Әwана бь Рʹәзәдьли Хьзмәт Дькьн: ль Мадагәскаре

ХУШКА мә бь наве Силвйана, йа кö 27 сали йә у пешәнг ә дьбежә: «Чахе һәвалед мьн кʹижан кö хьзмәт дькьрьн щийед кö һʹәwщәти һәйә, мьнрʹа гьли дькьрьн qәwьмандьнед һʹәwас, мьн жи дьхwәст әве шабуне тәʹм кьм. Ле әз дьтьрсийам кö жь бо дәрәща хwә әзе нькарьбьм дәрбази wи щийи бьм кʹидәре кö һʹәwщәти һәйә».

Ле бал wә жи һәбун фькьред мина йед Силвйана? Һун жи дьхwазьн хьзмәт кьн щийе кö һе зедә мьзгинван лазьм ьн, ле дöдьли нә кö нькарьбьн ви нети биньн сери? Һәрге һун öса дьфькьрьн, тʹö щар нәтьрсьн әве гаве бавежьн. Пе аликʹарийа Йаһоwа, бь һʹәзара хушк-бьра әwан чәтьнайа сафи кьрьн, кʹижан кö рʹийа wан дьгьрт wәки дәрбази wи щийи бьн кʹидәре кö һʹәwщәти һәйә. Сәва кö пебьһʹәсьн wәки Йаһоwа ча али һьнәка кьрийә, wәрә әм дәрһәqа Мадагәскаре хәбәр дьн, кö дьнйайеда жь гьравед лапә мәзьн, әв йа чара йә.

Нава 10 салед пашwәхтийеда, 70 мьзгинвана зедәтьр жь 11 wәлатаa дәрбази Африкайе бунә. Африкайеда хьзмәти гәләк бәред баш тинә, чьмки гәләк мәрьвед wедәре qәдьре Кʹьтеба Пироз дьгьрьн. Öса жи гәләк мьзгинванед кö wедәре дьжин, дәрбази Мадагәскаре дьбьн, сәва мьзгинийе бәла кьн. Wәрә әм тʹәви һьнәка жь wан бьбьнә нас.

WАНА ТЬРС У ДЬЛТӘНГИ АЛТ КЬРЬН

Луис у Перин, жьн-мер ьн жь Франсайе, дәрбази Мадагәскаре бунә. Нава салада, әwана дьфькьрин кö хьзмәт кьн wәлате хәрибда, ле Перин дьтьрсийа дәрбаз бә. Әw шьровәдькә: «Әз дьтьрсийам дәрбази щийе нәнас бьм. Һьн жи әз бәрхwә дькʹәтьм wәки әме бьһельн нәфәред хwә, щьват, мала хwә, щийед мәрʹа нас у графика хwә жи. Рʹаст бежьм һʹәчʹи зәʹф әв фькьред мьн рʹе мьн дьгьртьн wәки дәрбаз бьм». Сала 2012-да, Перин тьрса хwә алт кьр у әw тʹәви Луис дәрбази Мадагәскаре бун. Дәрһәqа ве сафикьрьна wан, Перин гьли дькә: «Бь рʹастийе баwәрийа мә дьһа qәwи бу, чьмки мә әʹмьре хwәда дәсте Йаһоwа дит». Луис зедә дькә: «Бьдьнә бәр чʹәʹве хwә, кö чахе щара пешьн әм Мадагәскареда чунә сәр Евара Биранине, 10 мәрьвед кö мә тʹәви wан һинбуна Кʹьтеба Пироз дәрбаз дькьр, һатьн wедәре!».

Ле гәло чь али Луис у Перин кьр, wәки wәʹде чәтьнайа хьзмәтийа хwә нәһельн? Wана бь дöа-дьрозга жь Йаһоwа аликʹарийе дьхwәстьн wәки qәwате бьдә wан сәбьр кьн (Фили. 4:13). Луис гьли дькә: «Мә дит кö Йаһоwа ча щаба дöайед мә да у әwи ‹әʹдьлайийа Хwәде› да мә. Бь сайа ве йәке, мә һʹьш-аqьле хwә да сәр ве шабуне, кö мә жь хьзмәтийа хwә дьстанд. Öса жи һәвалед мә мәрʹа нәʹмәка дьньвисин сәва мә бьшьдиньн, wәки сьст нәбьн у qәwи бьминьн» (Фили. 4:6, 7; 2 Корн. 4:7).

Йаһоwа сәбьра Луис у Перин кʹәрәм кьр. Луис дьбежә: «Сала 2014-да әм һатьнә тʹәглифкьрьне Мәкʹтәба сәва Жьн-Меред Мәсиһиb, кö Франсайеда дәрбаз дьбу. Әw мәкʹтәб жь Йаһоwа пʹешкʹешәкә öса мәзьн бу, кö әме тʹö щар бир нәкьн». Паши хьлазийа ве мәкʹтәбе, әwана гәләк ша бун кö диса Мадагәскареда һатьнә кʹьфшкьрьне.

