3 Аликʹари кö Проблемада Тәйах кьн

Иро һәнә проблемед öса, жь кʹижана кö әм нькарьн хwә хьлаз кьн у нә жи wана сафи кьн. Бәʹсә хәбәре, һәрге тә кәсәк жь мәрьвед хwәйи незик öнда кьрийә, йан һәрге тö бь нәхwәшийа гьран нәхwәш и, дьqәwьмә тö нькари чʹарәк бьвини, кö еша дьле хwә һьнәки сьвьк ки. Гәло wан дәрәщед чәтьнда, Кʹьтеба Пироз дькарә аликʹарийе бьдә?

НӘХWӘШИЙЕД КÖ НАЙЕНӘ QӘНЩКЬРЬНЕ

Рози дьбежә: «Әз бь нәхwәшийа гьран нәхwәш ьм, жь бо чь жи тʹьме еше дькʹьшиньм у дьчәрчьрьм. Жийина мьн öса баш нинә ча бәре». Әв нәхwәши wе йәкеда бу, кö Розирʹа чәтьн бу һʹьш у дина хwә бьдә сәр һинкьрьна хwәйә Кʹьтеба Пироз у сәр тьштед рʹöһʹани. Ле гьлийед Иса жь Мәтта 19:26 гәләк али wе кьр. Ль вьр ньвисар ә: «Һәр тьшт жь дәсте Хwәде те». Рози фәʹм кьр кö гәләк мәщалед дьн жи һәнә, кö чаwа Кʹьтеба Пироз һин бьн. Щарна жь бо еша хwә хwәндьн wерʹа чәтьн дьбу, ләма жи әwе дәстпекьр гöһ бьдә аудио-ньвисандьна Кʹьтеба Пироз у әʹдәбйәтед дьн.a Әw дьбежә: «Бей wан тьшта, мьне нькарьбуйа рʹöһʹанийа хwә хwәйкьра».

Щарна Рози хәмгин дьбу, кö нькарьбу мина бәре һьнә тьшта бькә. Wан чаха әwе аликʹари дьдит жь 2 Корьнтʹи 8:12, йе кö дьбежә: «Чьмки һәгәр һун бь рʹәзәдьли кʹомәке бьдьн, әw wәкә wе йәке qәбул ә, чьqас дәсте кʹева те, ле нә wәкә wе йәке, кö дестда тʹöнә». Әв гьли дькьрнә бира Рози, wәки кьред wе, Хwәде хwәш тен. Нәхwәшийа хwәда Рози һʹәму тьшти дькьр, чь кö жь дәсте wе дьһат.

ДӘРД-КÖЛЕ ДЬЛ

Зәйнәб, дәрһәqа кʹижани кö жоре һатьбу готьне дьбежә: «Паши мьрьна qиза мьнә 18 сали, еша дьле мьн öса qайим бу, мьн нә жи баwәр дькьр кö сах бьминьм. Тʹö тьшт нькарә бәрамбәри ве еше бә». Әwе бәрдьли дит жь Зәбур 94:19, кʹидәре кö зәбурбеж Хwәдерʹа дьбежә: «Дәма хәм һöндьре мьн бьгьрьн, хәмрәвинед тә дьле мьн кʹефхwәш дькьн». Зәйнәб бәрдәwам дькә: «Мьн Йаһоwарʹа дöа дькьр, кö али мьн бькә тьштед öсава мьжул бьм, бь сайа чь жи әзе бькарьбьм еша хwә һәвәки сьвьк кьм».

Зәйнәб тʹьме шьхöлед рʹöһʹанива мьжул дьбу. Wәʹдә шунда әw хwә бәрамбәри qаләма рʹәнгани кьр. Әwе гот кö һәла һе qаләма шкәсти жи дькарә керһати бә у лекә. Зәйнәб wәк qаләма шкәсти хwә тʹәхмин дькьр. Ле фәʹм дькьр, кö дькарә диса жи али мәрийед дьн бькә. Әw дьбежә: «Мьн тедәрхьст, кö хәбьтандьна принсипед Кʹьтеба Пироз у ньһерʹандьна рʹöһʹани, али мьн дькьрьн бәрдьлийе бьдьмә wан мәрийа, тʹәви кʹижана кö мьн һинбуна Кʹьтеба Пироз дәрбаз дькьр. Мьн фәʹм кьр, кö öса Йаһоwа мьн рʹьһʹәт дькьр у бәрдьли дьда мьн». Әwе хwәрʹа ньвиси навед wан мәрийа жь Кʹьтеба Пироз, йед кö мина wе, рʹасти дәрд-кöлед öса һатьбун. Әw дьбежә: «Бе шьк, әв һʹәму мәрьв тʹьме дöа дькьрьн. . . . Тö тʹәне һьнге бькарьби проблемед хwәда тәйах ки, һәрге Кʹьтеба Пироз дьхуни».

