Чахе Әм Рʹасти Кӧл-Дәрда Тен Йаһоԝа Али Мә Дькә

1-2. Хьзмәткʹаред Йаһоԝайә амьн рʹасти кʹижан тәнгасийа тен?

ҺʹАЛЕ хьраб дькарә жийина мә ньшкева тʹәвльһәв кә. Мәсәлә, һʹале бьраки амьн бь наве Луис,a ӧса бу. Рʹожәке, доктор ԝирʹа гот кӧ кʹансәра ԝи һәйә у тʹәне чәнд мәһ майә әԝ әʹмьр кә. Хушкәкә бь наве Моника жи рʹасти тәнгасикә гьран һат. Әԝе тʹәви мере хԝә бь хирәт Йаһоԝарʹа хьзмәт дькьр. Ле рʹожәке, әԝе бьһист кӧ мере ԝе, йе кӧ рʹуспийе щьвате бу, чәнд сала дьзикава гӧнә дькьр. Ле хушкәкә дьн бь наве Оливийа, мәщбур бу жь бо фьртоне жь мала хԝә бьрʹәвә. Гава әԝ вәгәрʹийа, әԝе дит кӧ фьртоне мала ԝе ԝеран кьрьбу. Бәле, әʹмьре ван хушк у бьра ньшкева һатә гӧһастьне. Гәло әʹмьре тә жи жь бо тьштәки ӧса һатийә гӧһастьне?

² Мина һәр кәси, хьзмәткʹаред Йаһоԝа жи рʹасти тәнгасийа тен у нәхԝәш дькʹәвьн. Сәрда жи, Шәʹдед Йаһоԝа жь дәсте кәсед кӧ ԝана һʹәз накьн рʹасти зӧлми у зерандьне тен. Һәмьки Йаһоԝа һʹәму чәтьнайа жь мә дур нахә, ле әԝи соз дайә кӧ ԝе али мә бькә (Ишайа 41:10). Бь аликʹарийа ԝи әм дькарьн шабуна хԝә ӧнда нәкьн, сафикьрьнед баш бькьн у нав чәтьнайада жи ԝирʹа амьн бьминьн. Ве готареда әме бьвиньн, кӧ ча бь сайа чар тьшта Йаһоԝа али мә дькә. Ӧса жи әме һин бьн, кӧ әм чаԝа дькарьн аликʹарийа Йаһоԝа бьстиньн.

ЙАҺОԜА ԜЕ ТӘ БЬПʹАРЕЗӘ

3. Гава тьштәки хьраб те сәре мә, чь дькарә бона мә чәтьн бә?

³ Дәрд: Чахе тьштәки хьраб те сәре мә, дьбәкә дьле мә гәләк бешә у һʹьше мә тʹьме сәр кӧл-дәрде мә бә. Дьԛәԝьмә әм хԝә бечʹарә у бәләнгаз тʹәхмин кьн у ньзаньбьн чь бькьн. Оливийа дьбежә: «Паши кӧ фьртоне мала мьн ԝеран кьр, әз гәләк дьлтәнг бум». Моника дәрһәԛа нәмамийа мере хԝә ӧса дьбежә: «Әз нә тʹәне хәмгин бум, ле дьле мьн гәләки бьриндар бу у дьшәԝьти. Мьнрʹа һәла һе чәтьн бу шьхӧлед һәррʹожи бькьм. Мьн нә жи дьда бәр чʹәʹве хԝә, кӧ тьштәки ӧса дькарә бе сәре мьн». Дәрәщед ӧсада Йаһоԝа чаԝа али мә дькә?

4. Ль гора Филипи 4:6, 7, Йаһоԝа ча али мә дькә?

⁴ Йаһоԝа ча али мә дькә? Ль гора Кʹьтеба Пироз, әме «әʹдьлайийа Хԝәде» бьстиньн (Бьхунә Филипи 4:6, 7). Әв те һʹәсабе кӧ әʹдьлайи ԝе бькʹәвә дьле мә, чьмки әм достед Йаһоԝа нә. «Әʹдьлайийа Хԝәде кӧ жь һәр һʹьш-аԛьли дәрбазтьр ә» у жь һәр тьшти кӧ әм дькарьн бьдьн бәр чʹәʹве хԝә, баштьр ә. Бәле, чахе әм жь дьл дӧа дькьн, рʹьһʹәтийа мәзьн кӧ дькʹәвә дьле мә, әв һәйә «әʹдьлайийа Хԝәде».

