Һәбука Рʹӧһʹани Али Мьн кьр Гәш бьм

Баве мьн Щон Милс сала 1913 шәһәре Нийу Йоркеда, 25 салийа хԝәда һатьбу ньхӧмандьне. Готара ньхӧмандьне Расел бьра хԝәндьбу. Паше һьнә ԝәʹдә шунда, баве мьн чубу Тринидаде, ԝедәре әԝи Констанс Фармер жьнти станд, йа кӧ Леколинкʹарәкә Кʹьтеба Пирозә хирәт бу. Баве мьн аликʹари дьда һәвале хԝә Ԝилиам Р. Броԝн, ԝәки «Фото-Драма Әʹфьрандьне» нишани мәрьва бькьн. Ԝана әԝ йәк дькьр, һʹәта Броԝн у жьна ԝи сала 1923-да Африкайа Рʹоһлатеда һатьнә кʹьфшкьрьне. Де-баве мьн һәрдӧ жи Мәсиһийед бьжарти бун, у Тринидадеда хьзмәт дькьрьн.

ДЕ-БАВ КӦ ӘМ ҺʹЬЗ ДЬКЬРЬН

Әм нәһә зарʹ бун, у де-баве мьн наве зарʹа пешьн данибун Рутерфорд, кӧ һьнге наве пресиденте Щьвака Бьрща Ԛәрәԝьлийе бу. Паше әз һатьмә буйине сала 1922-да, 30 Кануна Пешьн, у наве бьраки мә Клейтон Щ. Ԝудԝорт данә сәр мьн, йе кӧ һьнге щабдар бу бона готаред журнала «Ԛьрʹна Зерʹин» (иро журнала «Һʹьшйар Бьн!»). Де-баве мә әм бьрьнә мәкʹтәбе сәва әм хԝәндьне бьстиньн, ле йа лапә фәрз бона ԝана әԝ бу, ԝәки әм нетед рʹӧһʹани дайньн пешийа хԝә. Дийа мә һостә бу ве йәкеда, кӧ рʹьнд пе Кʹьтеба Пироз һәр тьшт шьровәдькьр. Баве мә һʹьз дькьр сәрһатийед Кʹьтеба Пироз мәрʹа гьли кә, у сәва әм әԝан сәрһатийа бьдьнә бәр чʹәʹве хԝә, әԝи пе емосийа у жеста гьли дькьр.

Әԝ щәфе ԝан бәред баш ани. Жь пенщ бьра, әз у дӧ бьред мьн Мәкʹтәба Гиләд дәрбаз бун. Се хушкед мә гәләк сала Тринидад у Тобагойеда ча пешәнг хьзмәт дькьрьн. Де-баве мә пе аликʹари, ширәткьрьн у мәсәла хԝәйә баш, әм «хана Хӧданда» дачʹькандьн. У бь сайа һеланед ԝан, мә кʹокед хԝә да у «һʹәԝшед Хԝәдейе мәда» гӧл да (Зәб. 92:13).

Мала мәда хушк-бьра тʹоп дьбун у дәрһәԛа хьзмәтийе хәбәр дьдан у паше дәрдькʹәтьнә хьзмәтийе. Пешәнг ԝедәре тʹоп дьбун, у гәләк щар дәрһәԛа мисйонере жь Канадайе Щорщ Йанг бьра хәбәр дьдан, йе кӧ тʹәсәлийа Тринидаде кьр. Де-баве мьн гәләк һʹәԝас гьли дькьрьн дәрһәԛа һәвалхьзмәткʹаред хԝә йед бәре, Броԝн у жьна ԝи, йед кӧ һьнге Африкайа Рʹоһлатеда бун. Әԝан һʹәму тьшта әз һелан кьрьм, кӧ мьн 10 салийа хԝәда дәстпекьр хьзмәт кьм.

