Бьра Һʹьзкьрьна Ԝә Сар Нәбә!

1. Кʹьтеба Пироз дәрһәԛа һʹьзкьрьна жь дьл чь дьбежә?

«ПʹЕТА ԝе [һʹьзкьрьне] мина пʹета егьр дьшәԝьтинә у дьԛәдинә. Пʹелед мәзьн нькарьн һʹьзкьрьне бьтәфиньн [бьтәмьриньн], нә жи лейи дькарьн ԝе бь хԝәрʹа бьбьн»b (Стьрана Сьлеман 8:6, 7, ИМ). Бәле, һʹьзкьрьна жь дьл тʹӧ щар хьлаз набә! Ве рʹезеда гьлийед баш һатьнә ньвисаре, ԝәки жьн-мер бь рʹасти жи дькарьн һәртʹьм һәвдӧ һʹьз бькьн.

2. Сәва кӧ һʹьзкьрьна ортʹа жьн-мер сар нәбә, әԝана гәрәке чь бькьн?

² Сәва кӧ жьн-мер һʹәта хьлазийа әʹмьре хԝә һәв һʹьз бькьн, хирәт лазьм ә. Һʹьзкьрьн мина агьр ә. Сәва кӧ агьр гӧрʹ бьминә, лазьм ә кӧ кәсәк тʹьме дара бавежә агьр. Мина ве йәке, сәва кӧ һʹьзкьрьна ортʹа жьн-мерда ԛәԝи бьминә, әԝана гәрәке бәрдәԝам кьн һәләԛәтийа хԝә ԛәԝи кьн. Ле щарна, һәрге жьн-мер алийе материалида бькʹәвьнә тәнгасийе, сьһʹәт-ԛәԝата ԝан сьст бә, йан жи хԝәйкьрьна зарʹа бона ԝан чәтьн бә, һʹьзкьрьна ортʹа ԝанда дькарә сар бә. Ле сәва кӧ зәԝаща ԝәда алава һʹьзкьрьне нәтәмьрә, гәло һун чь дькарьн бькьн? Ве готареда, әме бьвиньн кӧ жьн-мер ча дькарьн һәләԛәтийа хԝә дьһа ԛәԝи кьн у әʹмьрәки хԝәш тʹәвайи дәрбаз кьн.c

ДОСТЙА ХԜӘ ТʹӘВИ ЙАҺОԜА ДЬҺА ԚӘԜИ КЬН

3. Достийа ԛәԝи тʹәви Йаһоԝа ча али жьн-мера дькә, ԝәки дьһа зедә һәвдӧ һʹьз бькьн? (Ԝаиз 4:12) (Бьньһерʹә ӧса жи шькьл.)

³ Сәва кӧ ‹алава һʹьзкьрьне› нәтәмьрә, жьн-мер гәрәке хирәт бькьн, ԝәки достийа хԝә тʹәви Йаһоԝа дьһа ԛәԝи кьн. Әв йәк ча дькарә али зәԝаща ԝан бькә? Жьн-меред кӧ достийа хԝә тʹәви Баве хԝәйи әʹзмана ԛимәт дькьн, һазьр ьн гӧһ бьдьнә ширәтед Хԝәде. У әв йәк ԝе али ԝан бькә проблема алт кьн, ԝәки һʹьзкьрьна ԝан һьнда һәвда сар нәбә (Бьхунә Ԝаиз 4:12). Жьн-мере рʹӧһʹанида ԛәԝи, һәр тьшти дькьн, ԝәки чʹәʹв бьдьнә Йаһоԝа у мина ԝи дьлован бьн, бь сәбьр бьн у афукʹар бьн (Әфәси 4:32–5:1). Һʹӧнӧред ӧса али жьн-мера дькьн, ԝәки дьһа зедә һәвдӧ һʹьз бькьн. Хушкәкә бь наве Лена, йа кӧ 25 сала зедәтьр меркьри йә, дьбежә: «Мьнрʹа чәтьн нинә ԛәдьре йәки хԝәдеһʹьз бьгьрьм у ԝи һʹьз бькьм».

4. Йаһоԝа чьма Усьв у Мәрйәм бьжарт кӧ бьбьн де-баве Мәсиһе создайи?

