«Бьра Рʹонайа Wә . . . Шәwq Бьдә» сәва Пәсьна Бьдьнә Йаһоwа

1. Кʹижан мәʹнийа мәйә мәхсус һәйә кö ша бьн?

ДЬЛЕ мә бь шабуне тʹьжә дьбә чахе әм педьһʹәсьн кö щьмәʹта Йаһоwа ча пешда дьчә! Әшкәрә йә, хьзмәткʹаред Хwәде пе рʹонайа хwә шәwq дьдьн! Сала пар мә 10 000 000 зедәтьр һинбунед Кʹьтеба Пироз дәрбаз кьрийә. Öса жи бь милйона мәрьвед тʹәзә һатьнә сәр Евара Биранине у пеһʹәсийан, wәки Хwәде бона мә Кöрʹе хwә кьрә qöрбан у бь ве йәке һʹьзкьрьна хwәйә мәзьн да кʹьфше (1 Йуһʹн. 4:9).

2, 3. а) Чь рʹе мә нагьрә wәки «мина рʹонайед әʹзмана» шәwq бьдьн? б) Сәр һʹиме гьлийед Иса жь Мәтта 5:14-16, әме ве готареда дәрһәqа чь шеwьр кьн?

² Нав тʹәмамийа дьнйайе зьмане щьмәʹта Йаһоwа щурʹә-щурʹә йә. Ле әw йәк рʹе мә нагьрә, wәки бь йәктийе пәсьне Баве хwә Йаһоwа бьдьн (Әʹйан. 7:9). Фьрqи тʹöнә әм сәр чь зьмани хәбәр дьдьн йан кʹидәре дьжин, әм гьшк жи дькарьн «мина рʹонайед әʹзмана» ве дьнйайеда шәwq бьдьн (Фили. 2:15).

³ Хьзмәтийа мә, йәктийа мә у әw йәк кö әм һʹьшйар дьминьн, пәсьне дьдә Йаһоwа. Ве готареда әме шеwьр кьн ча әм дькарьн wан тьштада пешда һәрʹьн. (Бьхунә Мәтта 5:14-16.)

АЛИКʹАРИЙЕ ДЬДЬНӘ МӘРЬВА WӘКИ ЙАҺОWА БЬҺʹӘБИНЬН

4, 5. а) Хенщи хьзмәтийе, диса ча әм дькарьн шәwq бьдьн? б) Чаwа рʹабун-рʹуньштьна мәйә баш кʹаре тинә? (Бьньһерʹә шькле әʹwльн.)

⁴ «Бьрща Qәрәwьлийеда» йа 1 Һʹәзиране сала 1925-да, һәбу готар бь наве «Рʹонайи Тәʹрийеда». Wедәре дьһатә готьне: «Тʹö кәс нькарә wан рʹожед ахьрийеда бәр Хöдан амьн у рʹаст бе һʹәсабе, ... һәрге әw мәщала нәдә хәбате кö пе рʹонайа хwә шәwq бьдә. Әw гәрәке мәрьварʹа мьзгинийе бәла кә у хwәха жи ль гора рʹийед рʹонайе бьжи». Бәле, чахе әм мьзгинийе бәла дькьн у али мәрьва дькьн кö бьбьнә шагьрт, öса әм пе рʹонайа хwә шәwq дьдьн (Мәт. 28:19, 20). Хенщи ве йәке, әм дькарьн пе рʹабун-рʹуньштьна хwә жи пәсьна бьдьнә Йаһоwа. Wәʹде хьзмәтийа мал бь мал у дәрва, мәрьв дина хwә дьдьнә рʹабун-рʹуньштьна мә. Бәшәра мә у сьлава мәйә бь дьл у щан, wанрʹа дьдьнә кʹьфше кö әм кʹе нә у кʹижан Хwәдейирʹа хьзмәт дькьн.

