Щьват Чаԝа Дькарә Мина Йаһоԝа сәр Гӧнәкʹара Бьньһерʹә?

1. Хԝәстьна Йаһоԝа бона һʹәму мәрьва чь йә?

ЙАҺОԜА мәрьв бь азайа бьжартьне әʹфьрандийә. Гава тӧ сафикьрьна дьки, тӧ ве пʹешкʹеше дьди хәбате. Сафикьрьна һәрә фәрз кӧ мәрьв дькарә бькә, әв ә, ԝәки әʹмьре хԝә тʹәсмили Йаһоԝа кә у бьбә пʹара малбәта Ԝи. Йаһоԝа дьхԝазә ԝәки һәр кәс әве сафикьрьне бькә, чьмки әԝ мәрьва һʹәз дькә у ԛәнщийа ԝан дьхԝазә. Әԝ дьхԝазә ԝәки мәрьв бьбьнә достед ԝи у һʹәта-һʹәтайе бьжин (Ԛануна Дӧщари 30:19, 20; Галати 6:7, 8).

2. Йаһоԝа сәр гӧнәкʹаред кӧ тʹобә накьн ча дьньһерʹә? (1 Йуһʹәнна 2:1)

² Ле Йаһоԝа зоре тʹӧ кәси накә кӧ ԝирʹа хьзмәт кә. Әԝ мәщале дьдә ԝәки һәр кәс хԝәха сафи кә чь бькә. Һәрге хушк йан бьраки ньхӧманди ԛануна Хԝәде бьтʹәрʹьбинә у гӧнәки гьран бькә, һьнге ԝе чь бьбә? Һәрге әԝ тʹобә нәкә, әԝ ида гәрәке нәйе һʹәсабе ча әндәме щьвате (1 Корьнтʹи 5:13). Диса жи гӧмана Йаһоԝа һәйә у әԝ һивийе йә кӧ кәсе гӧнәкʹар вәгәрʹә бал ԝи. Ләма жи мәʹнийа фәрз кӧ чьрʹа Әԝи әʹмьре Кӧрʹе хԝә бәрва да, әв ә, ԝәки рʹийа бахшандьне бона гӧнәкʹаред кӧ тʹобә дькьн, вәкә (Бьхунә 1 Йуһʹәнна 2:1). Хԝәдайе мәйи дьлован жь гӧнәкʹара һиви дькә, ԝәки әԝана тʹобә кьн (Зәкәрйа 1:3; Рʹомайи 2:4; Аԛуб 4:8).

3. Ве готареда әме дәрһәԛа чь шеԝьр кьн?

³ Йаһоԝа дьхԝазә ԝәки ньһерʹандьна мә сәр гӧнәкьрьне у мәрьвед кӧ гӧнә дькьн, мина ньһерʹандьна ԝи бә. Ве готареда, әме бьвиньн кӧ әм ча дькарьн ӧса бькьн. Ԝәʹде хԝәндьна ве готаре, дина хԝә бьде кӧ (1) гава бьраки жь щьвата Корьнтʹе гӧнәки гьран кьр, щьвате чь кьр, (2) чахе кәсе гӧнәкʹар тʹобә кьр, Паԝлос чь рʹебәри да щьвате, у (3) ль гора ве сәрһатийа Кʹьтеба Пироз, Йаһоԝа сәр кәсед кӧ гӧнед гьран дькьн, ча дьньһерʹә.

ԚЬРʹНА ЙӘКЕДА, НЬҺЕРʹАНДЬНА СӘР ГӦНЕД ГЬРАН ЧАԜА БУ?

4. Щьвата Корьнтʹеда чь ԛәԝьми? (1 Корьнтʹи 5:1, 2)

⁴ Бьхунә 1 Корьнтʹи 5:1, 2. Паԝлосе шанди ԝәʹде рʹеԝитийа хԝәйә мисйонертийә сьсийада бьһист, кӧ щьвата тʹәзәда бажаре Корьнтʹеда тьштәки әʹщеб дьԛәԝьмә. Ԝедәре бьраки тʹәви демарʹийа хԝә зьнекʹари дькьр. Әԝ бенамусикә ӧса әʹщеб бу, кӧ һәла һе «нава пʹутпʹарьстада жи» тʹӧнә бу! Щьвате һьм чʹәʹве хԝә сәр кьред ԝи дьгьрт, һьм жи дьфькьри кӧ әԝ дькарә щьватеда бьминә. Дьԛәԝьмә һьнә кәс щьватеда дьфькьрин кӧ бь ве йәке әԝана чʹәʹв дьдьнә дьлрʹәʹмийа Йаһоԝа һьндава мәрьвед гӧнәкʹар. Ле Йаһоԝа чʹәʹве хԝә сәр гӧнед гьран данадә. Жь бо ви кьре мьрʹдарʹ, наве щьвате жи хьраб дьбу. Хенщи ве йәке, дьбәкә әԝи сәр хушк-бьред кӧ тʹәви ԝи һәвалти дькьрьн, хьраб һʹӧкӧм дькьр. Һьнге Паԝлос чь рʹебәри да щьвате?