⁴ Ԝәрә әм дина хԝә бьдьнә мәсәләкә жь Кʹьтеба Пироз. Гәло Йаһоԝа чьма Усьв у Мәрйәм бьжарт кӧ әԝана бьбьн де-баве Мәсиһе создайи? Ԝана Йаһоԝа һʹьз дькьр, у Йаһоԝа заньбу ԝәки Әԝе әʹмьре ԝанда щийе пешьн бьгьрә. Жьн-мерно, һун жь мәсәла Усьв у Мәрйәме чь дькарьн һин бьн?

5. Мер дькарьн жь мәсәла Усьв чь һин бьн?

⁵ Усьв тʹьме һазьр бу гӧһ бьдә рʹебәрийа Йаһоԝа. Ләма жи әԝ малхеки баш бу. Кеми-кем әԝи се щара бона малбәта хԝә рʹебәри жь Хԝәде стандьбу. Чьԛас жи ԝирʹа чәтьн бу, Усьв тʹьме дәрберʹа гӧһ дьда Йаһоԝа (Мәтта 1:20, 24; 2:13-15, 19-21). Әԝ пәй рʹебәрийа Йаһоԝа дьчу, ләма жи әԝи Мәрйәм дьпараст у бона ԝе хәм дькьр. Дә бьдьнә бәр чʹәʹве хԝә, кӧ Мәрйәме чьԛас ԛәдьре Усьв дьгьрт у ԝи һʹьз дькьр! Мерно, һун дькарьн чʹәʹв бьдьнә Усьв у бона хԝәйкьрьна малбәта хԝә рʹебәрийед Кʹьтеба Пироз бьгәрʹьн.d Һәрге ԝәрʹа һеса нинә ԝан ширәта бьдьнә хәбате, ле диса жи һун ве йәке дькьн, ӧса һун һʹьзкьрьна хԝә һьндава кʹӧлфәта хԝә дьдьнә кʹьфше у дьхԝазьн зәԝаща хԝә ԛәԝи кьн. Хушкәкә жь гьрава Вануату, йа кӧ 20 сала зедәтьр меркьри йә, дьбежә: «Гава мере мьн рʹебәрийа Йаһоԝа дьгәрʹә у хирәт дькә кӧ ль гора ве рʹебәрийе бьжи, әз дьһа зедә ԛәдьре ԝи дьгьрьм. Әз хԝә рʹьһʹәт тʹәхмин дькьм у заньм кӧ сафикьрьнед ԝи гәләк баш ьн».

6. Жьн дькарьн жь Мәрйәме чь һин бьн?

⁶ Достийа Мәрйәме тʹәви Йаһоԝа ԛәԝи бу. Баԝәрийа ԝе кьред Усьвва гьредайи нибу, әԝе хԝәха баԝәрийа хԝә ԛәԝи дькьр. Мәрйәме Ньвисаред Пироз рʹьнд заньбун. Ӧса жи әԝ сәр ван тьшта кʹур дьфькьри, чь кӧ педьһʹәсийа (Луԛа 2:19, 51). Бешьк, Мәрйәм рʹӧһʹанида ԛәԝи бу, ләма жи әԝ кʹӧлфәтәкә гәләк баш бу. Иро гәләк хушк хирәт дькьн кӧ чʹәʹв бьдьнә ԝе. Мәсәлә, дина хԝә бьдьне кӧ хушка мә Емико чь дьбежә: «Гава әз азәп бум, мьн хԝәха баԝәрийа хԝә ԛәԝи дькьр. Ле паши зәԝаще, мере мьн дӧа дькьр у ԛӧльхкьрьна тʹәви малбәте дәрбаз дькьр. Ләма жи баԝәрийа мьн ида кьред ԝива гьредайи бу. Ле мьн фәʹм кьр кӧ әз гәрәке хԝәха достийа хԝә тʹәви Йаһоԝа ԛәԝи кьм. Ньһа әз ԝәʹдә башԛә дькьм ԝәки дӧа бькьм, Ньвисаред Пироз бьхуньм у сәр бьфькьрьм» (Галати 6:5). Хушкно, гава һун хирәт дькьн ԝәки достийа хԝә тʹәви Йаһоԝа дьһа ԛәԝи кьн, һун һе зедә мәщала дьдьнә мере хԝә, кӧ әԝ ԝә һʹьз бькә у пʹайе ԝә бьдә (Мәтʹәлок 31:30).

7. Жьн-мер жь Усьв у Мәрйәме дәрһәԛа ԛӧльхкьрьна тʹәви малбәте чь дькарьн һин бьн?

