Пьрсед Хԝәндәвана
Кʹьтеба Пироз дәрһәԛа сондхԝарьне чь дьбежә?
Ль гора фәрһәнгәке сонд те һʹәсабе «созе мәрьв, кӧ әԝе әʹсәйи гьлийед хԝә бинә сери, у гәләк щар әԝ бәр Хԝәде ве сонде дьхԝә». Сонд дькарә бь әзбәри йан бь ньвиски бе хԝарьне.
Һьнә кәс дьфькьрьн кӧ гәрәке мәрьв тʹӧ щар сонд нәхԝә, чьмки Иса готьбу: «Тʹӧ щар сонд нәхԝьн . . . Ле бьра готьна ԝә бьбә ‹бәле-бәле› йан жи ‹на-на›. Жь ве зедәтьр жь Мирещьн ә» (Мәтта 5:33-37). Һәмьки Иса заньбу кӧ ль гора Ԛануна Муса лазьм бу кӧ Исраелийа щарна сонд бьхԝарана у кӧ һьнә хьзмәткʹаред Хԝәде жи сонд дьхԝарьн (Дәстпебун 14:22, 23; Дәркʹәтьн 22:10, 11). Хенщи ве йәке, Йаһоԝа жи һьнә сонд дьхԝарьн, у Иса әв йәк заньбу (Ибрани 6:13-17). Ләма жи, әм фәʹм дькьн кӧ Иса нәдьгот кӧ гәрәке әм тʹӧ щар сонд нәхԝьн. Ле әԝи дьхԝәст бьгота кӧ әм гәрәке сондед пʹучʹ нәхԝьн у һәртʹьм хԝәйе созед хԝә бьн, чьмки Йаһоԝа ве йәке дьхԝазә.
Ле һәгәр лазьм бә, ԝәки тӧ сонд бьхԝи, гәрәке тӧ чь бьки? Йа пешьн, баԝәр бә ԝәки тӧйе бькарьби созе хԝә бини сери. Һәгәр тӧ нә баԝәр и кӧ тӧйе бькарьби ве йәке бьки, ԝе баш бә кӧ тӧ ижар сонд нәхԝи. Хәбәра Хԝәде мәрʹа дьбежә, ԝәки дьһа баш ә сонд нәхԝьн, нә кӧ сонд бьхԝьн у нәйньн сери (Ԝаиз 5:5). Йа дӧда жи, принсипед жь Кʹьтеба Пироз бьгәрʹә, йед кӧ ве тʹемайева гьредайи нә, у паше ль гора исафа хԝәйә һинкьри сафикьрьне бькә. Ле гәло әв чь принсип ьн?
Һьнә сонд мьԛабьли ԛьрара Хԝәде ниньн. Мәсәлә, Шәʹдед Йаһоԝа ԝәʹде зәԝаще сонд дьхԝьн. Бәр Хԝәде у бәр шәʹда, бук у зәʹва соз дьдьнә һәв кӧ әԝана «һʹәта сах бьн» ԝе һәвдӧ һʹьз бькьн, һәвдӧ хԝәй кьн у ԛәдьре һәв бьгьрьн (Ԝәʹде зәԝаще, һьнә щот дьбәкә тьштәки дьн дьбежьн, ле әԝана диса жи бәр Хԝәде сонд дьхԝьн). Бь сайа ве сонде, әԝана дьбьн жьн-мер, у гәрәке һʹәта мьрьне тʹәвайи бьминьн (Дәстпебун 2:24; 1 Корьнтʹи 7:39). Әв сонд ль гора ԛьрара Хԝәде йә.
Һьнә сонд мьԛабьли ԛьрара Хԝәде нә. Мәсиһи ԝе тʹӧ щар сонд нәхԝә кӧ әԝе бь чʹәка ԝәлате хԝә бьпарезә йан жи баԝәрийа хԝә һьндава Хԝәде инкʹар кә. Сондед ӧса мьԛабьли ԛьрара Хԝәде нә. Шагьртед Иса «нә пʹара дьнйайе нә», ләма жи әԝана гәрәке тʹәви шәрʹ у проблемед дьнйайе нәбьн (Йуһʹәнна 15:19; Ишайа 2:4; Аԛуб 1:27).