5. Паԝлосе шанди щьватерʹа чь гот, у мәʹнийа готьнед ԝи чь бу? (1 Корьнтʹи 5:13) (Бьньһерʹә ӧса жи шькьл.)

⁵ Бьхунә 1 Корьнтʹи 5:13. Паԝлос жь бина бәр Хԝәде нәʹмәк ньвиси у теда гот кӧ гәрәке әԝ кәсе гӧнәкʹар, йе кӧ тʹобә накә, ида пʹара щьвате нибә. Гәло хушк-бьред дьн гәрәке чь бькьрана? Паԝлос ԝанрʹа гот кӧ әԝана ида «тʹәви йе ӧса һʹәта нен жи нәхԝьн!» (1 Корьнтʹи 5:11). Гава мәрьв тʹәвайи рʹудьнен у хԝарьне дьхԝьн, әԝана һәврʹа хәбәр дьдьн жи. Ләма Паԝлос дьхԝәст бьгота кӧ гәрәке хушк-бьра тʹәви кәсе ӧса ԝәʹде хԝә дәрбаз нәкьн, ԝәки нәкʹәвьнә бьн һʹӧкӧме ԝийи хьраб (1 Корьнтʹи 5:5-7). Ӧса жи әв йәк кӧ хушк-бьра хԝә жь кәсе гӧнәкʹар дур дьгьртьн, дькарьбу кәсе гӧнәкʹар бьда фәʹмкьрьне, кӧ әԝи бәр чʹәʹве Йаһоԝа тьштәки гәләк хьраб кьрийә, ԝәки әԝи шәрм кьра у тʹобә кьра.

6. Нәʹма Паԝлосе шанди ча һʹӧкӧм кьр сәр щьвате у сәр кәсе кӧ гӧнә кьрьбу?

⁶ Паши кӧ Паԝлос нәʹма хԝә щьвата Корьнтʹерʹа шанд, әԝ дьфькьри кӧ реаксийа ԝан сәр ве нәʹме ԝе чь щурʹәйи бә. Ԝәхт шунда, Тито һат у әʹламәтикә баш ани. Щьвате гӧһ дабу рʹебәрийа Паԝлос у кәсе гӧнәкʹар жь нав хԝә дәрхьстьбун (2 Корьнтʹи 7:6, 7). Ӧса жи чәнд мәһ шунда паши ве нәʹма Паԝлос, кәсе гӧнәкʹар ида гӧне хԝә тʹобә кьрьбу. Әԝи рʹабун-рʹуньштьна хԝә рʹаст кьрьбу у дәстпекьрьбу кӧ ль гора ԛанунед Йаһоԝа бьжи (2 Корьнтʹи 7:8-11). Һьнге Паԝлосе шанди чь рʹебәри да щьвате?

ГАВА КӘСЕ ГӦНӘКʹАР ТʹОБӘ КЬР, ЩЬВАТЕ ЧЬ КЬР?

7. Әԝ йәк кӧ мәрьве гӧнәкʹар ида пʹара щьвате нибу, чь кʹар жерʹа ани? (2 Корьнтʹи 2:5-8)

⁷ Бьхунә 2 Корьнтʹи 2:5-8. Паԝлосе шанди щьвата Корьнтʹерʹа ӧса гот: «Әԝ щәза бәси ԝи мәрьви йә, кӧ жь ԝә гәләка ԝирʹа һатийә дайине». Бь гьлийед майин бежьн, әԝ щәза бона нетәке бу у әԝ нет һатә сери. Ле әв чь нет бу? Нет әв бу кӧ әԝе гӧнәкʹар тʹобә бькә (Ибрани 12:11).

8. Паԝлос паше щьватерʹа гот кӧ әԝана чь бькьн?

⁸ Ләма жи Паԝлосе шанди щьватерʹа гот, кӧ әԝана бь дьл бьбахшиньнә ԝи, бәр дьле ԝида бен у нишани ԝи кьн кӧ ԝи һʹәз дькьн. Дина хԝә бьдьне кӧ Паԝлос нә тʹәне гот, ԝәки щьват диса ԝи ԛәбул кә, ле әԝи ӧса жи гот, кӧ әԝана гәрәке бь гьли у кьред хԝә нишани ԝи кьн, ԝәки бь дьл бахшандьнә ԝи у ԝи һʹәз дькьн. Әԝи бьрайи гәрәке жь ве йәке фәʹм кьра, ԝәки хушк-бьра бь рʹасти ша бун, кӧ әԝ вәгәрʹийа щьвате.

