оршәлимеда тʹоп бьбун. Әwи wанрʹа гот «Иса Мәсиһе Ньсрәте . . . , әwе кö wә сәр стуне дардакьр, ле Хwәде wи жь мьрьне рʹакьр», ДТʹ. Паши wан гьлийа Пәтрус гот: «Әw ә ‹әw кәвьре кö жь wә һоста һатә берʹумәткьрьне у бу сәре әʹнишке›» (Кʹар. Шанд. 3:15; 4:5-11; 1 Пәт. 2:5-7).

9. Зәбур 118:22-да кʹижан qәwьмандьна мәхсус һатә пʹехәмбәртикьрьне?

⁹ Бәле, бь сәда сала пешда Зәбура 118:22-да һатьбу пʹехәмбәртикьрьне, wәки Мәсиһ гәрәке жь мьрьне рʹабуйа. Wи qәбул нәкьрьн у кöштьн, ле әw гәрәке жь мьрьне рʹабуйа, сәва кö бьбә сәре әʹнишке. Иса кö жь мьрьне рʹабу, бу әw Кәс, кʹижан нав мәрьвада навәки öса жерʹа һатә дайине, кö «әм бькарьбьн бь wи хьлаз бьн» (Кʹар. Шанд. 4:12; Әфәс. 1:20).

10. а) Зәбура 16:10-да чь һатә пʹехәмбәртикьрьне? б) Чьрʹа әм дöдьли ниньн кö Зәбур 16:10, сәр Даwьд нәһатә сери?

¹⁰ Wәрә шеwьр кьн рʹезәкә дьн, кʹидәре кö һатә готьне дәрһәqа рʹабуна мьрики. Әw пʹехәмбәрти һатә ньвисаре һʹәзара сал пешда, у паше һатә сери. Әw избаткьрьн гәрәке баwәрийа wә һе qәwи кә һьндава созе кö гәләк сала пешда һатийә дайине, демәк кö wе рʹабуна мьрийа һәбә. Зәбура 16-да Даwьд ньвиси: «Те дийаре мьрийада мьн нәһели, нә жи бьһели амьне тә горʹьстен бьбинә» (Зәб. 16:10). Бь wан гьлийа Даwьд нәдьхwәст бьгота кö әw wе тʹö щар нәмьрә йан жи тʹö щар нәкʹәвә горʹе. Хәбәра Хwәде зәлал дьбежә кö Даwьд кал бу, у чахе әw мьр, «бь бапиред хwәрʹа рʹакʹәт у ль бажаре һатә бьнәʹрд кьрьн [чʹәʹлкьрьне]» (1 Пʹадш. 2:1, 10). Һәрге Даwьд мьр у һатә чʹәʹлкьрьне, wәки öса нә әв рʹез дәрһәqа кʹе йә?

11. Кʹәнге Пәтрус шьровәкьр Зәбур 16:10?

¹¹ Һʹәзар сал зедәтьр дәрбаз бу паши ньвисандьна ве зәбуре, кʹижан кö Даwьд ньвиси, у Пәтрус шьровәкьр кö Зәбура 16:10-да дәрһәqа кʹе дьһатә готьне. Һьнә wәʹдә шунда паши рʹабуна Иса жь мьрьне, Пәтрус тʹәви бь һʹәзара Щьһуйа у прозелита хәбәр дьда. (Бьхунә Кʹаред Шандийа 2:29-32.) Әwи готә wан, wәки Даwьд бь рʹастийе мьрьбу у wи чʹәʹл кьрьбун. Әwед кö гöһе хwә дабунә Пәтрус, һаш wе йәке һәбун. Öса жи чахе Пәтрус гот wәки Даwьд «әв йәк һе пешда дит у бона рʹабуна Мәсиһ гот», Кʹьтеба Пирозда найе готьне кö кәсәк тʹәви wи qайил нибу.

