К′ЬТЕБХАНӘЙА ОНЛАЙН йа Бьрща Qәрәwьлийе
К′ЬТЕБХАНӘЙА ОНЛАЙН
Йа Бьрща Qәрәwьлийе
К′öрди Кöрманщи (Кирили)
ö
  • һ
  • ә
  • w
  • q
  • ö
  • К′ЬТЕБА ПИРОЗ
  • Ә′ДӘБЙӘТ
  • ЩЬВАТ
  • w23 Чьлә рʹупʹ. 14–19
  • Йаһоԝа ԝе Али Тә Бькә ԝәки Тӧ Сәркʹәви

Дәрһәqа wе йәке т′ö видео т′öнә

Бьбахшиньн, wәʹде вехьстьна видео шаши пешда һат.

  • Йаһоԝа ԝе Али Тә Бькә ԝәки Тӧ Сәркʹәви
  • Бьрща Ԛәрәԝьлийе Дәрһәԛа Пʹадшатийа Йаһоԝа Әʹлам Дькә (Бона Һинбуне) — 2023
  • Бьнсәри
  • Т′емед Мина Wе
  • ГАВА ҺʹАЛЕ МӘ НЬШКЕВА ТЕ ГӦҺАСТЬНЕ
  • ГАВА ҺʹАЛ ДЬҺА ХЬРАБ ДЬБӘ
  • ЙАҺОԜА ЧАԜА АЛИ ТӘ ДЬКӘ?
  • АЛИКʹАРИ У КʹӘРӘМЕД ЙАҺОԜА БИР НӘКӘ
  • Диле кӧ Хԝәдерʹа Амьн ма
    Дәрсед ԛимәт жь Хәбәра Хԝәде
  • Усьв Давежьн Кәле
    Сәрһатийед Кʹьтеба Пироз
  • «Чьма ... Әз Дәԝса Хԝәде Дьгьрьм?»
    Бьрща Ԛәрәԝьлийе Дәрһәԛа Пʹадшатийа Йаһоԝа Әʹлам Дькә — 2015
  • Йаһоԝа Усьв Бир Нәкьр
    Дәрсед ԛимәт жь Хәбәра Хԝәде
Һе Зедә Бьньһер′ә
Бьрща Ԛәрәԝьлийе Дәрһәԛа Пʹадшатийа Йаһоԝа Әʹлам Дькә (Бона Һинбуне) — 2023
w23 Чьлә рʹупʹ. 14–19

ГОТАРА БОНА ҺИНБУНЕ 3

Йаһоԝа ԝе Али Тә Бькә ԝәки Тӧ Сәркʹәви

«Хӧдан тʹәви Усьв бу . . . у һәр тьште кӧ әԝ [дькьр], Хӧдан бь дәсте ԝи ль һәв [дьани]» (ДӘСТПЕБУН 39:2, 3).

КʹЬЛАМА 30 Бав, Хԝәде у Дост

ВЕ ГОТАРЕДАa

1-2. (а) Гава әм рʹасти тәнгасийа тен, әм чьрʹа әʹщебмайи наминьн? (б) Ве готареда, әме чь шеԝьр кьн?

ГАВА хьзмәткʹаред Йаһоԝа рʹасти тәнгасийа тен, әԝана әʹщебмайи наминьн, чьмки Кʹьтеба Пироз ӧса дьбежә: «Гәрәке әм бь гәләк щәфакʹьшандьне бькʹәвьнә Пʹадшатийа Хԝәде» (Кʹаред Шандийа 14:22). Ӧса жи әм заньн ԝәки һьнә чәтьнайед мә ԝе бь тʹәмами сафи нәбьн, һʹәта дьнйа тʹәзә нәйе, кʹидәре «иди мьрьне тʹӧнәбә, нә шин, нә гьри, нә еш-ешук» (Әʹйанти 21:4).