⁷ Усьв у Мәрйәме тʹәвайи хирәт дькьрьн, ԝәки достийа хԝә тʹәви Йаһоԝа һе ԛәԝи кьн. Ԝана фәʹм дькьр, кӧ чьԛас фәрз ә малбәтева Йаһоԝарʹа хьзмәт кьн (Луԛа 2:22-24, 41; 4:16). Әв йәк һеса нибу, илаһи гава зарʹед ԝан зедә бун, ле диса жи ԝана һәр тьшти дькьр, ԝәки малбәта ԝан рʹӧһʹанида ԛәԝи бә. Ԝана мәсәләкә гәләк баш жьн-мерарʹа һиштийә! Һәрге зарʹед ԝә һәнә, дьбәкә ԝәрʹа щара чәтьн ә һәрʹьн щьвата, йан жи ԛӧльхкьрьна тʹәви малбәте дәрбаз кьн. У илаһи дьбәкә дьһа чәтьн ә, кӧ жьн-мер ԝәʹдә бьвиньн ԝәки тʹәвайи дӧа кьн у Кʹьтеба Пироз леколин кьн. Ле бир нәкьн, гава һун тʹәвайи Йаһоԝарʹа хьзмәт дькьн, һун дьһа незики һәвдӧ у Йаһоԝа дьбьн. Ләма жи хьзмәтийа Йаһоԝа дайньн сәр щийе пешьн!

8. Һәрге зәԝаща ԝәда чәтьнайи һәнә, һун чаԝа дькарьн бь сайа ԛӧльхкьрьна малбәте дьһа незики һәв бьн?

⁸ Һәрге зәԝаща ԝәда чәтьнайи һәнә, һун чь дькарьн бькьн? Дьԛәԝьмә ԝәрʹа һʹәԝас нибә ԛӧльхкьрьна тʹәви малбәте тʹәвайи дәрбаз кьн. Һәрге ӧса нә, һун дькарьн кьн у һʹәԝас тьштәки ӧса шеԝьр кьн, чь кӧ ԝә һәрда хԝәш те. Әв гав дькарә али ԝә бькә, ԝәки һун дьһа зедә һәвдӧ һʹьз бькьн у һьм жи хԝәстьна ԝә зедә бә, кӧ тʹәвайи Йаһоԝарʹа хьзмәт кьн у шьхӧлед рʹӧһʹанида кʹар бькьн.

ТʹӘВАЙИ ԜӘʹДӘ ДӘРБАЗ КЬН

9. Жьн-мер гәрәке чь бькьн у чьрʹа?

⁹ Жьн-мерно, сәва кӧ һʹьзкьрьна ԝә сар нәбә, тʹәвайи ԝәʹдә дәрбаз кьн. Һәрге һун ӧса бькьн, һуне һәр алийава незики һәв бьминьн (Дәстпебун 2:24). Ԝәрә дина хԝә бьдьнә мәсәла бьре мә Руслан у кʹӧлфәта ԝи Лилийайе. Әԝана 15 сала зедәтьр зәԝьщи нә. Паши зәԝаще, ԝана тьштәк тедәрхьст. Руслан дьбежә: «Мә фәʹм кьр кӧ әм нькарьн һаԛас тʹәвайи ԝәʹдә дәрбаз кьн, чьԛас дьхԝазьн. Шьхӧл әʹмәлед мә у зарʹед мә, гәләк ԝәʹдә жь мә дьстандьн. Мә тедәрхьст, кӧ һәрге әм ча жьн-мер ԝәʹдә бона һәв нәвиньн, әме дури һәв кʹәвьн».

10. Жьн-мер чаԝа дькарьн принсипа жь Әфәси 5:15, 16 бьдьнә хәбате?

¹⁰ Сәва кӧ жьн-мер бькарьбьн ԝәʹдә тʹәвайи дәрбаз кьн, дьбәкә лазьм бә, кӧ әԝана бона ве йәке конкрет ԝәʹдә башԛә кьн (Бьхунә Әфәси 5:15, 16). Бьраки бь наве Узонду жь Нижәрйайе, дьбежә: «Гава әз графика шьхӧлед хԝә чедькьм, әз ӧса жи әв ԝәʹде кӧ гәрәке тʹәви жьна хԝә дәрбаз кьм, графикеда дьньвисьм, у әԝ ԝәʹдә бона мьн лапи фәрз ә» (Филипи 1:10). Ԝәрә әм дина хԝә бьдьнә мәсәла хушка мә Анастасийайе. Мере ԝе Молдовайеда бәрпьрсийаре мьһале йә. Әԝ дьбежә кӧ әԝ ча ԝәʹде хԝә рʹаст хәрщ дькә: «Чахе мере мьн щабдарийед хԝә тинә сери, ԝи чахи әз шьхӧлед хԝә дькьм. У паше әм ԝәʹдә тʹәвайи дәрбаз дькьн». Ле һәрге шьхӧлед ԝә зәʹф ьн у һун нькарьн ԝәʹдә бона һәв бьвиньн, ԝи чахи һун дькарьн чь бькьн?