ДӘСТПЕКА ХЬЗМӘТИЙА МЬН

Ԝи ԝәʹдәйи журналед мә мина агьр бун, чьмки әшкәрә дькьрьн нәрʹастийа рʹелигийед ԛәлп, комерсйалисм у политикед хьраб. Сәва ве йәке сәрԝеред дере, сала 1936-да нав сәрԝере Тринидаде дан, ԝәки һʹәму әʹдәбйәтед Щьвака Бьрща Ԛәрәԝьлийе ԛәдәхә кьн. Мә һʹәму әʹдәбйәт вәшарт, ле бәрдәԝам дькьр бьдьнә хәбате һʹәта хьлаз бун. Әм нав шәһәр пе плаката у бәлгед әʹламәтийе ньга у пе бисиклета дьчун. Мә ӧса жи тʹәви кʹомәке жь шәһәре Тунапунайе бь әʹрәба дәнги хьзмәт дькьр, һәла һе жи щийед дур Тринидадеда. Әԝ ԝәʹдәки һʹәԝас у хԝәш бу! Әԝ шьхӧлед рʹӧһʹани әз һелан кьрьм, у әз 16 салийа хԝәда һатьмә ньхӧмандьне.

Рʹӧһʹанийа малбәта мә у әԝ ԛәԝьмандьнед бәре, нав мьнда нетәкә ӧса пешда анин, кӧ бьбьмә мисйонер. Әԝ нет һьнге жи дьле мьнда бу, чахе әз чумә Арубе сала 1944 у тʹәви Едмунд Ԝ. Кемингз бьра хьзмәт дькьр. Әм гәләк ша дьбун кӧ дәһ мәри һатьн сәр Биранине сала 1945-да. Саләкә дьн щьвата пешьн сәр ве гьраве һатә сазкьрьне.

Һьнә ԝәʹдә шунда, мьн һәвалхәбатчийа хԝә Орис Ԝилиамсрʹа шәʹдәти да. Орисе гәләк пьштгьрийа рʹелигийа хԝә дькьр. Ле бь сайа һинбуна Кʹьтеба Пироз, әԝ пеһʹәсийа ԝәки Хәбәра Хԝәде бь рʹасти чь дьбежә, у 5 Чьләйе сала 1947-да һатә ньхӧмандьне. Ԝәʹдә дәрбаз бу, дьле мьн кʹәтә ԝе. Мә һәв һʹьз кьр у һәв станд. Әԝе мәһа Мьждаре, сала 1950-да пешәнгти дәстпекьр. Әʹмьре мьн тʹәви Орисе һе гәш бу.

ХЬЗМӘТИЙА ҺʹӘԜАС НИЖӘРЙАЙЕДА

Сала 1955-да әм тʹәглифи Мәкʹтәба Гиләд кьрьн. Әз у Орис сәва хԝә һазьр кьн бона ԛәдьрәки ӧса мәзьн, мә хәбата хԝә һишт, мала хԝә у һур-муред хԝә фьрот, у жь гьрава Арубе дәркʹәтьн. Мә 29 Тирмәһе, сала 1956-да Мәкʹтәба Гиләд хьлаз кьр у Нижәрйайеда һатьнә кʹьфшкьрьне.

Чахе Орисе ԝәʹде бәре ани бира хԝә, гот: «Рʹӧһʹе Йаһоԝайи пироз дькарә али мәрьва бькә, ԝәки әԝ ԝәʹде хьзмәтийа мисйонерти һини гӧһастьна бә. Мьн ԛә нәдьхԝәст бьбьмә мисйонер, ле мере мьн дьхԝәст. Мьнрʹа һе баш бу мала хԝәда бьм у зарʹа мәзьн кьм. Ле мьн ньһерʹандьна хԝә гӧһаст гава мьн фәʹм кьр, ԝәки чьԛас фәрз ә мьзгинийе бәла кьн. Чахе мә Мәкʹтәба Гиләд хьлаз кьр, әз ида бь тʹәмами һазьр бум бьбьмә мисйонер. Чахе әм гәрәке ида бькʹәтана гәмийе, ԝәки һәрʹьнә щийе кʹьфшкьрьна хԝә, бьраки бь наве Ԝорт Торнтон, кӧ тʹәви Нор бьра дьхәбьти, һат ԝәки хатре хԝә мә бьхԝазә. Әԝи готә мә, ԝәки әме Бәйтʹәледа хьзмәт кьн. Әз бәрхԝә кʹәтьм у мьн хԝәрʹа гот: ‹Оһ, на!›. Ле әз зу һини Бәйтʹәле бум у мьн әԝ хьзмәти һʹьз кьр. Ԝедәре мьн щурʹә-щурʹә шьхӧл дькьр. Шьхӧле лапә һʹәԝас кӧ мьн һʹьз дькьр, шьхӧле ресепшенеда бу, кʹидәре мьн меван ԛәбул дькьрьн. Әз мәрьва һʹьз дькьм у ләма әԝ кʹьфшкьрьн бона мьн һʹәԝас бу. Ԝедәре мьн гәләк хушк-бьра нас кьрьн. Гәләк жь щийед дур дьһатьн вәстийайи, тʹозгьрти у тʹи-бьрчи. Мьн али ԝан дькьр, чьда әԝана һʹәԝщә бун. Әԝ һʹәму тьшт хьзмәтийа пироз бу, у әԝе йәке әз бәхтәԝар дькьрьм». Бәле, һәр щурʹә кʹьфшкьрьн али мә кьр, кӧ мә рʹӧһʹанида гӧл дьда.