«ӘМЕ WӘРʹА ФЬРНАQ БЬН!»

Дидийе у Надин, жьн-мер жь Франсайе, сала 2010-да дәрбази Мадагәскаре бунә. Һьнге әwана 50 сали зедәтьр бун. Дидийе гьли дькә: «Щаһьлтийеда әм һәрдö жи пешәнг бун, ле паше мә се зарʹ мәзьн кьр. Чахе зарʹед мә ида мәзьн бун, әм фькьрин wәки дәрбази щийе хәриб бьн кö wедәре хьзмәт кьн». Надин зедә дькә: «Әз бәрхwә дькʹәтьм чахе дьфькьрим кö әме жь зарʹед хwә дур бьн, ле зарʹед мә мәрʹа готьн: ‹Һәрге һуне дәрбаз бьн щийе хәриб кʹидәре һʹәwщәтийа мьзгинвана һәйә, әме wәрʹа фьрнаq бьн!› Гьлийед wан мә qәwи кьрьн кö дәрбаз бьн. Рʹаст ә әм ньһа жь wана гәләк дур дьжин, ле әм ша нә wәки тʹьме дькарьн тʹәви зарʹед хwә пе тʹеле у интернете хәбәр дьн».

Бона Дидийе у Надин чәтьн бу зьмане Малагаси һин бьн. Надин дькʹәнә у дьбежә: «Әм ньһа зарʹед 20 сали ниньн». Ле гәло чь али wан кьр wи зьмани һин бьн? Йа пешийе, әwана дьчунә сәр щьвата зьмане Франси. Паше, чахе wана дит кö ида һазьр ьн у wәʹде wан һәйә зьмане wи щийи һин бьн, әwана дәрбази щьвата зьмане Малагаси бун. Надин дьбежә: «Гәләк мәрьв рʹасти кʹе әм хьзмәтийеда тен, һʹьз дькьн Кʹьтеба Пироз һин бьн. Гәләк щар әwана жь мә рʹази нә кö әм тенә щәм wан. Пешийе мьн тʹьре әз хәwнеда бум. Әз һʹьз дькьм wьра хьзмәт кьм ча пешәнг. Чахе әз шәбәqа рʹадьбьм, әз хwәрʹа дьбежьм: ‹Чьqас баш ә кö әз иро дьчьм хьзмәтийе!›».

Чахе Дидийе тинә бира хwә wәʹдә гава әwи дәстпекьр зьмане Малагаси һин бә, бәшәра wи хwәш дьбә. Әw дьбежә: «Мьн щьват дәрбаз дькьр, ле чахе хушк-бьра щаба хwә дьдан, мьн тьштәк фәʹм нәдькьр. Мьн тʹәне дьгот ‹Зәʹф рʹази мә›. Щарәке чахе хушкәке щаба хwә да у мьн wе спас кьр, әwед кö пьштва рʹуньштьбун пе дәсте хwә нишани мьн кьрьн wәки щаба wе нәрʹаст бу. Һьнге мьн бьрак пьрси, у ча әз дьфькьрьм әwи рʹаст щаба хwә да».

ӘWЕ БЬ ШАБУНЕ ТʹӘГЛИФКЬРЬНЕ QӘБУЛ КЬР

Сала 2005-да сәр щьвата мәзьн, драма һатә нишан кьрьне бь наве «Бьра Нетед Тә Хwәде Һöрмәт кьн». Әw драма сәр һʹиме Кʹьтеба Пироз дәрһәqа Тимотʹейо бу. Жьн-мер Тери у Надйа чахе әве драмайе дитьн, әw йәк дьле wан гьрт у wана һе зәʹф хwәст кö хьзмәт кьн wи щийи кʹидәре кö һʹәwщәтийа мьзгинвана һәйә. Тери гьли дькә: «Чахе драма хьлаз бу у мә дәсте хwә һәвдьхьст, мьн жьна хwә бь дәнге ньмьз пьрси, ‹Ле әм кʹöда һәрʹьн?› Жьна мьн жи мьнрʹа гот wәки әw жи һәма ве йәке фькьри». Зутьрәке wана дәстпекьр бьгьһижьнә нета хwә. Надйа дьбежә: «Һеди-һеди мә һур-муре хwә öса кем кьр, кö һʹәта чар чәмәданада щи бун».

