Тӧ Чаԝа Дькари Сәри бь Дьлтәнгийерʹа Дәрхи?

1. Дьлтәнги дькарә ль сәр мә чаԝа һʹӧкӧм бькә?

РʹОЖ бь рʹож, әм рʹасти проблема тен, у әм һәр тьшти дькьн кӧ сәри бь ԝанрʹа дәрхьн. Ле бәле, гава әм дьлтәнг дьбьн, ль мә зор те кӧ проблемед хԝә сафи бькьн. Дьлтәнги дькарә бьбә мәʹни кӧ әм хԝәбаԝәри, мерхаси у шабуна хԝә ӧнда кьн. Кʹьтеба Пироз жи дьбежә кӧ дьлтәнги дькарә мә сьст бькә (Мәтʹлк. 24:10). Бәле, гава әм дьлтәнг дьбьн, әм бәлки бетʹаԛәт дьбьн у мәрʹа ида чәтьн дьбә бәр проблемед хԝә сәбьр бькьн.

2. Һьнә сәбәбед дьлтәнгийе чь нә, у ве готареда, әме чь һин бьбьн?

² Әм дькарьн сәва гәләк тьшта дьлтәнг бьбьн, мәсәлә сәва нәхԝәши йан ԛьсур у кемасийед хԝә. Йан жи, әм дькарьн дьлтәнг бьбьн, чьмки мә дь хьзмәта Йаһоԝада ве щабдарийе нәстандийә кӧ мә дьхԝәст, йан жи чьмки гәләк мәрьвед ль мьһала мә гӧһ надьн мьзгине. Ве готареда, әме бьвиньн кӧ әм чаԝа дькарьн бәр дьлтәнгийе сәбьр бькьн.

ԚЬСУР У КЕМАСИЙЕД МӘ

3. Хԝәде сәр кемасийед мә чаԝа дьньһерʹә у әв йәк чь мә һин дькә?

³ Мәрьв һеса дькарә сәва ԛьсур у кемасийед хԝә дьлтәнг бьбә у бьфькьрә кӧ Йаһоԝа ԝи һежайи жийана һәр-һәйи һʹәсаб накә. Ньһерʹандьнәкә ӧса хоф ә у дькарә зийане бинә. Гәло әм гәрәке сәр кемасийед хԝә чаԝа бьньһерʹьн? Ль гора Кʹьтеба Пироз, тʹәне Иса Мәсиһ гӧнә нәкьрийә, ле әм гьшк гӧнәкʹар ьн (Рʹом. 3:23). Ле бәле, Хԝәде бь зедәйи дина хԝә надә ԛьсуред мә. Әԝ Бавәки дьлован ә, у әԝ дьхԝазә али мә бькә. Ӧса жи, әԝ бьсәбьр ә. Әԝ дьвинә кӧ әм чаԝа хирәт дькьн кӧ жь ԛьсуред хԝә бьфьльтьн у дәрһәԛа хԝә бь зедәйи негатив нәфькьрьн. Хԝәде һәртʹьм һазьр ә кӧ али мә бькә (Рʹом. 7:18, 19).

4-5. Готьнед жь 1 Йуһʹәнна 3:19, 20 чаԝа али дӧ хушка кьр кӧ әԝ ньһерʹандьна хԝә рʹаст бькьн?

⁴ Сәрһатийед дӧ хушкед бь наве Деби у Мариа бинә бәр чʹәʹве хԝә.b Деби дь малбәтәкә дьлсарда мәзьн бьбу. Де-баве ԝе пʹайе ԝе нәдьдан. Ләма ԝе хԝә беԛимәт һʹәсаб дькьр. Гава әԝе шашийед бьчʹук дькьр, әԝ дьфькьри кӧ әԝ бекер ә. Һʹале Мариайе жи ԝәк һʹале ԝе бу. Мәрьвед ԝе әԝ ньмьз дькьрьн. Ләма, әԝе жи хԝә беԛимәт һʹәсаб дькьр. Паши кӧ әԝ бу Шәʹда Йаһоԝа жи, әԝ дьфькьри кӧ әԝ һежайи ви нави нинә.