Сала 1961 әм чунә Тринидаде, у тʹәви малбәта хԝә тʹоп бун. Броԝн бьра жи ԝедәре бу у мәрʹа ԛәԝьмандьнед хԝәйи һʹәԝас гьли кьр, кӧ Африкайеда ԛәԝьмибун. Паше мьн жи гьли кьр кӧ Нижәрйайеда шьхӧл ча пешда дьчу. Броԝн бьра бь дьл дәсте хԝә дани сәр мьле мьн у готә баве мьн: «Щони, тӧ ӧса жи нәчуйи Африкайе, ле бал кӧрʹе тә Ԝудԝорт һатә стандьне!». Баве мьн жи мьнрʹа гот: «Әʹфәрьм Ԝудԝорт! Һәма ӧса жи бәрдәԝам кә!».

Сала 1962, мьн ԛәдьрәки ӧса станд, ԝәки диса һәрʹьм Мәкʹтәба Гиләд у курса дәһ-мәһи дәрбаз бьм. Һьнге бәрпьрсийаре филиала Нижәрйайе Ԝилфред Гош бьра бу, әԝ паши мьн һатә тʹәглифкьрьне Мәкʹтәба Гиләде у паше ль Инглистане һатә кʹьфшкьрьне. Паши ԝи, ида әз щабдар бум бона филиале. Мьн чʹәʹв дьда Броԝн бьра ве йәкеда, кӧ әз гәләк щар дьчумә щурʹә-щурʹә щийа, сәва тʹәви хушк-бьред ԝедәре бьбьмә нас у һʹьзкьрьна хԝә ԝанрʹа бьдьмә кʹьфше. Рʹаст ә ԝана алийе материалида нәдьжит мина мәрьвед дәԝләтед пешдачуйида, ле йәкә әԝана тʹьме ша бун у рʹази бун чь жи бал ԝана һәбу. Әԝе йәке әʹйан дькьр, ԝәки бәхтәԝари һәбукева у пʹәрава гьредайи нинә. Әԝана кʹәсиб бун, ле әз әʹщебмайи дьмам, ԝәки әԝана тʹьме тʹәмьз, тʹәрбәт у лайиԛ дьһатьнә щьвате. Чахе әԝана дьчунә сәр щьватед мәзьн, гәләк жь ԝана пе әʹрәбед баркʹеш дьһатьн, ԝан әʹрәбарʹа дьготьн «болекайас»a (мәрьвед ԝедәре жь әʹрәбед баркʹеш отобус чедькьрьн, кӧ һәрдӧ алийава вәкьри бун). Сәр гәләк ԝан отобуса ньвисар һәбун. Мәсәлә сәр йәке ӧса ньвисар бу: «Жь дьлопед аве, окйануса мәзьн чедьбә».

