Сәре Щьвате Мәсиһ йә

1. Гәло мәʹник чь йә кӧ малбәта Йаһоԝада йәкти һәйә?

ӘМ ГӘЛӘК ша нә кӧ әм пʹара малбәта Йаһоԝа нә. Гәло чьрʹа әʹдьлайи у йәкти нав мәда һәйә? Мәʹник әв ә кӧ әм принсипа сәритийе ԛәбул дькьн, йа кӧ Йаһоԝа данийә. Әм ве принсипе чьԛас баш фәʹм дькьн, һаԛас йәктийа мә зедә дьбә.

2. Ве готареда, әме щабед кʹижан пьрса бьстиньн?

² Ве готареда, әме бьвиньн кӧ щьватеда, нета сәритийе чь йә. Ӧса жи, әме щабед ван пьрса бьстиньн: Рола хушка чь йә? Гәло һәр бьра сәре һәр хушке йә? Гәло һʹӧкӧме рʹуспийед щьвате ль сәр хушк у бьра ԝәк һʹӧкӧме сәред малбәта йә? Йа пешьн, әме бьвиньн кӧ ньһерʹандьна мә сәр хушка гәрәке чаԝа бә.

НЬҺЕРʹАНДЬНА МӘ СӘР ХУШКА ГӘРӘКЕ ЧАԜА БӘ?

3. Сәва кӧ әм дьһа зедә шьхӧлед хушка бьшекьриньн, ԝе баш бә кӧ әм чь бькьн?

³ Әм ԛимәт дькьн хушкед кӧ бь дьл у щан малбәтед хԝә хԝәй дькьн, мьзгине бәла дькьн у пьштгьрийа щьвате дькьн. Сәва кӧ әм һе зедә ԝана ԛимәт бькьн, ԝе баш бә кӧ әм биньн бәр чʹәʹве хԝә кӧ Йаһоԝа у Иса Мәсиһ чаԝа сәр ԝана дьньһерʹьн. Ӧса жи, әме пебьһʹәсьн кӧ Паԝлосе шанди һьндава хушкада ча бу.

4. Әм жь кʹӧ заньн кӧ Йаһоԝа жьна ԛимәт дькә?

⁴ Кʹьтеба Пироз нишан дькә кӧ Йаһоԝа жьна ԛимәт дькә. Мәсәлә, ԛьрʹна йәкеда, Йаһоԝа рʹӧһʹе пироз нә тʹәне ль сәр мера, ле ль сәр жьна жи дьрʹьжанд у ԛәԝат дьда ԝан кӧ әԝана кʹәрәмәта бькьн. Мәсәлә, һьм жьн һьм жи мер бь щурʹә-щурʹә зьмана хәбәр дьдан (Кʹаред Шандийа 2:1-4, 15-18). Чаԝа жьн ӧса жи мер бь рʹӧһʹе пироз дьһатьн кʹьфш кьрьн, ԝәки әԝана бьбьн һәмпʹадшед Иса Мәсиһ (Галати 3:26-29). Һьм жьн һьм мер ԝе һʹәта-һʹәтайе щьнәтеда ль сәр әʹрде бьжин (Әʹйанти 7:9, 10, 13-15). Ӧса жи, шьхӧле бәлакьрьна мьзгине нә тʹәне мерарʹа, ле жьнарʹа жи һатийә дайине (Мәтта 28:19, 20). Кʹьтеба Кʹаред Шандийа бәʹса хушкәкә бь наве Прьскила дькә, йа кӧ тʹәви мере хԝә Әкила али мәрьвәки хԝәнди бь наве Аполос кьр, кӧ әԝ рʹастийе дьһа зәлал фәʹм бькә (Кʹаред Шандийа 18:24-26).

5. Ль гора Луԛа 10:38, 39, 42, Иса Мәсиһ һьндава жьнада ча бу?