2 Йаһоԝа мә жь һʹәму тәнгасийа хԝәй накә, ле әԝ али мә дькә ԝәки әм сәбьр кьн. Дина хԝә бьдьне, кӧ Паԝлосе шанди Рʹомайарʹа чь готьбу. Пешийа ве йәке, әԝи бәʹса чәнд тәнгасийа кьр, кʹижан кӧ рʹасти ԝи у хушк-бьред дьн дьһатьн. Паше әԝи ньвиси: «Әм нава ван һʹәму тьштада һе зедә сәрдькʹәвьн, бь сайа әԝи кӧ әм һʹьз кьрьн» (Рʹомайи 8:35-37). Демәк, гава тәнгасикә тә хьлаз набә, Йаһоԝа дькарә али тә бькә ԝәки нава ве тәнгасийеда сәркʹәви. Ньһа әме бьвиньн кӧ Йаһоԝа чаԝа али Усьв дькьр, ԝәки әԝ сәркʹәвә, у әԝ чаԝа дькарә али тә жи бькә.

ГАВА ҺʹАЛЕ МӘ НЬШКЕВА ТЕ ГӦҺАСТЬНЕ

3. Жийина Усьв чаԝа һатә гӧһастьне?

3 Аԛуб «жь һʹәмуйа зәʹфтьр Усьв һʹьз дькьр» (Дәстпебун 37:3, 4). Ләма жи кӧрʹед Аԛуб йед мәзьн чʹәʹвнәбарийа бьре хԝә дькьрьн. Гава мәщал кʹәтә дәсте ԝан, ԝана Усьв фьрот базьрганед Мьдйанирʹа. Әԝана жи Усьв бьрьн Мьсьре, ԝәлатәки кӧ бь сәда километьра дури мала ԝи бу. Ԝедәре, Потифаре кӧ сәрԝере нобәдара бу, Усьв ча дил кʹьрʹи. Жийина Усьв бь тʹәмами һатә гӧһастьне. Бәре әԝ кӧрʹе баве хԝә йе һʹьзкьри бу, ле ньһа әԝ ида диле Мьсьрийа бу (Дәстпебун 39:1).

4. Мина Усьв, әм дькарьн рʹасти чь тәнгасийа бен?

4 Кʹьтеба Пироз дьбежә, кӧ тьштед хьраб тенә сәре һәр кәси (Ԝаиз 9:11). Әм дькʹәвьн тәнгасийед ӧса, йед кӧ «тенә сәре мәрьвед майин» жи (1 Корьнтʹи 10:13). Щарна жи мәʹнийа тәнгасийед мә әԝ ә, кӧ әм Мәсиһи нә. Мәсәлә, дьбәкә мәрьв сәва баԝәрийа мә ԛәрфа мә бькьн, пәй мә кʹәвьн, йан һәла һе мә бьзериньн жи (2 Тимотʹейо 3:12). Ле чь жи һәбә, Йаһоԝа дькарә али тә бькә ԝәки чәтьнайада жи тӧ сәрфьнийаз би. Гәло әԝи чаԝа али Усьв дькьр, ԝәки әԝ сәрфьнийаз бу?

Потифар Усьв ча дил дькʹьрʹә.

Гава Потифар Усьв ча дил кʹьрʹи, Йаһоԝа али Усьв дькьр ԝәки әԝ пешдачуйи бә (Бьньһерʹә абзаса 5)

5. Чахе Потифар дит ԝәки һәр тьшт ль дәсте Усьв һәв те, әԝи чь фәʹм кьр? (Дәстпебун 39:2-6)

5 Бьхунә Дәстпебун 39:2-6. Усьв хортәки сәр хԝә у аԛьл бу, у Потифар ве йәке тʹәхмин кьр. Хенщи ве йәке әԝи заньбу чьрʹа Усьв йәки ӧса бу. Чаԝа кӧ Кʹьтеба Пироз дьбежә, Потифар «дит кӧ Хӧдан перʹа бу у һәр тьште кӧ әԝ дькә, Хӧдан бь дәсте ԝи ль һәв тинә».b Ԝәʹдә шунда Усьв «бу бәрдәстийе» Потифар у паше жи, «әԝ кьрә бәрпьрсийаре мала хԝә у һʹәму һәбука хԝә да дәсте ԝи». Паши ве йәке Потифар шьхӧле хԝәда пешдачуйи бу.

6. Һʹале Усьв чаԝа бу?

