Хьзмәтийеда Чʹәʹв Бьдьнә Хирәта Иса

1. Хьзмәткʹаред Йаһоԝа чьда жь кәсед дьн щӧдә дьбьн?

ХЬЗМӘТКʹАРЕД Йаһоԝа бь дьл у щан мьзгинийе бәла дькьн. У ве йәкеда әԝана жь кәсед дьн, йед кӧ дьбежьн кӧ әԝана Мәсиһи нә, щӧдә дьбьн (Тито 2:14). Ле щарна дьбәкә мәрʹа һеса нинә хьзмәтийеда хирәт бьн. Рʹуспики хирәт ӧса гот: «Щарна хԝәстьна мьн ԛә тʹӧнә, ԝәки мьзгинийе бәла кьм». Дьбәкә әм жи щарна хԝә мина ԝи тʹәхмин дькьн.

2. Чьрʹа щарна дькарә чәтьн бә бь хирәт мьзгинийе бәла кьн?

² Дьԛәԝьмә щурʹед хьзмәтийейә дьн дьһа мә хԝәш тен, нә кӧ бәлакьрьна мьзгинийе. Гәло чьрʹа? Гава әм тʹәви хушк-бьра авайед тʹәшкиләте ава дькьн, паши тʹәшԛәлед тʹәбийәте али хушк-бьра дькьн у ԝана ԛәԝи дькьн, әм дәрберʹа кʹара ве йәке дьвиньн у жь ве йәке шабуне дьстиньн. Чахе әм тʹәви хушк-бьра һәвкʹарийе дькьн, әм ләзәте дьстиньн жь йәкти у һʹәзкьрьна кӧ ортʹа мәда һәйә, у дьвиньн кӧ әԝана шьхӧл у хирәта мә ԛимәт дькьн. Жь алийе дьнва жи, дьбәкә әм мьзгинийе бь сала мьһаләкеда бәла дькьн, ле тʹәне һьнә мәрьв гӧһ дьдьнә мә. Ӧса жи дьбәкә әм рʹасти мәрьвед ӧса тен, йед кӧ нахԝазьн гӧһ бьдьнә мьзгинийе у сәрт щаба мә дьдьн. У әм заньн ԝәки чьԛас әм незики хьлазийа ве дьнйайе дьбьн, һаԛас һе зедә әм дькарьн рʹасти пәйкʹәтьна бен (Мәтта 10:22). Ле сәва кӧ әм хирәта хԝә ӧнда нәкьн, әм чь дькарьн бькьн?

3. Луԛа 13:6-9 дәрһәԛа хирәта Иса чь нишан дькә?

³ Мәсәла Иса дькарә али мә бькә, кӧ әм хирәта хԝә ӧнда нәкьн. Чахе әԝ сәр әʹрде бу, әԝи бь хирәт мьзгини бәла дькьр (Бьхунә Луԛа 13:6-9). Мина мере кӧ се сал һивийе бу ԝәки бәре дара хԝә йа һежире бьстинә, ле нәстанд, Иса ԝәкә се сал Щьһуйарʹа бәʹса мьзгинийе дькьр, ле һʹәчʹи зәʹф жь ԝан гӧһ нәданә ԝи. Ле чаԝа кӧ мере жь мәтʹәлоке гӧмана хԝә ӧнда нәдькьр, ԝәки дара һежире ԝе бәр бьдә, Иса жи гӧмана хԝә ӧнда нәдькьр, ԝәки мәрьв ԝе гӧһ бьдьнә мьзгинийе. Ләма жи әԝ хьзмәтийа хԝәда дьһа хирәт бу, сәва кӧ али Щьһуйа бькә мьзгинийе ԛәбул кьн.

4. Ве готареда әме жь мәсәла Иса кʹижан чар тьшта һин бьн?