11. Щотед зәԝьщи дькарьн жь мәсәла Әкила у Прьскилайе чь һин бьн?

¹¹ Щотед зәԝьщи дькарьн чʹәʹв бьдьнә жьн-мерәки бь наве Әкила у Прьскила, кӧ ԛьрʹна йәкеда дьжитьн, кʹижана щьватеда гәләк һʹьз дькьрьн (Рʹомайи 16:3, 4). Кʹьтеба Пироз дәрһәԛа зәԝаща ԝан гәләк тьшт набежә. Ле әм заньн ԝәки ԝана тʹәвайи шьхӧл дькьр, хьзмәт дькьр у али кәсед дьн дькьр (Кʹаред Шандийа 18:2, 3, 24-26). Һʹәԝас әв ә, кӧ гава Кʹьтеба Пироз бәʹса Әкила у Прьскилайе дькә, навед ԝан һәртʹьм тʹәвайи те готьне.

12. Жьн-мер чаԝа дькарьн дьһа зедә ԝәхт тʹәвайи дәрбаз кьн? (Бьньһерʹә ӧса жи шькьл.)

¹² Гәло һун чаԝа дькарьн чʹәʹв бьдьнә Әкила у Прьскилайе? Бьфькьрьн дәрһәԛа ван тьшта, чь кӧ һәр кәс жь ԝә гәрәке бькә. Дәԝса кӧ һун һәр тьшти тʹәне бькьн, ԝе баш бә ԝәки һун шьхула тʹәвайи бькьн? Мәсәлә, Әкила у Прьскила тʹәвайи дьчунә хьзмәтийе. Гәло һун жи тʹәвайи дьчьнә хьзмәтийе? Ӧса жи Әкила у Прьскила тʹәвайи дьхәбьтин. Дьԛәԝьмә һун сәр хәбатәке нахәбьтьн, ле һун дькарьн шьхӧлед мале тʹәвайи бькьн (Ԝаиз 4:9). Һәрге һун али һәв бькьн, һуне дьһа незики һәв бьн у мәщала бьвиньн, ԝәки тʹәвайи хәбәр дьн. Роберт у Линда зедәтьри 50 сал зәԝьщи нә. Роберт дьбежә: «Рʹаст бежьм, гәләк мәщалед мә тʹӧнә нә кӧ әм ԝәʹдә тʹәвайи дәрбаз кьн. Ле гава әз фьраԛа дьшом у жьна мьн зьһа дькә, йан жи гава әм тʹәвайи бахчәда дьхәбьтьн, әз гәләки ша дьбьм. Шьхӧлед кӧ әм тʹәвайи дькьн, мә незики һәвдӧ дькьн. Ӧса һʹьзкьрьна ортʹа мәда чьԛас дьчә дьһа ԛәԝи дьбә».

13. Сәва кӧ жьн-мер бь рʹасти незики һәв бьн, әԝана гәрәке чь бькьн?

¹³ Бир нәкьн кӧ һәрге һун тʹьме бәр чʹәʹве һәв бьн, әв йәк найе һʹәсабе ԝәки һәләԛәтийа ԝә ԝе дьхԝази-нахԝази незик бә. Хушкәкә жь Бразилйайе дьбежә: «Рʹожа иройин шьхӧлед мә гәләк ьн. Әм дькарьн бьфькьрьн кӧ әм маләкеда дьжин у әв ида те һʹәсабе, ԝәки әм ԝәʹде хԝә тʹәвайи дәрбаз дькьн. Ле мьн фәʹм кьр кӧ әв йәк бәс нинә. Тьште һәри фәрз әв ә, кӧ әз жь дьл дина хԝә бьдьмә мере хԝә у бона ԝи ԝәʹдә вәԛәтиньм». Гәло чь али бьре мә Бруно у жьна ԝи Тайсе дькә, ԝәки дина хԝә бьдьн һәвдӧ? Бруно дьбежә: «Чахе әм тʹәвайи нә, әм тʹелед хԝә датиньн алики у ԝәʹде хԝә һʹәԝас дәрбаз дькьн».