9. Чьрʹа дьԛәԝьмә һьнәкарʹа чәтьн бу бьбахшиньнә бьре кӧ гӧне хԝә тʹобә кьрьбу?

⁹ Гәло һьнә хушк-бьрарʹа чәтьн бу, ԝәки ви гӧнәкʹаре кӧ тʹобә кьрьбу, диса ԛәбул кьн? Дьԛәԝьмә әре. Ле Кʹьтеба Пирозда дәрһәԛа ве йәке найе готьне. Кьред ԝи тʹәмамийа щьватерʹа проблем пешда ани, дьбәкә ӧса жи дьле һьнәка ешанд. Ԝана гәләк хирәт дькьр кӧ хԝә ль ԛанунед Йаһоԝа бьгьрьн, у һьнә кәс дьԛәԝьмә дьфькьрин, ԝәки кәсе ӧса гӧнәкʹар нәһежа йә диса нав ԝанда бә (Бәрамбәр кә Луԛа 15:28-30). Ле йәкә чьрʹа гәләк фәрз бу, кӧ хушк-бьра бьдьнә кʹьфше ԝәки әԝана бьре кӧ тʹобә кьрийә һʹәз дькьн?

10-11. Һәрге рʹуспийа нәбахшанда гӧнәкʹаре кӧ тʹобә кьрьбу, чь ԝе бьԛәԝьмийа?

¹⁰ Бьдьнә бәр чʹәʹве хԝә кӧ һәрге рʹуспийа мәрьве кӧ тʹобә кьрьбу щьватеда ԛәбул нәкьрана, йан жи һәрге паши вәгәрʹандьна ԝи хушк-бьра һьндава ԝида бь һʹәзкьрьн нибуна, чь ԝе бьԛәԝьмийа. Әԝ мәрьв ԝе «кʹәрби бәрхԝәкʹәтьне» дьлшкәсти буйа у бьфькьрийа кӧ һʹале ԝи бечʹарә йә. Сәрда жи дьбәкә әԝи ида хирәт нәкьра кӧ диса незики Хԝәде бә.

¹¹ Һәрге хушк-бьред дьн нәбахшандана мәрьве кӧ тʹобә кьрьбу, достийа ԝанә тʹәви Йаһоԝа жи ԝе хьраб буйа. Гәло чьрʹа? Чьмки әԝана ԝе мина Йаһоԝа рʹәʹм нибуна, ле мина Мире-щьна сәрт у берʹәʹм буна. Бь ԝи щурʹәйи ԝана ԝе дьле Мире-щьна ша кьра, чьмки әԝана ԝе бьбуна сәбәб кӧ әв мәрьв тʹәрка хьзмәтийе бьда (2 Корьнтʹи 2:10, 11; Әфәси 4:27).

12. Щьвате гәрәке ча чʹәʹв бьда Йаһоԝа?

¹² Ле хушк-бьред ль щьвата Корьнтʹе гәрәке чь бькьрана, ԝәки нә кӧ чʹәʹв бьдана Мире-щьна, ле Йаһоԝа? Лазьм бу кӧ ԝана мина Йаһоԝа сәр гӧнәкʹаред кӧ гӧне хԝә анибун рʹуйе хԝә, бьньһерʹийана. Дина хԝә бьдьне кӧ һьнә ньвискʹаред Кʹьтеба Пироз дәрһәԛа Йаһоԝа чь готьнә. Даԝьд Пʹадша готьбу, кӧ әԝ «ԛәнщ у афу кьр» ә (Зәбур 86:5). Миха пʹехәмбәр ӧса ньвисийә: «Хԝәдайе ԝәк тә, йе кӧ фәсадийа [шашийа] паԛьж дькә у . . . дьборинә [дьбахшинә] кʹи йә?» (Миха 7:18). Ишайа пʹехәмбәр жи ӧса готьбу: «Бьра кәсе хьраб дәв жь рʹийа хԝә, бьра кәсе нәһәԛ дәв жь фькьред хԝә бәрʹдә. Бьра әԝ ль Хӧдан вәгәрʹьн кӧ әԝ ль ԝан ԝәрә рʹәʹме. Бьра әԝ ль Хԝәдайе мә вәгәрʹьн, чьмки ԝе бь зедәбари бьбахшинә» (Ишайа 55:7, ИМ).

13. Чьрʹа лазьм бу ԝәки гӧнәкʹаре кӧ тʹобә кьрьбу, диса щьватеда бьһата ԛәбулкьрьне? (Бьньһерʹә чаргошә бь наве «Мәрьве ль Корьнтʹе Кʹәнге Диса Щьватеда Һатә Ԛәбулкьрьне?».)