⁵ Иса Мәсиһ ԛәдре жьна дьгьрт. Ль ԛьрʹна йәке, Ферьсийа жьн ньмьз һʹәсаб дькьрьн, ләма жи ԝана нав мәрьвада тʹәви жьна хәбәр нәдьдан у дәрһәԛа Ньвисаред Пироз тʹәви ԝан шеԝьр нәдькьрьн. Иса Мәсиһ мина Ферьсийа нибу. Әԝи нә тʹәне тʹәви мера, ле тʹәви жьна жи дәрһәԛа тьштед рʹӧһʹани хәбәр дьдаb (Луԛа 10:38, 39, 42 бьхунә). Ӧса жи, гава әԝи мьзгин мал бь мал у гӧнд бь гӧнд бәла дькьр, әԝи изьн дьда кӧ жьн жи тʹәви ԝи һәрʹьн (Луԛа 8:1-3). Ԝәхта кӧ Иса Мәсиһ жь мьрьне рʹабу, әԝи һьнә жьнарʹа гот кӧ бьра әԝана мьзгина рʹабуна ԝи бьгьһиньн шандийа (Йуһʹәнна 20:16-18).

6. Чь нишан дькә кӧ Паԝлосе шанди ԛәдре жьна дьгьрт?

⁶ Паԝлосе шанди Тимотʹейорʹа гот кӧ бьра әԝ ԛәдре жьна бьгьрә. Паԝлос Тимотʹейорʹа гот кӧ бьра әԝ жьнед әʹмьрда мәзьн «чаԝа дийа хԝә» у «кʹӧлфәтед щаһьл чаԝа хушкед хԝә» һʹәсаб кә (1 Тимотʹейо 5:1, 2). Пешийа кӧ Паԝлос али Тимотʹейо кьр кӧ әԝ рʹӧһʹанида гьһишти бә, дайик у пирька ԝи рʹастийа Ньвисаред Пироз кьрьнә дьле Тимотʹейо, у Паԝлос жи әв йәк заньбу (2 Тимотʹейо 1:5; 3:14, 15). Ль нәʹма Рʹомайарʹа, Паԝлос бь нава һьнә хушкарʹа сьлав шандьн. Хенщи ве йәке, кӧ әԝи дина хԝә дьда шьхӧлед ԝан, әԝи пʹайе ԝан жи дьда (Рʹомайи 16:1-4, 6, 12; Филипи 4:3).

7. Ньһа әме щабед кʹижан пьрса бьстиньн?

⁷ Чаԝа мә жь абзасед жоре дит, Кʹьтеба Пироз навежә кӧ хушк жь бьра ньмьзтьр ьн. Хушкед мәйә дәлал бона щьвате гәләк ԛимәт ьн, у рʹуспийед щьвате заньн кӧ хушк дькарьн бь кьред хԝәйә баш әʹдьлайи у йәктийа щьвате хԝәй кьн. Диса жи, чәнд пьрс пешда тен. Мәсәлә, Йаһоԝа чьма дьхԝазә кӧ хушк һьнә дәрәщада сәре хԝә гьредьн? Рʹаст ә тʹәне бьра ча рʹуспийед щьвате у бәрдәстийед щьвате тенә кʹьфшкьрьне, гәло әв йәк те һʹәсабе кӧ щьватеда һәр бьра сәре һәр хушке йә?

ГӘЛО ҺӘР БЬРА СӘРЕ ҺӘР ХУШКЕ ЙӘ?

8. Ль гора Әфәси 5:23, гәло һәр бьра сәре һәр хушке йә?

⁸ Гәло һәр бьра сәре һәр хушке йә? На! Щьватеда сәре һʹәму хушка тʹәне Мәсиһ йә (Әфәси 5:23 бьхунә). Малбәтеда, сәре жьне, мер ә, ле кӧрʹе ньхӧманди сәре де найе һʹәсабе (Әфәси 6:1, 2). Щьватеда, һʹӧкӧме рʹуспийа сәр хушк у бьра бь синор ә (1 Тʹесалоники 5:12; Ибрани 13:17). Хушкед азәп, йед кӧ ида ль щәм де у баве хԝә наминьн, һьлбәт ԛәдре де у баве хԝә у рʹуспийед щьвате дьгьрьн. Ле щьватеда чаԝа кӧ сәре бьра Иса йә, сәре ԝан хушка жи тʹәне Иса йә.

9. Щарна чьма лазьм дьбә кӧ хушк сәре хԝә гьредьн?