5. «Әʹдьлайийа Хԝәде» ча дьл у фькьред мә хԝәй дькә?

⁵ Ӧса жи, рʹез дьбежә, ԝәки «әʹдьлайийа Хԝәде» ԝе «дьл у фькьред ԝә . . . хԝәй кә». Хәбәра Йунани, йа кӧ һатийә ԝәлгәрʹандьне «хԝәй кә», һʹәчʹи зәʹф дәрһәԛа ԝан әскәра дьданә хәбате, йед кӧ бажар хԝәй дькьрьн. Кәсед кӧ бажарәки ӧсада дьжитьн, хԝә бехофийеда тʹәхмин дькьрьн у рʹьһʹәт рʹадьзан, чьмки ԝана заньбу, ԝәки дәргәһед бажер рʹьнд тенә хԝәйкьрьне. Мина ве йәке, гава «әʹдьлайийа Хԝәде» һʹьш у дьле мә хԝәй дькә, әм хԝә әʹдьлайи у бехофийеда тʹәхмин дькьн (Зәбур 4:8). Мина дәрәща Һананйа, һәрге һʹале мә зу нәйе гӧһастьне жи, әм дькарьн дьлрʹьһʹәт бьн (1 Самуйел 1:16-18). У гава әм дьлрʹьһʹәт дьбьн, мәрʹа дьһа һеса йә рʹаст бьфькьрьн у сафикьрьнед баш бькьн.

6. Әм ча дькарьн «әʹдьлайийа Хԝәде» бьстиньн? (Бьньһерʹә ӧса жи шькьл.)

⁶ Гәрәке әм чь бькьн? Гава дәрдед мә һәнә, әм гәрәке дӧа бькьн һʹәта кӧ «әʹдьлайийа Хԝәде» бькʹәвә дьле мә (Луԛа 11:9; 1 Тʹесалоники 5:17). Чахе Луис бьһист, кӧ тʹәне чәнд мәһ әʹмьре ԝи майә, гәло әԝи у кʹӧлфәта ԝи Анайе, чь кьрьн? Луис гот: «Һʹаләки ӧсада, гәләк зор ә кӧ мәрьв сәва сьһʹәт-ԛәԝата хԝә у тьштед дьн сафикьрьна бькә. Тʹәне дӧа дькарьн али мә бькьн, кӧ рʹьһʹәт бьминьн». Луис у кʹӧлфәта ԝи готьн, кӧ ԝана һәртʹьм жь дьл дӧа дькьр, ԝәки Йаһоԝа әʹдьлайе бькә дьле ԝан у биланийе бьдә ԝан. Ахьрийеда ԝана дәсте Йаһоԝа сәр хԝә тʹәхмин кьр. Бәле, гава әм рʹасти тәнгасийа тен, әм гәрәке бәрдәԝам кьн дӧа бькьн, ԝәки «әʹдьлайийа Хԝәде» һʹьш у дьле мә хԝәй кә (Рʹомайи 12:12).

ЙАҺОԜА ԜЕ ТӘ ԚӘԜИ КӘ

7. Гава әм дәрдәки дькʹьшиньн, дьбәкә әм хԝә ча тʹәхмин кьн?

⁷ Дәрд: Гава әм дәрдәки дькʹьшиньн, дьбәкә һәст у фькьред мә тʹәвльһәв бьн, мина гәмике кӧ ԝәʹде фьртоне вьрда-ԝеда дьчә. Паши мьрьна Луис, һʹале Анайе жи ӧса бу. Әԝ дьбежә: «Чахе дьле мьн дешийа, мьн гӧне хԝә хԝә дьани. Әз һерс дькʹәтьм чьмки әԝ чу». Ӧса жи, Анайе хԝә тʹәне тʹәхмин дькьр, у әԝ әʹщьз дьбу чьмки ида лазьм бу, ԝәки әԝ хԝәха һʹәму сафикьрьна бькә. Щара жерʹа ӧса дьһатә кʹьфше, кӧ әԝ кʹәтийә фьртонәкә нава бәʹре. Гава әм хԝә ӧса тʹәхмин дькьн, гәло Йаһоԝа ча али мә дькә?

8. Ль гора 1 Пәтрус 5:10 Йаһоԝа чь соз дьдә мә?