6 Ԝәрә әм һʹале Усьв бьдьнә бәр чʹәʹве хԝә. Бь тʹәхмина тә, әԝ жь һәр тьшти зедәтьр чь дьхԝәст? Гәло, һʹьзрәта дьле ԝи әԝ бу кӧ бькʹәвә чʹәʹве Потифар, ԝәки Потифар ԝи хәлат кә? На. Фәʹмдари йә, һʹьзрәта дьле ԝи әԝ бу, кӧ аза бә у вәгәрʹә мала баве хԝә. Рʹаст ә мала Потифарда әԝи щийе бьльнд дьгьрт, ле әԝ диса жи диле ахайе пʹутпʹарьст бу. Йаһоԝа Потифар дәʹф нәда, кӧ әԝ Усьв аза кә. Сәрда жи, һʹале Усьв һе хьраб бу.

ГАВА ҺʹАЛ ДЬҺА ХЬРАБ ДЬБӘ

7. Һʹале Усьв чьда дьһа хьраб дьбу? (Дәстпебун 39:14, 15)

7 Чаԝа сәре 39 йа кʹьтеба Дәстпебун нишан дькә, жьна Потифар чʹәʹв бәрʹдабу Усьв, у әԝе чәнд щара зоре ԝи дькьр, кӧ сәре хԝә перʹа дайнә. Ле Усьв хԝәстьна ԝе инкʹар дькьр. Ахьрийа ахьрийе, һерса ԝе рʹабу, у әԝе бӧхдан авитә Усьв, кӧ йанчь әԝи дьхԝәст дәст бавита ԝе у намуса ԝерʹа бьлизә (Бьхунә Дәстпебун 39:14, 15). Гава Потифар әв йәк бьһист, әԝи Усьв авитә кәле, у Усьв чәнд сала ԝедәре ма (Дәстпебун 39:19, 20). Гәло кәл щики чаԝа бу? Хәбәра Ибрани, йа кӧ ча «кәл» һатийә ԝәлгәрʹандьне, дькарә бе һʹәсабе «чʹәл» йан «бир», демәк щики тәʹри, кʹидәре Усьв хԝә бечʹарә тʹәхмин дькьр (Дәстпебун 40:15). Ӧса жи Кʹьтеба Пироз дьбежә: «Ньгед ԝи ԛәйдада шьдандьн у хәлаԛ авитьнә стӧкӧра ԝи» (Зәбур 105:17, 18). Бәле, һʹале Усьв чьԛас дьчу дьһа хьраб дьбу. Әԝ ида диләки бь итʹбар нибу, ле гьртики бәләнгаз бу.

8. Һәрге тәнгасийа мә гьран бә жи, әм чьда дькарьн баԝәр бьн?

8 Гәло, тӧ ԛә кʹәтьбуйи һʹаләки гьран у лавайа Хԝәде дькьр кӧ али тә бькә, ле диса жи һʹале тә чьԛас дьчу дьһа хьраб дьбу? Бәле, щарна ӧса дьбә. Йаһоԝа мә жь һʹәму тәнгасийед дьнйа Мире-щьна напарезә (1 Йуһʹәнна 5:19). Диса жи баԝәр бә кӧ Йаһоԝа һаш жь һʹале тә һәйә, у әԝ бона тә хәм дькә (Мәтта 10:29-31; 1 Пәтрус 5:6, 7). Сәрда жи, әԝи соз дайә: «Әзе тʹӧ щар жь тә нәчьм у тʹӧ щар тә бәрʹнадьм» (Ибрани 13:5). Һәрге жи тәрʹа те кʹьфше, кӧ чʹарә ида тʹӧнә, бир нәкә кӧ Йаһоԝа дькарә али тә бькә, ԝәки тӧ сәбьр ки. Ԝәрә әм бьвиньн Йаһоԝа чаԝа али Усьв дькьр.

Потифар Усьв ча дил дькʹьрʹә ә.