14. Һәрге жьн-мер һʹьз накьн ԝәʹдә тʹәвайи дәрбаз кьн, әԝана дькарьн чь бькьн?

¹⁴ Ле һәрге һун һʹьз накьн ԝәʹде хԝә тʹәвайи дәрбаз кьн, чьмки һун жь һәвдӧ әʹщьз дьбьн, һун дькарьн чь бькьн? Мәсәла агьр диса бьдьн бәр чʹәʹве хԝә. Бона агьр ԛьршьк лазьм ьн, паше жи сәва кӧ агьр гӧрʹ бә, лазьм ә дара бавежьне. Мина ве йәке, серида һун жи дькарьн рʹоже һәма чәнд дәԛа тʹәвайи дәрбаз кьн. Тʹәвайи тьштед ӧсава мьжул бьн, чь кӧ ԝә һәрда хԝәш те, нә кӧ ԝә әʹщьз дькә (Аԛуб 3:18). Чаԝа кӧ агьр һеди-һеди гӧрʹ дьбә, һʹьзкьрьн жи дькарә гав бь гав ԛәԝи бә.

ԚӘДРЕ ҺӘВДӦ БЬГЬРЬН

15. Чьрʹа фәрз ә кӧ жьн-мер ԛәдьре һәв бьгьрьн?

¹⁵ Чаԝа кӧ бона агьрәки гӧрʹ у ԛәԝи оксижән лазьм ә, сәва кӧ зәԝащ жи ԛәԝи бә, ԛәдьргьртьн лазьм ә. Агьр бе оксижән дьтәмьрә. Мина ве йәке, һәрге жьн-мер ԛәдьре һәв нәгьрьн, һʹьзкьрьна нав ԝанда ԝе сар бә. Жь алийе дьнва жи, һәрге жьн-мер хирәт бькьн кӧ ԛәдьре һәв бьгьрьн, һʹьзкьрьна ԝан ԝе тʹьме ԛәԝи бә. Дьԛәԝьмә тӧ дьфькьри, ԝәки тӧ ча лазьм ә ԛәдьре жьн йан мере хԝә дьгьри. Ле фәрз әв ә, кӧ һәвалзәԝаще тә ве йәке тʹәхмин кә. Ԝәрә әм дина хԝә бьдьнә мәсәла Арет у Пенни, йед кӧ зедәтьри 25 сала зәԝьщи нә. Пенни дьбежә: «Бь сайа ве йәке кӧ әм ԛәдьре һәвдӧ дьгьрьн, мала мәда һʹьзкьрьн һәйә. Әм аза дьле хԝә һәвдӧрʹа вәдькьн, чьмки әм фькьр у ньһерʹандьна һәвдӧ ԛимәт дькьн». Демәк сәва кӧ һәвалзәԝаще тә бьвинә, ԝәки тӧ ԛәдьре ԝи дьгьри, тӧ гәрәке чь бьки? Ԝәрә әм дина хԝә бьдьнә мәсәла Бьраһим у Сәрайе.

16. Мер дькарьн жь мәсәла Бьраһим чь һин бьн? (1 Пәтрус 3:7) (Бьньһерʹә ӧса жи шькьл.)