Щарна Мәсиһи гәрәке ль гора исафа хԝә сафикьрьне бькьн һәла сонд бьхԝьн йа на. Пешийа кӧ әм сонд бьхԝьн, щарна лазьм ә кӧ әм ль сәр ве ширәта Иса кʹур бьфькьрьн: «Чь кӧ йед Ԛәйсәр ьн, бьдьнә Ԛәйсәр у чь йед Хԝәде нә бьдьнә Хԝәде» (Луԛа 20:25).
Мәсәлә, гава Мәсиһи дьхԝазә бажарванийе йан паспорте бьстинә, дьԛәԝьмә жь ԝи бе дәʹԝакьрьне ԝәки сонда амьнийе бьхԝә. Һәгәр готьнед сонда ԝи ԝәлати мьԛабьли ԛануна Хԝәде нә, исафа ԝи ԝе изьне нәдә кӧ әԝ ве сонде бьхԝә. Ле дьбәкә дәԝләт изьне бьдә кӧ әԝ готьнед сонде ль гора исафа хԝә бьгӧһезә.
Рʹомайи 13:1 ӧса дьбежә: «Һәр мәрьвәк бьра гӧрʹа ԝан һʹӧкӧмәтийада бә». Ль гора ве рʹезе, Хԝәде хԝәха дьхԝазә ԝәки әм гӧһ бьдьн сәрԝеред дәԝләте. Ләма жи әԝ дькарә ве сонде бьхԝә, чьмки жь Мәсиһийа те дәʹԝакьрьне кӧ гӧрʹа сәрԝера бькьн.
Һәгәр һʹәԝщә бә кӧ тӧ бәр тьштәки сонд бьхԝи йан ԝәʹде сондхԝарьне жестәки бьки, диса лазьм ә ԝәки тӧ ль гора исафа хԝә сафикьрьне бьки. Ԝәʹде бәре, Рʹомайи у Бәйанийа ль сәр шуред хԝә сонд дьхԝарьн, йа кӧ симбола ԛәԝата хӧдане шәрʹ бу у әв йәк ча әʹйанкьрьна амьнийе дьһатә һʹәсабе. Ӧса жи, гава Йунанийа сонд дьхԝарьн, ԝана дәсте хԝә һьлдьбьрʹандьн жор. Бь ве йәке, ԝана дьда кʹьфше кӧ баԝәр дькьн ԝәки ԛәԝатәкә жорьн һәйә, кӧ һәр тьшти занә у дьвинә, у инсан гәрәке һʹәсаб бьдьнә ԝи.
Хьзмәткʹаред Йаһоԝа һәмьки пе симболед мьләтийе, йед кӧ һʹәбандьна ԛәлпва гьредайи нә, сонд нахԝьн. Ле һәгәр диԝан жь тә бьхԝазә кӧ тӧ дәсте хԝә дайни сәр Кʹьтеба Пироз у сонд бьхԝи кӧ тӧйе рʹастийе бежи, гәрәке тӧ чь бьки? Ньвисаред Пироз бәʹса һьнә хьзмәткʹаред Хԝәде дькә, йед кӧ бь фьлан жеста сонд дьхԝарьн (Дәстпебун 24:2, 3, 9; 47:29-31). Ләма жи дьбәкә кӧ сондәкә ӧса щайиз бә. Ле бир нәкә кӧ һәгәр тӧ ве сонде бьхԝи, әв йәк те һʹәсабе кӧ тә бәр Хԝәде сонд хԝарийә. Лазьм ә кӧ тӧ рʹастийе бежи у бь һʹәлали щаба һʹәму пьрса бьди.
Әм достийа хԝә тʹәви Йаһоԝа гәләк ԛимәт дькьн, ләма жи пешийа кӧ әм сонд бьхԝьн, гәрәке әм дӧа бькьн у кʹур бьфькьрьн. Әм гәрәке баԝәр бьн кӧ әв сонд мьԛабьли исафа мә йан жи мьԛабьли принсипед Кʹьтеба Пироз нинә. Һәгәр тӧ сафи ки кӧ сонд бьхԝи, гәрәке тӧ сонда хԝә бини сери (1 Пәтрус 2:12).