⁸ Йаһоԝа ча али мә дькә? Йаһоԝа соз дайә, кӧ әԝе мә ԛәԝи кә (Бьхунә 1 Пәтрус 5:10). Гава фьртонә рʹадьбә, дьбәкә гәми гәләк дьһʹәжә. Гәләк гәмийава һәр дӧ алийава стабилизатор һәнә, бь сайа чь жи гәми нӧԛи аве нәбә, у ба гәмийе вьрда-веда нәвежә. Бь сайа ве йәке, рʹеԝити бона рʹеԝийа рʹьһʹәт дьбә. Ле сәва кӧ кʹара ван стабилизатора һәбә, лазьм ә кӧ гәми пешда һәрʹә. Бь ԝи щурʹәйи, һәрге әм ԝәʹде тәнгасийа бәрдәԝам кьн бь амьни Йаһоԝарʹа хьзмәт кьн, Әԝе мә ԛәԝи кә.

9. Һащәтед мәйә бона лекʹолине ча дькарьн али мә бькьн? (Бьньһерʹә ӧса жи шькьл.)

⁹ Гәрәке әм чь бькьн? Гава дьле мәда ча бежи фьртонә рʹадьбә, гәләк фәрз ә ԝәки әм бәрдәԝам кьн дӧа бькьн, һәрʹьнә щьвата у мьзгинийе бәла кьн. Дьбәкә ԛәԝата мә нагьһиже һәр тьшти ча бәре бькьн, ле бир нәкьн, кӧ Йаһоԝа синоред мә занә (Бәрамбәр кә Луԛа 21:1-4). Ӧса жи әм гәрәке бона һинбуна шәхси у фькьрандьна кʹур, ԝәʹдә вәԛәтиньн. Гәло чьрʹа? Бь сайа тʹәшкиләта хԝә, Йаһоԝа гәләк әʹдәбйәт у видеойед сәр һʹиме Кʹьтеба Пироз дьдә мә. Бь аликʹарийа ԝан тьшта әм ширәтед ӧса дьстиньн, йед кӧ али мә дькьн чәтьнайада ԛәԝи бьминьн. Әм дькарьн ван һащәта бьдьнә хәбате бь аликʹарийа програма JW Library^®, Индекса Әʹдәбийәта Бьрща Ԛәрәԝьлийе у Рʹебәрийа Лекʹолинкьрьне бона Шәʹдед Йаһоԝа. Гава Моникайе тʹәхмин дькьр, кӧ дьле ԝеда ча бежи фьртонә рʹадьбә, әԝе һащәтед бона лекʹолине дьда хәбате. Мәсәлә, әԝе лекʹолин дькьр, һәла әʹдәбйәтед мәда дәрһәԛа «һерсе», «нәмамийе» у «амьнийе» чь те готьне. Әԝе ван әʹдәбйәта һаԛас лекʹолин дькьр, һʹәта кӧ дьле ԝе рʹьһʹәт дьбу. Әԝ дьбежә: «Чахе мьн дәстпедькьр лекʹолина бькьм, серида дьле мьн нәрʹьһʹәт бу, ле чьԛас мьн бәрдәԝам дькьр дьхԝәнд, һаԛас мьн тʹәхмин дькьр, кӧ Йаһоԝа ча бежи мьн һʹәмез дькә у һәстед мьн фәʹм дькә». Бәле, бь аликʹарийа Йаһоԝа әме бькарьбьн емосийед хԝә контрол кьн у әʹдьлайа дьл бьстиньн (Зәбур 119:143, 144).

ЙАҺОԜА ԜЕ АЛИ ТӘ БЬКӘ

10. Чахе әʹмьре мәда тьштәки хьраб дьԛәԝьмә, әм ча дькарьн хԝә тʹәхмин кьн?

¹⁰ Дәрд: Чахе әм рʹасти дәрдәки тен, паши ве йәке дьбәкә әм хԝә бьриндар у бетʹаԛәт тʹәхмин дькьн. Дьбәкә шьхӧлед кӧ бәре мә һеса дькарьбу бькьра, ида мәрʹа чәтьн ә бькьн, у бәре әм чьва мьжул дьбун у жь ве йәке шабун дьстанд, ида мәрʹа шабуне найнә. Гава Елйас пʹехәмбәр рʹасти чәтьнайе һат, жерʹа зор бу рʹабә сәр пʹийа у әԝи тʹәне дьхԝәст рʹазе. Дьбәкә һʹале мә жи ӧса бә (1 Пʹадшати 19:5-7). Чахе әм хԝә бетʹаԛәт тʹәхмин дькьн, Йаһоԝа ча али мә дькә?