Гава Усьв кәледа бу у һʹәму гьртийед кәле дәсте ԝида бун, һьнге жи Йаһоԝа Хԝәде тʹәви ԝи бу (Бьньһерʹә абзаса 9)

9. Әм жь кʹӧ заньн кӧ чахе Усьв кәледа бу, Йаһоԝа тʹәви ԝи бу? (Дәстпебун 39:21-23)

9 Бьхунә Дәстпебун 39:21-23. Чахе Усьв кәледа бу, Йаһоԝа али ԝи дькьр ԝәки һәр тьшт ԝирʹа ль һәв бе. Гәло чаԝа? Чаԝа кӧ бәре Усьв бәр чʹәʹве Потифар йәки бь итʹбар у хԝәйиԛәдьр бу, ньһа ида әв бәр чʹәʹве сәрԝере кәле жи навәки баш ԛазанщ кьр. Сәрԝере кәле итʹбарийа хԝә Усьв ани у һʹәму гьртийед кәле да дәсте ԝи. Кʹьтеба Пироз дьбежә кӧ «сәрԝере кәле дина хԝә нәдьда ԝан тьштед дәсте ԝида». Усьв ида бош-бәтал рʹунәдьньшт, ле шьхӧле ԝи диса һәбу. Әв йәк бь рʹасти жи гӧһастьнәкә ӧса бу, кӧ әԝ һивийе нибу. Гәло, гьртийе кәле, кʹижан кӧ ӧса сәрт һатьбу нәһәԛкьрьне, чаԝа дькарьбу щабдарийа ӧса бьльнд бьстинә? Дәстпебун 39:23 шьровәдькә, ԝәки «Хӧдан тʹәви ԝи бу у һʹәму шьхӧле ԝи Хӧдан жерʹа ль һәв дани».

10. Дьԛәԝьмә Усьв чьма нәдьфькьри, ԝәки һәр тьшт ԝирʹа ль һәв те?

10 Һәла диса хԝә дәԝса Усьв дайнә. Бь тʹәхмина тә, чахе бӧхдан авитьнә ԝи у әԝ кʹәтьбу кәле, гәло әԝ дьфькьри ԝәки һәр тьшт ԝирʹа ль һәв те? Гәло һʹьзрәта дьле ԝи әԝ бу, кӧ сәрԝере кәле хԝәш бе? На. Бь рʹасти һʹьзрәта дьле ԝи әԝ бу, кӧ наве хԝә паԛьж кә у жь кәле дәркʹәвә. Щарәке, Усьв жь гьртики дьн, йе кӧ гәрәке жь кәле дәркʹәта, лава кьр, ԝәки әԝ Фьрәԝьнрʹа бәʹса ԝи бькә, сәва кӧ әԝ жь кәле аза бә (Дәстпебун 40:14). Ле әв мәрьв дәрберʹа Фьрәԝьнрʹа дәрһәԛа ԝи нәгот. Ләма жи Усьв диса дӧ сала кәледа ма (Дәстпебун 40:23; 41:1, 14). Диса жи, Йаһоԝа рʹийа Усьв рʹаст дькьр. Гәло чаԝа?

11. Бь аликʹарийа Йаһоԝа, Усьв чь кьр, у чаԝа бь ве йәке Йаһоԝа дькарьбу ԛьрара хԝә бинә сери?

11 Чахе Усьв кәледа бу, Йаһоԝа дӧ хәԝнед әʹщеб нишани Фьрәԝьн кьр. Фьрәԝьн гәләк дьхԝәст мәʹна ԝан хәԝна бьзаньбуйа. Гава Фьрәԝьн бьһист кӧ Усьв дькарә хәԝна шьровәкә, әԝи гази Усьв кьр. Бь аликʹарийа Йаһоԝа, Усьв хәԝнед Фьрәԝьн шьровәкьрьн у жерʹа гот кӧ гәрәке әԝ чь бькә. Фьрәԝьн әԝ ль сәр тʹәмамийа ԝәлате Мьсьре кьрә ԝәзире бәлакьрьна хԝарьне, чьмки фәʹм кьр кӧ Йаһоԝа тʹәви Усьв ә (Дәстпебун 41:38, 41-44). Паше, бьрчибунәкә гьран һьм Мьсьреда, һьм жи Кәнанеда дәстпебу, демәк ԝи ԝәлатида, кʹидәре кӧ малбәта Усьв дьжит. Һьнге Усьв дькарьбу малбәта хԝә жь хәлайе хьлаз кә. Бь ви щурʹәйи, Усьв чаԝа малбәта баве хԝә хԝәй кьр, ӧса жи хәза рʹькʹьнийата Мәсиһе создайи.