⁵ Иса шагьртед хwәрʹа гот: «Гава һун һәрʹьнә мале, сьлаве бьдьн» (Мәт. 10:12). Wан щийада кʹидәре кö Иса у шандийед wи хьзмәт дькьрьн, әʹдәт бу кö хәриба йан жи мәрьвед нәнас тʹәглифи мала хwә кьн. Иро гәләк щийада әw йәк qәйдә нинә. Ле һәрге һун пе бәшәра хwәш у нәрм хwәйе малерʹа шьровәкьн мәʹнийа һатьна хwә, wанрʹа wе һеса бә wә qәбул кьн у жь wә әʹщьз нәбьн. Щара бона хәбәрдане дәстпекьн, сьлавәкә бь дьл жи баш ә, у әw öса жи керһати йә wәʹде хьзмәтийа пе стенде. Чахе һун пе стенде хьзмәт дькьн, дьбәкә һун дьвиньн кö бәшәра wәйә хwәш у сьлавед wә, мәрьва хwәш тен. Әw йәк дькарә wана һелан кә кö незики wә бьн у әʹдәбйәта һьлдьн. Бәле, рʹабун-рʹуньштьна wәйә баш дькарә али wә бькә тʹәви wан хәбәрдане дәстпекьн.

6. Чаwа жьн-мере әʹмьрда мәзьн хьзмәтийеда хирәт ман?

⁶ Жьн-мере жь Инглистане кö әʹмьрда мәзьн ьн, жь бо нәхwәшийа хwә нькарьн мал бь мал хьзмәт кьн. Ле wана сафи кьр кö һәма бәр мала хwә хьзмәт кьн, сәва рʹонайа wан шәwq бьдә. Әwана незики мәкʹтәбе дьжин, у wәʹде кö де-бав дьчьнә мәкʹтәбе сәва зарʹед хwә һьлдьн, һьнге әwана әʹдәбйәтед мә датиньн сәр тʹәхтә. Гәләка хwәстьн пебьһʹәсьн әw чь әʹдәбйәт ьн, у һьнә де-бава кʹьтеба «Пьрсед Щаһьла у Ширәтед Керһати», Пʹара 1 у 2, öса жи бьрошур хwәрʹа һьлдан. Хушкәкә пешәнг жь щьвата wан ве йәкеда аликʹарийе дьдә wан. Рʹабун-рʹуньштьна ве хушке у дьлсахийа жьн-мер, мәрьвәк һелан кьр һинбуна Кʹьтеба Пироз дәстпекә.

7. Һун ча дькарьн wәлате хwәда аликʹарийе бьдьнә хәриба?

⁷ Wан салед пашwәхтийеда, гәләк wәлатада мәрьвед хәриб зедә бунә, йед кö рʹәви нә. Ле һун ча дькарьн али wан рʹәвийа бькьн, wәки Йаһоwа нас кьн у дәрһәqа qьрара wи пебьһʹәсьн? Йа пешьн, wе баш бә һун сәр зьмане wан сьлаве һин бьн. Ве йәкеда «JW Ленгwищ app» (JW Languagе app), дькарә аликʹарийе бьдә wә. Хенщи ве йәке, һун дькарьн чәнд щöмла жи һин бьн, кʹижан кö дькарьн али wә бькьн wәки тʹәви wан хәбәрдане дәстпекьн. Паше һун дькарьн дина wан бьдьн сәр малпәра мә jw.org, сәва кö видео у әʹдәбйәтед сәр зьмане wан нишани wан кьн (Qан. Дщр. 10:19).

8, 9. а) Әм ча щьватеда һин дьбьн wәки хьзмәтийеда щерʹьбанди бьн? б) Де-бав ча дькарьн али зарʹед хwә бькьн кö щьватеда щаба хwә бьдьн?

⁸ Йаһоwа тʹьме wан тьшта дьдә мә, чь кö мәрʹа лазьм ьн сәва хьзмәтийеда пешда һәрʹьн у һе щерʹьбанди бьн. Бәʹса хәбәре, щьватеда әм Бәрнама Щьвине «Мина Иса Бьжин» дәрбаз дьбьн, кʹижан кö али мә дькә һазьр бьн чахе сәрледанед дöбарә дькьн у һинбунед Кʹьтеба Пироз дәрбаз дькьн.