⁴ Ве готареда әме бьвиньн, ԝәки Иса ча бь хирәт хьзмәт дькьр, илаһи шәш мәһед пашьнә сәр әʹрде (Бьньһерʹә «Паши ве йәке» әʹламәтийа һинбуне сәр һʹиме Луԛа 10:1). Сәва кӧ әм хирәта хԝә ӧнда нәкьн, әм гәрәке һьм гӧһ бьдьнә гьлийед ԝи, һьм жи чʹәʹв бьдьнә кьред ԝи. Ньһа әме дәрһәԛа ван чар тьшта бьфькьрьн: (1) Иса дина хԝә дьда ԛьрара Йаһоԝа, (2) әԝи дина хԝә дьда пʹехәмбәртийед жь Ньвисаред Пироз, (3) әԝи хԝә дьспартә Йаһоԝа у (4) әԝи гӧмана хԝә ӧнда нәдькьр, ԝәки һьнә мәрьв ԝе гӧһ бьдьнә ԝи.

ИСА ДИНА ХԜӘ ДЬДА ԚЬРАРА ЙАҺОԜА

5. Иса чаԝа дина хԝә дьда ԛьрара Хԝәде?

⁵ Иса «мьзгинийа Пʹадшатийа Хԝәде» бь хирәт бәла дькьр, чьмки әԝи заньбу кӧ Хԝәде дьхԝазә ԝәки әԝ ви шьхӧли бькә (Луԛа 4:43). Әʹмьре Исада хьзмәти щийе пешьн дьгьрт. Незики хьлазийа хьзмәтийа хԝә жи, әԝи «гӧнд у бажарарʹа дәрбаз дьбу у мәрьв һин дькьрьн» (Луԛа 13:22). Ӧса жи әԝи шагьрта шьхӧле бәлакьрьна мьзгинийе һин дькьрьн (Луԛа 10:1).

6. Жь һʹәму шьхӧлед кӧ әм бона Йаһоԝа дькьн, йа лапә фәрз кʹижан ә? (Бьньһерʹә ӧса жи шькьл.)

⁶ Иро жи бәлакьрьна мьзгинийе шьхӧле лапи фәрз ә, йа кӧ Йаһоԝа у Иса данә мә (Мәтта 24:14; 28:19, 20). Һәр шьхӧле кӧ әм бона Йаһоԝа дькьн, бәлакьрьна мьзгинийева гьредайи йә. Мәсәлә, әм авайед тʹәшкиләте ава дькьн, ԝәки мәрьвед кӧ гӧһ дьдьнә мьзгинийе, бькарьбьн ԝедәре Йаһоԝа бьһʹәбиньн. Шьхӧлед кӧ әм Бәйтʹәледа дькьн, әв жи бәлакьрьна мьзгинийева гьредайи нә. Паши тʹәшԛәла әм тенә һәԝара хушк-бьра нә тʹәне сәва кӧ али ԝан бькьн, ле ӧса жи ԝәки мәщала ԝан һәбә диса һәрʹьнә щьвата у мьзгинийе бәла кьн. Һәрге әм бир нәкьн кӧ бәлакьрьна мьзгинийе шьхӧле лапи фәрз ә, йе кӧ Йаһоԝа дьхԝазә әм биньн сери, әме чь жь дәсте мә те бькьн, ԝәки әви шьхӧли биньн сери. Рʹуспики бь наве Йанош, йе кӧ ль Һунгаристане дьжи, ӧса дьбежә: «Әз тʹьме тиньм бира хԝә ԝәки тʹӧ шьхӧле дьн, йе кӧ әм бона Йаһоԝа дькьн, нькарә дәԝса бәлакьрьна мьзгинийе бьгьрә. Бәле, шьхӧле мәйи лапи фәрз әв ә».

7. Йаһоԝа чьрʹа дьхԝазә кӧ әм бәрдәԝам кьн мьзгинийе бәла кьн? (1 Тимотʹейо 2:3, 4)

⁷ Сәва кӧ хирәта мә зедә бә, әм гәрәке бь ньһерʹандьна Йаһоԝа сәр мәрьва бьньһерʹьн. Әԝ дьхԝазә ԝәки мәрьв мьзгинийе бьбьһен у ԛәбул кьн (Бьхунә 1 Тимотʹейо 2:3, 4). Бона ве йәке, әԝ мә һин дькә, ԝәки әм ве мьзгинийа фәрз, йа кӧ дькарә әʹмьре ԝан хьлаз кә, бьгьһиньн ԝан. Мәсәлә, брошура Мәрьва Һʹәз кьн—Шагьрта Һазьр кьн, мә һин дькә кӧ әм ча тʹәви мәрьва хәбәрдане дәстпекьн у али ԝан бькьн ԝәки әԝана бьбьнә шагьртед Иса. Һәрге әԝана гӧһ нәдьнә мә жи, дьбәкә әԝ пешийа хьлазийа тәнгасийа мәзьн бенә сәр рʹийа рʹастийе. Тьштед кӧ әм ньһа ԝанрʹа дьбежьн, дькарьн паше али ԝан бькьн, кӧ әԝана ньһерʹандьна хԝә бьгӧһерʹьн. Ле бона ве йәке, лазьм ә кӧ әм бәрдәԝам кьн мьзгинийе бәла кьн.