12. Йаһоԝа ча али Усьв кьр, ԝәки һәр тьштида дәсте ԝи ль һәв бе?

12 Тьштед кӧ һатьнә сәре Усьв бь рʹасти жи әʹщеб бу. Гава Усьв дил бу, гәло кʹи бу мәʹни, ԝәки Потифар дина хԝә да ԝи? Гава Усьв гьрти бу, гәло кʹи ӧса кьр ԝәки әԝ ль сәрԝере кәле хԝәш бе? Кʹи хәԝнед әʹщеб нишани Фьрәԝьн кьр у али Усьв кьр, ԝәки әԝ ԝана шьровәкә? Кʹи ӧса кьр кӧ Усьв ль сәр тʹәмамийа ԝәлате Мьсьре бьбә ԝәзире бәлакьрьна хԝарьне? (Дәстпебун 45:5) Әшкәрә йә, әв Йаһоԝа Хԝәде бу, йе кӧ һәр тьштида дәсте Усьв ль һәв дьани! Ахьрийеда, Йаһоԝа хьрабийа бьред Усьв да хәбате ча мәщал, бь сайа чь жи әԝи ԛьрара хԝә ани сери.

ЙАҺОԜА ЧАԜА АЛИ ТӘ ДЬКӘ?

13. Гәло Йаһоԝа дькʹәвә нава һʹәму дәрәщед кӧ рʹасти мә тен? Шьровәкә.

13 Әм чь дькарьн жь жийина Усьв һин бьн? Йаһоԝа накʹәвә нав һʹәму дәрәща кӧ рʹасти мә тен. Гәло Йаһоԝа ӧса дькә, ԝәки тьштед хьраб бенә сәре мә бона мәʹникә баш? Кʹьтеба Пироз ӧса набежә (Ԝаиз 8:9; 9:11). Чь жи һәбә әм заньн, кӧ чахе әм дькʹәвьнә тәнгасийа, Йаһоԝа дьвинә у һәԝар-газийа мә дьбьһе (Зәбур 34:15; 55:22; Ишайа 59:1). Хенщи ԝе йәке, Йаһоԝа дькарә али мә бькә, ԝәки әм нава һʹәму щурʹә чәтьнайада сәркʹәвьн. Гәло чаԝа?

14. Рʹожед гьранда, Йаһоԝа чаԝа али мә дькә?

14 Гәләк щар Йаһоԝа али мә дькә бь ԝе йәке, кӧ әм ԝәхтда бәрдьли у һелани бьстиньн (2 Корьнтʹи 1:3, 4). Әв йәк һатә сәре бьре мәйи жь Тьркмәньстане. Наве ԝи Әзиз ә. Әԝ жь бо баԝәрийа хԝә дӧ сала кʹәтьбу кәле. Әԝ ӧса дьбежә: «Рʹожа диԝана мьн, сьбәһе, бьраки мә Ишайа 30:15 (ДТʹ), нишани мьн кьр, йа кӧ ӧса дьбежә: ‹Ԛәԝата ԝә ԝе йәкеда бә, ԝәки дьле хԝәда рʹьһʹәтийе хԝәйи кьн у итʹбари бьдьнә кʹьфше›. Әв рʹез тʹьме али мьн дькьр, ԝәки дьлрʹьһʹәт бьм у һәр тьштида хԝә бьсперьм Йаһоԝа. Гава әз кәледа бум, әв рʹез гәләк мьн дьшьданд». Гәло дәрәщәки ӧса те бира тә, чахе тә ԝәʹде лазьмда бәрдьли у һелани жь Йаһоԝа станд?

15-16. Әм жь сәрһатийа Торийе чь һин дьбьн?

15 Гәләк щар, тʹәне паши ԝе йәке ча тәнгасийа мә хьлаз дьбә, әм фәʹм дькьн кӧ Йаһоԝа чаԝа али мә кьрийә. Хушкәкә мә бь наве Тори жи ӧса дьфькьрә. Кӧрʹе ԝе Мейсон шәш сала жь бо нәхԝәшийа кʹансәре дьчәрчьри, һʹәта кӧ әԝ мьр. Ләма жи, дьле Торийе гәләк шәԝьти. Әԝ ӧса дьбежә: «Ча де әз дькарьм бежьм, ԝәки ешәкә жь ве еше гьрантьр тʹӧнә йә. Әз баԝәр ьм кӧ де у бавед дьн ԝе тʹәви мьн ԛайил бьн. Чахе де дьвинә, кӧ зарʹа ԝе чьԛас дьчәрчьрә, әв еш бона ԝе ӧса гьран ә, ԝәки әԝ дәрһәԛа еша хԝә ида бир дькә».

