МИНА ИС БЬЖИН
«Паԝлос Шькьри да Хԝәде у Мерхаси да Кʹьфше»
Чахе щьвата Рʹоме бьһист кö Паԝлос те щәм ԝан, һьнге кʹома бьра ԝәкә 64 километр дәрбаз бун, сәва кö һәрʹьн рʹасти Паԝлос бен. Чь щурʹәйи һʹьзкьрьна ԝанә дьлован ль сәр Паԝлос һʹöкöм кьр? Әԝи «шькьри да Хԝәде у дьле ԝи шьдийа» (Кʹр.Шн. 28:15). Рʹаст ә Паԝлос әʹйан бу ча мәрьвәки кö тʹьме бь һатьна хԝә щьват һелан дькьр, ле чахе әԝ гьрти бу, әԝи хԝәха жь баԝәрманда һелане дьстанд (2 Кр. 13:10).
Иро бәрпьрсийаред мьһале сәрледана щьвата дькьн, сәва кö хушк-бьра ԛәԝи кьн у һелан кьн, чьмки щарна хушк-бьра дьвәстьн, хәмгин дьбьн у дьлтәнг дьбьн. Щарәкә дьн, чахе бәрпьрсийаре мьһале тʹәви кʹöлфәта хԝә сәрледана щьвата ԝә бькә, бьфькьрә кö чь тö дькари бьки сәва али ԝан ки мерхас бьн. Бь ве йәке әме «дьл бьдьн бәр һәв» (Рʹм. 1:11, 12).
Щьватед бона даннасинкьрьне бәрнәдә. Бәрпьрсийаре мьһале хԝәха жи гәләк һелан дьбә, чахе хушк-бьра жь алийе хԝәда ԛöрбана дькьн, ԝәки бенә сәр һʹәму щьватед кö ль ԝе һʹәфтийе кʹьфшкьринә (1 Тʹс. 1:2, 3; 2:20). Бьфькьрә кö ве мәһе чахе сәрледана бәрпьрсийаре мьһале йә, һәла тöйе бькарьби ча пешәнге кʹомәкдар хьзмәт ки. Тö дькари бьфькьри, ԝәки тʹәви ԝана дәркʹәви хьзмәте, йан жи ԝана бьви ль сәр һинбунәкә хԝә. Гәләк ԝана хԝәш те, тʹәви щурʹә-щурʹә хьзмәткʹара хьзмәт кьн, öса жи тʹәви йед тʹәзә у нәщерʹьбанди.
Меванһʹьзийа хԝә бьдә кʹьфше. Бьфькьрә кö ԝана тʹәглиф ки мала хԝә сәр хԝарьне, йан жи щи бона шәвмайине бьди ԝан. Бь ве йәке те бьди кʹьфше, ԝәки ԝана һʹьз дьки. Әԝана һивийе ниньн, кö һун гәләк тьшт бона ԝан бькьн (Лԛ. 10:38-42).
Гöһ бьдә, һьм жи ширәт у рʹебәрийа ԝи бьдә хәбате. Бәрпьрсийаре мьһале бь һʹьзкьрьн али мә дькә бьвиньн, кö чаԝа әм дькарьн хьзмәта хԝә Йаһоԝарʹа даһа баш кьн. Дьԛәԝьмә щарна әԝ ширәтәкә сәрт жи бьдә (1 Кр. 5:1-5). Әԝ ша дьбә, чахе әм гöһдар ьн (Ибр. 13:17).
Рʹазибуна хԝә бьдә кʹьфше. Бежә бәрпьрсийаре мьһале у кʹöлфәта ԝи, кö һатьна ԝан чьԛас бона тә кʹар ә. Тö дькари әве йәке ԝанарʹа бежи, йан жи бь щурʹе нәме ԝанарʹа бьньвиси (Кл. 3:15).