11. Диса чь щурʹәйи Йаһоԝа али мә дькә? (Зәбур 18:18)

¹¹ Йаһоԝа ча али мә дькә? Әԝи соз дайә кӧ ԝе пьштгьрийа мә бькә (Бьхунә Зәбур 18:18). Чаԝа кӧ спортсменәки бьриндаррʹа аликʹари лазьм ә, ӧса жи мәрʹа аликʹари лазьм ә, ԝәки дәрәщед чәтьнда бәрдәԝам кьн Йаһоԝарʹа хьзмәт кьн. Дәрәщед ӧсада, Йаһоԝа мәрʹа дьбежә: «Әз, Хԝәдайе тә Хӧдан, дәсте тәйе рʹасте дьгьрьм. Йе кӧ тәрʹа дьбежә: ‹Нәтьрсә, әзе тәрʹа бьбьм аликʹар›» (Ишайа 41:13, ИМ). Даԝьд Пʹадша әʹмьре хԝәда аликʹарийа Йаһоԝа дитьбу. Чахе Даԝьд рʹасти тәнгасийа у дьжмьна дьһат, әԝи Йаһоԝарʹа гот: «Мьле Тәйи рʹасте гьрт пьшта мьн» (Зәбур 18:35). Ле гәло Йаһоԝа ча али мә дькә?

12. Гава әм хԝә сьст тʹәхмин дькьн, Йаһоԝа дькарә бь сайа кʹе али мә бькә?

¹² Йаһоԝа гәләк щара бь сайа кәсед дьн али мә дькә. Мәсәлә, гава Даԝьд хԝә сьст тʹәхмин дькьр, досте ԝи Йонатʹан щарәке чу бал ԝи, кӧ бәрдьлийе бьдә ԝи у емосийалида ԝи бьшьдинә (1 Самуйел 23:16, 17). Ӧса жи, Йаһоԝа бь сайа Елиша али Елйас пʹехәмбәр кьр (1 Пʹадшати 19:16, 21; 2 Пʹадшати 2:2). Иро жи, Йаһоԝа дькарә бь сайа малбәта мә, һәвалед мә, йан жи рʹуспийед щьвате али мә бькә. Ле гава әм хәмгин дьбьн, дьԛәԝьмә әм нахԝазьн кәсәки бьвиньн. Һәстед ӧса нормал ьн. Ле гәло әм ча дькарьн жь Йаһоԝа аликʹарийе бьстиньн?

13. Сәва кӧ әм аликʹарийа Йаһоԝа бьстиньн, әм гәрәке чь бькьн? (Бьньһерʹә ӧса жи шькьл.)

¹³ Гәрәке әм чь бькьн? Чьԛас жь дәсте мә те, ԝәрә әм хԝә жь мәрьва дур нәгьрьн. Гава кәсәк хԝә жь мәрьва дур дьгьрә, әԝ гәләк щар дәрдед хԝә тʹәне дькʹьшинә. Әв йәк дькарә сәр сафикьрьнед ԝи жи хьраб һʹӧкӧм кә (Мәтʹәлок 18:1). Һәмьки, әм гьшк щарна дьхԝазьн тʹәне бьминьн, илаһи чахе тьштәки хьраб дьԛәԝьмә. Ле һәрге әм бәрдәԝам дькьн хԝә дури мәрьва бьгьрьн, әм мәщале надьнә Йаһоԝа, ԝәки әԝ бь сайа кәсед дьн али мә бькә. Ләма чьԛас чәтьн бә жи, ԝәрә әм аликʹарийа малбәта хԝә, һәвалед хԝә у рʹуспийа ԛәбул кьн, чьмки Йаһоԝа бь сайа ԝан али мә дькә (Мәтʹәлок 17:17; Ишайа 32:1, 2).

ЙАҺОԜА ԜЕ ДЬЛЕ ТӘ РʹЬҺʹӘТ КӘ

14. Чь тьрс дькарә бькʹәвә дьле мә?