⁹ Йаһоԝа дьхԝазә кӧ щьват бь организә бә. Ләма, әԝи Иса Мәсиһ ча сәре һәр мери кʹьфш кьрийә. Ӧса жи, дь щьватеда, Йаһоԝа шьхӧле һинкьрьне дайә дәсте мера. Әв һʹӧкӧм жьнарʹа нәһатийә дайине (1 Тимотʹейо 2:12). Һәгәр лазьм бә кӧ хушк ише бьра бькьн, гәрәке әԝана сәре хԝә гьредьнc (1 Корьнтʹи 11:4-7). Ле әԝ найе һʹәсабе кӧ Йаһоԝа хушка ньмьз һʹәсаб дькә, ле мәщале дьдә ԝан, ԝәки әԝана нишан кьн кӧ принсипа сәритийе ԛәбул дькьн. Ньһа әме дина хԝә бьдьн ве пьрсе: Гәло рола сәред малбәта у рола рʹуспийед щьвате чь нә?

РОЛА СӘРЕД МАЛБӘТА У РОЛА РʹУСПИЙЕД ЩЬВАТЕ

10. Һьнә рʹуспийед щьвате чьма дьфькьрьн кӧ изьна ԝан һәйә ԝәки бона щьвате ԛәйда дайньн?

¹⁰ Рʹуспийед щьвате һьм Иса Мәсиһ һьм жи «пәзед» кӧ Йаһоԝа у Иса тʹәсмили ԝан кьрьнә, һʹьз дькьн (Йуһʹәнна 21:15-17). Дьбәкә бь нетәкә баш, һьнә рʹуспийед щьвате хԝә ча «баве щьвате» һʹәсаб дькьн. Әԝана дьԛәԝьмә дьфькьрьн кӧ һәгәр изьна сәред малбәта һәйә кӧ бона хԝәйкьрьна нәфәред хԝә ԛәйда дайньн, изьна рʹуспийед щьвате жи һәйә кӧ бона хԝәйкьрьна щьвате ԛәйда дайньн. Сәрда жи, һьнә хушк-бьра щарна дьхԝазьн кӧ рʹуспийед щьвате дәԝса ԝан сафикьрьна бькьн. Ле гәло һʹӧкӧме рʹуспийед щьвате бь рʹасти мина һʹӧкӧме сәред малбәта йә?

11. Рола сәред малбәта чьда мина рола рʹуспийед щьвате йә?

¹¹ Чаԝа Паԝлосе шанди нишан кьр, рола сәред малбәта һьнә алийава мина рола рʹуспийед щьвате йә (1 Тимотʹейо 3:4, 5). Мәсәлә, Йаһоԝа дьхԝазә кӧ нәфәред мале гӧһ бьдьн сәре малбәте (Колоси 3:20). Мина ве йәке, әԝ дьхԝазә кӧ хушк-бьред щьвате жи гӧрʹа рʹуспийада бьн. Гәрәке һьм сәред малбәта һьм рʹуспийед щьвате аликʹарийе бьдьнә ԝан, бона кʹе жи әԝана щабдар ьн, ԝәки әԝана незики Йаһоԝа бьн. Ӧса жи, гәрәке әԝана бона кәсед кӧ бьн һʹӧкӧме ԝанда ньн, бь һʹьзкьрьн хәм бькьн. Гава щәм хушк-бьра проблем пешда тен, рʹуспи гәрәке али ԝан бькьн (Аԛуб 2:15-17). Ӧса жи, Йаһоԝа дьхԝазә кӧ рʹуспийед щьвате у сәред малбәта ԛанунед ԝи хԝәй кьн у «жь ньвисаре дәрнәйен», у ве йәкеда али щьвате у нәфәред хԝә жи бькьн (1 Корьнтʹи 4:6).

12-13. Чаԝа Рʹомайи 7:2 нишан дькә, рола сәред малбәта чаԝа жь рола рʹуспийед щьвате щӧдә дьбә?

¹² Ле рола рʹуспийед щьвате гәләк алийава жь рола сәред малбәта щӧдә йә. Мәсәлә, Йаһоԝа рʹуспийед щьвате ча һʹәким кʹьфш кьрьнә, у әԝ дьхԝазә кӧ әԝана кәсед кӧ гӧнә дькьн у тʹобә накьн, жь щьвате дәрхьн (1 Корьнтʹи 5:11-13).