12. Зәбур 16:10 ча һатә сери, у әw йәк чь избат дькә дәрһәqа рʹабуна мьрийа?

¹² Пәтрус гьлийед хwә избат кьр бь рʹеза жь Зәбур 110:1. (Бьхунә Кʹаред Шандийа 2:33-36.) Шьровәкьрьна Пәтрус сәр һʹиме Ньвисара, әʹлаләтәкә мәзьн да баwәркьрьне, кö Иса «һьн . . . Хöдан, һьн жи Мәсиһ» бу. Хенщи wе йәке, щьмәʹте фәʹм кьр кö пʹехәмбәртийа жь Зәбур 16:10, һатә сери чахе Иса жь мьрьне рʹабу. Wәʹдә шунда Паwлосе шанди жи әw избаткьрьн да хәбате чахе тʹәви Щьһуйа шәһәре Әнтакйа Пьсидйайеда хәбәр дьда. Шьровәкьрьна wи öса сәр wан һʹöкöм бу, кö wана дәрһәqа wе йәке һе зедә дьхwәстьн пебьһʹәсьн. (Бьхунә Кʹаред Шандийа 13:32-37, 42.) Пʹехәмбәртийед жь Кʹьтеба Пироз дәрһәqа рʹабуна Иса һатьнә сери, паши гәләк qьрʹна. Әw йәк гәрәке баwәрийа мә qәwи кә һьндава пʹехәмбәртийед Кʹьтеба Пироз дәрһәqа рʹабуна мьрийа ахьрийеда.

КʹӘНГЕ МЬРИ WЕ РʹАБЬН?

13. Кʹижан пьрс дьбәкә бал һьнәка пешда тен?

¹³ Рʹасти жи мә гәләк qәwи дькә әw йәк, кö сахкьрьн дькарә бьqәwьмә гәләк qьрʹнә паши создайине. Ле дьqәwьмә бал һьнәка пьрсед öса пешда тен: «Гәло әв те һʹәсабе кö әз гәләк wәхт гәрәке һивийе бьм, wәки мәрьве хwәйи дәлал бьвиньм? Мьри wе кʹәнге рʹабьн?». Иса шандийед хwәрʹа гот wәки һәнә тьшт кö әwана ньзаньн у нә жи дькарьн бьзаньбьн. Һәнә тьштед һур дәрһәqа «wәхт у зәмана . . . йед кö Баве бь һʹöкöме хwә кʹьфш кьрьнә» (Кʹар. Шанд. 1:6, 7; Йуһʹн. 16:12). Ле әw найе һʹәсабе кö әм qә тьштәки ньзаньн кö кʹәнге мьри wе рʹабьн.

14. Чьрʹа рʹабуна Иса мәхсус бу?

¹⁴ Рʹабуна мьрийайә лапә мәхсус, әw һәйә рʹабуна Иса, кʹижан кö Кʹьтеба Пирозда һатә пʹехәмбәртикьрьне. Һәрге Иса жь мьрьне рʹанәбуйа, баwәрийа мә wе пʹучʹ буйа, кö әме мәрьвед хwәйи незик йед кö мьрьнә, диса бьвиньн. Әwед кö пешийа Иса жь мьрьне рʹабун, мәсәлә йед кö бь сайа Елйас у Елиша һатьнә сахкьрьне, әwан мәрьва һʹәта-һʹәтайе нәжитьн. Әwана мьрьн у щьнийазе wан әʹрдеда рʹьзийа. Ле Иса «жь мьрьне рʹабуйә, [у] иди намьрә, мьрьн сәр wи иди һʹöкöм накә». Әw «һʹәта-һʹәтайе» дьжи сәр әʹзмана (Рʹом. 6:9; Әʹйан. 1:5, 18; Колс. 1:18; 1 Пәт. 3:18).

15. Чьрʹа Иса йә «бәре дәрәмәта пешьн»?