Рʹасти жи әԝ гьли чьԛас рʹаст ьн! Щәфе тʹӧ кәси пʹучʹ нинә, у щәфе мә жи бадиһәԝа нибу. Незики сала 1974, алийе зедәбуна мьзгинванада паши Дәԝләтед Йәкбуйи, Нижәрйа щийе пешьн бу, чьмки ԝедәре һʹәсабе мьзгинвана гьһиштә 100 000. Бәле, шьхӧле бәлакьрьна мьзгинийе гӧл дьда!

Ԝәʹде ве пешдачуйине, Нижәрйайеда шәрʹе мьләтийе дәстпебу, кӧ жь сала 1967 һʹәта сала 1970 кʹьшанд. Чәнд мәһа, хушк-бьред мә кӧ Бийафрайеда алийе Чʹәме Нижәре бун, жь филиале ԛәтийайи бун. Ләма мә гәрәке ԝанрʹа хԝарьна рʹӧһʹани бьвьра. Чаԝа мьн дәстпекеда гьли кьр, мә дӧа дькьр у итʹбарийа хԝә Йаһоԝа дьани, ӧса әм чәнд щара ԝи чʹәмирʹа дәрбаз бун.

Рʹьнд те бира мьн, кӧ ча хоф бу ви чʹәмирʹа дәрбаз бьн у әʹмьре хԝә бькьнә бьн ԛәзийе, чьмки әскәред кӧ беһʹәмде хԝә мәрьв гӧлә дькьрьн, дькарьбун әм жи бькӧштана, йан жи мә дькарьбу нәхԝәши у диса зийанед майин бьстанда. Бәс нибу әм нав ордийед дәԝләтерʹа дәрбаз дьбун, ижа әм гәрәке бь тьрс у хофе алийе Бийафрайерʹа дәрбаз буна, дора кʹижане гьртибу. Щарәке, әз шәв жь шәһәре Асабайе һʹәта шәһәре Онитша пе ԛәйьке ԝи чʹәме гӧррʹа дәрбаз бум, у чумә шәһәре Енугу, сәва бәрпьрсийара дьлгәрм кьм у ԛәԝи кьм. Әз ӧса жи чумә шәһәре Абадайе сәва рʹуспийед ԝедәре ԛәԝи кьм. Ԝедәре евара лус весанди бун, сәва дьжмьн ԝана нәвиньн. Порт Һаркуртеда, мә щьвата хԝә зу бь дӧа хьлаз кьр, гава әскәред дәԝләте дәрбази әскәред Бийафра бун у кʹәтьн шәһәр.

Әԝ щьвин гәләк фәрз бун, чьмки мә әԝана дьдан баԝәркьрьне, ԝәки Йаһоԝа ԝана һʹьз дькә у бона ԝан хәм дькә. Һьн жи әԝана һʹәԝще ширәткьрьне бун, ԝәки тʹәвнәбуйине у йәктийе хԝәй кьн. Әԝ хушк-бьред жь Нижәрйайе, нава ԝи шәрʹе бехԝәдетида амьн ман. Рʹаст ә һьнге нава бәрәкада дьжмьнати һәбу, ле ԝана һʹьзкьрьна мәзьн у йәктийа Мәсиһити да кʹьфше. Бона мьн әԝ рʹасти жи ԛәдьрәки гәләк мәзьн бу, ԝәки ԝи ԝәʹде гьранда кʹеләка ԝан бум!

Сала 1969-да, Милтон Г. Һеншел бьра, бәрпьрсийаре бәрнаме бу, йа щьвата мәзьнә һʹәмдьнйайе бь наве «Әʹдьлайи сәр Әʹрде», кʹижан кӧ Нийу Йоркеда сәр Стадиона Йанке дәрбаз бу. Әз аликʹарчийе ԝи бум, у әз чь кӧ жь ԝи һин бум, кери мьн һат. Сала 1970-да Нижәрйайеда, шәһәре Лагоседа щьвата һʹәмдьнйайе дәрбаз бу, бь наве «Мәрьв жь Кʹижана Хԝәде Рʹази йә». Паши шәрʹ, әԝ щьвата мәзьн ӧса рʹьнд дәрбаз бу, кӧ тʹәне пе кʹәрәма Йаһоԝа дькарьбу бьһата стандьн. Әԝ рʹасти жи рекорд бу, ԝәки әԝ щьвата мәзьн сәр 17 зьмана дәрбаз бу, кʹидәре кӧ 121 128 мәри һатьбун. Нор у Һеншел бьра у йед дьн жь Амәрикайе у Инглистане пе тәйаре һатьбун. Әԝана шәʹде ве йәке бун кӧ 3 775 шагьртед тʹәзә һатьнә ньхӧмандьне. Паши Рʹожа Пенщийе Һʹәсабе, тʹӧ щар һаԛас мәрьв нәһатьбун ньхӧмандьне! Мьн аликʹари дьда организәкьрьна ве щьвата мәзьн у әʹмьре мьнда дькарьм бежьм тʹӧ щар һаԛас шьхӧле мьн тʹӧнә буйә. Һәжмара мьзгинвана ӧса мәзьн бу, кӧ гәләк әʹщебмайи бу.