¹⁴ Дәрд: Щарна тьрс дькʹәвә дьле мә. Һьнә хьзмәткʹаред Хԝәде йед бәре жи щарна жь бо дьжмьна, йан жь бо чәтьнайа тьрс дькʹәтә дьле ԝан (Зәбур 18:4; 55:1, 5). Бь ви щурʹәйи, әм жи дькарьн мәкʹтәбеда, сәр хәбате, жь алийе малбәта хԝә, йан жь алийе дәԝләте рʹасти пәйкʹәтьна бен. Йан жи дьбәкә әм жь бо нәхԝәшикә гьран бәр мьрьне бьн. Ләма жи, дьԛәԝьмә әм хԝә бечʹарә тʹәхмин кьн. Дәрәщед ӧсада, гәло Йаһоԝа чаԝа али мә дькә?

15. Зәбур 94:19 ча бәрдьлийе дьдә мә?

¹⁵ Йаһоԝа ча али мә дькә? Әԝ бәр дьле мәда те (Бьхунә Зәбур 94:19). Бьдә бәр чʹәʹве хԝә кәчʹькәкә бьчʹук, йа кӧ жь бо гӧрʹә-гӧрʹа әʹԝьра у бьруске дьтьрсә у нькарә рʹазе. Баве ԝе дькʹәвә ода ԝе у ле һʹәмез дькә һʹәта кӧ әԝ рʹазе. Рʹаст ә дәрва һе дәнге гӧрʹә-гӧрʹа әʹԝьра у бьруске те, ле әԝ хԝә рʹьһʹәт тʹәхмин дькә, чьмки баве ԝе кʹеләка ԝе йә. Чахе әм рʹасти тәнгасийа тен у тьрс дькʹәвә дьле мә, әм гьшк жи һʹәԝще аликʹарийа Баве хԝәйи әʹзмана нә, у ча бежи дьхԝазьн кӧ әԝ мә һʹәмез кә, һʹәта кӧ тьрса мә дәрбаз бьбә. Гәло әм ча дькарьн бәрдьлийе жь Йаһоԝа бьстиньн?

16. Әм ча дькарьн жь Йаһоԝа бәрдьлийе бьстиньн? (Бьньһерʹә ӧса жи шькьл.)

¹⁶ Гәрәке әм чь бькьн? Әм гәрәке тʹьме дӧа бькьн у Кʹьтеба Пироз бьхуньн. Ӧса әме бькарьбьн дьһа зедә һәләԛәтийа хԝә тʹәви Йаһоԝа ԛәԝи кьн (Зәбур 77:1, 12-14). Һәрге әм дӧа у хԝәндьна Кʹьтеба Пироз хԝәрʹа бькьнә хәйсәт, әме рʹожед чәтьнда жи хԝә бьсперьн Йаһоԝа. Ԝәрә әм Йаһоԝарʹа бәʹса тьрс у хәмед хԝә бькьн у мәщале бьдьнә ԝи, кӧ әԝ бь сайа Ньвисаред Пироз тʹәви мә хәбәр дә у бәр дьле мәда бе (Зәбур 119:28). Гава тьрс дькʹәвә дьле мә, ԝи чахи һьнә рʹезед Кʹьтеба Пироз дькарьн дьле мә рʹьһʹәт кьн. Мәсәлә, кʹьтеба Ибо, Зәбур у Мәтʹәлок, йан жи гьлийед Иса, йед кӧ кʹьтеба Мәтта сәре 6-да һатьнә дайине, дькарьн мә бьшьдиньн. Чьԛас әм Йаһоԝарʹа дӧа бькьн у Хәбәра ԝи бьхуньн, һаԛас әме бәрдьлийе жь Ԝи бьстиньн.

17. Әм дькарьн чьда баԝәр бьн?

¹⁷ Әм гәрәке баԝәр бьн, кӧ рʹожед гьран у чәтьнда Йаһоԝа ԝе кʹеләка мә бә. Әԝе тʹӧ щар мә тʹәне нәһелә (Зәбур 23:4; 94:14). Йаһоԝа соз дайә, кӧ әԝе мә ԛәԝи кә, али мә бькә у дьле мә рʹьһʹәт кә. Бәле, Йаһоԝа кәсед кӧ хԝә дьсперьн ԝи, дьпʹарезә у рʹьһʹәтийа дьл дьдә ԝан (Ишайа 26:3). Ләма жи, итʹбарийа хԝә Йаһоԝа бинә у аликʹарийа ԝи ԛәбул кә. Һәрге тӧ ӧса бьки, тӧйе ԝәʹде чәтьнда ԛәԝате бьстини кӧ рʹаби сәр пʹийа!