Ԛӧтʹийа Пьрса
Ча гәрәке зарʹа һин кьн, сәва кӧ әԝана рʹӧһʹанида гьһишти бьн у пешда һәрʹьн?
Де-баве Мәсиһи жь алийе хԝәда һʹәму тьшти дькьн, сәва кӧ зарʹед хԝә «бь ширәт у һинкьрьна Хӧдан мәзьн кьн» (Әфәс. 6:4). Мәсәлә, де-бав фәʹм дькьн кӧ чахе әԝана һәр шәбәԛ тʹәви зарʹа шеԝьр дькьн дәрһәԛа рʹеза рʹоже йа жь Кʹьтеба Пироз, әв йәк сәва зарʹа гәләк керһати йә. Ԝәʹде ԛӧльхкьрьна тʹәви малбәте, йан жи шьхӧлед дьн, малбәт дькарьн тʹәвайи бьньһерʹьн у шеԝьр бькьн дәрһәԛа видеойәки. Де-бав ӧса жи дькарьн шеԝьр бькьн дәрһәԛа тʹемаке жь ве готаре «Пьрсед Щаһьла у Ширәтед Керһати», бьԝәкʹьлиньн һьнә сәрһатийа жь Кʹьтеба Пироз, йан жи дькарьн тʹәвайи тʹәмашәки һазьр кьн кӧ зарʹ һин бьн. Демәк сәва кӧ зарʹ «бенә ль сәр һинбуна гьһишти», лазьм ә ԝәки ԝана ӧса жи һе зедә һин кьн дәрһәԛа рʹастийед жь Кʹьтеба Пироз (Ибрн. 6:1).
Дьшьрмиш бә, һәла чь әм һин дькьн мәрьвед мьһала хԝә. Чахе әм щара пешьн тенә щәм мәрийа, йан жи чахе сәрледана дӧбарә дькьн, әм тʹьме дьхәбьтьн кӧ тʹәви ԝан дәстпекьн һинкьрьна Кʹьтеба Пироз бь ве кʹьтебе: «Чь Һин Дькә Кʹьтеба Пироз?». Ле чахе мәри әв кʹьтеб дәрбаз бу, әм тʹәви ԝи дәстпедькьн һинкьрьна кʹьтеба «Хԝә Нава Һʹәзкьрьна Хԝәдеда Хԝәй кә». Чьрʹа? Кʹьтеба «Чь Һин Дькә Кʹьтеба Пироз?», али мәрийа дькә, кӧ әԝана бьстиньн занәбуне дәрһәԛа Кʹьтеба Пироз. Ле кʹьтеба «Хԝә Нава Һʹәзкьрьна Хԝәдеда Хԝәй кә», ԝана һин дькә кӧ чаԝа дькарьн принсипед жь Кʹьтеба Пироз әʹмьре хԝәйи һәр рʹожида бьдьнә хәбате. Һинбуна ван дӧ кʹьтеба аликʹарийе дьдә йед тʹәзә, сәва кӧ әԝана «баԝәрийеда шьдийайи һʹимгьрти бьн» (Колс. 2:6, 7). Ле гәло әв кʹьтеб ԝе сәва зарʹед мә жи керһати бьн? Бәле, зарʹ жи гәрәке пебьһʹәсьн у һин бьн дәрһәԛа кʹьрине, Пʹадшатийе у һʹале мьрийа. Әԝана ӧса жи гәрәке бьзаньбьн, кӧ чьрʹа Хԝәде дьһелә ԝәки кӧл-дәрд һәбьн, у чаԝа дькарьн рʹожед ахьрийе тедәрхьн. Хенщи ԝе йәке зарʹ гәрәке избат бьн, кӧ щәм Шәʹдед Йаһоԝа һәйә рʹасти. Әԝана гәрәке фәʹм бькьн принсипед Кʹьтеба Пироз, у ӧса жи кӧ чаԝа дькарьн «тегьһиштьна» хԝә һин кьн (Ибрн. 5:14, ИМ). Һәмьки де-бав гәрәке һьлдьн һʹәсаб кӧ зарʹед ԝан чәнд сали нә, у чьԛас әԝана дькарьн фәʹм бькьн. Хенщи ве йәке һәнә гәләк зарʹед ӧса жи, фәрәсәтед кʹижана кӧ һәйә ԝәки зу һьлдьн у фәʹм бькьн һинкьрьнед кʹур жь Кʹьтеба Пироз (Луԛа 2:42, 46, 47).
Сәва кӧ де-бав аликʹарийе бьстиньн, ль сәр jԝ.org ԝе әʹдәбйәтед сәва һинбуне бенә данине, йед кӧ ль сәр һʹиме ве кʹьтебе нә: «Чь Һин Дькә Кʹьтеба Пироз?». У де-бав дькарьн әве йәке дь малпәра мәда бьвиньн. Ле ахьрийеда әʹдәбйәтед зедә сәва һинбуне, ԝе бенә һазьркьрьне ль сәр һʹиме кʹьтеба «Хԝә Нава Һʹәзкьрьна Хԝәдеда Хԝәй кә». Ле әв кʹьтебед бь формата нәшьркьри жи, дькарьн бенә хәбьтандьне. Демәк де-бав дькарьн хԝәха сафи кьн кӧ әв кʹьтеб чь чах бьдьнә хәбате. Мәсәлә де-бав дькарьн әв бьдьнә хәбате, ԝәʹде ԛӧльхкьрьна тʹәви малбәте, йан чахе башԛә тʹәви зарʹәкә хԝә һинкьрьне дәрбаз дькьн. Ӧса жи чахе зарʹа хԝә һин дькьн, кӧ әԝ бькарьбә һинбуна шәхси дәрбаз кә.