16 Гава Торийе дит, ԝәки кӧрʹе ԝе чьԛас еше дькʹьшинә, әԝ гәләк дьлтәнг бу. Ле паше, әԝе фәʹм кьр кӧ Йаһоԝа чаԝа али ԝе кьрьбу, ԝәки әԝ сәбьр кә. Әԝ ӧса дьбежә: «Гава әз дәрһәԛа ԝи ԝәʹдәйи дьфькьрьм, те бира мьн кӧ Йаһоԝа тʹьме кʹеләка мьн бу. Мәсәлә, гава һʹале Мейсон гәләк хьраб бу у әԝи нькарьбу кәсәк бьдита, диса жи хушк-бьред мә рʹеки дур данә бәр хԝә у һатьн нәхԝәшхане. Нәхԝәшханеда тʹьме кәсәк һәбу у һазьр бу, кӧ али мә бькә. Ӧса жи, хушк-бьред мә бона һʹәԝщед мәйә физики хәм дькьрьн. Һәла һе рʹожед һәри гьранда жи, һәр тьште мә һәбу». Йаһоԝа һәргав али Тори у кӧрʹе ԝе дькьр, ԝәки әԝ сәбьр кьн.—Бьньһерʹә чаргошә «Чь жи Мәрʹа Лазьм бу Йаһоԝа Дьда Мә».

«Чь жи Мәрʹа Лазьм бу Йаһоԝа Дьда Мә»

Мейсон 7 салийа хԝәда бь кʹансәре нәхԝәш кʹәт, у нава 6 салада, әԝи бь мерхаси һьмбәри ве нәхԝәшийе шәрʹ дькьр. Мейсон бона нәхԝәшийа хԝә гәләк щара дькʹәтә нәхԝәшхане. Ле хушк-бьред жь щьвата ԝи, дәрһәԛа ԝи тьштәк тʹәхмин кьрьн: Һәр щар гава Мейсон жь нәхԝәшхане дәрдькʹәт, әԝ дәрберʹа дьчу хьзмәтийе. Әԝи һʹьз дькьр хьзмәт кә у һʹәта ԛәԝата ԝи һәбу, әԝи мьзгинийе бәла дькьр.

Гава Мейсон мьр, зедәтьри 700 мәрьви һатьн сәр шина ԝи. Нав ԝанда гәләк һәвалдәрсхан у дәрсдаред ԝи жи һәбун. Дәрсдарәкә ԝи, йа кӧ пешийа мьрьна ԝи тʹәсәлийа ԝи кьрьбу, гот кӧ хԝазьл баԝәрийа зарʹед ԝе жи һаԛас ԛәԝи буйа чаԝа йа Мейсон. Ӧса жи, әԝе гот кӧ ида 5 сал ә ча әԝ малбәта хԝәва дәрбази ве мьһале буйә, у ԛә рʹасти Шәʹдед Йаһоԝа нәһатийә. Ле рʹожа дьн паши кӧ әԝе тʹәсәлийа ԝи кьр, дӧ Шәʹдед Йаһоԝа чунә мала ԝе у ле тʹәглифи сәр щьвате кьрьн. Әԝе тʹәглифа ԝан ԛәбул кьр.

Тори, дийа Мейсон, дьбежә: «Йаһоԝа бь кʹәрәмәти Мейсон ԛәнщ нәкьр. Щарна, ве фькьре нәдьһишт әз зәлал бьвиньм кӧ ча Йаһоԝа али мә дькә. Ле бь рʹасти Әԝи али мә дькьр. Йаһоԝа чь жи мәрʹа лазьм бу дьда мә, у тʹьме ԝәʹдәда».