¹³ Хушк-бьред ль Корьнтʹе сәва кӧ чʹәʹв бьдана Йаһоԝа, гәрәке мәрьве кӧ тʹобә кьрьбу диса ԛәбул кьрана у жерʹа нишан кьрана кӧ ԝи һʹәз дькьн. Щьвате «һәр тьштида» гӧһдарийа рʹебәрийа Паԝлос кьр у гӧнәкʹаре кӧ тʹобә кьрьбу, ԛәбул кьр (2 Корьнтʹи 2:9). Рʹаст ә тʹәне чәнд мәһ дәрбаз бьбу кӧ һатьбу әʹламкьрьне ԝәки әԝ пʹара щьвате нинә, ле әв йәк жи, али ԝи кьр тʹобә кә. Ләма жи нәлазьм бу һе зедә ԝәхт дәрбаз буйа, у паше әԝ щьватеда бьһата ԛәбулкьрьне.

МИНА ЙАҺОԜА ҺӘԚ У ДЬЛРʹӘʹМ БӘ

14-15. Әм чь һин бун жь сәрһатийа мәрьве ль щьвата Корьнтʹе? (2 Пәтрус 3:9) (Бьньһерʹә ӧса жи шькьл.)

¹⁴ Әв сәрһати «бона һинбуна мә һатә ньвисаре» (Рʹомайи 15:4). Жь ве сәрһатийе әм фәʹм дькьн, кӧ Йаһоԝа изьне надә, ԝәки кәсед кӧ гӧнед гьран дькьн, нав хьзмәткʹаред ԝида бьминьн. Ньһерʹандьна Йаһоԝа әԝ нинә, ԝәки жь бо рʹәʹмтийа хԝә бьһелә кӧ гӧнәкʹаред тʹобә накьн, нава хьзмәткʹаред ԝийи амьнда бьминьн. Бәле, Йаһоԝа дьлрʹәʹм ә, ле әԝ чʹәʹве хԝә сәр гӧнед гьран данадә у принсипед хԝә нагӧһезә (Щьһуда 4). Һәрге Йаһоԝа изьн бьда, ԝәки кәсед кӧ тʹобә накьн щьватеда бьминьн, һʹәму хушк-бьра ԝе зьрар бьстандана (Мәтʹәлок 13:20; 1 Корьнтʹи 15:33).

¹⁵ Диса жи әм фәʹм дькьн кӧ Йаһоԝа нахԝазә ԝәки кәсәк ӧнда бә. Әԝ дьхԝазә кӧ чьԛас дькарә гәләк мәрьва хьлаз кә. Һәрге кәсәк ньһерʹандьна хԝә бьгӧһезә у хирәт кә кӧ тʹәзәда незики ԝи бә, әԝ һазьр ә һьндава ԝида рʹәʹма хԝә бьдә кʹьфше (Һәзәԛел 33:11; бьхунә 2 Пәтрус 3:9). Ләма жи гава мәрьве Корьнтʹеда тʹобә кьр у тʹәрка гӧнәкьрьне да, Йаһоԝа Паԝлос да хәбате, ԝәки щьватерʹа шьровәкә кӧ гәрәке әв мәрьв бе бахшандьне у щьватеда бе ԛәбулкьрьне.

16. Сәрһатийа мере ль щьвата Корьнтʹе, чь нишани мә дькә?

¹⁶ Әм жь сәрһатийа мере ль щьвата Корьнтʹе, һʹәзкьрьне, һәԛи у рʹастийа Йаһоԝа зәлал дьвиньн (Зәбур 33:5). Бе шьк, бона ве йәке Йаһоԝа һежайи пәсьна йә! Әм гьшк гӧнәкʹар ьн, ләма жи әм һʹәԝще бахшандьна ԝи нә. Әм гәләк дьшекьриньн кӧ Йаһоԝа ԛӧрбанәкә ԛимәт бона мә бәрва дайә, сәва кӧ әм бахшандьна гӧна бьстиньн. У әм гәләк ша нә, ԝәки Йаһоԝа бь рʹасти хьзмәткʹаред хԝә һʹәз дькә у ԝанрʹа ԛәнщийе дьхԝазә!

17. Готаред дьнда әме щабед кʹижан пьрса бьстиньн?

¹⁷ Гава кәсәк гӧнәки гьран дькә, щьват гәрәке чь бькә? Гәло рʹуспи чаԝа дькарьн ль гора хԝәстьна Йаһоԝа али кәсед гӧнәкʹар бькьн, ԝәки әԝана тʹобә кьн? Гава рʹуспи сафи дькьн кӧ кәсәки жь щьвате дәрхьн йан жи диса щьватеда ԛәбул кьн, щьват гәрәке чь бькә? Готаред дьнда әме щабед ван пьрса бьстиньн.