Хwәде у Һәвале Хwә Һʹьз Бькә: Чаwа Әве Һʹьзкьрьне Пешда Биньн

Рʹаст ә Qануна Муса борщдар накә Мәсиһийа, ле әв дö тʹәмийед фәрз, кö Хwәде у һәвале хwә һʹьз бькьн, һәта ньһа әʹйан дькә әw, чь кö Йаһоwа жь мә дәʹwа дькә (Мт. 22:37-39). Һʹьзкьрьна ви щурʹәйи хwәха пешда найе, әм гәрәке әw нав хwәда пешда биньн. Ле чь щурʹәйи? Йа әwльн, әв һәйә хwәндьна Кʹьтеба Пирозә һәррʹожи. Чахе әм һе зедә дәрһәqа Хwәде педьһʹәсьн, чаwа кö Ньвисаред Пирозда әʹйан кьрийә, öса әм зәлал дьвиньн «хwәшькийа Йаһоwа» (Зб. 27:4, ДО). Бь сайа ве йәке, һʹьзкьрьна мә һьндава Йаһоwа һе мәзьн дьбә у ньһерʹандьна мә жи, мина йе Wи дьбә. Әв мә һелан дькә тʹәмийед Хwәде пек биньн, нава кʹижани кö дькʹәвә тʹәми, wәки һьндава мәрийада һʹьзкьрьна дьлсах бьдьнә кʹьфше (Йн. 13:34, 35; 1 Йн. 5:3). Ль вьр се ширәт тенә дайине, кö чаwа хwәндьна Кʹьтеба Пироз даһа һʹәwас кьн:

• Зәлал бьдә бәр чʹәʹве хwә. Бьдә һʹәсабе хwә, кö тö wедәре йи. Тö чь дьбини, дьбьһей, у бина чь те? Чь дькари бежи дәрһәqа һәстен wан мәрийа, дәрһәqа кʹижана кö дьхуни?

  

• Хwәндьна хwә һʹәwас кә. Ль вьр чәнд рʹебәри тенә дайине. Бь дәнге бьльнд бьхунә, йан аудио-ньвисандьне вехә у бьра чʹәʹве тә жи ль Кʹьтеба Пирозда бә. Дәwса кö сәри пәй сәрийарʹа бьхуни, дькари бьхуни сәрһатийа мәрьвәки жь Кʹьтеба Пироз, йан дәрһәqа тʹемәки. Мәсәлә, дькари бьди хәбате брошура «Рʹебәри Бона Һинбуна Кʹьтеба Пироз» сәре 4 у 16 у бьхуни дәрһәqа Иса. Öса жи тö дькари бь тʹәмами бьхуни әw сәри жь Кʹьтеба Пироз, жь кʹижани кö рʹеза рʹоже һатьбу һьлдане. Бьхунә кʹьтебед жь Кʹьтеба Пироз бь wе сьрийе, чаwа кö әwана һатьнә ньвисаре.

  

• Бьхунә кö фәʹм бьки. Дәwса кö тʹәне гәләк сәрийа бьхуни, бь wе мәʹнийе кö зу хьлаз ки, wе баш бә һәр рʹож сәрик жь Кʹьтеба Пироз бьхуни у сәр бьфькьри. Һе зедә леколин кә дәрһәqа тьштед хwәнди у кʹур бьфькьрә. Бьдә хәбате хәрита у әʹламәтийа зедә, кö те дайине ортʹеда, сәр һәр рʹупʹеләкә Кʹьтеба Пироз. Дькари леколин бьки тьштәки, чь кö тәрʹа фәʹмдари нинә. Һәрге дьбә, һаqас wәʹдә бьфькьрә, чьqас wәʹдә тәйе сәр хwәндьне хәрщ кьра.