⁵ Диса жи, ван дӧ хушка хьзмәта хԝә Йаһоԝарʹа нәданә сәкьнандьне. Гәло чьма? Чьмки йа лапә фәрз, ԝана жь дьл дӧа дькьр у баре хԝә Йаһоԝарʹа дьһиштьн (Зәб. 55:22). Ԝана фәʹм кьр кӧ Баве мәйи дьлован рʹьнд занә кӧ тьштед хьраб, йед кӧ һатьбун сәре мә, дькарьн бьбьн сәбәб кӧ әм хԝә ньмьз һʹәсаб кьн. Әм бәлки дьфькьрьн кӧ һʹӧнӧред мә йед баш тʹӧнәнә, ле бәле Йаһоԝа ӧса нафькьрә (1 Йуһʹәнна 3:19, 20 бьхунә).

6. Гава кәсәк шашикә хԝә дӧбарә дькә, әв йәк чаԝа дькарә ль сәр ԝи һʹӧкӧм бькә?

⁶ Гава кәсәк хирәт дькә кӧ тʹәрка хәйсәтәкә хьраб бькә, ле ви тьшти диса дькә, әԝ дькарә дьлтәнг бьбә. Һьлбәт нормал ә кӧ әм хԝә сәва шашийед хԝә сущдар бькьн (2 Корн. 7:10). Ле бәле, гәрәке әм нәфькьрьн кӧ әм бекер ьн у кӧ Йаһоԝа ԝе тʹӧ щара нәбахшинә мә. Ньһерʹандьнәкә ӧса нә рʹаст ә у дькарә бьбә сәбәб кӧ әм хьзмәта хԝә Йаһоԝарʹа бьдьнә сәкьнандьне. Ԝәк Мәтʹәлок 24:10 дьбежә, дьлтәнги дькарә мә сьст бькә. Ләма, дәԝса кӧ әм хԝә бь зедәйи сущдар бькьн, гәрәке әм Йаһоԝарʹа дӧа бькьн у жь ԝи бахшандьне бьхԝазьн (Иша. 1:18). Һәгәр әм жь дьл тʹобә бькьн, әԝе бьбахшинә мә. Ӧса жи, ԝе баш бә кӧ әм рʹуспийед щьватерʹа бәʹса проблема хԝә бькьн. Әԝе бь сәбьр али мә бькьн кӧ әм жь алийе рʹӧһʹанива ԛәнщ бьбьн (Аԛуб 5:14, 15).

7. Һәгәр әм ль һьмбәри кемасикә хԝә шәрʹ дькьн, гәрәке әм чьма мерхасийа хԝә ӧнда нәкьн?

⁷ Рʹуспики щьвате бь наве Жан-Лук, йе кӧ ль Франсайе дьжи, ԝанрʹа йед кӧ ль һьмбәри кемасикә хԝә шәрʹ дькьн, ӧса дьбежә: «Дь чʹәʹве Йаһоԝада, кәсе рʹаст нә әԝ ә йе кӧ ԛәт шашийа накә, ле әԝ ә йе кӧ сәва шашийед хԝә пʹошман дьбә у тʹобә дькә» (Рʹом. 7:21-25). Ләма, һәгәр тӧ ль һьмбәри кемасикә хԝә шәрʹ дьки, хԝә бекер һʹәсаб нәкә. Әм гьшк жи ԛьсурдар ьн, у әм һʹәԝщәйи кʹәрәма Хԝәде нә, йа кӧ әԝ бь сайа ԛӧрбана Иса ль сәр мә дьбаринә (Әфәс. 1:7; 1 Йуһʹн. 4:10).

8. Гава әм дьлтәнг дьбьн, әм дькарьн жь кʹе аликʹарийе бьстиньн?