⁹ Мәрьвед кö тʹәзә тенә щьватед мә, щара әʹщебмайи дьминьн кö чаwа зарʹ щьватеда щаба хwә дьдьн. Ләма жи де-бавно али зарʹед хwә бькьн, wәки әwана һин бьн пе гьлийед хwә щаба хwә бьдьн. Һьнә мәрьв һатьнә сәр рʹийа рʹаст, гава дитьнә кö ча зарʹ пе щабед хwәйә бь дьл, баwәрийа хwә дьдьнә кʹьфше (1 Корн. 14:25).

ЙӘКТИЙЕ QӘWИ КЬН

10. Qöльхкьрьна тʹәви малбәте чаwа йәктийе тинә?

¹⁰ Чахе әм малбәта хwәда у щьватеда йәктийе хwәй дькьн, һьнге жи әм пе рʹонайа хwә шәwq дьдьн, демәк пәсьна дьдьнә Йаһоwа. Мәсәлә, де-бав дькарьн öса бькьн, wәки һәр гав бе сьтандьне Qöльхкьрьна тʹәви Малбәте дәрбаз кьн. Гәләк де-бав wәʹде qöльхкьрьна тʹәви малбәте öса жи тʹәвайи «JW Бродкастинге» дьньһерʹьн, у паше шеwьр дькьн кö wана чь кʹар станд у кʹижан ширәта дькарьн бьдьнә хәбате. Де-бавно, wәʹде qöльхкьрьна тʹәви малбәте, бир нәкьн wәки тʹәви зарʹед бьчʹук лазьм ә щурʹәки майин шеwьркьрьне дәрбаз кьн, ле тʹәви щаһьла щурʹәки майин. Ләма жи öса бькьн wәки нәфәред wә һʹәмушк жи кʹаре бьстиньн жь qöльхкьрьна тʹәви малбәте.

11-13. Щьватеда ча һәр кәс дькарә йәктийе хwәй кә, у аликʹарийе бьдә хушк-бьра кö шәwq бьдьн?

¹¹ Чаwа щаһьл дькарьн щьватеда йәктийе хwәй кьн у йед дьн һелан кьн пәсьна бьдьнә Йаһоwа? Щаһьлно, һун дькарьн нете дайньн пешийа хwә, wәки щьватеда тʹәви мәрьвед әʹмьрда мәзьн һәвалтийе бькьн. Һун дькарьн жь wана бьпьрсьн, wәки әwана дәрһәqа qәwьмандьнед хьзмәтийа хwәда wәрʹа гьли кьн. Бь ве йәке һуне жи qәwи бьн у әwана жи, у пе рʹонайа хwә шәwq бьдьн. Һәр кәс жь мә дькарә нете дайнә пешийа хwә, wәки бь дьл сьлав кә у qәбул кә мәрьвед кö тенә щьватед мә. Öса һуне йәктийе хwәй кьн, у мәрьвед тʹәзә wе һелан бьн чʹәʹв бьдьнә wә. Һун дькарьн wана бь бәшәра хwәш qәбул кьн у сьлав кьн, у һәла һе жи али wан бькьн wанрʹа щи бьвиньн. Wана тʹәви йед майин бькьнә нас, сәва әwана хwә баш тʹәхмин кьн.

¹² Һәрге һун щабдар ьн wәки щьвина бона хьзмәткьрьне дәрбаз кьн, һун дькарьн гәләк али хушк-бьред әʹмьрда мәзьн бькьн. Мәсәлә, пебьһʹәсьн кö мьһала wанә бона хьзмәтийе һәйә йан на. Шьхöл бьдьнә щаһьла wәки аликʹарийе бьдьнә хушк-бьред әʹмьрда мәзьн. Öса жи гәләк фәрз ә дьл бьдьнә wан хушк-бьра, сьһʹәт-qәwата кʹижана хьраб ә у нькарьн гәләк хьзмәт кьн. Хәмкьрьна wә у һʹьзкьрьна wә һьндава щаһьла у йед әʹмьрда мәзьн, öса жи һьндава йед щерʹьбанди у нәщерʹьбанди, дькарә wана һелан кә кö бь хирәт мьзгинийе бәла кьн (Qан. Кʹаһ. 19:32).

