Дәрбаз Дькьн Һинкьрьна Кʹьтеба Пирозә Керһати
1. Чь щабдари һәйә щәм ԛӧльхкʹаре кӧ һинкьрьна Кʹьтеба Пироз дәрбаз дькә?
1 Тʹӧ кәс нькарә Хԝәдерʹа ԛӧльх кә, һʹәта кӧ Йаһоԝа әԝи бәрбь хԝә «нәкʹьшинә» (Йуһʹн. 6:44). Чь жи һәбә ԛӧльхкʹаре кӧ һинкьрьна Кʹьтеба Пироз дәрбаз дькә, гәрәке жь алийе хԝәва һʹәму тьшти бькә, кӧ али мәрийа бькә незики Баве хԝәйи әʹзмана бьн (Аԛб. 4:8). Сәва ве йәке лазьм ә һазьрбун. Сәва кӧ али мәрийа бьки фәʹм бькьн нета мьзгинийа хере у пешда һәрʹьн, бәс нинә тʹәне абзасе бьхуни у пьрсед нәшьркьри бьди.
2. Чь лазьм ә сәва кӧ һинкьрьна Кʹьтеба Пирозә керһати дәрбаз кьн?
2 Сәва кӧ һинкьрьна керһати дәрбаз кьн, ԛӧльхкʹар гәрәке али мәрийа бькә ԝәки әԝ (1) фәʹм бькьн кӧ чь һин дькә Кʹьтеба Пироз, (2) ԛәбул кьн һинкьрьнед Кʹьтеба Пироз, у (3) бьԛәдиньн әԝе йәке, чь кӧ Кʹьтеба Пироз һин дькә (Йуһʹн. 3:16; 17:3; Аԛуб 2:26). Щарна чәнд мәһ лазьм ә сәва кӧ али мәрийа бькьн, ван се гава бьԛәдиньн. Һәр гавәкә кӧ мәрьв дькә, дьдә кʹьфше ԝәки әԝ һәләԛәтийа хԝә тʹәви Йаһоԝа мәзьн дькә у хԝә тʹәсмили ԝи дькә.
3. Чьрʹа дәрсдаред щерʹьбанди пьрсед сәва дьшьрмишбуне дьдьнә мәрийа?
3 Дәрһәԛа Ньһерʹандьна Мәрийа Пебьһʹәсә: Әм гәрәке пебьһʹәсьн һәла мәрьве кӧ һин дьбә, фәʹм дькә у ԛәбул дькә һинкьрьнед Кʹьтеба Пироз, йан на. Сәва ԝе йәке лазьм ә ԝәки нә кӧ тʹәне әм хәбәр дьн, ле мәрийа һелан кьн ньһерʹандьна хԝә бежьн (Аԛуб 1:19). Гәло әԝ фәʹм дькә, ԝәки чь һин дькә Кʹьтеба Пироз дәрһәԛа ԝе тʹемайе, йа кӧ һун шеԝьр дькьн? Әԝ дькарә бь гьлийе хԝә әԝе тʹемайе шьровәкә? Чь әԝ дьшьрмиш дьбә дәрһәԛа ԝе йәке, чь кӧ һин буйә? Гәло әԝ баԝәр дькә ԝәки чь кӧ Кʹьтеба Пироз һин дькә, әв рʹаст ә? (1 Тʹеслн. 2:13). Әԝ фәʹм дькә кӧ гәрәке һьнә гӧһастьна дь әʹмьре хԝәда бькә, сәва кӧ ль гора ԝе йәке бьжи, чь кӧ әԝ жь Кʹьтеба Пироз пеһʹәсийа? (Колс. 3:10). Сәва кӧ щабед ԝан пьрса бьстиньн, әм гәрәке пьрсед сәва дьшьрмишбуне бьдьнә мәрийа, у паше гӧһ бьдьнә ԝан (Мәт. 16:13-16).
4. Әм чь гәрәке бькьн чахе дьвиньн, кӧ мәрийарʹа чәтьн ә һинкьрьна жь Кʹьтеба Пироз фәʹм бькьн йан бьԛәдинә?
4 Щәм һәр мәрьвәки һәйә хәйсәт у фькьред ԝанә шәхси, чь кӧ нав ԝанда кʹур рʹуньштьнә. Ләма жи щарна ԝәʹдә лазьм ә, сәва кӧ әԝана ван тьшта нав хԝәда бьгӧһезьн (2 Корн. 10:5). Ле һәрге мәрьв ԛәбул накә йан жи наԛәдинә әԝ тьштед кӧ һин буйә? Сәбьркьрьн у ԝәʹдә лазьм ә, сәва кӧ Хәбәра Хԝәде у рʹӧһʹе пироз, һʹӧкӧм кьн ль сәр дьле ԝан мәрийа, йед кӧ Кʹьтеба Пироз һин дьбьн (1 Корн. 3:6, 7; Ибрн. 4:12). Чахе әм дьвиньн ԝәки мәрийарʹа чәтьн ә һинкьрьна Кʹьтеба Пироз фәʹм бькьн йан жи бьԛәдиньн, әм гәрәке ԝана нәдьнә зоре. Ле ԝе баш бә ԝәки әм дәрбази тʹема дьн бьн. Һәрге әм бь сәбьркьрьн у һʹьзкьрьне бәрдәԝан дькьн Кʹьтеба Пироз мәрийа һин кьн, һьнге әԝ дькарьн һе һелан бьн, ԝәки гӧһастьнед лазьм нав хԝәда бькьн.