⁸ Хушк у бьра дькарьн мә һелан бькьн. Гава әм дьхԝазьн бәʹса проблемед хԝә бькьн, әԝана дькарьн гӧһ бьдьн мә у дьл бьдьнә мә (Мәтʹлк. 12:25; 1 Тʹеслн. 5:14). Хушкәкә бь наве Щой, йа кӧ ль Нижәрийайе дьжи, дьбежә кӧ гава әԝ дьлтәнг дьбу, чь али ԝе дькьр: «Һәгәр хушк у бьра али мьн нәкьрана, мьне чь бькьра? Аликʹарийа ԝан избат дькә кӧ Йаһоԝа щаба дӧайед мьн дьдә. Бь сәрда, әз жь ԝан һин бумә кӧ әз чаԝа дькарьм кәсед дьн һелан бькьм, йед кӧ ԝәк мьн дьлгьран ьн». Ле бәле, гәрәке әм нәфькьрьн кӧ хушк у бьра һәртʹьм заньн кӧ һʹале мә чь йә. Ләма, ԝе бәлки лазьм бә кӧ әм һәрʹьн бал хушк йан бьраки гьһишти у бежьн кӧ әм һʹәԝщәйи аликʹарийе нә.

ДЬЛТӘНГИ ЖЬ БО НӘХԜӘШИЙЕ

9. Зәбур 41:3 у 94:19 мә чаԝа һелан дькьн?

⁹ Жь Йаһоԝа аликʹарийе бьхԝазә. Гава әм нәхԝәш дькʹәвьн – илаһи гава әм нәхԝәшикә кʹроники нәхԝәш ьн – бәлки ль мә зор те кӧ әм ньһерʹандьнәкә позитив хԝәй бькьн. Иро, Йаһоԝа мә һәр чьԛас бь кʹәрәмәта ԛәнщ нәкә жи, әԝ бәрдьлийе у ԛәԝате дьдә мә кӧ әм бькарьбьн сәбьр бькьн (Зәбур 41:3; 94:19 бьхунә). Мәсәлә, гава әм бона ишед мале йан бона кʹьрʹин-фьротьне һʹәԝщәйи аликʹарийе дьбьн, Хԝәде дькарә ль сәр дьле хушк у бьред мә һʹӧкӧм бькә кӧ әԝ али мә бькьн. Йан жи, әԝ дькарә ԝана һелан бькә кӧ әԝ тʹәви мә дӧа бькьн. Ӧса жи, әԝ дькарә готьнед дьлбини жь Кʹьтеба Пироз бинә бира мә, мәсәлә һевийа жийанәкә бе еш у бе нәхԝәшийе дьнйа тʹәзәда (Рʹом. 15:4).

10. Исанг чаԝа жь дьлтәнгийе фьльти?

¹⁰ Бьраки бь наве Исанг, йе кӧ ль Нижәрийайе дьжи, кʹәтә ԛәзике у шьл у шат бу. Доктор ԝирʹа гот кӧ әԝе ида нькарьбә бьмәшә. Исанг дьбежә: «Әз пʹьрʹ хәмгин у дьлгьран бум». Гәло чь али ԝи дькьр кӧ әԝ жь дьлтәнгийа хԝә бьфьльтә? Исанг ӧса дьбежә: «Әз у жьна мьн, мә бәрдәԝам дькьрьн Йаһоԝарʹа дӧа бькьн у Кʹьтеба Пироз леколин дькьр. Ӧса жи, мә дина хԝә дьда бәрәкʹәтед кӧ мә стандьнә, мәсәла һевийа жийана дьнйа тʹәзәда».

11. Гава Синди нәхԝәш кʹәт, әԝе шабуна хԝә чаԝа хԝәй дькьр?