ИСА ДИНА ХԜӘ ДЬДА ПʹЕХӘМБӘРТИЙЕД КʹЬТЕБА ПИРОЗ

8. Тьштед кӧ Иса жь Ньвисаред Пироз заньбу, ча сәр ԝи һʹӧкӧм дькьрьн?

⁸ Иса фәʹм дькьр, ԝәки чь кӧ Ньвисаред Пирозда пешда һатьбунә пʹехәмбәртикьрьне, ԝе чаԝа бенә сери. Мәсәлә, әԝи заньбу ԝәки хьзмәтийа ԝи ԝе тʹәне се сал у нив бькʹьшинә (Данийел 9:26, 27). Ӧса жи әԝи заньбу ԝәки һатьбу пʹехәмбәртикьрьне, кӧ әԝе кʹәнге у ча бьмьрә (Луԛа 18:31-34). Әԝ һаж ван тьшта һәбу, ләма жи әԝи ԝәʹде хԝә бь щурʹе лапи баш дьда хәбате. Әԝи мьзгини бь хирәт бәла дькьр ԝәки шьхӧле кӧ жерʹа һатьбу дайине, бь тʹәмами бинә сери.

9. Пʹехәмбәртийед Кʹьтеба Пироз ча хԝәстьна мә зедә дькьн, кӧ әм бь хирәт мьзгинийе бәла кьн?

⁹ Занәбуна дәрһәԛа пʹехәмбәртийед жь Кʹьтеба Пироз дькарә мә жи һелан кә, ԝәки бь хирәт мьзгинийе бәла кьн. Мәсәлә, әм заньн ԝәки хьлазийа ве дьнйайе незик ә. Һʹале дьнйайе у хәйсәт-һʹӧнӧред мәрьвед иройин нишан дькьн, кӧ әм рʹожед хьлазийеда дьжин, чьмки дәрһәԛа ԝан тьшта һатьбу пʹехәмбәртикьрьне. Кʹьтеба Пирозда дәрһәԛа дьжмьнатийа ортʹа пʹадше башур у пʹадше бакӧре һатьбу пʹехәмбәртикьрьне. У иро әм ве дьжмьнатийе ортʹа империйа һʹәмдьнйайе, демәк Англо-Америкайе у Русйайеда, дьвиньн (Данийел 11:40). Ӧса жи әм фәʹм дькьн кӧ пʹийед һʹәйкәле жь Данийел 2:43-45 тенә һʹәсабе империйа һʹәмдьнйайе, демәк Англо-Америка. Жь пʹехәмбәртийед Кʹьтеба Пироз, әм фәʹм дькьн кӧ дәмәкә гәләк незикда, Пʹадшатийа Хԝәде ԝе ԛьрʹа һʹәму сәрԝеред дьнйайе бинә. Бь сайа ван пʹехәмбәртийед Кʹьтеба Пироз, әм дьвиньн кӧ рʹожед мә чьрʹа мәхсус ьн у чьрʹа әм гәрәке бь хирәт мьзгинийе бәла кьн.

10. Диса кʹижан пʹехәмбәртийед жь Кʹьтеба Пироз хирәта мә зедә дькьн?