Әw жьн-мер сала 2006-да дәрбази Мадагәскаре бун у жь дәстпека хьзмәтийа хwәда шабуне дьстиньн. Надйа дьбежә: «Мәрьвед кö хьзмәтийеда рʹасти мә тен, шабунәкә гәләк мәзьн мәрʹа тиньн».

Паши шәш сала әw жьн-мер рʹасти чәтьнайе һатьн. Дийа Надйа, Мари-Мадлен кö Франсайеда дьжит, кʹәт мьле хwә шькенанд у сәре хwә гәләк ешанд. Чахе әw жьн-мер тʹәви һʹәкиме wе хәбәр дан, wана жь Мари-Мадлен пьрсин һәла әw qайил ә йан на, wәки дәрбази Мадагәскаре бә у wедәре бьжи. Һьнге әw 80 сали бу, ле йәкә бь дьл у щан qәбул кьр әве тʹәглифкьрьне. Ле гәло әw чь дьфькьрә дәрһәqа жийина wедәре? Әw гьли дькә: «Щара мьнрʹа чәтьн ә һини тьштәки бьм. Рʹаст ә синоред qәwата мьн һәнә, ле йәкә әз тʹәхмин дькьм wәки әз щьватерʹа кʹаре тиньм. У лапә баш бона чь жи әз гәләк ша мә, әw ә кö жийина мьнә wедәре мәщале дьдә зарʹед мьн, wәки әwана хьзмәтийа хwәйә һәртʹьм нәһельн».

«МЬН СӘР ХWӘ ДӘСТЕ ЙАҺОWА ТʹӘХМИН ДЬКЬР»

Бьраки мә бь наве Риан кö 22 сали йә, мәзьн бу Алаотра Мангорода. Әw һәйә региона кö Мадагәскара рʹоһлатеда йә. Мәкʹтәбеда әw гәләк рʹьнд һин дьбу у дьхwәст хwәндьна бьльнд бьстинә. Ле чахе әwи дәстпекьр Кʹьтеба Пироз һин бә, әwи нета хwә гöһаст. Әw гьли дькә: «Мьн гәләк дьхwәст wәки зу екзамина хwәйә пашьн хьлаз кьм у мьн соз да Йаһоwа кö ‹Һәрге әз әw екзамин дәрбаз бьм, әзе бьбьмә пешәнг›». Чахе Риан мәкʹтәб хьлаз кьр, әwи созе хwә ани сери. Әw дәрбази бал бьраки мәйи пешәнг бу, хәбата ниврʹожи хwәрʹа дит, у дәстпекьр пешәнгти. Риан гьли дькә: «Әв сафикьрьна лапә баш бу кö мьн әʹмьре хwәда кьр».

Ле мәрьвед Риан фәʹм нәдькьрьн кö чьрʹа әw хwәрʹа хәбатәкә баш нагәрʹә wәки пʹәре мәзьн чекә. Риан дьбежә: «Баве мьн, апе мьн у хушка пирька мьн, гьшк мьн ширәт дькьрьн wәки әз хwәндьна бьльнд бьстиньм. Ле мьн нәдьхwәст пешәнгтийа хwә бьдьмә сәкьнандьне». Пешийа ве йәке, Риан, дьхwәст хьзмәт кьра щийе кö һʹәwщәти һәбу. Ле гәло чь wи һелан кьр кö ви нети бинә сери? Әw дьбежә: «Дьз кʹәтьнә мала мә у гәләк һур-муред мьн дьзин. Әw qәwьмандьн мьн һелан кьр кö бьфькьрьм сәр гьлийед Иса, чахе гот кö хьзне хwәрʹа ль әʹзмен тʹоп кьн. Мьн хwәрʹа нет дани wәки алийе хwәда һәр тьшти бькьм сәва хьзна рʹöһʹани qазанщ кьм» (Мәт. 6:19, 20). Риан дәрбази алийе башуре бу, кʹижан кö щики һʹьшкайи йә у 1 300 километьр дур ә жь wи щийи кʹидәре әw дьжит. Ви щийи щьмәʹта Антандрои дьжи. Ле гәло чьрʹа әw чу һәма wедәре?

Мәһәк пешийа кö дьз кʹәтьнә мала Риан, әwи тʹәви 2 мәрьвед Антандрои һинбуна Кʹьтеба Пироз дәстпекьр. Әwи чәнд гьли сәр зьмане wан һин бу у дьфькьри дәрһәqа мәрьвед Антандрои, йед кö тʹö щар мьзгинийа Пʹадшатийе нәбьһистьбун. Әw дьбежә: «Мьн Йаһоwарʹа дöа дькьр wәки али мьн бькә дәрбази щийе öса бьм, кʹидәре мәрьв сәр зьмане Тандрои хәбәр дьдьн».