¹⁶ Бьраһим ԛәдьре Сәрайе дьгьрт. Әԝи һәстед ԝе һьлдьда һʹәсаб у фькьред ԝе ԛимәт дькьр. Щарәке Сәра гәләк дьлтәнг бу. Әԝе дьле хԝә Бьраһимрʹа вәкьр у бона дьлтәнгийа хԝә ԝи нәһәԛ кьр. Гәло Бьраһим һерс кʹәт у жерʹа шәрʹ кьр? На. Әԝи заньбу кӧ Сәра ԝи ча сәре мале ԛәбул дькә у пьштгьрийа сафикьрьнед ԝи дькә. Бьраһим гӧһ да ԝе у хирәт кьр, ԝәки бона дәрде ԝе чʹарәке бьвинә (Дәстпебун 16:5, 6). Әм дькарьн жь ве мәсәле чь һин бьн? Хԝәде щабдарийа сафикьрьнед малбәте тʹәсмили мера кьрийә (1 Корьнтʹи 11:3). Ле пешийа кӧ мер сафикьрьнәке бькә, ԝе баш бә ԝәки әԝ жьна хԝә бьпьрсә, һәла әԝ дәрһәԛа ве йәке чь дьфькьрә, илаһи һәрге әв йәк ԝе сәр жьна ԝи жи һʹӧкӧм кә (1 Корьнтʹи 13:4, 5). Щара, дьбәкә жьн хәмгин бә у бьхԝазә дәрде хԝә мере хԝәрʹа бежә. Дәрәщед ӧсада мер гәрәке һәстед ԝе һьлдә һʹәсаб у баш гӧһ бьдә ԝе (Бьхунә 1 Пәтрус 3:7). Әва ида ԝәкә 30 сал ә кӧ Дмитри у Анжела зәԝьщи нә. Анжела дьбежә, кӧ мере ԝе чаԝа ԛәдьре ԝе дьгьрә: «Гава әз хәмгин ьм йан жи дьхԝазьм жерʹа хәбәр дьм, Дмитри һәр гав һазьр ә гӧһ бьдә мьн. Щара әз тʹәвльһәв ьм у бь һерс хәбәр дьдьм, ле диса жи әԝ мьн фәʹм дькә у бәр дьле мьнда те».

17. Жьн дькарьн жь мәсәла Сәрайе чь һин бьн? (1 Пәтрус 3:5, 6)

¹⁷ Сәрайе пьштгьрийа сафикьрьна Бьраһим дькьр у бь ви щурʹәйи нишан дькьр, кӧ ԛәдьре ԝи дьгьрә (Дәстпебун 12:5). Рʹожәке, ньшкева се кәс һатьн щәм ԝи у Бьраһим хԝәст меванһʹьзийе ԝанрʹа бьдә кʹьфше. Әԝи Сәрайерʹа гот, кӧ шьхӧле хԝә бьһелә у зускава нан бьпежә (Дәстпебун 18:6). Сәрайе дәрберʹа гӧрʹа мере хԝә кьр у дәстпекьр һазьрийа бькә. Кʹӧлфәтно, һун дькарьн чʹәʹв бьдьнә Сәрайе у мина ԝе пьштгьрийа сафикьрьнед мере хԝә бькьн. Һәрге һун ӧса бькьн, зәԝаща ԝәйе дьһа ԛәԝи бә (Бьхунә 1 Пәтрус 3:5, 6). Дмитри дьбежә, кӧ жьна ԝи чаԝа нишан дькьр, ԝәки ԛәдьре ԝи дьгьрә: «Чахе ньһерʹандьнед мә жь һәв щӧдә нә жи, Анжела хирәт дькә ԝәки пьштгьрийа сафикьрьнед мьн бькә. Һәрге ахьрийа сафикьрьна мьн нәбаш бә жи, әԝ мьн сущдар накә. Ләма жи, әз ле гәләк ԛимәт дькьм». Бәле, һәрге кәсәк ԛәдьре мә бьгьрә, мәрʹа дьһа һеса йә ле һʹьз бькьн!

18. Жьн-мер ԝе чь кʹаре бьстиньн һәрге һәвдӧ һʹьз бькьн?

¹⁸ Иро дьжмьне мә Мире-щьна, дьхԝазә һәләԛәтийа ортʹа жьн-мерда хьраб кә. Бона ве йәке әԝ һәр тьшти дькә, ԝәки ‹алава һʹьзкьрьна› ԝан бьтәмьрә. Әԝ занә кӧ һәрге һʹьзкьрьна ортʹа жьн-мерда сар бә, әԝана ԝе жь Йаһоԝа жи дур кʹәвьн. Ле һʹьзкьрьна рʹаст ԛә хьлаз набә! Бьра һʹьзкьрьна ԝә мина һʹьзкьрьна жь кʹьтеба Стьранед Сьлеман бә. Хирәт бькьн кӧ һун зәԝаща хԝәда пешийа һәр тьшти, дина хԝә бьдьнә һʹәбандьна Йаһоԝа. Бона һәвдӧ ԝәʹдә вәԛәтиньн у ԛәдьре һәст у фькьред һәв бьгьрьн. Һәрге һун ӧса бькьн, зәԝаща ԝә ԝе рʹумәте бьдә Йаһоԝа Хԝәде, йе кӧ Канийа һʹьзкьрьна рʹаст ә. Бьра һʹьзкьрьна ԝә тʹӧ щар сар нәбә!