¹⁰ Хенщи ве йәке, созед Кʹьтеба Пироз дьле мә гәләк гәрм дькьн, у әм дьхԝазьн ԝәки кәсед дьн жи дәрһәԛа ве йәке пебьһʹәсьн. Хушкәкә бь наве Кери, йа кӧ ль Кʹомара Доминике дьжи, ӧса дьбежә: «Ахьрийа хԝәш, йа кӧ Йаһоԝа мәрʹа соз дайә, хԝәстьна мьн зедә дькә ԝәки әз кәсед дьнрʹа бәʹса рʹастийе бькьм. Гава әз дьвиньм кӧ мәрьв рʹасти чь чәтьнайа тен, әз фәʹм дькьм кӧ созед Йаһоԝа нә тʹәне бона мьн, ле бона ԝан ьн жи». Пʹехәмбәртийед Кʹьтеба Пироз нишани мә дькьн, кӧ Йаһоԝа пьштгьрийа шьхӧле бәлакьрьна мьзгинийе дькә. Әв йәк хԝәстьна мә зедә дькә, ԝәки әм бәрдәԝам кьн мьзгинийе бәла кьн. Хушкәкә бь наве Лейла, йа кӧ Һунгаристанеда дьжи, ӧса дьбежә: «Пʹехәмбәртийа жь Ишайа 11:6-9 али мьн дькә, кӧ әз мьзгинийе бьдьм ԝан мәрьва жи, йед кӧ бь тʹәхмина мьн ԝе мьзгинийе нә жи ԛәбул кьн. Әз заньм кӧ бь аликʹарийа Йаһоԝа, һәр кәс дькарә бе сәр рʹийа рʹастийе». Бьраки бь наве Кристофер, йе кӧ ль Замбйайе дьжи, ӧса дьбежә: «Чаԝа Маркос 13:10-да һатьбу пʹехәмбәртикьрьне, мьзгинийа хере сәр тʹәмамийа дьнйайе бәла дьбә, у бона мьн ԛәдьрәки мәзьн ә, кӧ әз жи ве йәкеда кʹар дькьм». Ле кʹижан пʹехәмбәртийед жь Кʹьтеба Пироз али тә дькьн, ԝәки бәрдәԝам ки мьзгинийе бәла ки?

ИСА ХԜӘ ДЬСПАРТӘ ЙАҺОԜА

11. Сәва кӧ Иса бь хирәт мьзгини бәла кьра, чьрʹа лазьм бу ԝәки әԝ хԝә бьсперә Йаһоԝа? (Луԛа 12:49, 53)

¹¹ Иса дӧдьли нәдьбу, ԝәки Йаһоԝа ԝе али ԝи бькә бь хирәт мьзгинийе бәла кә. Рʹаст ә Иса бь нәрми у бь ԛәдьр дәрһәԛа мьзгинийе тʹәви мәрьва хәбәр дьда, ле диса жи әԝи заньбу кӧ һьнә мәрьв ԝе һерс кʹәвьн у гӧһ нәдьнә мьзгинийе (Бьхунә Луԛа 12:49, 53). Чахе Иса мьзгини бәла дькьр, сәрԝеред религи чәнд щара дьхԝәстьн ԝи бькӧжьн (Йуһʹәнна 8:59; 10:31, 39). Диса жи Иса бәрдәԝам дькьр мьзгинийе бәла кә, чьмки әԝи заньбу ԝәки Йаһоԝа тʹәви ԝи йә. Әԝи гот: «Әз тʹәне ниньм, ле Баве кӧ әз шандьмә, тʹәви мьн ә. . . . Әԝи әз тʹәне нәһиштьмә, чьмки әз һәртʹьм тьштед кӧ ԝи хԝәш тен, дькьм» (Йуһʹәнна 8:16, 29).

12. Иса готә шагьртед хԝә кӧ һәрге әԝана рʹасти пәйкʹәтьна бен, гәрәке чь бькьн?

¹² Иса шагьртед хԝә һелан кьр, ԝәки хԝә бьсперьн Йаһоԝа. Әԝи чәнд щара ани бира ԝан, кӧ һәрге әԝана рʹасти пәйкʹәтьна бен, Йаһоԝа ԝе али ԝан бькә (Мәтта 10:18-20; Луԛа 12:11, 12). Ӧса жи әԝи ԝанрʹа гот кӧ һаж хԝә һәбьн (Мәтта 10:16; Луԛа 10:3). Әԝи тʹәми да ԝан, кӧ һәрге кәсәк нахԝазә гӧһ бьдә ԝан, әԝана гәрәке зоре ԝи нәкьн (Луԛа 10:10, 11). Хенщи ве йәке, әԝи гот кӧ һәрге әԝана рʹасти пәйкʹәтьна бен, бьра жь ԝи щийи бьрʹәвьн (Мәтта 10:23). Иса йәки хирәт бу у хԝә дьспартә Йаһоԝа, ле диса жи чь жь дәсте ԝи дьһат дькьр, ԝәки бадиһәԝа әʹмьре хԝә нәкә бьн ԛәзийе (Йуһʹәнна 11:53, 54).