¹¹ Хушкәкә бь наве Синди, йа кӧ ль Мәксике дьжи, бь нәхԝәшикә гьран нәхԝәш кʹәт. Дь ви һʹалида, гәло әԝе чаԝа сәбьр дькьр? Гава әԝ дьһатә ԛәнщкьрьн, әԝе хԝәрʹа нет дани кӧ һәр рʹож һәма мәрьвәкирʹа бәʹса мьзгине бькә. Әԝ ӧса дьньвисә: «Бь ви аԝайи, мьн дина хԝә дьда – нә сәр нәхԝәшийе, еша хԝә йан сәр ве кӧ мьн чьԛас хьраб хԝә тʹәхмин дькьр – ле сәр кәсед дьн. Ләма, гава мьн тʹәви һʹәким йан бәрдәстед һʹәкима хәбәр дьда, мьн жь ԝан дьпьрси кӧ малбәта ԝан чаԝа йә. Паше, мьн дьпьрси кӧ ԝана чьма хԝәрʹа ишәки һаԛас зор бьжартийә. Бь ви щурʹәйи, мьн фәʹм дькьр кӧ кʹижан тʹема дькарьн дьле ԝан бьгьрьн. Чәнд кәса гот кӧ пʹьрʹанийа кәсед нәхԝәш тʹӧ щара напьрсьн кӧ әԝ чаԝа ньн. Гәләк һʹәким у бәрдәстед һʹәкима сәва ве йәке жь мьн рʹази бун. Һәла һе һьнәк жь ԝана адрес йан һәжмара тʹела хԝә жи дьданә мьн. Дь ви һʹале зорда, Йаһоԝа дьле мьн пʹьрʹ ша дькьр!» (Мәтʹлк. 15:15).

12-13. Һьнә хушк у бьред мә йед нәхԝәш йан әʹмьрда мәзьн чаԝа хьзмәте дькьн?

¹² Хушк у бьред мә йед әʹмьрда мәзьн йан жи йед нәхԝәш щарьна дьлтәнг дьбьн, чьмки әԝ нькарьн мина бәре хьзмәт бькьн. Диса жи, әԝ чь жь дәсте ԝан те дькьн кӧ мьзгине бьдьн мәрьва. Мәсәлә, ль Америкайе, хушкәкә бь наве Лаурел, 37 сал дь һӧндьре мәкʹинәкә жь бо бинкʹьшандьнеда ма. Хенщи ве йәке, кансәра ԝе һәбу, әԝ чәнд щара һат операсийонкьрьн у нәхԝәшийа чʹәрм щәм ԝе һәбу. Диса жи, тʹӧ тьшти нькарьбу рʹийа ԝе бьгьрә кӧ әԝ бәʹса мьзгине нәкә. Әԝе мьзгин дьда бәрдәстед һʹәкима у кәсед дьн кӧ дьһатьн мала ԝе. Бь сайа хирәта ԝе, һәри кем 17 кәс бун Шәʹдед Йаһоԝа!c

¹³ Рʹуспики щьвате бь наве Ричард, бона кәсед кӧ нькарьн жь мале  дәркʹәвьн, у ԝанрʹа йед кӧ мала бона кал-пирада дьжин, ширәтәке ӧса дьдә: «Ԝе баш бә кӧ стенда әʹдәбйәта бал ԝан һәбә. Стендед ӧса ԝе дина мәрьва бькʹьшинә у бона хәбәрдане рʹе вәкә. Әв йәк дькарә дьле хушк у бьред мәйә дәлал, йед кӧ ида нькарьн мал бь мал хьзмәте бькьн, ша бькә». Ӧса жи, кәсед кӧ нькарьн жь мале дәркʹәвьн дькарьн бь нәʹма у бь тʹеле жи хьзмәте бькьн.

ГАВА ӘМ КʹЬФШКЬРЬНӘКЕ НАСТИНЬН

14. Даԝьд Пʹадша чаԝа мәрʹа бу мәсәлә?

¹⁴ Дьбә кӧ тӧ сәва кал-пирбуне, нәхԝәшийе йан сәбәбед дьн нькари хьзмәтеда һьнә кʹьфшкьрьна бьстини. Һәгәр һʹале тә ӧса йә, сәрһатийа Даԝьд Пʹадша бинә бәр чʹәʹве хԝә. Әԝи жь дьл дьхԝәст пʹарьстгәһа Хԝәде ава бькә. Гава Даԝьдрʹа һат готьн кӧ изна ԝи тʹӧнә кӧ пʹарьстгәһе ава бькә, әԝи бь дьл у щан аликʹари да ви мәрьви, йе кӧ жь алийе Хԝәдева һат бьжартьн кӧ ви иши бькә. Ӧса жи, Даԝьд бона ве авакьрьне пʹьрʹ зер у зив һазьр кьр. Чь мәсәләкә баш! (2 Сам. 7:12, 13; 1 Дир. 29:1, 3-5).