¹⁵ Иса бу йе пешийе кö жь мьрьне рʹабу бь бәдәна рʹöһʹани, у әw рʹабуна wи лапә фәрз ә (Кʹар. Шанд. 26:23). Ле нә тʹәне Иса йә, кö жь мьрьне рʹабу бона жийина сәр әʹзмана. Иса соз да шандийед хwәйи амьн, wәки wе тʹәви wи сәр әʹзмана сәрwертийе бькьн (Луqа 22:28-30). Сәва әве хәлате бьстиньн, пешийе әwана гәрәке бьмьрана. Паше әwана дькарьбун мина Иса жь мьрьне рʹабуна бь бәдәна рʹöһʹани. Паwлос ньвиси кö «Мәсиһ жь мьрьне рʹабуйә, чаwа бәре дәрәмәта пешьн жь нава мьрийа рʹабуйи». Бь wан гьлийа Паwлос дьхwәст бьгота, кö wе һәбьн йед öса, кʹижан кö wе жь мьрьне рʹабьн у бьжин сәр әʹзмана. Әwи гот: «Һәр кәс дора хwәда: Пешийе Мәсиһ чаwа бәре дәрәмәта пешьн, паше йед пʹара Мәсиһ, wәхте һатьна wида» (1 Корн. 15:20, 23).

16. Дәрһәqа wәхте рʹабуна мьрийа бона жийина сәр әʹзмана, әм чь заньн?

¹⁶ Әw гьлийед Паwлос мәрʹа нишан дькьн кö рʹабуна мьрийа бона жийина сәр әʹзмана кʹәнге wе бьqәwьмә. Әw wе бьqәwьмә «wәхте һатьна wида», демәк Мәсиһ. Шәʹдед Йаһоwа зудава сәр һʹиме Кʹьтеба Пироз тедәрхьстьн кö сала 1914-да һʹәта ньһа әм ида дьжин wәʹде «һатьна» Мәсиһ у кö ахьрийа ве дьнйа зöлм ида бәр шемике йә.

17, 18. Чь wе бьqәwьмә тʹәви һьнә Мәсиһийед бьжарти wәʹде һатьна Мәсиһ?

¹⁷ Кʹьтеба Пироз һе зедә шьровәдькә дәрһәqа рʹабуна жь мьрьне бона жийина сәр әʹзмана: «Әм дьхwазьн кö һун дәрһәqа мьрийада заньбьн. . . . Аwа һәгәр әм баwәр дькьн, кö Иса мьр у жь мьрьне рʹабу, öса жи Хwәде wе мьрийед . . . тʹәви wи вәгәрʹинә. . . . Әм кö һʹәта һатьна Хöдан бьжин сах бьминьн, тʹö щар пешийа мьрийа накʹәвьн. Хöдане хwәха бь әʹламәтикә фәрмани, . . . жь әʹзман бе хwаре у әw мьрийед кö Мәсиһ баwәр кьрьбун, wе пешийе жь мьрьне рʹабьн, паше, әм кö сах манә, тʹәви wан әʹwрава бенә рʹаһьштьне, һәwеда рʹасти Хöдан бен у бь ви аwайи әме һʹәта-һʹәтайе тʹәви Хöдан бьн» (1 Тʹеслн. 4:13-17).

¹⁸ Рʹабуна жь мьрьне йа пешийе, демәк йа бона жийина сәр әʹзмана, дәстпебу һьнә wәʹдә шунда паши һатьна Мәсиһ. Мәсиһийед бьжарти йед кö wәʹде тәнгасийа мәзьн сах бьминьн, wе «әʹwрава бенә рʹаһьштьне» (Мәт. 24:31). Әwед кö бенә «рʹаһьштьне», «мьрийа накʹәвьн», демәк әwана гәләк wәхт мьри нибьн. Әwана wе «бенә гöһастьне, ньшкева, чаwа чʹәʹве хwә бьгьри-вәки дәма борʹийа ахьрийе бе ледане» (1 Корн. 15:51, 52).