Чаwа кö Риан дәрбаз бу, әw дәрберʹа рʹасти чәтьнайе һат. Әwи нькарьбу хwәрʹа хәбат бьдита. Мәрьвәки жерʹа гот: «Тö wьра чь дьхwази? Бона хәбате мәрьв жь wьра дьчьнә wи щийи, жь кʹö тö һати!». Паши дö һʹәфтийа, Риан чу сәр щьвата мәзьн. Пʹәре wи гәләк һьндьк бун, у әw ньзаньбу чь бькә. Рʹожа пашьн сәр щьвата мәзьн, бьраки тьштәки кьрә щева Рианда. Әw пʹәрә бу кö бәси wи бу сәва пашда һәрʹә Антандроида, у дәстпекә хwәрʹа хәбата бьчʹук бькә кö qатʹьх бьфьрошә. Риан дьбежә: «Һәма wәʹдәда мьн сәр хwә дәсте Йаһоwа тʹәхмин кьр. Мьн дькарьбу бәрдәwам кьра али wан мәрьва бькьм, йед кö тʹö щар дәрһәqа Йаһоwа нәбьһистьбун!». Ле öса жи гәләк шьхöл һәбу кö щьватеда гәрәке бьһата кьрьне. Риан дьбежә: «Мьн щабдари станд кö дö һʹәфте щарәке готаре бьхуньм. Йаһоwа бь сайа тʹәшкиләта хwә мьн һин дькьр». Риан һʹәта иро мьзгинийе бәла дькә мәрьвед кö сәр зьмане Тандрои хәбәр дьдьн у дьхwазьн дәрһәqа Йаһоwа пебьһʹәсьн.

КʹӘРӘМ ЖЬ ХWӘДЕЙЕ ҺӘQ

Йаһоwа мәрʹа дьбежә wәки әwед кö дьхwазьн кʹәрәма сәр әʹрде бьстиньн, wе жь Хwәдейе һәq бенә кʹәрәмкьрьне (Иша. 65:16). Чахе әм алийе хwәда һәр тьшти дькьн сәва һе зедә хьзмәт кьн, әм сәр хwә кʹәрәмед Йаһоwа тʹәхмин дькьн. Дина хwә бьдьн мәсәла Силвйанайе, бәʹса кʹижане мә дәстпека ве готареда кьр. Биньн бира хwә wәки әw дьтьрсийа кö wе нькарьбә хьзмәт кә wи щийи кʹидәре һʹәwщәти һәйә. Ле чьрʹа әw öса дьфькьри? Әw шьровәдькә: «Ньге мьнә чʹәпе wәкә 9 сантиметр жь ньге рʹасти кьнтьр ә. Ләма әз дькöльм у зу дьwәстьм».

Ле йәкә сала 2014-да Силвйана тʹәви хушкәкә щаһьл жь щьвата wе бь наве Силви Анн, тʹәвайи дәрбази гöндәки бьчʹук бун, кʹижан кö 85 километр жь шәһәре wан дур бу. Рʹаст ә Силвйанайерʹа чәтьн бу, ле йәкә нета дьле wе һатә сери, у әwе гәләк кʹәрәмед баш станд! Әw гьли дькә: «Паши саләкә хьзмәтийа мьнә wедәре, жьнькәкә щаһьл бь наве Доратин, тʹәви кʹе мьн һинбуна Кʹьтеба Пироз дәрбаз дькьр, сәр щьвата мәзьн һатә ньхöмандьне».

«ӘЗЕ АЛИ ТӘ БЬКЬМ»

Сәрһатийа wан мәрьва кö мә шеwьр кьр, нишан дькьн кö чахе әм һәр тьшти дькьн сәва тʹö тьшт рʹе мә нәгьрә һе зедә хьзмәт бькьн, әм хwәха сәр хwә тʹәхмин дькьн кö чаwа әв созе Йаһоwа те сери: «Әзе тә хwәй кьм, бәле әзе али тә бькьм» (Иша. 41:10, ДТʹ). Бь ве йәке һәләqәтийа мә тʹәви Йаһоwа һе qәwи дьбә. Хенщи ве йәке, чахе әм бь рʹәзәдьли дьчьн хьзмәт дькьн щийед дьнда йан жи wәлате хәрибда, әw йәк мә һазьр дькә бона шьхöлед кö дьнйа тʹәзәда әме бькьн. Чаwа Дидийе гот, бәʹса кʹижани мә жоре кьр, «хьзмәткьрьна wи щийи кʹидәре кö һʹәwщәти һәйә, бона ахьрийе гәләк тьшт мә һин дькә!». Wе чьqас баш бә wәки дьһа зәʹф хьзмәткʹар wи щурʹәйи хьзмәт кьн у әwе йәке сәр хwә тʹәхмин кьн!