15. Һуго чаԝа жь дьлтәнгийе фьльти?

¹⁵ Бьраки бь наве Һуго, йе кӧ  ль Франсайе дьжи, жь бо нәхԝәшийе ида нькарьбу ԝәк рʹуспи хьзмәт бькә. Сәрда жи, әԝи ида нькарьбу һьнә ишед мале бькә. Әԝ ӧса дьньвисә: «Дь сәрида, мьн хԝә беԛимәт тʹәхмин дькьр, у әз  пʹьрʹ дьлтәнг бум. Ле ԝәʹдә шунда, мьн фәʹм кьр кӧ гәрәке әз синоред хԝә ԛәбул бькьм, у мьн һьмбәри ван синора хьзмәта Йаһоԝада шабун дьстанд. Әзе тʹӧ щара хьзмәта хԝә нәдьм сәкьнандьне. Мина Гидәйон у 300 әскәред ԝи, йед кӧ ԝәстийайи бун у диса жи шәрʹе хԝә бәрдәԝам дькьрьн, әзе жи нәһельм кӧ дьлтәнги мьн бьшкенә!» (Һʹакьм. 8:4).

16. Мәсәла мәләкед амьн чь мә һин дькьн?

¹⁶ Мәләкед амьн мәрʹа мәсәлә нә. Ль дәма Аһаб Пʹадша, Йаһоԝа мәләка пьрси кʹа ԝана ԝе әв пʹадше хьраб чаԝа бьхапанда. Чәнд мәләка фькред хԝә готьн. Ле бәле, Хԝәде тʹәне йәк жь ԝан бьжарт у ԝирʹа гот кӧ фькра ԝи баш ә (1 Пʹадш. 22:19-22). Гәло мәләкед дьн әʹщьз бун у фькьрин кӧ хирәта ԝан бадиһәԝа бу? Һьлбәт на! Мәләк бь рʹасти мьлук ьн, у әԝана дьхԝазьн кӧ Йаһоԝа һʹәму пәсна бьстинә (Һʹакьм. 13:16-18; Әʹйан. 19:10).

17. Һәгәр әм хәмгин ьн жь бо кӧ мә һьнә кʹьфшкьрьнед хьзмәте нәстандьнә, гәрәке әм чь бькьн?

¹⁷ Бир нәкә ԝәки әԝ ԛәдьрәки мәзьн ә кӧ наве Хԝәде ль сәр мә йә у әм мьзгина Пʹадшатийа Хԝәде әʹлам дькьн. Әм дькарьн һьнә кʹьфшкьрьнед мәхсус бьстиньн йан жи ӧнда бькьн, ле бәле бона Йаһоԝа, тьште һәри фәрз әв ә кӧ әм мьлук бьн у синоред хԝә бьзаньбьн. Һәгәр әм мәрьвед ӧса бьн, һьм Йаһоԝа һьм жи хушк у бьред мә ԝе мә һʹьз бькьн. Ләма, жь Йаһоԝа аликʹарийе бьхԝазә кӧ тӧ мьлук бьмини. Сәрһатийед мәрьвед дьлньмьз, йед кӧ ль Кʹьтеба Пироз һатьнә ньвисандьн, бинә бәр чʹәʹве хԝә. Ише кӧ гәрәке тӧ бьки чь бә жи, ви иши бь дьл у щан бона кʹара хушк у бьра пек бинә (Зәб. 138:6; 1 Пәт. 5:5).

ГАВА МӘРЬВ ГӦҺ НАДЬН МЬЗГИНЕ

18-19. Һәгәр гәләк кәс гӧһ нәдьн мә, әм чаԝа дькарьн диса жи жь хьзмәте шабуне бьстиньн?