13. Әм чьма дькарьн баԝәр бьн, ԝәки Йаһоԝа ԝе али мә бькә?

¹³ Әм һʹәԝще аликʹарийа Йаһоԝа нә, сәва кӧ ԝәʹде пәйкʹәтьна жи бәрдәԝам кьн мьзгинийе бәла кьн (Әʹйанти 12:17). Әм чьма баԝәр ьн ԝәки Йаһоԝа ԝе али мә бькә? Ԝәрә әм ньһа дина хԝә бьдьнә дӧайе Иса, йа кӧ кʹьтеба Йуһʹәнна сәре 17-да ньвисар ә. Иса жь Йаһоԝа лава кьр, ԝәки әԝ бона шандийа хәм бькә. У Йаһоԝа щаба дӧайе ԝи да. Кʹьтеба Кʹаред Шандийа нишан дькә, кӧ Йаһоԝа ча али шандийа дькьр, ԝәки әԝана нава пәйкʹәтьнада жи бь хирәт мьзгинийе бәла кьн. Ӧса жи дӧайе хԝәда Иса жь Йаһоԝа лава кьр, ԝәки әԝ бона ԝан мәрьва хәм бькә, йед кӧ ԝе гӧһ бьдана мьзгинийе. Ләма жи чаԝа кӧ Йаһоԝа али шандийа кьр, әԝе али тә жи бькә (Йуһʹәнна 17:11, 15, 20).

14. Әм жь кʹӧ заньн, кӧ әме бькарьбьн бь хирәт мьзгинийе бәла кьн? (Бьньһерʹә ӧса жи шькьл.)

¹⁴ Чьԛас әм незики хьлазийа ве дьнйайе дьбьн, һаԛас бәлакьрьна мьзгинийе дькарә дьһа чәтьн бә. Диса жи Йаһоԝа ԝе али мә бькә, ԝәки әм бь хирәт шьхӧле бәлакьрьна мьзгинийеда кʹар бькьн (Луԛа 21:12-15). Мина Иса у шагьртед ԝи, әм жи мьзгинийе бь дәсте зоре сәр мәрьвава накьн у тʹәви ԝан накʹәвьнә дәʹԝе. Чахе бәлакьрьна мьзгинийе ԝәлатәкида те ԛәдәхәкьрьне, хушк-бьред мә диса жи тʹәрка ви шьхӧли надьн, чьмки әԝана итʹбарийа хԝә Йаһоԝа тиньн. Чаԝа кӧ Йаһоԝа ԛьрʹна йәкеда ԛәԝат да хьзмәткʹаред хԝә, әԝ иро жи ԛәԝате дьдә мә, ԝәки әм һәр дәра мьзгинийе бь тʹәмами бәла кьн у хԝәстьна ԝи биньн сери (2 Тимотʹейо 4:17). Әм дькарьн баԝәр бьн, кӧ һәрге әм хԝә бьсперьн Йаһоԝа, әме бькарьбьн мьзгинийе бь хирәт бәла кьн.

ИСА БАԜӘР БУ КӦ ҺЬНӘ МӘРЬВ ԜЕ ГӦҺ БЬДЬНӘ МЬЗГИНИЙЕ

15. Чьрʹа Иса баԝәр бу кӧ шьхӧле бәлакьрьна мьзгинийе ԝе бәред баш бинә?