Паше, нава 30 сала зедәтьр, щар-щара Африкайа Рʹоһлатеда мьн ча бәрпьрсийаре рʹеԝи у бәрпьрсийаре кӧ тʹәсәлийа филиала дькә, хьзмәт дькьр. Мисйонер гәләк рʹази бун у ша дьбун, кӧ мә әԝана дьлгәрм дькьрьн у пʹайе ԝан дьда! Әԝ бона мьн ԛәдьр бу кӧ дьл бьдьмә ԝана, у нишан кьм ԝәки ԝана бир накьм! Ԝан кʹьфшкьрьнада әз һин бум, ԝәки чахе бона хушк-бьра хәм дьки, әԝана гәш дьбьн, ԛәԝи дьминьн у тʹәшкиләта Йаһоԝада йәктийе хԝәй дькьн.

Тʹәне пе аликʹарийа Йаһоԝа мә карьбу бәр чәтьнайед шәрʹе мьләтийева у нәхԝәшийава гьредайи тәйах кьн. Мә кʹәрәма Йаһоԝа тʹьме әшкәрә дьдит. Орисе гьли кьр:

«Чәнд щара әм һәрдӧ жи пе нәхԝәшийа маларйа нәхԝәш кʹәтьн. Щарәке Ԝудԝорт хәрьԛи у кʹәтә нәхԝәшхана Лагосе. Мьнрʹа готьн ԝәки әԝ бәр мьрьне йә, ле ча баш ә кӧ әԝ сах ма! Чахе әԝ сәр һʹьше хԝәда һат, әԝи дәрһәԛа Пʹадшатийа Хԝәде шәʹдәти да бәрдәстийе һʹәким, кʹижан кӧ мьԛати ԝи дьбу. Ԝәʹдә дәрбаз бу, әм тʹәви Ԝудԝорт чун тʹәсәлийа ԝи бәрдәстийе һʹәким бькьн, наве ԝи Нԝамбиԝе бу. Мә дьхԝәст һʹәԝаса ԝи пешда биньн һьндава Кʹьтеба Пироз. Әԝи рʹасти ԛәбул кьр у ахьрийеда бу рʹуспи шәһәре Абайеда. Мьн аликʹари да гәләк мәрьва, һәла һе жи Мьсьлманед хирәтрʹа, ԝәки бьбьнә хьзмәткʹаред Йаһоԝа, у әԝ шабунәкә лапә мәзьн бу бона мьн. Ле әм ӧса жи ша дьбун, чьмки мә щьмәʹта жь Нижәрйайе нас кьр. Мә әԝ щьмәʹт, ӧса жи әʹрф-әʹдәт у зьмане ԝан һʹьз кьр».

Диса дәрсәк кӧ әм һин бун: Сәва әм хьзмәтийа хԝәда ль ԝәлате хәриб гәш у пешдачуйи буна, әм гәрәке һин буна хушк-бьред ԝедәре һʹьз кьн, фьрԛи тʹӧнә әʹдәтед ԝан ча щӧдә дьбун жь әʹдәтед мә.