¹⁸ Гәло тӧ щарьна дьлтәнг дьби жь бәр кӧ ль һәрема тә, гәләк мәрьв гӧһ надьн мьзгине йан нә ль мале нә? Һәгәр ӧса йә, тӧ чаԝа дькари шабуна хԝә хԝәй бьки йан зедә бьки? Чаргошә «Хьзмәтеда Дьһа Пешдачуйи бә» нишан дькә кӧ әм чаԝа дькарьн жь хьзмәта хԝә зедәтьр шабуне бьстиньн. Ӧса жи, пʹьрʹ фәрз ә кӧ ньһерʹандьна мә ль сәр хьзмәте рʹаст бә. Гәло әм чаԝа дькарьн ньһерʹандьнәкә позитив хԝәй бькьн?

¹⁹ Бир нәкә кӧ нета һәри фәрз йа хьзмәта мә әв ә кӧ әм наве Хԝәде у Пʹадшатийа ԝи әʹлам бькьн. Иса Мәсиһ зәлал кьрьбу кӧ йед кӧ рʹийа жийане дьвиньн, һьндьк ьн (Мәт. 7:13, 14). Гава әм дьчьн хьзмәте, әм тʹәви Йаһоԝа, Иса Мәсиһ у мәләка һәвкʹарийе дькьн (Мәт. 28:19, 20; 1 Корн. 3:9; Әʹйан. 14:6, 7). Йаһоԝа кәсед һежа дькʹьшинә бал хԝә (Йуһʹн. 6:44). Ләма, һәгәр кәсәк ньһа мьзгине ԛәбул нәкә жи, әԝе бәлки щарәкә дьн гӧһ бьдә мә.

20. Ль гора Йерәмйа 20:8, 9, әм чаԝа дькарьн сәри жь дьлтәнгийе дәрхьн?

²⁰ Ве йәкеда Йерәмйа пʹехәмбәр мәрʹа мәсәләкә баш ә. Әԝи нав мәрьвед сәрт у сәрһʹьшкда хьзмәт дькьр. Мәрьва һәртʹьм ԛәрфед хԝә пе дькьрьн у пе дькʹәнийан (Йерәмйа 20:8, 9 бьхунә). Щарәке, Йерәмйа һаԛас әʹщьз бу кӧ әԝи дьхԝәст хьзмәта хԝә бьһелә. Ле әԝи ӧса нәкьр. Гәло чьма? Чьмки хәбәра Йаһоԝа дь дьле Йерәмйада ԝәк агьр бу, у әԝи нькарьбу хԝә бьгьрә. Гава һʹьш у дьле мә бь хәбәра Йаһоԝава тʹьжә дьбә, әм жи ӧса дьбьн. Ләма, пʹьрʹ фәрз ә кӧ әм Кʹьтеба Пироз рʹож бь рʹож леколин бькьн у ль сәр ԝе кʹур бьфькьрьн. Бь ви аԝайи, шабуна мә ԝе зедә бьбә, у хьзмәта мә ԝе һе зедә бәр бьдә (Йерәм. 15:16).

21. Әм чаԝа дькарьн сәри бь дьлтәнгийерʹа дәрхьн?

²¹ Деби, йа кӧ мә бәре бәʹса ԝе кьрьбу, ӧса дьбежә: «Шәйтʹан дькарә дьлтәнгийе ԝәк чʹәкәке бьхәбьтинә». Ле бәле, Йаһоԝа жь Шәйтʹан у һʹәму чʹәкед ԝи ԛәԝаттьр ә. Ләма, гава тӧ сәва тьштәки дьлтәнг дьби, Йаһоԝарʹа дӧа бькә кӧ әԝ али тә бькә. Бь аликʹарийа ԝи, тӧ дькари ль һьмбәри ԛьсур у кемасийед хԝә шәрʹ бьки. Һәрге тӧ нәхԝәши жи, Йаһоԝа ԝе кʹеләка тә бә у пьштгьрийа тә бькә. Ӧса жи, әԝе али тә бькә кӧ ньһерʹандьна тә йа ль сәр хьзмәта тә позитив бә. Бәле, Баве хԝәйи әʹзманирʹа дәрһәԛа хәмед хԝә гьли кә. Бь аликʹарийа ԝи, тӧ дькари сәри бь дьлтәнгийерʹа дәрхи.