19. Чь те һʹәсабе «жийинәкә һе qәнщ»?

¹⁹ Иро һʹәчʹи зәʹф Мәсиһи бьжарти ниньн сәва тʹәви Мәсиһ сәрwертийе бькьн. Әwана һивийа рʹожа Йаһоwа нә, чахе әw qьрʹа ве дьнйа зöлм бинә. Тʹö кәс ньзанә әв рʹож кʹәнге wе бе, ле һәр тьшт дьдә кʹьфше кö әв рʹож гәләк незик ә (1 Тʹеслн. 5:1-3). Чахе дьнйа тʹәзә бе, рʹабуна мьрийа wе һәбә, ле щурʹе дьн. Әwед кö жь мьрьне рʹабьн, wе бона жийина сәр әʹрде рʹабьн у бькарьбьн бьбьнә беqьсур у тʹö щар ида мьрьне нәвиньн. Бәре чахе «кʹöлфәта мьрийед хwә сахбуйи стандьн», әw мәрьв паше мьрьн. Ле әwед кö дьнйа тʹәзәда wе жь мьрьне рʹабьн, «бьгьһижьнә жийинәкә һе qәнщ», демәк wе ида тʹö щар мьрьне нәвиньн (Ибрн. 11:35).

20. Чьрʹа әм дькарьн бежьн кö рʹабуна мьрийа wе бь организә бә?

²⁰ Кʹьтеба Пироз дәрһәqа рʹабуна жь мьрьне бона жийина сәр әʹзмана, дьбежә «һәр кәс дора хwәда» wе жь мьрьне рʹабә (1 Корн. 15:23). Әм дькарьн дöдьли нәбьн, wәки дьнйа тʹәзәда жи рʹабуна мьрийа wе бь организә бә. Рʹасти жи һʹәwас ә пебьһʹәсьн әw йәк wе ча бьqәwьмә. Дьбәкә бал мә пьрс пешда тен: «Гәло әwед кö wан пашwәхтийада мьрьнә, wе дәстпека Һʹәзарсалийа Сәрwертийа Мәсиһ жь мьрьне рʹабьн у рʹасти мәрьвед хwәйи дәлал бен? Гәло дьбәкә пешийе меред жь һена бәре йед кö рʹебәред баш бун, wе рʹабьн, сәва кö дьнйа тʹәзәда организәкьрьнеда али щьмәʹта Хwәде бькьн? Ле wе чь бьбә тʹәви wан мәрьва йед кö тʹö щар Йаһоwарʹа хьзмәт нәкьрьнә? Әwана wе кʹәнге у кʹидәре жь мьрьне рʹабьн?» Бәле, дәрһәqа ван тьшта гәләк пьрс дькарьн пешда бен. Ле wе баш бә, һәрге әм дәрһәqа wан тьшта гәләк бәрхwә нәкʹәвьн, ле дәwсе әм һивийе бьн у бьвиньн wе ча бә. Әм дькарьн баwәр бьн кö wе wәʹдәки гәләк хwәш бә чахе әм пе чʹәʹве хwә бьвиньн кö Йаһоwа wе чаwа ван тьшта бькә.

21. Һун чьда баwәр ьн?

²¹ Һʹәта әw wәʹдә бе, әм гәрәке баwәрийа хwә һьндава Йаһоwа qәwи кьн. Йаһоwа бь Иса мәрʹа соз да кö мьри бира Wида ньн у әw wе wана жь мьрьне рʹакә (Йуһʹн. 5:28, 29; 11:23). Щарәке Иса сәр Бьраһим, Исһаq, у Аqуб гот кö әwана бона Йаһоwа «һʹәму жи сах ьн» (Луqа 20:37, 38). Әшкәрә йә мәʹнийед мә һәнә әм мина Паwлос бежьн: «Әз Хwәдеда баwәр ьм . . . кö wе рʹабуна мьрийа һәбә» (Кʹар. Шанд. 24:15).