Пьрсед Хԝәндәвана

Зәбур 61:8-да, Даԝьд Пʹадша ньвисибу кӧ әԝе «һʹәта-һʹәтайе» пәсьне наве Хԝәде бьдә. Гәло гьлийед ԝи дьһатьнә һʹәсабе кӧ әԝ дьфькьри, ԝәки ԝе тʹӧ щар нәмьрә?

На, әԝ ӧса нәдьфькьри.

Ԝәрә әм бьньһерʹьн кӧ әԝи ве рʹезеда у рʹезед дьнда чь ньвисибу: «Аԝа әзе һʹәта-һʹәтайе бьстьрем әшԛи наве Тә у һәр рʹож ад-ԛьраред хԝә биньмә сери». «Бь тʹәмамийа дьле хԝә әзе шькьрийе бьдьмә Тә, Хӧдан Хԝәдейе мьн у һʹәта-һʹәтайе рʹумәте бьдьмә наве Тә». «Әзе . . . пәсьне наве Тә бьдьм һʹәта-һʹәтайе» (Зәбур 61:8; 86:12; 145:1, 2).

Даԝьд Пʹадша һьлбәт нәдьфькьри кӧ әԝе тʹӧ щар нәмьрә. Әԝи заньбу кӧ ахьрийа гӧнә, мьрьн ә, у әԝи ԛәбул дькьр ԝәки әԝ гӧнәкʹар ә (Дәстпебун 3:3, 17-19; Зәбур 51:4, 5). Әԝи заньбу кӧ Бьраһим, Исһаԛ, Аԛуб у хьзмәткʹаред Хԝәдейи дьн жи мьрьбун. Ӧса жи, Даԝьд заньбу кӧ рʹожәке, әԝе жи вәгәрʹә ахе (Зәбур 37:25; 39:4). Ле готьнед ԝи, жь Зәбур 61:8 хԝәстьн у ԛьрара ԝи нишан дькьн, кӧ һʹәта-һʹәтайе, демәк һʹәта кӧ әԝ сах бә, әԝе пәсьне Хԝәде бьдә (2 Самуйел 7:12).

Һьнә гьлийед Даԝьд жь Зәбур 18, 51 у 52 нишан дькьн, кӧ Даԝьд щарна дәрһәԛа жийина хԝә дьньвиси. Мәсәлә, Зәбур 23-да, Даԝьд готьбу, кӧ Йаһоԝа мина шьванәки йә, кӧ рʹебәрийа ԝи дькә, рʹьһʹәтийе дьде у ԝи дьпарезә. Даԝьд жи шьванәки ӧса бу у әԝи дьхԝәст «һʹәму рʹожед әʹмьре хԝәда» Хԝәдерʹа хьзмәт бькә (Зәбур 23:6).

Ӧса жи, бир нәкә кӧ Даԝьд жь бина бәр Хԝәде дьньвиси, у щарна, готьнед ԝи нишан дькьн, кӧ бь һʹәзара сал шунда чь ԝе бьԛәԝьмә. Мәсәлә, Зәбур 110-да, Даԝьд бәʹса ԝәхтәкә ӧса кьр, кӧ «хӧдане» ԝи ԝе сәр әʹзмана ль мьле Хԝәдейи рʹасте рʹуне у ԛәԝатәкә мәзьн бьстинә. Ле бона чь? Сәва кӧ дьжмьнед Хԝәде алт кә у «нава мьләтада һʹакьмтийе бькә». Гәло әв «хӧдан» кʹи йә? Әԝ Иса Мәсиһе создайи йә, жь рʹькʹьнийата Даԝьд пʹадша, йе кӧ гәрәке жь әʹзмана сәрԝертийе бькә у бьбә Кʹаһине һʹәта-һʹәтайе (Зәбур 110:1-6). Иса Мәсиһ зәлал кьр, кӧ готьнед Зәбур 110 сәр ԝи һатьбун ньвисаре у ԝе ахьрийеда жи бенә сери (Мәтта 22:41-45).

Бәле, жь бина бәр Хԝәде, Даԝьд һьм дәрһәԛа рʹожед хԝә, һьм жи дәрһәԛа ахьрийе ньвиси. Әԝ баԝәр бу, кӧ ԝе жь мьрьне рʹабә у һʹәта-һʹәтайе пәсьне Йаһоԝа бьдә. Ләма жи, әм фәʹм дькьн кӧ Зәбур 37:10, 11, 29 һьм бәʹса ԝәʹде Исраела кәвьн дькә, һьм жи дәрһәԛа дьнйа тʹәзә те готьне (Ве журналеда бьньһерʹә абзаса 8 жь готара бь наве «Те Тʹәви Мьн Щьнәтеда би»).

Рʹезед ӧса ча Зәбур 61:8 нишан дькьн, кӧ Даԝьд дьхԝәст һʹәта хьлазийа әʹмьре хԝә пәсьне Йаһоԝа бьдә. Ӧса жи әв гьли нишан дькьн кӧ паши рʹабуна жь мьрьне, Даԝьд ԝе чь бькә.