¹⁵ Иса баԝәр бу, кӧ һьнә мәрьв ԝе гӧһ бьдьнә мьзгинийе. Ләма жи әԝи хьзмәтийеда шабуна хԝә ӧнда нәдькьр. Мәсәлә, незики хьлазийа сала 30 Д.М., гава Иса дит кӧ гәләк мәрьв һазьр ьн гӧһ бьдьнә мьзгинийе, әԝи әԝ мәрьв бәрамбәри зәвийе кьр, йа кӧ зәр бьбу у бона дьруне һазьр бу (Йуһʹәнна 4:35). Ԝәкә саләк шунда, әԝи ӧса готә шагьртед хԝә: «Шьхӧле нандьруне гәләк ә» (Мәтта 9:37, 38). Щарәкә дьн жи, әԝи ӧса гот: «Шьхӧле нандьруне гәләк ә, . . . Ләма, һиви жь Хԝәйе нандьруне бькьн, ԝәки нандьруна хԝәрʹа хәбаткʹара бьшинә» (Луԛа 10:2). Бәле, Иса тʹьме баԝәр бу, кӧ һьнә мәрьв ԝе гӧһ бьдьнә мьзгинийе, у чахе ԝана гӧһ дьда, әԝ гәләк ша дьбу (Луԛа 10:21).

16. Мәтʹәлокед Иса дәрһәԛа бәлакьрьна мьзгинийе чь мә һин дькьн? (Луԛа 13:18-21) (Бьньһерʹә ӧса жи шькьл.)

¹⁶ Иса дина шагьртед хԝә дькʹьшандә сәр кʹара бәлакьрьна мьзгинийе, у әв йәк али ԝан дькьр ԝәки әԝана хирәта хԝә ӧнда нәкьн. Ԝәрә әм дина хԝә бьдьнә дӧ мәтʹәлокед ԝи (Бьхунә Луԛа 13:18-21). Бь сайа мәтʹәлока тʹохьмәки хәрдале, Иса да кʹьфше, кӧ мьзгинийа Пʹадшатийа Хԝәде ԝе чаԝа бәла бә. Ӧса жи әԝи гот кӧ мина һәвиртьрʹшке, мьзгинийа дәрһәԛа Пʹадшатийа Хԝәде, ԝе һәр дәра бәла бә. У кʹара кӧ әԝе бьанийа, дьбәкә дәрберʹа нәһата кʹьфше. Бь ви щурʹәйи Иса нишани шагьртед хԝә кьр, ԝәки мьзгинийа кӧ ԝана бәла дькьр, ԝе али гәләк мәрьва бькә.

17. Чьма әм гәрәке ньһерʹандьна баш сәр бәлакьрьна мьзгинийе хԝәй кьн?

¹⁷ Гава әм дьдьнә бәр чʹәʹве хԝә, ԝәки мьзгини ча али мәрьва дькә, әв йәк али мә дькә хирәта хԝә ӧнда нәкьн. Һәр сал, бь милйона мәрьв тенә сәр Биранина Мьрьна Иса Мәсиһ у дәстпедькьн Кʹьтеба Пироз һин бьн. Бь сәда һʹәзара мәрьв тенә ньхӧмандьне у мьзгинийа хере тʹәви мә бәла дькьн. Әм ньзаньн кӧ диса чьԛас мәрьв ԝе мьзгинийе ԛәбул кьн, ле әм заньн ԝәки Йаһоԝа әʹлаләтәкә мәзьн тʹоп дькә, йа кӧ ԝе тәнгасийа мәзьнда сах бьминә (Әʹйанти 7:9, 14). Йаһоԝа Хԝәйе нандьруне йә, у әԝ баԝәр ә кӧ диса гәләк мәрьв дькарьн мьзгинийе ԛәбул кьн. Әв йәк мә һелан дькә, бәрдәԝам кьн бь хирәт мьзгинийе бәла кьн.

18. Әм дьхԝазьн кӧ мәрьв чьда избат бьн?

¹⁸ Шагьртед Иса мьзгини тʹьме бь хирәт бәла дькьрьн. Гава хәлԛе дьдит ԝәки шандийед Иса чаԝа мьзгинийе бь мерхаси бәла дькьн, «ԝана тедәрхьст кӧ әԝана тʹәви Иса бун» (Кʹаред Шандийа 4:13). Мина ве йәке, гава мәрьв дьвиньн кӧ әм чаԝа бь хирәт мьзгинийе бәла дькьн, әԝана дькарьн избат бьн, кӧ әм жи чʹәʹв дьдьнә хирәта Иса.