¹³ Алийе дьнва жи, Йаһоԝа һʹӧкӧме кӧ әԝи дайә сәред малбәта, нәдайә рʹуспийед щьвате. Мәсәлә, изьна сәре малбәте һәйә кӧ бона малбәта хԝә ԛәйда дайнә у жь малбәта хԝә бьхԝазә кӧ әԝана ван ԛәйда биньн сери (Рʹомайи 7:2 бьхунә). Мәсәлә, изьна сәре малбәте һәйә зарʹед хԝәрʹа бежә, кӧ гәрәке әԝана еваре сьһʹәта чәнда вәгәрʹьн мале. Һәгәр зарʹ гӧһ нәдьн ве ԛәйде, бав дькарә ԝана ширәт кә (Әфәси 6:1). Мере кӧ малбәта хԝә һʹьз дькә ԝе һьлбәт шеԝьра хԝә тʹәви жьна хԝә бькә пешийа кӧ бона малбәте ԛәйда дайнә, чьмки әԝана һәр дӧ жи «бәдәнәк» ьнd (Мәтта 19:6).

ԚӘДЬРЕ МӘСИҺ ЧА СӘРЕ ЩЬВАТЕ БЬГЬРЬН

14. (а) Ль гора Марԛос 10:45, чьма Йаһоԝа Иса Мәсиһ ча сәре щьвате кʹьфш кьрийә? (б) Рола Кʹома Рʹебәрийе чь йә? (Чаргошә бь наве «Рола Кʹома Рʹебәрийе» бьньһерʹә.)

¹⁴ Бь сайа ԛӧрбана Иса, Йаһоԝа кʹьрʹи жийина һәр кәсе кӧ ԝирʹа хьзмәт дькә у баԝәрийа хԝә ԛӧрбана Иса тинә (Марԛос 10:45 бьхунә; Кʹаред Шандийа 20:28; 1 Корьнтʹи 15:21, 22). Ләма жи фәʹмдари йә чьрʹа Йаһоԝа Иса, йе кӧ әʹмьре хԝә чаԝа кʹьрʹин да, ча сәре щьвате кʹьфш кьрийә. Әԝ йәк кӧ Иса Мәсиһ сәре мә йә, изьна ԝи һәйә ԝәки ԛәйда у ԛануна дайнә у ширәте бьдә кәсед кӧ гӧһ надьн ван ԛануна (Галати 6:2). Ле Иса Мәсиһ нә тʹәне ԛануна датинә, әԝ мә һʹьз дькә у мә хԝәй дькә (Әфәси 5:29).

15-16. Тӧ жь готьнед Марли у Бенжамин чь дәрса дьстини?

¹⁵ Гава хушкед мә гӧһ дьдьн рʹебәрийа меред кӧ жь алийе Иса Мәсиһва һатьнә кʹьфшкьрьне, ԝәки ԝана хԝәй кьн, әԝана нишан дькьн кӧ ԛәдре Иса Мәсиһ дьгьрьн. Хушкәкә бь наве Марли, йа кӧ ль Америкайе дьжи, ньһерʹандьна гәләк хушка дьбежә: «Әз жь дьл ԛимәт дькьм рола хԝә ча жьнәкә меркьри у ча хушкәкә ль щьвате. Гәрәке әз бәрдәԝам бькьм һʹӧкӧме кӧ Йаһоԝа дайә мере мьн у рʹуспийед щьвате, ԛәбул бькьм. Ле мере мьн у бьред щьватеда әв йәк бона мьн һеса дькьн, чьмки әԝана ԛәдре мьн дьгьрьн у мьнрʹа дьбежьн кӧ әԝана шьхӧлед мьн дьшекьриньн.»

¹⁶ Гава бьред мә ԛәдре хушка дьгьрьн у хушка ԛимәт дькьн, әԝана нишан дькьн кӧ принсипа сәритийе фәʹм дькьн. Бьраки бь наве Бенжамин, йе кӧ ль Инглистане дьжи, ӧса дьбежә: «Әз жь щабед кӧ хушк щьватеда дьдьн у жь дәрсед ԝан, йед дәрһәԛа бәлакьрьн у һинкьрьна мьзгинеда, гәләк тьшт һин бумә. Әз дьфькьрьм кӧ шьхӧле ԝан гәләк ԛимәт ә.»

17. Чьма фәрз ә кӧ әм принсипа сәритийе ԛәбул бькьн?

¹⁷ Һәгәр щьватеда хушк, бьра, сәред малбәта у рʹуспийед щьвате принсипа сәритийе фәʹм бькьн у ԛәбул бькьн, әʹдьлайи ԝе һәбә, у кәсед дьн жи ԝе пәсне Йаһоԝа, Баве мәйи дьлован бьдьн (Зәбур 150:6).