¹³ Зәбурбеж ньвиси: «Чаwа qәнщ ә, чаwа хwәш ә, кö бьра һәврʹа йәктийеда нә!». (Бьхунә Зәбур 133:1, 2.) Исраелийа бь йәкти Йаһоwа дьһʹәбандьн, у әве йәке гәләк кʹар wанрʹа дьани. Зәбурбеж әв йәкти бәрамбәри рʹуне хальс кьр, кʹижан кö чʹәрм гәш дькә у тʹәзә дькә. Әм жи дькарьн хушк-бьра qәwи кьн у гәш кьн, гава wанрʹа һʹәйф у нәрм бьн. Wи щурʹәйи йәктийа щьвате qәwи дьбә. Һәрге һун ида öса дькьн, һун һежайи пʹайа нә. Wе керһати бә һун тʹәви щурʹә-щурʹә хушк-бьра һәвалтийе бькьн у һе рʹьнд wана нас кьн (2 Корн. 6:11-13).

14. Ча һун дькарьн нава щинаред хwәда шәwqе бьдьн?

¹⁴ Һун öса жи дькарьн шәwq бьдьн нава щинаред хwәда. Гьли у кьред wәйә баш дькарьн wана бәрбь рʹастийе бькʹьшиньн. Пьрсе бьдьнә хwә: «Щинаред мьн дәрһәqа мьн чь дьфькьрьн? Мала мьн у дор бәре мала мьн тʹәмьз у тʹәрбәт ә? Әз аликʹарийе дьдьмә щинаред хwә?» Жь хушк-бьред дьн бьпьрсьн кö qәнщийа wан у рʹабун-рʹуньштьна wан, ча һʹöкöм дькә сәр мәрьвед wани незик, щинар, һәвалхәбатчи йан жи һәвалдәрсханед wан. Бешьк, һуне жь wана qәwьмандьнед баш бьбьһен (Әфәс. 5:9).

ҺʹЬШЙАР БЬМИНЬН

15. Чьрʹа гәләк фәрз ә һʹьшйар бьминьн?

¹⁵ Һәрге әм дьхwазьн кö рʹонайа мә шәwq бьдә, әм гәрәке фәʹм кьн кö чь wәʹдәйида дьжин. Иса гәләк щар дьготә шагьртед хwә: «Һʹьшйар бьминьн» (Мәт. 24:42; 25:13; 26:41). Һәрге әм баwәр дькьн wәки тәнгасийа мәзьн һе дур ә йан жи wе wәʹде мәда нәйе, һьнге әме хьзмәтийеда хирәта хwә öнда кьн у хьзмәти wе ида бона мә фәрз нибә (Мәт. 24:21). Һьнге шәwqа мә wе һеди-һеди сьст бә у дьбәкә һәла һе жи бьтәмьрә.

16, 17. Чьрʹа әм гәрәке иро һʹьшйар бьминьн?

¹⁶ Зәман һе хьраб дьбә, ләма жи әм гьшк гәрәке һʹьшйар бьминьн. Рʹожа Йаһоwа wе wәʹдәда бе у ве йәкеда шьк тʹöнә (Мәт. 24:42-44). Әм гәрәке сәбьр кьн у илаһи ньһа гәрәке алийе рʹöһʹанида мьqати хwә бьн. Һәр рʹож Хәбәра Хwәде бьхуньн у һәр гав Йаһоwарʹа дöа бькьн (1 Пәт. 4:7). Чʹәʹв бьдьнә wан хушк-бьра, йед кö бь сала Йаһоwарʹа хьзмәт дькьн, һʹьшйар дьминьн у шабуна хwә öнда накьн. Һун дькарьн сәрһатикә баш бь наве «Һʹәфте Сала Рʹишийе Кʹьнще Щьһу Дьгьрьм» бьхуньн «Бьрща Qәрәwьлийеда» йа 15 Нисане, сала 2012, рʹупʹелед 18-21.