КʹЬФШКЬРЬНА ТʹӘЗӘ

Паши хьзмәтийа мәйә Бәйтʹәла Нижәрйайеда, сала 1987-да мә кʹьфшкьрьна тʹәзә станд. Әм ча мисйонер һатьнә кʹьфшкьрьне гьравәкә гәләк бәдәԝда, Ст. Лучиада, кӧ сәр Кариба йә. Әм ве кʹьфшкьрьнерʹа ша дьбун, ле әм рʹасти чәтьнайед тʹәзә жи һатьн. Бәʹса хәбәре, Африкайеда әʹдәтәкә ӧса һәйә, ԝәки мер дькарә гәләк жьна бьстинә, ле Ст. Лучиайеда мәрьвед кӧ нәзәԝьщи бун тʹәвайи дьжитьн. Гәләк мәрьва тʹәви кʹе мә һинбуна Кʹьтеба Пироз дәрбаз дькьр, бь сайа Хәбәра Хԝәде кӧ ԛәԝи йә, гәләк гӧһастьн кьрьн.

Жь бо әʹмьре мәйи мәзьн, Кʹома Рʹебәрийе сала 2005-да әм дәрбази филиала сәрәкә кьрьн, кӧ Бруклинеда бу (Амәрика). Әз һʹәта иро жь Йаһоԝа рʹази мә бона Орисе. Ле сәд һʹәйф, сала 2015-да әԝ мьр. Әԝ дәрдәки ӧса гьран ә, кӧ пе гьлийа найе готьне. Әԝ һәваләкә лапә баш бу, әԝ бь һʹьзкьрьн у ширьн бу. Мьн Орис гәләк һʹьз дькьр, мә тʹәвайи 68 сала жит. Мә фәʹм кьр, кӧ һәрге мәрьв дьхԝазә зәԝащеда у щьватеда бәхтәԝар бә, йа лапә фәрз әԝ ә, кӧ ԛәдьре һʹӧкӧмәтийе бьгьрә, бь дьл бьбахшинә мәрьва, шкәсти бә, у бәре рʹӧһʹе пироз нав хԝәда пешда бинә.

Чахе әм дьлшкәсти дьбун йан жи бәрхԝә дькʹәтьн, чʹәʹве мә тʹьме ль Йаһоԝа бу, ԝәки әԝ кʹәрәм кә ԝан ԛӧрбана кӧ мә дькьр. Чахе әм һини гӧһастьна дьбун, мә дьдит ԝәки һәр тьшт һеди-һеди баш дьчә, ле ԝәʹдәки дьһа хԝәш һе һивийа мә йә (Иша. 60:17; 2 Корн. 13:11).

Тринидад у Тобагойеда, Йаһоԝа шьхӧле де-баве мьн у хушк-бьред дьн кʹәрәм кьр бь ве йәке, кӧ анәгори һʹәсабед пашԝәхтийе, 9 892 мәри һатьнә сәр рʹийа рʹаст. Арубеда, гәләк хушк-бьра аликʹари дьданә ве щьвата пешьн, кʹидәре бәре әз дьчум. Ньһа ве гьраведа 14 щьватед пешдачуйи һәнә. Һәжмара мьзгинвана Нижәрйайеда буйә ча әʹлаләтәкә ԛәԝи у мәзьн, кӧ жь 381 398 мәрьва йә. У сәр гьрава Ст. Лучиа, 783 мьзгинван пьштгьрийа Пʹадшатийа Йаһоԝа дькьн.

Иро әз ида 90 сали зедәтьр ьм. Зәбур 92:14 дәрһәԛа ԝан кӧ мала Йаһоԝада дачьканди нә, дьбежә: «Һʹәта мәзьнайийа хԝәда жи ԝе бәр бьдьн, тәрʹ у шин ԝе бьминьн». Әз гәләк жь Йаһоԝа рʹази мә, кӧ мьн әʹмьре хԝә хьзмәтийа ԝида дәрбаз кьр. Әԝ һәбука рʹӧһʹани кӧ мьн жь бьчʹуктайе станд, дьл да мьн, ԝәки бь амьни Йаһоԝарʹа хьзмәт кьм. Йаһоԝа жь һʹьзкьрьна хԝәйә амьн ԛәдьрәки ӧса да мьн, ԝәки «һʹәԝшед Хԝәдейе [хԝәда] гӧл» бьдьм (Зәб. 92:13).