АЛИКʹАРИ У КʹӘРӘМЕД ЙАҺОԜА БИР НӘКӘ

17-18. Ԝәʹде тәнгасийа Йаһоԝа чаԝа али мә дькә? (Зәбур 40:5)

17 Бьхунә Зәбур 40:5. Мәрьве кӧ һьлдькʹьшә сәр чʹийе, нета ԝи әԝ ә кӧ бьгьһижә сәре чʹийе. Сәр рʹийа хԝә әԝ рʹасти гәләк щийед бәдәԝ те, бәр кʹижана дьсәкьнә у дина хԝә дьдә бәдәԝбуна тʹәбийәте. Анәгори ве йәке, тӧ жи тʹьме ԝәʹдә хԝәрʹа вәԛәтинә, сәва кӧ аԝа готи бьсәкьни у бьфькьри, һәла Йаһоԝа чаԝа али тә кьрийә, ԝәки нава тәнгасийада сәбьр ки. Һәр евар жь хԝә бьпьрсә: «Гәло, мьн иро чьда кʹәрәма Йаһоԝа дит? Һәрге жи проблема мьн сафи набә, гәло Йаһоԝа чаԝа али мьн дькә кӧ әз сәбьр кьм?» Чь жи һәбә, аликʹари у кʹәрәмед Йаһоԝа тʹӧ щар бир нәкә.

18 Дьԛәԝьмә тӧ дӧа дьки, сәва кӧ тәнгасийа тә хьлаз бә. Әв йәк хԝәстьнәкә нормал ә (Филипи 4:6). Ле гәрәке әм тʹӧ щар бир нәкьн, кӧ Йаһоԝа иро ча мә кʹәрәм дькә. Йаһоԝа соз дайә мә, кӧ әԝе ԛәԝате бьдә мә у али мә бькә, ԝәки әм сәбьр кьн. Ләма жи тʹьме сәва аликʹарийа Йаһоԝа рʹази бә. Чаԝа кӧ Йаһоԝа һәртʹьм рʹийа Усьв рʹаст дькьр, баԝәр бә кӧ әԝе рʹийа тә жи рʹаст кә, ԝәки тӧ сәркʹәви! (Дәстпебун 41:51, 52)

ПЬРСЕД ДӦБАРӘКЬРЬНЕ

  • Йаһоԝа чаԝа али Усьв дькьр, ԝәки әԝ мала Потифарда пешдачуйи бә?

  • Йаһоԝа чаԝа али Усьв дькьр, ԝәки әԝ кәледа пешдачуйи бә?

  • Йаһоԝа чаԝа али тә дькә, ԝәки рʹийа тә рʹаст бә?

КʹЬЛАМА 32 Бьсәкьнә Алийе Йаһоԝа!

a Гава әм тәнгасийеда ньн, дьбәкә щарна әм дьфькьрьн кӧ тьштәк дәсте мә ль һәв найе. Дьԛәԝьмә әм дьфькьрьн кӧ тʹәне паши тәнгасийе, әм дькарьн бина хԝә бькʹьшиньн у бежьн кӧ мә сәри жь тәнгасийе дәрхьстийә. Ле сәрһатийа Усьв нишани мә дькә, кӧ һәла һе нава тәнгасийада жи Йаһоԝа дькарә али мә бькә, ԝәки һәр тьшт ль һәв бе. Ве готареда әме бьвиньн, кӧ Йаһоԝа чаԝа али мә дькә.

b Кʹьтеба Пироз тʹәне чәнд рʹезада дьбежә, кӧ дәстпека дилтийа Усьвда жийина ԝи ча һатә гӧһастьне. Ле дьбәкә әԝ гӧһастьн, дәрһәԛа кʹижана ван рʹезада те готьне, нава чәнд салада ԛәԝьмин.

    Әʹдәбйәтед Кʹӧрди Кӧрманщи (2011-2025)
    Дәрк′әвьн
    Бьк′әвьн
    • К′öрди Кöрманщи (Кирили)
    • Бьшиньн
    • Бьqәйдәкьрьн
    • Copyright © 2025 Watch Tower Bible and Tract Society of Pennsylvania
    • Qәйде Хәбьтандьне
    • Политика Конфиденсийалийе
    • Гöһастьна Конфиденсийалийе
    • JW.ORG
    • Бьк′әвьн
    Шандьн