¹⁷ Тʹьме нава шьхöле Йаһоwада бьн, мәрьварʹа qәнщийе бькьн у тʹәви хушк-бьра һәвалтийе бькьн. Әw йәк wе wәрʹа шабуне бинә, у бона wә wәʹдә wе зу дәрбаз бә (Әфәс. 5:16). Qьрʹнәк пешда, хушк-бьред мә гәләк тьштада пешда чун. Ле иро әм бь сайа рʹебәрийа Йаһоwа һе зедә шьхöл дькьн у һе зедә пешда чунә. Әм пе рʹонайа хwә öса шәwq дьдьн, кö мә нькарьбу әw йәк бьда бәр чʹәʹве хwә жи!

18, 19. Рʹуспи ча дькарьн аликʹарийе бьдьнә мә, wәки хьзмәтийа Йаһоwада хирәт бьминьн?

¹⁸ Әм чьqас ша дьбьн кö Йаһоwа наньһерʹә сәр гöнәкʹарийа мә у дьһелә әм жерʹа хьзмәт кьн. Әwи мәрʹа «пʹешкʹеш бь щурʹе мәрьва» дайә, демәк рʹуспийед щьвате. (Бьхунә Әфәси 4:8, 11, 12.) Ләма жи гава рʹуспи тʹәсәлийа wә бькьн, әве мәщале бьдьнә хәбате сәва жь билани у ширәтед wан һин бьн.

¹⁹ Мәсәлә, Инглистанеда жьн-мерәк жь дö рʹуспийа һиви кьрьн, wәки тʹәсәлийа wан бькьн, чьмки малда проблемед wан һәбун. Жьн рʹöһʹанида сьст бу, мере wе жи гот wәки әw дәрсдарәки баш нинә у qöльхкьрьна тʹәви малбәте һәр гав дәрбаз накә. Рʹуспийа дина wана данә сәр мәсәла Иса. Иса бона шагьртед хwә хәм дькьр. У рʹуспийа ширәт данә мер кö ве йәкеда чʹәʹв бьдә Иса, ле жьнерʹа ширәт дан wәки һе бь сәбьр бә. Рʹуспийа öса жи чәнд ширәт данә wан һәрда, кö ча әwана дькарьн али һәвдö бькьн, wәки тʹәви дö зарʹед хwә qöльхкьрьна тʹәви малбәте дәрбаз кьн (Әфәс. 5:21-29). Һьнә wәʹдә шунда, рʹуспийа пʹайе малхе мале дан, чьмки әwи ширәт qәбул кьрьн. Wана wи һелан кьрьн, wәки бәрдәwам кә итʹбарийа хwә рʹöһʹе пироз бинә, сәва алийе рʹöһʹанида бьбә малхеки баш. Һʹьзкьрьн у хәмкьрьна wан рʹуспийа али wе малбәте кьрьн, кö пе рʹонайа хwә шәwq бьдьн.

20. Чь кʹар ә һәрге әм пе рʹонайа хwә шәwq дьдьн?

²⁰ «Хwәзи ль wан һʹәмуйед кö жь Хöдан хоф дькьн у рʹийа Wида дьмәшьн» (Зәб. 128:1). Чахе әм мәрьва һелан дькьн Хwәдерʹа хьзмәт кьн, öса жи пе рʹабун-рʹуньштьна хwә йәктийе хwәй дькьн у һʹьшйар дьминьн, әм бәхтәwар дьбьн. Бь ве йәке әм пе рʹонайа хwә шәwq дьдьн. У гава мәрьв кьред wәйи баш бьвиньн, wе һелан бьн шькьрийе бьдьнә Баве мә (Мәт. 5:16).