Һинбуна Кʹьтеба Пироз диса тьштәки һини Зәйнәбе кьр. Әw һин бу дина хwә бьдә ахьрийе, нә кö рʹожед дәрбазбуйи. Әв һевийа дәрһәqа кʹижани кö Кʹаред Шандийа 24:15-да ньвисар ә бәрдьли дьдә wе. Ль вьр ньвисар ә: «Һʹәму һәq у нәһәqе жь мьрьне рʹабьн». Гәло, әw чьqаси баwәр дькә, кö Йаһоwа qиза wе жь мьрьне рʹакә? Зәйнәб хwәха щаба ве пьрсе дьдә: «Әз дьдьмә бәр чʹәʹве хwә, кö ль ахьрийе, Йаһоwа qиза мьн жь мьрьне рʹакьр у әз wе дьвиньм. Әз öса жи дьвиньм, wәки әз тʹәви wе, бахчеда рʹуньштьмә. Әв дәрәщә бона мьн öса реали йә, ча реали бу рʹожа буйина wе».

a Гәләк аудио-ньвисандьнед ви щурʹәйи ль сәр малпәра jw.org һәнә.

Кʹьтеба Пироз дькарә али тә бькә бәрдьли бьвини, һәла һе рʹожед чәтьнда жи

ЧАWА ХWӘДЕ ДЬКАРӘ АЛИ МӘ БЬКӘ?

Щаба Кʹьтеба Пироз зәлал ә. Ль вьр ньвисар ә: «Хöдан незики wан һʹәмуйа йә, кʹижан кö гази Wи дькьн, wан һʹәмуйа кö дьле рʹаст гази дькьн. Әw мьразе wан дькә, кʹижан кö жь Wи дьтьрсьн, заринийа wан дьбьһе у wан хьлаз дькә» (Зәбур 145:18, 19). Әв чьqас дьле мә гәрм дькә. Гәло Хwәде wе чаwа щаба дöайед мәрьвед дьлпʹак бьдә, йед кö рʹебәрийа wи дьгәрʹьн?

QӘWАТЕ ДЬДӘ МӘ:

Гәләк щар проблем, мә дьлтәнг дькьн у алийе физикида, емосийалида у рʹöһʹанида, әм ча бежи дьчʹьлмьсьн (Мәтʹәлок 24:10). Ле Йаһоwа «qәwате дьдә йе вәстийайирʹа у йед сьст qәwи дькә» (Ишайа 40:29, ДТʹ). Паwлосе шанди йе кö рʹасти пәйкʹәтьнед гьран һатьбу, гот: «Әз һәр тьшти бь сайа wи дькарьм, йе кö qәwате дьдә мьн» (Филипи 4:13). Хwәде рʹöһʹе хwәйи пироз дабу Паwлос у öса әw qәwи кьр. Тö жи дькари жь Хwәде рʹöһʹе пироз бьхwази (Луqа 11:13).

СӘРWАХТИЙЕ ДЬДӘ МӘ:

Ле чь тö гәрәке бьки, һәрге тәрʹа аликʹари лазьм ә кö ширәта Кʹьтеба Пироз фәʹм бьки у бьди хәбате? Аqубе шанди дьньвисә: «Һәгәр сәрwахтийа йәки жь wә тʹера wи накә, бьра һиви жь Хwәде бькә у wе жь wирʹа бе дайине. Әw бь мәрʹдани дьдә һʹәмуйа у тʹö кәси беqәдьр накә» (Аqуб 1:5). Тö дькари ль гора дöайед хwә бьки, һәрге Кʹьтеба Пироз бьхуни у һинкьрьнед wе бьди хәбате (Аqуб 1:23-25). Һәрге тö öса бьки, те бьвини кö һинкьрьнед wе чьqас бь сәрwахтийе тʹьжә нә.

ӘʹДЬЛАЙЕ ДЬДӘ:

Һәла һәрге тö гәләк дьлтәнг и, Йаһоwа дькарә али тә бькә кö һәвәк хwә рʹьһʹәт тʹәхмин ки. Дь Хәбәра Wида ньвисар ә: «Бона тʹö тьшти хәм нәкьн, ле хwәстьна wә бьра бь дöа-дьрозга, рʹазибунева тʹәвайи, Хwәдева әʹйан бә. У әʹдьлайийа Хwәде кö жь һәр һʹьш-аqьли дәрбазтьр ә, wе дьл у фькьред wә йәктийа Мәсиһ Исада хwәй кә» (Филипи 4:6, 7). Ләма жь Йаһоwа бьхwазьн, кö әʹдьлайе бьдә wә.

Ле чь бькьн, һәрге проблемед тә дәрбера найенә сафикьрьне? Һʹәсаб нәкә, кö Хwәде тә һиштийә. Һәла һәрге проблемед тә бәрдәwам дьбьн, Хwәде дькарә мерхаси у qәwате бьдә тә, кö бькарьби тәйах ки (1 Корьнтʹи 10:13). Кʹьтеба Пироз öса жи соз дьдә, кö wәʹдәки öса wе бе, чахе һʹәму проблемед мә wе бенә сафикьрьне!